حاجات كانت محرمة في المناصير، اما الزمن ده! الكتوف إتلاحقت

الأدب كان ولايزال في المناصير، هو تاج فوق الرؤوس!
وعندي أن الأدب في جميع العصور والازمنة سيظل باق كما هو بلا تعديل.. أما الحاجات التانية ممكن تتعدل حسب الحضارة..
مافي زول بيمنعك من حاجة في المناصير.. لكن لما تكون براك مشاتر ! تلقى نفسك زي الغراب الابيض.
وقد يسلقوك بألسنة حداد..
طبيعة المنطقة طبيعة عمل وكد وجهد ولا مجال للفنطزة والعنطزة..
1 رقم1.. لا احد يستطيع ان يلبس بنطلون و قميص يوم سوق النعوفاب.. من الأولاد المتعلمين والجامعين حتى!
كدي اسألوا مصباح.. أو سلمان عقيد. أو عثمان النفر.. يقدر يمشي في سوق النعوفاب بي بنطلون لغاية أوائل التسعينات ما يقدر. يمكن الآن شوية شوية الحكايي فكت!.. البنطلون يسموه ( فرق الإسكاك) وهو عود في الساقي. يقول ليك ولد فلان الليلي دي لابس فرق الإسكاك وحايم في السوق..!!
2 رقم2.ابوك لايمكن تجلس معه في نفس السرير اللي هو جالس عليهو! ده خط احمر
3 ابوك في الدرب لايمكن تمشي قدامو... ولا بي جنبو.. تمشي وراهو.. خاصة جايين طالعين المغيرب من الجرف أو البوغة او العيش او القراعي
4كلمة لا.لابوك تعتبر قلة ادب... تنفذ طوالي.. لأنو ادرى منك خبرة ودراية بفنون ومشاكل وحلول البلد التى عاش فيها عمره كلو وعاش اسلافه
5 لابد أن تحضر وجبة أو وجبتين مع أبوك وتجيب القدح وتودي وتغسل للناس وتجيب الشاي. حضور رسمي.. توقف لعبك ، وتجي.. وإلا ابوك يديك نهزيره
6ممنوع لباس الجلابية والحوامة فوق المزارعين البي ينقحوا في البوغة أو يسقوا في البوغة.. الناس الكبار حتى السوق يمشوا ليهو بالعراقي والسروال .. ناس خدمي.. وجاهزين لاي حاجي.. الجلابية يوم السفر.. بس.. وتكون لافحا فوق كتفك لامن تصل الكاب وتختلط مع الأغراب بعدين تلبسا..
7 لا تلعب ولاتعوم وحمارتك عطشاني. او عندك مهمة منزلية أخرى
البنات الفتوات:-
عليهن العواسة.. وكان ما اتعلمت العواسة تتعلم
وعليهن ورود الموية.. مرات.. وكسيير الواقوود مرات. والاعمال المنزلية الاخري
لبس الطرحة فقط.. لاتلبس توب.إلا بعد تعرس.. ولا تتحنن ولا تتزين إلا الحاجات الخفيفة.. دخان مافي للبنات
.............
النساء:-
1 المقنع ما يقع من الراس! خاصة قدام الغريب او حتى راجلا..
2 خلفة الرجل فوق الرجل في مجلس يضم العائلة بالنسبة للمرأة قلة أدب.. ولايمكن يحصل من اي مرأة منصورية .. بالله عليك الله هسي دي في القنوات التلفزيونية ، تلقاهم مذيعات صغااار وخالفات رجل فوق رجل ويتكلمن مع العلماء والأساتذة وكبار الفنانين والادباء والدكاترة عادي.. على عينك يا تاجر.. الكتوف إتلاحقت..
3 مافي كريمات في البلد ولا روج ولا زبدة ولاغيرو. دهن كركار بس وزيت سمسم .. وما كل يوم. يوم الباشي بس. أو لما تكون نازلي الجرف..
4 الغناء. ما قامت حفلة كاملة في المناصير لغاية سنة 1979والغناء يعتبر صعلكة وقلة أدب.. وحتى لمان قامت الحفلات .كانن النساء لايحضرن الحفلة.. لكن يسمح اللعب فقط يوم الباشي.. والتجهيز له قبل يوم الباشي بالليل يدقوا الطش والبنات يتعلمن الرقيص الما بتعرف إستعدادا ليوم العرس.. واللعب طنبور بس بدون غناء.. وصفقة موت ونقزي. اهم حاجة( الصفقة دنقير)كلمات سلمان عقيد..
5 العروس الوحيدة التى لاترقص يوم عرسها في العالم( هي العروس المنصورية) كما قال دكتور مصباح.. وهذه قيمة كبيرة للمرأة المنصورية..
6 ممنوع منعاً باتاُ اي مرأة ترسل أخوها أو ابنها أو زوجها حتى لملابس داخلية بجميع اشكالها من السوق.. ولايوجد ترزي يخيط ملابس داخلية للنساء..( حاجاتنا كلها حاجات رجالة كدة!) يقول ليك أمشي السوق اقول للتاجر عايز شنو؟ أضحك الناس فيا ساكت! هسي دي الكتوف اتلاحقت. ترسل اي زول والولد الصغير يعرف اي حاجة في ايتها حاجي.. ياخي زمان نحنا كنا نفتكر ونعتقد ونظن، أن أمهتانا ديل أنصاف آلهة عديل كدة.. وما كنا بنعرف ذاتو نجي كيف؟ لغاية ما بقينا رجال.. ولاهم بيتلاقو قدامك ولا يهمسوا ولا يتغازلوا قدامك ولا اي نوع من انواع الكلام الماهو راكب عدلو.لغاية ما شككونا فيهم.. شوف الادب ده بالله كيف؟ ويمشي لغاية وين!!
ناس متدينة بطبيعتها بدون مغالاه أو تهريج. دين بالفطرة سايل بين الناس في المعيشة.. نبيهم صلى الله عليه وسلم امي وهم أميين.. لكن عقولهم توزن بلد بي حالا..
7 ركوب الحمير للبوش والأعراس والافراح والأتراح.. الحريم عندهن ركبة معينة فوق الحمار والحمارة والرجال عندهم ركبة معينة. إذا وحدي شافوها من فوق العدوي والناس في الحلي تحت يقرعوا أو يحشوا وشافوها مخالفة لركبة الحريم! يمقتوها ويمقتوا راجلا وأهلا..
8 المرأة عليها إكرام الضيف، بكل ما تستطيع من نواحي الكرم( الوراثي)..
......................
تراثنا الحبيب. قد نتفق فيه أو نختلف مع بعضه.. ولكن نحن هنا رواه فقط.. للأجيال. عشان تعرف ، بس مجرد المعرفة.. بالشئ القديم والحديث.. وعجلة التطور ماشة. بس هنالك اشياء خيط الأدب يظل واحد فيها.واحد. بالرغم من إنو الكتوف إتلاحقت..
.
صديق عبدالله علي أبوحنة
كبار الشخصيات

