قراءات فى اشعار الاستاذ الكلال --ودوره الكبير فى الاعتصام

اريد هنا الحديث عن لشاعر الشاب -
والذى لعب دورا مهما فى بث الحماس وروح الانتماء فى ميدان العدالة--
الشاعر الاستاذ عبد الرؤوف عبد الرحيم الكلال --قرية المديمر معلم بالبلد-
يتميز شعر هذا الشاب بالحداثة فى المفردات والمضمون وهو مدرسة جديدة وكبيرة فى الشعر المنصورى عموما -
-كما يتميز بميله للدفاع عن الظلم ونصرة العامة والمستضعفين --وهو تقريبا هنالك وجه شبه كبير بينه وبين الشاعر القامة حميد فى الاسلوب والنمط الشعرى وقصائده التى تدافع عن المغلوبين والغبش --كما ان قضية المناصير قد اثرت فى ذلك الابداع لهذا الشاعر الشاب مما جعلت له دورا كبيرا فى الاعتصام --فقصيدته بت احمد فى اليوم تقال مرتين او اكثر حيث يرددها المعتصمون فى شكل هتاف جماعى وهم يطوفون بالميدان وتقريبا محفوظة للجميع وخاصة الشباب -وهى انتقلت ايضا للجامعات فى الخرطوم وكذلك فى حوارى وشوارع الدامر يردد الاطفال مقاطع منها خاصة--
مسكين وحات امك
وكما ذكرت فى ان شعره يتميز بحداثة المفردات ولكنه لاينسى ثقافة المنطقة وتاريخها ويدعو للدفاع عنها لاحظوا :
بلد بى عرضها وطولا
يتمنوا فيها ناس زى ديل عليكم الله معقولا
ايا نعمان ولدت رجال احفادك يقيفولا
التاريخ يعيد نفسو وكتير بى يبقى مقتولا
ويتحدث عن الثقافة والقيم :
ناسا مابتعرف الغش
تكضب انت ما زولا
بلد حاضن ضفاف النيل معزتو فينا مشتولا
غريب ناسا يظلموها وعند الحارة يمشولا
حزاراكم حزاراكم تجى الدولة وتقول كلماتا معسولة
تجدد للوعود تانى عصابة السد يسمحولا
واذا الامر فات الحد تلاقى سيوفنا مسلولا
وعلى اعدانا وعلينا تدور تبقى الدولة مسوؤلا
كما يتحدث عن الوطن الكبير السودان فى اشعاره -
قبيل درنا الوطن ينعم دى طيبة اهلنا يا الاخوان
نغرق نحنا دون الناس عشان مايتبنى الخزان
نكون بين الشعوب قمة مثل فى خدمة الاوطان
اتاريهو الوطن يظلم اتاريهو الوطن منهوب وفضلت كلمة السودان
حكومة الحاجى مافترت من الدوران
تزور فى ارادة الناس انتهكت حقوق انسان
لقمة العيش بقت خاذوق منو الفى الشعب ما هو جعان
بلد موساها فرعونا ولا فى ذرة من ايمان
ما فى زول يقول الحق افرس فيها زول هو جبان
حكومة الحاجى مافترت من الدوران
وايضا:

عزيزة بلدنا كل الفيها منسجمين
ماتقدر تخشها سوسة خليك من يطلقوا عوين
نحنا اب ننظلم نرفض لوية الايدين والبرفع نخرتو نودى قعر الطين
وكذلك:
بلد منحوتة فى الخاطر فداها نموت مية مرة
نصون ارضك نصون عرضك اسود وقت النضال حرة
بلدنا نريدا ريد الجن سماها وبرها وبحرا
ما احلاها ديار منصور ليليها السمح قمرا
نغادرا كيف هى فى ذاتنا فى انفاسنا فى شهقتنا فى الزفرة
نفوتا نموت على طولنا مابنرضالك الحقرة
نوطن فى محلينا نصدرا خيرنا لى بره
ها ديل كل الشباب جاهزين اهل الحارة موش قدرا
عشان الدولة تتحمل عفاناتا قدر وزرا
الهى تنيض البرهان ونسمع نحنا يوم شكرا
الى ان يختم هذه القصيدة ب:
متين يصحا الضمير الحى يفجر بالظلم ثورة
ويذكرنى هذا بالابيات الاتية للشاعر حميد-
نعاين فى الجروف تنهد ولا يانا
رقاب تمر الجود تنقص ولا يانا
متين ايد الغبش تتمد تتش عين الظلام بالضوء
عقب يانيل تكون ياكا ونكون اهل البلد بالجد
قصدت ان اكتب هذا فى منتدى قضية المناصير لاسباب كثيرة منها ان كل الاشعار تجسد وتحكى عن القضية وتشجع الناس وليكون الاطلاع على الموضوع وهذا الشعر الجميل كبيرا --
وكما وعدت سوف ننزل اشعاره فى البوست الذى فتحه الاخ النذير فى منتدى الشعراء باسم هذا الشاعر--ومن قصائده الكثير والتى سمعتها وشاهدتها فقط حتى لا اظلمه--بت احمد-ام منصور-ظنك فسد---هو دا حال وطن والكثير والتى لااعرف تسميتها -
لا اريد ان اطيل واختم بجزء من فصيدته ظنك فسد:
ظنك فسد
لو اعتصمنا مدى السنين ياتحتها يافوقا عايشين للابد
ظنك فسد
لا انهد من حلينا المشى لافينا زولا لين وشى
-----لى زول مرتشى يمسك زمامات كل شئ
صحى الضمير الفيك لبد
محروسة لى حدى ابحمد
حصحاصة من ارض الجدود مابنرضى تتعدى الحدود ماكل ظالم عندو حد
ظنك فسد
دايرين نعرف الدين الحنيف جابوهو واللا اصلا هوفى
واللا الصدق نقض العهود والدنيا عدمانى الوفى
وما دق باب الحق احد
ظنك فسد
يبقى الكلام مافهموا صاح
الليلة كم يوم اعتصام
يبقى السؤال وينا الرجال شفتوها هل
تلقاها فارقت البلد من بدرى من يوم الاحد
ظنك فسد
يبقى الكلام مافهموا صاح
او يبقى ننطق بالعجم
او يبقى ما انسد سد
يبقى الغراق الجانا
جن
والله العظيم والله العظيم ياتحتها يا فوقا عايشين للابد
اعتذر للشاعر اذا كانت هنالك اخطاء -

على العموم جاييكم راجع لهذا الشاعر الكبير--
--للجميع احترامى وتقديرى--

الاخ سلمان لك الشكر والتحية على الاجتهاد المثمر
لم تترك شارده وواردة عن هذا الشاعرالشاب الذى
له مستقبل باهر فى الشعر الرمزى
ولم تترك لنا من حديثك مساحة للتعليق

دام ذخرا لاعلام المنطقة بشعره الرصين