نطحة الضحية

إخوتى الكرام ... كل عام وأنتم بخير وعيد سعيد على الجميع ... على ما أعتقد الجيل الجديد دا ...جيل السندوتشات والوجبات الطائرة والخفيفة ما مرو بنطحة الضحية وقد لا يعرفوها أما نحن فقد عايشناها ... نطحة الضحية كانت زمان... لما كانت البطون ما متعودة على اللحم .... اللحم كان من الضحية للضحية ولا يجينا عابر الضباح ...دى السماية كنا نقطع ليها بالمراكب عشان نأكل شوية دنفريس ومن الفرحة إيدينا ماكنا بيى نغسلن ونقعد نشم فيهن طول النهار ... العضم كنا نكدو لامن يعزف موسيقى !!! أذكر لما توفى الشيخ على الميرغنى الجماعة الخلفا فى شرى طبحوا تيران وعملو كابور ونحن الزمن داك صغار جينا من الودات عشان نأكل ليحمات وحتى اللحميات ما لقيناهن مع ولاد المتيرة !! دادق وشلتو كانوا يختفوا اللحم من صحن الدبكر ويقولو فر ويا العيش جاك نفر .. الزمن داك جحر الصبرة ماتلقى فيهو عضم غير دلاقين وكشاكيش !!! الشبعة الوحيدة كانت فى الضحية وكانت تنطحنا لامن نقع على قفانا فى العقبة التالانا ....

كانديقة :-
لمزيد من الشرح الوافى إطلع على كتاب الكافى من نطحة الأضاحى ...المؤلف الشربوتلى _

الاخوة النفر والنعوفابي

كل سنة وانت طيبين

برضو كلامكم عن نطح الضحية يحتاج لترجمة علي الشريط من الاستاذ م\ بروي

ونقول ليهو كل سنة وانت طيب

الاستاذ الجليل النفر سنه وانت طيب
طبعا نحنا من الجيل ما حضر الزمن داك بس بذكر قبل كدا ضحينا فى البلد وبرغم من كثرة الاضاحى الا ان الخروف مع نهايه اليوم كان خلص وما بقى منو شئ .
اما الان يا كافى البلاء توزع .. وتعزم .. والتلاجه مليانه.
ما بعرف السر فى ذالك شنو اما خروف البلد الطاعم اما الناس بتحب اللحم كتير او الاثنيين معا .
وحماكم الله من نطحه الضحيه
وعساكم من عواده

الأرباب سلمان عقيد و الرائع أبوأحمد والأخت الفاضلة أميرة الحومرى .... مشكورين على المرور و الإضافة الثرة ..... نحن فى إنتظار الباحث فى التراث المنصورى القامة أبوحنة والذى لديه الكثيرالذى يمكن أن يضيفه فى هذا المجال _

لكم تحياتى وودى ،،،

اسع تجي واحدي والله واحد يقول ليك ده حرام!
نحن عارفين حرمتو، لكن نحن هنا ناس تراث بس!
كانوا يخموا الرماد على رؤوسهم ويتحزمن الحريم ويبكن ويزغردن.. وواحدة فيهن تجيب قفة مليانة رماد..
اظن من الكابور داك تاني ما شفنا كابور يا النفر!
هل تذكر كابور بعد ذلك!

ردين بدل رد واحد يا النفر! عشان كفارة لى يا زول. خلاص إتفقنا!
والله لسه عايز تعمل فيا قصيدة هجاء...

ها ها ها .... عفارم وعوافى عليك يا صديق ما قصرت تب ... أنا كنت متأكد إنك ح تسهب فى الشرح وبالسهل الممتنع الذى عودتنا عليه ... فعلا أنا متذكر الكابور وكان فى جامع شرى القديم والزمن داك أنا كنت فى سنة رابعة وممتحن للوسطى ...
مشكور يا باشمهندس على الإضافات الرائعة وننتظر المزيد _

شكرا يا اصل الروعة ومكمن البهجة والفرح السرمدي .. الشيخ النفر .. وكل سنة وإنت طيب

والشكر عبرك للراقي الرائع صديق ابو حنة أصل التحنان والحنية وقصة الإبداع السوداني الخالص

شكرا لكم وانتم تعطرون المنتدى وترابطون فيه ليل نهار وتستقطعون من وقتكم للآخرين

ليتنا نستطيع أن نرد جمائلكم

النفر
يبدو لى إنت كنت في ثالثة وليس رابعة.. انا وحمود بروي كنا في رابعة.. لأنو السيد على مات سنة 1968 وسنة 1968 أنا كنت في رابعة..