عدد المساهمات: 2856
نقاط: 10530
تاريخ التسجيل: 14/07/2010

.
تابع الردود على هذا الموضوع

صديق عبدالله علي أبوحنة كتب:
.............
النساء:-
2 خلفة الرجل فوق الرجل في مجلس يضم العائلة بالنسبة للمرأة قلة أدب.. ولايمكن يحصل من اي مرأة منصورية .. بالله عليك الله هسي دي في القنوات التلفزيونية ، تلقاهم مذيعات صغااار وخالفات رجل فوق رجل ويتكلمن مع العلماء والأساتذة وكبار الفنانين والادباء والدكاترة عادي.. على عينك يا تاجر.. الكتوف إتلاحقت.

والله ياعمنا ابوحنة خلفة الرجل للبت قدام الرجال وكل العالم شايفها فاقعة مرراتى .

ودتمتم لنا

من طرف **amira ali** الأحد 23 أكتوبر 2011, 6:45 pm

ة"][quote="صديق عبدالله
2 .. بالله عليك الله هسي دي في القنوات التلفزيونية ، تلقاهم مذيعات صغااار وخالفات رجل فوق رجل ويتكلمن مع العلماء والأساتذة وكبار الفنانين والادباء والدكاترة عادي.. على عينك يا تاجر.. الكتوف إتلاحقت.
]

لن ادافع عن خلفة الكراع ولكن : عندى راي في طريقة تناولكم ما يتعلق بالمراة

المذيعة التى ضربتم بها المثل الست متعلمه ويمكن عالمة هى ايضا

واللا ايه المانع؟

الكتوف لسع مااتلاحقت لو كان اتلاحقت ما قلتو الكلام ده
تقبل مرورى اب حنة

من طرف **عازه** الأحد 23 أكتوبر 2011, 7:08 pm

ا والله في حاجات كتيره فايته علي الاجيال دي لانو ثقافتهم من التلفزيون بعدين الزمن دا في حاجه اسمها الاتكيت يعلموهم خلفة الرجل والمشي بي طريقه معينه تكون رافعه راسه خجله مافي بس اظن الثقافه دي في تركيا واوربا مااظن في سودانا ولا دولنا العربيه في زول يرضي حاجه ذي دي

من طرف **هويدا ابوشعر** الأحد 23 أكتوبر 2011, 7:52 pm

الاغلبيه ركزوا على وضع المذيعه واعتقد هو يتوقف على الشخصيه المحاوره .فلا اعتقد انه تتجرا واحده على فعل ذلك مع الشيخ القرضاوى مثلا او الشيخ صادق عبد الله مثلا ولكن هنالك من يرضى ويستحسن هذا الشئ فهو حضاره واتكيكيت كما يزعمون.
لكن الجميل فى الموضوع خصوصياتنا نحن المناصير اذكر كان معانا قبل عدة سنوان قريبنا وزوجته , رفضت تجلس معه فى صنيه واحده ونحنا اربعه فقط ,صاحبنا ضحك ضحكه شديده وقال لينا لمن كنت خاطب فلانه (وهى ما منصوريه من قبيله مجاوره ) كنت انا وهى واهلها نتغدى فى صنيه واحده هسع دى مرتى وخجلانه .فعلا المناصير مميزين

هو طبعاً... أنا قولاً واحداً مع قضية المرأة.. وابدأ بأمي وزوجتى واخواتي وقريباتي ومعارفي..معزة لهن كاملة..
لكن يا أستاذة أميرة علي أنا أتحدث عن مقارنة ما يراه أهلنا زمان .. بعضه صاح وبعضه ما صاح.. وقلنا زي خلفة الرجل دي عند المنصوريات زماااان مافي خالص.. وضربت ليك يا أميرة علي أختنا هويدا.. مثل بذلك.. وقالت هسي دي المذيعة لو كانت أمام واحد من العلماء الأجلاء ! ما كان خلفت رجل فوق رجل! وقالت يعني الرجل هو الذي يفرض احترامه على المرأة ... وفعلا.. آباءنا المناصير كانوا قمة في الشموخ، . عشان كدة محبة مفرطة نساوينهم إحترمنهم موش خوف. محبة زائدة..من هنا نشا الكلام القالتو هويدا... والنبي صلى الله عليه وسلم قال Sad

