لغاية ما نلاقيكم شان تعرفونا دفعتنا في مدرسة شري الأولية تراهم ديل(توجد أسماء معبقة بريحة المغمول)

صديق عبدالله علي أبوحنة كتب:الأخ عثمان محمد حامد النفر..شكرا شكرا.. ها ها ها .. الله يحفظنا من ناس الضرائب.. هي ليست غواصة بالمعنى المعروف لهو لنش يشيل خمسة أشخاص.. وسريع للغاية يمشى لغاية سرعة200 كيلو في الساعة من شدة ما يمشي تشعر بأنو غواصة كلو مغطى بالمياه ولكنه لايغوص إلا منافذ الهواء العالية في شكل ماسورة تشبه ماسورة الغواصة.. يعني يسير على السطح ومزود بأنوار ضباب تعمل تحت المياه للرؤية وهنا الناس يسمونه لنش غواصة ولكنه موش غواصة... بعدين هو أسرع من الإسعاف حتى إذا عملوا الطريق زلط.. ووسيلة السير في البحيرة آمن من الطريق البري الآن.. في الطريق البري تعمل حساب السرعة من العربات المارة والناس والأطفال الغير معتادين على الزلط.. والعربات الجاية في الإتجاه المعاكس في نفس الشارع يعني شوارعنا كلها موش زي شوارع السعودية والإمارات مسارين متعاكسين منفصلين.. ويفصل بينهما نخيل وأشجار...
الآن البحيرة صارت آمنه في سباحة القوارب يعني تمشي وفي بطنك بطيخة صيفي( مرة كاسح ومرة منجر لاغراق لادقشة حجر) ياخي نحن زمان زمن اللنش جنس حجار، لولا الوالد كان خبير مراكب زمان ما استطاع أن يقود لنش بين هذه الحجار المرجانية وغير المرجانية والشلالات ، لعلك تذكر ذلك يا النفر.. يعني بعض المناطق اللنش ما بيقدر يمشيها.. يركز في مشرعين بس في شري ( مشرع الحليي) ومشرع المدارس.. الكير ما بيقدر يمشيها عشان شلال ود عينة... هنالك مشكلة حجار جنب( الكبشيي) شيمة راس الجزيري مقابل السلمات.. الشلال ما بيقدر يفوتا غادي.. هنالك شيمة شلال أب عوة.... مقابل جزيرة( كيوت) هنالك حجار في الدميري والله غيرها لازم تنصرف عنهم شرقاً لغاية ما تقرب حجييرة البحر.. هناك شيمة الحيبي.. الحيبة مقابل الحيبي غرب هناك شيمي الله لا وراك ليها لو ما شديت بيدك طلمبة الجاز لللنش ما تقدر تتجاوزها.. محل ناس ود فرح في الحيبي الغربيي ومحل ناس سليمان حرجولي قصاد هذه الشيمي كان زارع تمر كتيييير.. تطلع منها شوية لى قدام تلقى( حجار الحمر) مقابل الحيبي شرق دي سلسلة حجار زي الموس لونا أحمر مافي طريقة تفوتا إلا منفذ صغير كان ما استعدلت اللنش فيهو صاح حقك راح ومرة نحن وكرنا فوقها ثلاثة أيام نجر في اللنش، إلا جاء قمر عيسي من ناس الحيبي خال دكتور عبد الله محمد سليمان صبي قريبنا رحمو الله.. قمر عيسي كان عندو لوري يعمل به في بورتسودان لحظنا جاء تلك الأيام هناك ربط اللوري بي سلبة تيل في اللنش واللنش كبير وجسمو تقيل.. وبرضو هزهز اللنش وما قدر يطلعو.. دقينا الفزع من الحيبي والنقعة وكبنة وأم دييمي والقناوييت.. جوا ساعدوا اللوري عشان يجر.. واحد من ناس أم دييمي دخل كراهو بي تحت الريشة بتاعة اللنش جرحتو جرح غاير لغاية الآن يعاني من رجلو.. الوالد ساعدوا كثثير في مقبل حياتو..