الرائع والمتألق ود المناصير ... كل سنة وأنت طيب ... بمقدمكم الكريم هلت البشريات ودبت الروح فى المنتديات وتمايلت طربا البوستات فلا تحرمنا من الطلات _

تقبل تحياتى يا رائع ،،،

التلوث برضو في نطحة الضحية وارد.
واللحم اقرب مادة للتلوث مع صحة البيئة واشياءها..
مرارة ولحم ني وحلاوة . دايما نطحة الضحية زمان تحصل للأطفال غالباً.. ما بيقدروا يمسكوا نفسهم من الحلاوة واللحم..
هسي دي صحة البيئة صارت احسن كتير عندنا.. عشان كدة نطحة الضحية قلت..
ثقافة النظافة. لسه فينا من يعتبر النظافة دلع في المناصير او شغل ناس صعيد مدلعين مايعين ماناس خدمي..
الخبيز ما كنا بنعرفوا في العيدين..
إلا مرة معرسة لافوق وجات تحضر العيد في البلد جابتو معاها..نعتبروا برضو الخبيز شغل صعيد ما بيخارج معانا.. وكان زمان الدكاكين ما بتجيب دقيق نمرة واحد دقيق الفينة أو الفينو.. لانو ما عندو مستهلكين. لكن شوية شوية إتعلموه
حتى الزلابية السمحة البيضااا المنفخة الفيها خميرة.ز حريم بالعدد البيجودنها..
ومعظم زلابيتنا تلقاها مسمطة كدة وقوية..
الجيل الجديد ده هو الذي باشر عمل هذه الاشياء وفرضها على اهلنا بقوة الإبداع عند المحدثين.
عندنا راي غريب كان عند قادة المجتمع كسره صعب جداً.. وإلا إعتبروك ولد قليل أدب أو بت مَلـَقـْلـِقي..
ملقلقي موش حاجة كعبة للآخر
لكن تلادي الكبار
يعني الكلمة بالكلمة.
يعني قليلة ادب في حدود الكلام بس. ما دخلت في الحاجات التانية ديك.

اللهم إنا نعوذ بك من زلابيةً مصمته وقوية

اللهم إنا نعوذ بك من نطحة الضحية

اللهم إنا نعوذ بك من فتاة ملادحه وعصية

وأكان ما اخاف الكذب اقولكم أنا عندى ليكم وصفة سحرية

وعلاج ناجع بديكم ليهو المداخلة القادمة انشاء الله ...

يعنى ما الليلة بكرة عشية .

حباب منوفلى ... أصل الحكاية والرواية واالفضل يرجع لك فى طرح هذه المفردة فى بوست ( العيد فى البلد .. لحم طاعم ) للرائع أبو مصطفى والعبد لله نقل المفردة بيى جاى لمزيد من الشرح الوافى ...مشكور أخى منوفلى على المرور ... نحن فى إنتظارالعلاج الناجع والوصفة السحرية _
تقبل تحياتى ،،،

شكراً... شكرا يا النفر وود الحنونى والمشاركين

والوصفة السحرية مأخوذة من سنة رسولنا الكريم صلى الله عليه وسلم وهى :-

ان تصوم يوم عرفة وفى اليوم التالى اى يوم الضحية من الصباح تقوم من النوم وانت صائم وما تفطر الا على لحم الضحية جربوا هذة الوصفة وشوفوا كان تانى تنطحكم ضحية

وللشفع ممكن يشربوا شاى الصباح كباية شاى بى لبن فقط من غير اى زلابية او حلويات .

وحمانا الله واياكم وشكرا .

اللهم إنا نعوذ بك من زلابيةً مصمته وقوية

اللهم إنا نعوذ بك من نطحة الضحية

اللهم إنا نعوذ بك من فتاة ملادحه وعصية

ملقلقي يعني يا منوفلي..
زمان كانت في وحدي من المهوة تسمى بت منوفلي. تجي سوق النعوفاب. ولما ينتهي السوق، تجي تزور أمي عندها معاها صداقة، وتقيل وتقطع بمركب عبد الله ود العجمي تروح المهوة.

كل سنه وانت طيب وربنا يحقق الاماني والله فعلا ملاحظه السنه دي ماشاءلله مافي زول اشتكي من نطحة الضحيه والله لخبتنا ماخلينا زلابيه ولابسكويت ولاحلاوه وضربنا في اللحمه انا اقول يمكن الحرص علي تناول المشروبات الهاضمه شئ جردقه وببسي وغيرهمابعد كل شيه

زمان كان.ت في وحدي من المهوة تسمى بت منوفلي

بت منوفلى دى من صاحبت امك دى يظهر عليها بت ما ملقلقى وما منافقه (منافقه بكسر الفاء والقاف وتعطيش القاف ) .

ها ها ها
هي مرة عجوز يا منوفلي.. كبيييرة كانت رحمها الله.