لو كنت آمراً احدا أن يسجد لأحد بعد الله! لأمرت المرأة أن تسجد لزوجها) وفعلا هو موش سجود خوف! وإنما سجود علم ومحبة.. ورسولنا الكريم عليه الصلاة والسلام هو اكبر من احترم المرأة.. ولكن نحن يا استاذة اميره علي نتكلم عن بنات اليوم المذيعات المفارقات لتعاليم اهلنا السمحة والمفارقات لدينهن يعني.. التبرج يا اميره.. مافي زول بيحبوا ولا المرأة العفيفة نفسها بي تحبو! موش كدة..
أما بالنسبة لخلفة الرجل في الظروف العادية أنا ما شايف فيها حاجة غايتو كبيرة .. ممكن في البيت تحصل عادي أمامي وما أشوف فيها حاجة.. أها يا أميرة علي..( المقنع وقع من على الراس !) رايك فيها شنو دي!
القصة التي ضربتها الأخت هويدا هي خير دليل على زيادة الأدب عند مناصيرنا الكبار..
في قريبتهن التى رفضت تتغدي كمجموعة وراجلها بينهم!
ولمان كان خاطب واحدي من قبيلة تانية كان الوضع عكس..
انا معاك يا أميرة علي . يمكن مافيها حاجة كم مرة تغدينا مع بعض كمجموعة أنا عندي برضو ماشايف فيها حاجة. إتغدى ونص وخمسة وكمان نتخاتف اللحم من اي جار أو جارة..
لكن يا اميره هويدا تحكي ليكي عن الورع الزائد عند أهلنا.. وقد قال سعيد بن المسيب.. وهو الجيل الذي تلا الصحابة رضوان الله عليهم وقال: ( الوَرِع ْهو الذي يترك سبعين باباً من الحلال، خوف الحرام) لذلك هذه المرأة التي رفضت تتغدا وزوجها بينهم . يعني ادب زائد.موش حرام.ز بس ادب زائد... والعلماء دائما يفضلوا الأدب الزائد، اخير من قلة الأدب الزايدة.. زيد في الأدب. والأدب قالوا باب من أبواب الجنة يدخل به الذين يحرصون على الأدب الشديد جدا وماتوا شهداء الادب المفرط..
لكن نحن ابدا ما عندنا قشة مرة.. بس نحكي في عادات أهلنا وتوخيهم للأدب الزائد.
شايفة يا أميرة علي بتنا عازة برضو قالت
الحكاية دي بي يعلموها ليهم كفن إخراج..
.................ز
ايوة يا أميرة علي. ممكن المذيعة تكون عالمة هي ايضاً. لكن عشان تثبت علمها تشتغل مع الضيف بي عقلها موش خلفة كراعا وقعر الشبب في وش الضيف الكبير في السن وكبير في العلم.. والنبي صلى الله عليه وسلم قال( العلماء ورثة الأنبياء)
نحن مع تكريم المرأة مرة واحدة. لكن بسبب ذلك هنالك لازم يكون تشذيب للعادات الضارة او المفارقة
في عادات في المجتمع نافعة
وفي عادات ضارة
حتى الأنبياء عليهم الرضوان لمان جوا برسالاتهم.ما بيلغوا اي شئ في المجتمع وإنما ينموا العادات الحسنة ويلغوا الضارة
مرة النبي صلى الله عليه وسلم سأل عن يهودي معين في المدينة! عايزو في حاجة..
شوفي الصدق في الدين كيف!
هم يهود ومسيحين وما مسلمين لكن من شدة الادب والأمان والصدق الموجود في نبينا الكريم، كانوا يضعون قروشهم وأمانتهم عند النبي صلى الله عليه وسلم وهم كفار
أها نبينا صلى الله عليه وسلم سأل عن اليهودي ده!
قالوا ليهو يا رسول الله.. هو صائم اليوم يوم عاشوراء
بالسوداني قال ليهم ما معناه ، يوم عاشوراء ده شنو؟
قالوا ليهو( اليوم الذي ناجى فيه موسى ربه)
قال صلى الله عليه وسلم: ( نحن اولى بموسى منهم وامر الصحابة بصيامه) كسنة يعني
اها الأنبياء بشرائعهم كانوا ينموا العادات الحسنة ويحاربوا الضارة ، كان عند النساء والله عند الرجال
الانبياء زي المزارع يجدوا القمح قايم ومخلوطة معه الضريسي والويييد والنجيلة ، ينظفوا منو الحشائش الضارة ويسيبوا القمح ينمو..
هي الكتوف راح تتلاحق بالعلم يا اختنا العزيزة اميره ونتنمى أن تتلاحق ونتمنى أن يكون الرجل والمرأة على قدم المساواه كل في اختصاصه.
نحن هنا نتكلم عن المفارقات
وليس عن المرأة
قولاً واحداً نحن مع قضية المرأة وتكلمت عن هذا كتير جداً انا هنا في المنتدى
والله ايه رايك يا اميره على
في راي ناس هويدا وعازة ده!.
نحن مع المفارقات ومع ادب أهلنا الزايد
حتى صدق فيهم حديث سعيد بن المسيب
( الورع هو الذي يترك سبعين باباً من الحلال، خوف الحرام)
برضو اهلنا موش انبياء
برضو عندهم حاجات مفارقة موش كويسة
ولكن المفارقات الشديدة جداً في المنبر لانذكرها
أها إفتكر بعد كدة ما اتلومت معاكي يا أم عمار.. صاح..

