ملاح سلج.. أثلج صدري

ومتااااابعين وبانتظار المزيد من الاخبار التى تثلج صدر المناصير جميعهم

بي هناك الأخت الاستاذة إنتصار قالت كدة. العبارة أعلاه لها. بي هناك.. بس العبارة دي ذكرتني ملاح السلج، لأنو من الوجبات المفضلة عندي، ومرتين في الشهر على الاقل بجيبو من سوق الخضار للحكومة بتاعتي( مع الإعتذار للأخت نجلاء) لأنها قالت تفاهم الزوجية ، مافي حد بيحكم حد.. وبحبوا بالإثنين بالكسرة وبالقراصة.. الكسرة هنا نشتريها ولايعسونها سودانيات، إنما بماكينة كبيرة ، تطلع طرقة السناسن والطرقة قدر البرش، بعدين يقوموا يقطعوها صغارة.. وهذا المهندس الذي قام باقتراع هذه الماكينة قام بتسجيلها في موسوعة الاختراعات العالمية وله الحق، في اي واحد ما يصنع مثلها، وعمل منها أعداد كبيرة ومخابز محجوزة باسمه في جميع أنحاء الإمارات، وهو نال الجواز الإماراتي.. والده عمك سليمان صاحب( المعروضات السودانية للتياب) المعروف هنا.. والده كمان نال الجواز..
أها الثلج يثلج صدري وهو من الوجبات المفضلة عندي. خاصة لما يكون ملايق بي بامية خضراء عيونها موش مكتولة باينة نص نص مفقعة في ملاح السلج ، وليس ملايق بي ويكة ناشفة ، الملايق بي ويكة ناشفة ما بحبو..( ملاح سلج أثلج صدري)

تحية لك تثلج صدرك يا باشمهندس

لكن لا تحاول تقنعنا بكسرة الماكينات دي

بالرغم من اننا هنا برضو نستخدها ,لكنها لا لون لها ,لارائحة لها,لاطعم لها

عبد الواحد لالون لها ولاطعم ولا رائحة
صاح
بس هي لها لون.. الطعم ده من عندك إنت. يعني تاكل فيها وعلى حس كدة تتذكر سناسن ناس شنكوكة.. ديك أم طرفاً احمر.. اول نحنا ذاتو لمان كنا في الخرطوم، كسرة الكساريات ديك البيضا ماها قاعدة تعجبنا..
اول الحكومة بتاعتنا زمان قاعدة تعوسا لينا هنا ولكن لمان طغت وتجبرت، وماها شايفة الناس المعتصمين من أجل الكسرة، بقت ما بتعوسا لينا..وقالت إلا تفضوا الاعتصام حتى أعوسا ليكم!
زمان فرحتا لمان قالت لى بعوس ليكم كسرة.. جريت جري على السوق الإيراني وجبتا تلات صاجات بدل واحد. الأنواع ديك بتاعة الألمونيوم يا عبد الواحد الفيها قرن كدة زي شيال الحلة.. سمحي خلاص في العواسة.. خاصة للقراصة..
أها لمان عاست مرتين وتوقفت، انا قلت ليها إلا تعملي لى مفوضية منفصلة، لأنو ما ببقى تحت يدك، يوم تقولي لى الصاج ما قام.. يوم تقولي لى امشي الجزارة جيب طايوق. يوم داك شويت لحم وقلبتو بي بعضو فوق الصاج.. عميت الصاج ابا يقوم..
انا ما عارف حكاية الصاج ابا يقوم دي شنو العند حكوماتنا يا عبد الواحد! يعني سبحان الله الناس دي قدر ما اخترعت، ما عرفت تخترع ليها شئ يقوّم الصاج غير الطايوق..
والله لمان تقول لى الصاج ما قام!
دي ما عارف يحلوها كيف!
مرة قلت ليها اهو ضهروا أمس.. هو يقوم كيفن يعني!
عشان كدة قلت للحكومة( حقنا كامل، ما بنجامل) لازم ناكل كسرة ضهرا احمر زي بتاعة البلد ديك!
وكسرة الماكينة لالون ولاطعم ولا رائحة وليس لها شكل ثابت..

يوم الخميس مسكتني جوعة حلفت الا اكل كسرة معمولة في البيت ماها حقت الماكينات دي

ويلا جري علي الطاحونة جبنا دقيق الكسرة والمرة مرأة خرتوم الا اتعلمت الكسرة وبقت كسرتها ماها كسرة منصورية لكنها شوية تقارب ويوم الجمعة كانت معركتنا مع الكسرة ناكل فيها مع نصيحتك باحساس كسرة شنكوكة

والله لكن شوقتنا يا عبد الواحد.. معليش سويناكم في حيص بيص مشيتوا تعوسوا.. والحكايي دخلت في نيتك

مداخلاتكم اعجبتني يادكتور وياباشمهندس واعجبني اكتر وصفكم للكسره وملاح الثلج اوالسبانخ كما يسميهو البعض لو فهمتو صاح بعدين انا اتخصصت خلاص فيهو بالكسره لانو وزارة الخارجيه كل اسبوع جايباهو من السوق ومعهو الشبت ولحمة ضنب خروف ودقيق ذره اسمو ذادنا . طبعا شغلتو كتيري خلاص ماذي طبيخ الزمن دا عشان كدا بنصح وزاراة الداخليه مايقعو في مصيدته رغم انو حار كدا ومعاهو كسره خفيفه حلو خلاص