تمشي لى قدام قصاد القناوييت تلقى شيمة ود معشابي قصاد بيوت ناس محمود ود معشابي سواق اللنش الصغير البي يوزع الجاز وصاحبو سعد أحمد سعد وما تنسى شيمة التكارنة هناك ناس عمك إدريس جنب الخوي.. تمشي لى قدام شيمة السادي قصاد مشرع الكاب جنس حجار مرات اللنش ما يلقى يركز.. إلا نركزوا في مشرع الدونكي.. وعندنا أهل في الكييب مرات نمشي نبيت معاهم ديل أهل أبوي ابوي حبوبتو أم أمو ماها من الحنانين، هي من الكييب إسمها زينب بت فرحين بت حمدين.ز أهلها ناس سليمان السنقوري وناس عطا الله وناس التاجر حسوني ومن هنا جاءت علاقتنا بي دكتور عبد الله محمد سليمان صبي رحمو الله وعبد الله ذاتو مسمنو على ابوي عبد الله وكل ناس السادي ناس سنقوري تربطنا معهم علاقة بي حبوبتنا فرحين بت حمدين.... الآن البحر اصبح آمن يا النفر
...............................
أخونا حازم
نتناقش معاك ولك الحرية.. ولكن لسه ما عرفناك بالكامل... لاضير ولكنك منصوري أصيل
كلامك القلتو أظن قبل التهجير وكلو صاح.. سوف يكون عندي موضوع قريباً يتناول هجرة المناصير وفائدتها وضررها.. ولكنى اقول لك فعلاً المسألة وصلت كان عنق الزجاجة.. وإتخجت عشان تصفى وتروق لصالح المناصير.. إن الله لايعذب مرتين.. في الدنيا والأخري.. ومن وراء هؤلاء الناس يد خفية هي يد القدرة الإلهية( يد الله فوق أيديهم) هذه اليد الخفية لايخفى عليها شئ ولا تظلم أحد.. ينبغي للعاقل أن يوزن الأمور.. لاينظر للشريعة والشي الجاري على الظاهر فقط.. ولا ينظر للبواطن والشئ الجاري بي هناك فقط.. يوزن الشريعة والحقيقة ويأخذ الحكمة من بينهما.. نحن وأهلنا كنا في حالة ثورة عارمة والثورة العارمة لاتملك أن تعتدل... طرف في الإفراط وطرف في التفريط.. شطط.. ولكن بين هذه الثورة برز الآن صوت العقل وصوت الفكر.. وهو كلنا نعمل بالفكر من غير عاطفة شديدة تجاه موطن صبانا.. المسألة عاوزة ليها خجة وقد حصلت الخجة والآن الرواقة تصفي.. تصفي لامن تروق الموية.. خلال هذه المرحلة قد يكون هنالك ضحايا.. قهر.. ألم... كرامة.. جوع.. فقر... موت بإسهالات .. بطن.. أمراض غيرو.. لكن الله كافي .. الله شافي.. ربنا يعجل بالحل.. البشاير تلوح في الافق ماها كعبي شديد... شوية صبرة... أولادنا الفي المؤسسات العليا.. عارفين وما عايزين زول يلزهم عشان ما يفهموا بأنهم منحازين وذلك يؤثر على وضعهم الما بيقدروا يسيبوهو.. أو يستحملوا الحكاية بدونه.. هم عايزين يعملوا في صمت تحت تحت.. الشئ المعروف عن المناصير أنهم موظفين مؤسسية.. يعني يعملوا من خلال الوظيفة وينسوا إنتماءهم الضيق.. ولكن لايعني أن هنالك تفلتات وقد قلت أن تلك كانت ثورة ولا تملك الثورة إلا أن تعتدل