من طرف **علي الكليس** الأحد 23 أكتوبر 2011, 9:15 pm

شكرا الرائع صديق غيتو بتنكت ليك جنس حاجات
نحن زمان كنا نتابع الناس البيجوا من السفر من حجرة البحر لغاية مايدخل البيت وكانت لنا ملاحظه وهي ان المسافر يسلم علي كل الناس ماعدا زوجته وهي تدخل الخس علي طول ولغاية اسع ماعارف السر في كدي شنو .والرجل مهما يحب زوجته من النادر ان يعبر لها عن ذالك .ومن النادر ان تجد كلمة شكر من زوجها عند تقديم اي خدمه مهما كانت .والمراه الفالحه عندنا هي الخدامه(يعني غالبا مايتم زواج يد المراه).والنسيبه لاتاكل مع زوج ابنتها .والزوجه لاتنطق باسم زوجها .ويستحيل ان يمشي الرجل وزوجته متباريين مع بعض
ووالدك مهما يكون يحبك يحاول ان لايظهر هذه المحبه بل تكون في بعض الغلظه ويندر ان تجد والد يتونس ويضحك مع اولاده دعك من اللعب معهم والولد مهما كبر مابيشاوروه في عرس اخته
الظروف جعلتني اسكن وسط مجموعه من الشوام (اللبنانيين والسوريين والفلسطينيين والاردنيين)تعجبني معاملاتهم مع نساءهم في الشأن العام وكان احدهم اذا طلب من احداهن شيئا ان يناديها (ابنة عمي الله يرضي عليك فنجان قهوه )وماان تحضره حتي يقول لها (يسلموا الاديات) الولد يبوس جبهة والده احتراما وغيرها الكثير من اللطف في المعامله
اما نحن يصراحه معاملتنا فيها خشونه شوي اذا اردنا شيئا نقوله بصيغة الامر واذا احضروه لنا لانقول كلمه طيبه وربما ننتقد
جيلنا هذا حاول ان يعالج بعض الشى ولان نشأنا علي تربيه معينه نحاول ان نتخلص من بعض عيوبها ولكن في النفس شى من حتي

كلي الكليس كتب..نحن زمان كنا نتابع الناس البيجوا من السفر من حجرة البحر لغاية مايدخل البيت وكانت لنا ملاحظه وهي ان المسافر يسلم علي كل الناس ماعدا زوجته وهي تدخل الخس علي طول ولغاية اسع ماعارف السر في كدي شنو

معقول ما عارف السر يا علي الكليس...!!!
آآآآآآآه يعني لما كنت طفل. ماك عارف السر..

الغريبة يا علي الكليس
حتى السودانيين هنا المغتربين بيفتكروا كلام الشوام ده لى زوجاتهم بكش ساكت!
هم كلام
ونحن فعل!
يعني تحترم المرأة بالفعل والبرهان
تشتري دهب زي ما عاوزة
العايزاهو تشتريهو
تحترما فعلياً
تحترما قدام اولادا حتى اولادا يشعروا بأنك تعز أمهم ويزيدوا في احترامك تلاحظ ذلك في عيونهم ، حتى لو لم يتحدثوا
لكن الكلام بتاع يا روحي وياحبيبتي ويا عيوني
نحن نعتبروا بكش موش!
لكن مرات مرات مهم خاصة إذا اتربط بالتنفيذ والإحترام الجد يعني

شكرا الصدوق على هذا السرد الجميل لعادات وقيم دينية وتربوية واجتماعية –وقد توارثها الناس جيلا بعد جيل –بعضها سائد الان وبعضها تبدل وبعضها اختفى –

ونجد ايضا العروس لاترى حتى لزوجها الا بعد ثلاث ايام –كما كانت هنالك (الكجرة) وهى ستارة من القماش تعمل لكى تكون ساترا وايضا للمرأة النفسا –ترفع وتنزل عند دخول الضيوف ورواحهم –ودايما تأخذ تلت الغرفة تقريبا –

فهذه توضح الاهتمام باداب الزيارة وهنالك اشياء جميلة توضح قيم وثقافة هذه المنطقة –

جاييك راجع-

لكن يا اميرة المقصود ليس العلم وليست الثقافة وليست تلاحق الكتوف ولكن ما يحثه علينا ديننا الحنيف –والذى بالتأكيد يقدر المرأة

من طرف **amira ali** الأحد 23 أكتوبر 2011, 11:27 pm

طبعا اخى صديق اداب وشيم وقيم اهلنا سمحة واصيلة للغاية ومابختلفوا فيها اتنين

الحشمه والذوق والادب واحترام الكبير واحترام المراة لزوجها وان لم يعبران بالحكى كالشوام

كمان طريقة الاحترام والتعبير زمان تختلف عن اليوم

فخير الامور اوسطها لا دخول المطبخ عند رجوع الزوج و سي سيد ولا الاسترجال و(الكعب في الوش اضحكتنى جدا

.)

والواقع الان فيه وسطية جميلة

انا رديت عليك فى جزئية محددة ولا اعنى البته التبرج والبجاحة

اما بقية ما كتبته انت اب حنة هذه مسلمات وامور قمة فى الروعة نسال المولى الا تتلاشى ولا تحتاج منى لتعليق

لا اختلف معكم ايها الرائعان سلمان واب حنة

أميرة علي كتبت...لا دخول المطبخ عند رجوع الزوج

أميرة علي
ظاهر عليكي سمعتي كلام علي الكليس ده!
علي الكليس ده! اكبر من ناس عمر أخوى.. يحكي عن جيل بعيييييد
وغالباً ديل الطيانة البي يغيبوا سنة وسنتين بداية بنيان الطين في الصعيد .ز ده زمن بعيييد خلاص.. نحن لمان جينا لقينا الحكاية دي غنتهت حكاية لمان يجي راجلا من السفر ما بتسلم عليهو! تدخل المطبخ!
بدليل إنو ناس علي الكليس هاجروا للقضارف من بدري
نحن لمان جينا لقيناها تسلم عليهو بالأحضان!

ياجماعة الكليس دا جاب كلام فى الصميم –كدى السر خلو –
اما السبب لدخول الخس
القصد منه ان المرأة لاتريد الناس يشاهدون ويعلقون على سلام او مصافحة الزوج
العائد من السفر-وكما ذكر الاخ الصدوق فى موضوع (العبيدية والقمبرات) –ان الحريم عند استقبال الرجال العائدين من بعيد وعندما لم
تجد احداهن زوجها ضمن العائدين تقول (نحنا اللينا يينو)—خجلا وحتى لم تقل ابو
الولاد او ابو محمد او ابونا –فهنالك ادب متوارث عبر الاجيال وهنالك حواجز لايمكن
تخطيها وبالطبع تتماشى مع مايرتضيه ديننا الحنيف وما يرتضيه المجتمع-ولان المجتمع
كان يدار على مستوى الاسرة الصغيرة والكبيرة والجيران وكبير القوم وهكذا فهنا يكمن
الاسر فى فهنا نجد ان الرقابة لصيقة وتعاقب فى اللحظة –هذا ذكرنى ايضا بما كتبه
الاخ الصدوق فى موضوع الحسيباب –فعثمان ود حاج قيلى ومن بعده عيسى ود حاج قيلى
نموذج –وعندنا فى النعوفاب جدنا ود الخليفة نموذج للشخصية المهابة والقوية وحتى
لقرى غير النعوفاب-

من طرف **amira ali** الإثنين 24 أكتوبر 2011, 1:45 am

علي الكليس كتب:
e]uote]الظروف جعلتني اسكن وسط مجموعه من الشوام (اللبنانيين والسوريين والفلسطينيين والاردنيين)تعجبني معاملاتهم مع نساءهم في الشأن العام وكان احدهم اذا طلب من احداهن شيئا ان يناديها (ابنة عمي الله يرضي عليك فنجان قهوه )وماان تحضره حتي يقول لها (يسلموا الاديات) الولد يبوس جبهة والده احتراما وغيرها الكثير من اللطف في المعامله

ذكرنى كلامك هذا عن هؤلاء بموقف مغاير احزننى كثيرا خرجت من بيتى للترفية مع العيال والجارات في احدى حدائق الحى في اخر الاسبوع

كانت الحديقة مكتظة وجلس بجوارنا مجموعة من اهل الشام رجالا ونساء ومعهم خادمة وجلست خلفهم اصبح ابنى الصغير يرمى لها الكرة فتجاوبت معه تلاعبه لنهاية الجلسه

شب الرجال النار للشواء وجلست النساء على الكراسى وجلس الرجال على الارض كل واحدة من النساء مسكت شيشتها واحيانا تغير منها للسجارة وهكذا ....واحدة معانا شايقية شجاعة كتبت لهم ورقة(اتقى الله فى هؤلاء الاطفال) لكثرة الدخان( (شواء.سجاير زشيشة)

انتهى الشواء والكل تناول وجبته بمزااااج وبعدو البارد و الفواكه كلو ده عادى عندهم بس الما عادى والازعجنا هو تلك الخادمه التى توزع فى الاكل واللحوم وووو

تخيلو انها لم تمنح حتى قطعة خبز!!!!!

اشرنا لها بان تجى عندنا لنعطيها ساندوتشات فهزت راسها سلبا (خوف) بطريقه ذكية وبالخفاء ارسلنا لها الاكل ابتسمت دسته داخل عباءتها وتناولته خلسة

وبنفس الطريقة اعطيناها البارد بادلتنا الابتسامات والشكر

وولما انصرفت فى نهاية السهرة مرت عمدا بجانبنا وشكرتنا ثانية. عشان كده يا اب حنة لما تنتهى القيم السمحة الاصيلة تتبدل معها الاخلاق والضميرووتنعدم الرحمة

مشكلة

يا رب ارحمنا واجعل الرحمة فى قلوبنا

من طرف **نورالهادى** الإثنين 24 أكتوبر 2011, 2:29 am

الباشمهندس صديق تحياتى لك ولضيوفك الكرام وشكرا للتوثيق لعادات فى العصر الذهبى ,وأنا الفترة التى قضيتها فى المناصير وحتى فارقتها لم أشاهد رجل مبارى زوجته فى الشارع والبت عندما تخطب لشخص وتشوفهو بعد داك فى الشارع تترك له الشارع أو التنقير .

السبب يا صديق منطقة المناصير كانت مقفولة لوقت قريب اى مهمشة ولذلك تجد الناس محافظة على عاداتها القديمة ما فى عادات دخيلة وحتى فى طريقة اللبس ,أما الآن تخيل نفسك انت فى خلوة الحاج عبدالله الحنونى وتشاهد نانسى عجرم تغنى ,فنحن يا صديق شباب النعوفاب والصغيراب والحنانين والضقولة كنا فى منتصف الثمانينات نمشى لمنزل الوالد عمر عبدالله الله يرحمه بدعوة منه فى الامسيات لمشاهدة فلم فيديوا وكنا نفضل افلام عادل امام وفى اثناء ما الفلم شغال يجى الشاى باللبن مع الزلابية كل الشباب يشربوا شاى بلبن وبعد نهاية الفلم يشغل لنا أفلام مديح ,وأذكر حينها كان للوالد عمر أفلام غنائية من التراث الاثيوبى أى شعبية وكان الشباب بعد الفلم يفضلوا هذه الرقصات وبالذات ناس محمد ود الحسن وخالى خليفة ولكن احترام للوالد حاج عبدالله ما بطالبوا بها ولكن لأن الوالد يحترم رغبة الجميع يقول لعمر شغل الحبش ويشيل عصايته ويمشى الى منزله .ألم اقل لك الآن عصر العولمة يمكن ان تشاهد كرة قدم فى البرازيل وأنت فى المناصير .ولذلك يا صديق كل العادات الجميلة من العصر الذهبى ستنقرض وتصير ذكرى .

حكت لى جارتى الهولندية قبل ما تمشى دار المسنين وقالت لى هنا فى هولندا كان الرجال عندهم حمام سباحة براهم والنساء عندهم حمام براهم الى ما بعد الحرب العالمية الثانية لا يوجد اختلاط وختمت كلامها بزعل وقالت الامريكان قضوا على كل ثقافة الشعوب فى العالم .

كتبنا في مكان اخر
بت الحلال وين تتلقي
تتلقي لي سعيدا مو شقي
ان جابت ولد بي يتلقي
ان جابت بنية بي تترجي
بت الحرام وجعت كبد
ان جابت ولد يمرق عبد
وان جانت بنية من الشين مابتنجبد

ياااااه
البوست ده بقا ظريف خلاص بي تعليقات سلمان وعبد الواحد والهادي. واميرة علي.. والكليس ذااااتو خلى القضية وجاء بي جاي.. يا أخونا علي الكليس ده! في كل حاجة عندو باع..
............
الهادي ذكرتنا هذه الذكريات الجميلة يا رجل! وفعلاُ هذا الفيديو العند عمر انسهك الهيد بتاعو من المشاهدة، وفي واحدي من إجازاتي اداني الهييد بتاعو رسلت ليهو اسبير من ابوظبي، ليواصل أهلنا في الحنانين والنعوفاب المشاهدة.. هذا وقت الزمن كان عديل يا الهادي.. وعمر الله يرحمو لامن مات لسانو يلهج بالشكر لى عقيد في إنو ما كسر خاترو وبنى ليهو بيوتو.. وبالمناسبة انا اي ساريقة يبنيها عقيد انا أعرفا.. ساريقتو في البناء تختلف عن اي اسطى طين.. حجمها صغير ومحكمة وموزونة غاية الميزانية... مع إنو عقيد لايبني في البلد... كأمهر اسطى منصوري ومع إنو قبل كدة كسر خاتر سلمان وما بنى ليهو.. لكن بنى للوالد وعمر كما ذكرت ذلك آنفاً في بوست آخر... وبنى لى صالون في غاية الروعة في بيت ناس ابوى..
ايام يا الهادي
...................................
اميره علي
اوع شية الشوام ديل الجنبكم تكون دخلت في نفسك!
وإنتو شايلين سندوتشات !
ما وريتينا المرة ردت على الشايقية قالت ليها شنو؟
في الورقة الكتبتا!

بت الحلال وين تتلقي
تتلقي لي سعيدا مو شقي

عبد الواحد بنات الحلال والدايرات العيشي الزمن ده كتااار
بس اولاد الحلال شوية..

بصراحه كلام اميره بت علي

حيرني شيشه حريم سجاير ماادو الخادم

الاكل وحتي اكل وهي تعمل في الاكل داكلام مايخش العقل

اذا الكلام حصل بحذافيرو يبقي قمه السخافه والانحطاط الاخاقي والقيم وقتل الانسانيه العجب

انه يحصل في دول ذي السعوديه تبقي دي الكارثه

من طرف **amira ali** الإثنين 24 أكتوبر 2011, 5:03 pm

[quote]أبوسفيان خلف الله كتب:بصراحه كلام اميره بت علي

حيرني شيشه حريم سجاير ماادو الخادم

الاكل وحتي اكل وهي تعمل في الاكل داكلام مايخش العقل

اذا الكلام حصل بحذافيرو يبقي قمه السخافه والانحطاط الاخاقي والقيم وقتل الانسانيه العجب

انه يحصل في دول ذي السعوديه تبقي دي الكارثه

[/quote]

اخى ابو سفيان ولانك ولاننا سودانيين وفى السودان مناصير نستبعد حدوث هذه الاشياء

لكنها الحقيقة لا غيرها انه انعدام الرحمه

سمعت عن هذه الاحداث كثيرا لكنى لم ارها بام عينى الا هذه المرة اى قبل اسبوعين فقط لم اتعمد ملاحقتهم لكنهم جلسوا بمحازاتنا

اما يا اب حنه انا شبه نباتية لكن امرهم ازعجنى من كل النواحى

شكرا لجميع الاخوة المتداخلين –وفعلا البوست بقى ظريف ياصديق –

ايضا لايستطيع العريس ان يمشى مع عروسته حتى بعد شهور –واذا كان معزومين ويتباروا الناس وبالذات الحريم يقولن عليهن ديل مابخجلوا متبارين كدى—وهكذا-

وذكرنى رد الهادى ايضا –الزوغان من الدرب –اظنو ناقشناها فى موضوع التعليم –وهى ترك الدرب او الشارع للمعلم وذلك للهيبة والخوف من المعلم –وكذلك فى السوق –يقول واحد الليلى استاذ فلان فى السوق –فنتحرى اماكن مروره-وما بين الشأن الاجتماعى والشأن التربوى وتشكيل شخصية الفرد وسماته السيكلوجية علاقة قوية –ان لم تكن موروثة فهى اتت بالتنشئة السليمة التى يتطلبها الدين والمجتمع -اما موضوع اميرة فهى اكيد شاهدت المنظر –وحتى لانخرج بالبوست عن مساره ومضمونه –فقط اريد ان اذكر ان الخادمات ايضا فى السودان اصبخ لهم شأن واصبحت ظاهرة اجتماعية وتفاخر—واصبحت نساء الخرطوم يأتين للمناسبات وهن يصطحبن خادماتهن –وفى الرحلات ايضا—

سبحان الله سادت هذه العادة كما سادت ايضا عادة التزين ولبس افخر التياب والدهب والتطيب والدخان للبكاء –ولكن بكل امانة لا اتوقع ان تترك الخادمات من غير اطعام او ماشابه ذلك ولايمكن ان يحدث ماذكرته الاخت اميرة لان المجتمع السودانى بخير-

-

الأخ صديق والمتداخلين أنا من المعجبين بالمرأة المنصورية ولكن هنالك عادات وتقاليد ما كان ينبغي أن تكون ولكن من حكمة الله أنه العادات دائما تنقرض ولكل جيل عادته وتبقى قيم ديننا الإسلامي ثابتة نتمسك بها حتى الموت

خروج المرأة مع زوجها وتمشي معاه هذا من أفضل الأشياء والحمد لله تخلصنا منه

سلام المرأة على زوجها بعد غيابه عنه من أفضل الاشياء وان لم تسلم على زوجها على من تسلم تخلصنا من الحمد لله.

ركوب الحريم (للحمير) كان فيه خطروة على المرأة خاصة ركبتها (من غير ما تفشق) والكل يعرف الاسباب تخلصنا من الحمير في المناصير وجات الرقشات والرفاسات.

كلام الزوجة مع زوجها وأنه الراجل في الديوان ولايرى زوجته إلا ليلا وهذا الحمد لله بدأنا نتخلص منه

الأدب والأخلاق والذوق في تعليمنا الإسلامية . كانت لنا عادات سيئة جدا ولا نفتخر أن تكون من تراثنا .

التحامل على المرأة لا نحبه ولا يجوز وياجماعة المرأة دي كل ما تعمله لها لا تستطيع مكافأتها وهي عمود وعمدة الببيت. المرأة نتمنى له أن تكسب حقوقها وفقا لتعاليمنا الإسلامية.

كان وكان كانت البوش حكاية
كان العريس يحنن اليدين حتي المرفقين والرجلين حتي الكعبين وكان اللعب ليل ونهار
اذا العريس يسف يتحول الي السجاير وكان علبة السجاير وعلبة الحلوي من الضرورات وبعضهم قليل من الشربة لاباس.
سم (من السهل تتدعي انك بطل وتحمل قيم الدنيا كلها ولكن من الصعب اثبات ذلك)
وكانت القعيدة والعرضة دق الصوط وبعدها يترغ الجمع ويتركوا العريس نافض الكيس ويبتدي المشوار وبعد يكون العرسان في احوال ثلاث
+الاول يستسلم وتضعه في يدها ويصير ود بتا مباري حبوبتو
+الثاني يكون دائما معها في الاتجاه المعاكس
+ الثالث رجل متوازن يعرف كيف يدير بيته

صديق عبدالله علي أبوحنة كتب: الاذ احد يستطيع ان يلبس بنطلون و قميص يوم سوق النعوفاب.. من الأولاد المتعلمين والجامعين حتى
كدي اسألوا مصباح.. أو سلمان عقيد. أو عثمان النفر.. يقدر يمشي في سوق النعوفاب بي بنطلون لغاية أوائل التسعينات ما يقدر. يمكن الآن شوية شوية الحكايي فكت!.. البنطلون يسموه ( فرق الإسكاك) وهو عود في الساقي. يقول ليك ولد فلان الليلي دي لابس فرق الإسكاك وحايم في السوق..!!

عمنا صديق شيمنا وعاداتنا اصيلة مابتشبه عادات بقية القبائل والمجموعات

والبنطلون والنظاره مرفوضة ومستهجنه في البلد من الرجال ناهييك عن العنصر النسائي !!!!!1

نعم يا ياساري الليل
دكتور مصباح والهادي اضافوا
الهادي لخص الحكاية في كلمتين وقال Sad

المنطقة كانت مقفولة )
عشان كدة حصل الادب الراقي
........
دكتور مصباح برضو لخص لينا الحاجات الإتخلصنا منها والحاجات الإطورنا فيها..

من طرف **ساري الليل** الخميس 27 أكتوبر 2011, 12:24 pm

كلام عين العقل

يعني ماأشرت اليه نعتبره من الادب الراقي في بلادي عمنا صديق

عمده المنتدي استاد نا ابوحنه لك التحيه والتقدير وانت دوما سباق الي التوثيق لعاداتنا وتقاليدنا فلك التحيه والتجله

الاخوة المرور الكرام تسلموا علي التعقيب الممتع والمفيد
انا في راي ان كلل عاداتنا المنصوريه القديمه واصر علي كلمه القديمه لان العادات الان اختلطت مع ثقافه العصر من فضائيات وغيرها من التكنلوجيا الحديثه0هي من صميم تعاليم ديننا الحنيف ويعتبر الدين عندنا عاده بمعني هنالك عادات يتمسك بهاا اهلنا وهي من صميم ديننا الحنيف من احترام الزوجه لزوجها
من لبس النساء الساتر
احتلاط النساء بالرجال
وغيرها كثير من العادات
اما بالنسبه لتلاحق الكتوف فانا اري ادا لم يكن هنالك مايتعارض مع الدين ويخدش الحياء العام يعني المرجعيه تكون الدين واحكام الشريعه الاسلاميه فادا طبقناها فعنئد يجب ان تتسابق الكتوف وليس تتلاحق ولا ايه رائك يا ابواحمد

تخريمه ياجماعه اين بت حجازي واميره يلا نخوجل يابنات منصور الموضوع شيق0

والله يا نجلاء بت حجازي دي ليها زمن ما خوجلت هنا. هي شغالة وعايزة تلم الريالات...
لأنو سعر الريال ارتفع الآن في السودان
والأميرتان
تراهن يمرقن ويدخلن..

تسلم استاذنا صاحب القلم الشيق وانت دايما تذكرنا بقيمنا واخلاقنا الجميله

اختى نجلاء مشكوره على سؤالك عنا نحنا موجودين بس لعدة اسباب خوجلنا قلا ادعى لينا ربنا يصلح حالنا

البوست الصراحه لله حلوجدا

وعاوز قعده بمزااااج وانا حاليا مشكلتى انى مضغوطة فى الزمن .... وعاجبانى جدا مداخلات الاعضاء وتعليق اميرة على كمان

بس يا صديق ابو حنه السبب ما الريالات لان الراتب هو هو بس دايما بداية العام الدراسي بيكون ضغط عمل كثير

والحمد لله قربت تفرج

صديق عبدالله علي أبوحنة كتب:
والله يا نجلاء بت حجازي دي ليها زمن ما خوجلت هنا. هي شغالة وعايزة تلم الريالات...
لأنو سعر الريال ارتفع الآن في السودان

نجلاء زمراوي كتب:
اما بالنسبه لتلاحق الكتوف فانا اري ادا لم يكن هنالك مايتعارض مع الدين ويخدش الحياء العام يعني المرجعيه تكون الدين واحكام الشريعه الاسلاميه فادا طبقناها فعنئد يجب ان تتسابق الكتوف وليس تتلاحق

فعلا المرجعية هي الدين وطالما ان مرجعيتنا الدين فلا باس من تلاحق الكتوف او حتى تسابقها كما قالت اختنا نجلاء

يا نجلاء راجعين ان شاء الله للخوجيل مع بنات بلدى بس نفضى شوية من ضغوط العمل

تخريمه ياجماعه اين بت حجازي واميره يلا نخوجل يابنات منصور الموضوع شيق0

ومشكوورة للسؤال سواء هنا او عبر الرسائل .. جزيتي خيرا .. فانتى ملكة باخلاقك وتعاملك الراقي مع الجميع

إذا رأيت لاي مجتمع شأن لنسائه!
فاعلم أن رجاله أحراراً
.................
المرأة المنصورية في مكانها تكاد تقوم بكل شئ، والرجل المنصوري وثق في تدبيرها المعايش!
...................
يروح الرجل المنصوري الحقل أو الزراعة، ولايدري فطورو بي شنو؟
هي التى تدبر وتصنع
................
البكيات من مهامها
الزراعة وتنطيفها ومعاملتها يوم بيوم حتى تثمر من مهامها
الافراح من مهامها
تربية الأولاد يقع العبء الأكبر عليها.. حتى ظننا أن أمهاتنا أنصاف آلهة.
الإستشارة في الحياة والرزق، يشركها فيها الرجل
إكرام الضيف كلو حقها
تربية قطيع الأغنام هي المسؤولة عنه
مجاملة جاراتها ، هي المسؤولة عنه.
كل شئ يخص البيت هي المسؤولة عنه
الثقة المطلقة عند الرجل عنها، تكاد تكون كاملة
................
والمنصوريات في المدن.. ملاذ آمن لأهلهن في الريف، وقت الحوجة والعلاج وزيارة المدينة لاي سبب..
.................
نسبة الطلاق في المجتمع المنصوري في المدن والاقاليم، هي اقل نسبة منخفضة في السودان.. نسبة للتوافق والعادات المشتركة بين الوحدة الإجتماعية الواحدة من شركاء الحياه من رجل وزوجته

من طرف **نجلاء زمراوي** السبت 29 أكتوبر 2011, 5:10 pm

الاستاد صديق السلام عليكما ورحمه الله تعالي وبركااته >انت وولدك0 0و>>
من قمنا وجدنا امهاتنا قد نقلن حياه القريه المنصوريه الي المدينه مما زادنا تمسكا بمنصوريتنا وبمحليتنا
كما قلت ياصديق ان المراه المنصوريه هي ناصره الرجل في اي زمان ومكان فهدا يؤكد ان وراء كل عظيم امراه
واصل في السرد يا نا صر المراه المنصوريه

تقبل مروري00000

بلغت السلام لى ولدي يا نجلاء منك!
صورة جديدة مليئة بحنان الأبوة موش!

حاجات كانت محرمة في المناصير، اما الزمن ده! الكتوف إتلاحقت

حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت

رد: حاجات كانت محرمة في المناصير، اما الزمن ده! الكتوف إتلاحقت