غدا الخميس حوليه جدنا الشيخ الشايقي

غدا الخميس حوليه جدنا الشيخ احمد الشايقي بقرية ام عداره ريفي ام روابه
والشيخ احمد الشايقي وهو منصوري ولدبقرية ام سيال
ترعرع صباه قريه الحيبه الشرقيه مع اخواله
تم تصوف وساع في الارض الي انتهي المقام في الشكينيبه وامرالشيخ المكاشفي
الاتجاه غرب الي ان وصل منطقه ام عداره ريفي ام روابه
ومكت في تلك المنطقه عده سنوات وكان غابه وعمرها عمل مسيده الحالي
وتزوج من هناك وله من الاولاد شيخ الجيلي والشيخ دفع الله والشيخ وجلوك واخريين
وامهاتهم من الغرب اما محمد فامه منصوريه من ام سيال

يحبني جدا الشيخ الشايقي يا ابو سفيان..
هل تصدق يا ابو سفيان هذا الكلام!
لما سمع بيا عايز أعرس.. سنة 1982 جاء من أم عداره للمناصير.. وشحن إثنين لوري من الكاب بالغرب من اهلنا السليمانية وجميع الدراويش وجميع القرى اللاقتو في الطريق جوا معاه.. وعملوا حفلة عرسي في الحنانين بي ليلية واقام معنا يوم بيت معانا ورجع تاني يوم الصباح في طريقه الى أم عدارة..
ابنه الجيلي كلما يجي ابوظبي يزورني.. ومرة جاءوا شيخ دفع الله والجيلي عملوا عندي ليلية في البيت في ابوظبي.. ودعونا لها كل المريدين..
هو بكل تواضع يقول لى( إنت عندك شأن) وبكل تواضع باس راسي عدة مرات..
وحكي لى قصته مع الشيخ المكاشفي. قصة طويلة..
أولادوأنا بيناتنا صلات كبيرة

انت رجل صالح
وطالما احبك جدنا الشيخ
وباس علي راس البوس علي الراس عند الصوفيه مهو ساهل
وماكل مريد حوار يلقي البوسه
وفعل لك شان عظيم وانت تحفظ تراث وتاريخ القبيله
وانت مرجع لكل صغيره وكبيره
متع الله بالصحه والعافيه
ادينا الفاتحه والمدد ياشيخ يا ودالشيخ

مدد يا الشايقي مدد.
صورتك دائما يا ابو سفيان تذكرني وتشبه شديد واحد مهندس معانا هنا. خريج جامعة الخرطوم أمو منصورية وابوه من كنوز بربر وهو من طائفة ناس عمر السيد.. إسمو حسين الكنزي.. متزوج كنوزية من عطبرة.. وعاصر شديد على اهل أمو المناصير ولايحب أهلو الكنوز.. معانا في السراء والضراء واول واحد يساهم في الزواج والوفاه وغيرو..
قبل شهر زوجتو اشتغلت( سهام) راحت مرسلا ليا 100 درهم في ظرف..
قلت ليها ده شنو ده يا سهام!
قالت لى إشتغلتا ودايراك تضوق ماهيتي! وتباركا ليا.
قلت ليها بسم الله الرحمن الرحيم. انا زول عادي
قالت لى.عادي... ما عادي... دي انا عارفاها
المهم أمسك المائة درهم
قالت لى انا شايفا الكشوف سنين تساهم وزول ساهم ليك مافي؟
قلت ليها طوال هذه السنين الحمد لله ما حصلت لى حاجة الناس يساهموا ليا فيها! إنت عايزة تكتليني على وليداتي والله شنو؟
المهم بركات الشيخ الشايقي جدك يا ابو سفيان

الأخ سفيان لك كل الود والإحترام أما عن شيخنا الشايقي لقد قمت في أحدى سفرياتي للأبيض رأيت في أحد المحلات صوورة الشيخ وتحدثت مع صاحب المحل وهو من اشد محبي الشيخ الشايقي وأخبرته بأن الشيخ قريبي رحب بي وذهبت معه بعربتي لأم عدار ولم أتشرف بلقاء الشيخ لأنه كان خارج ام عدار وقابلت الشيخ دفع الله والشيخ الجيلي وبعد كم شهر توفي شيخنا في رمضان ونسأل الله أن يجعل الجنة مثواه ولا يفتنا بعده وعلى طريقته سالكين أخي سفيان لو عند جوال الشيخ دفع الله أنا محتاج له شديد

الاخ ابو سفيان من زمان بتاع حوليات ومديح واذكر عنما جاءت الانقاذ وادخلت انظمة غريبة على الداخليات وبدات تجفف فى منابع التغذية حيث الفطور والغداء والعشاء فى ابو حمد الثانوية مجانا وكان وقتها الطباخ اسمو حسان فامسك ابو سفيان بصحن وصار يمدح ؟؟



حليل زمن القرع يا اخونا

وحسان اتخلع يا اخوان

وعلى نعمان انتحر يا اخوانا

الى اخر المديح متاسف على نظام الاكل المجانى وحيث كان ابوسفيان مدير التغذية والصفرة وعضو فى اتحاد المدرسة ورئيس شعبة كرة القدم ولاعب بنادى السكة حديد او القوز وحقيقة كان زمن جميل ؟؟؟؟؟؟؟؟؟؟؟؟؟؟؟





تحياتى

ابو مصطفى

الله الله يازمن وقف شويا يازمن رحم شويا بعدها
شيل باقي عمري شيل شبابي شيل عيني
بابو مصطفي دائما تقلب المواجع
الله العوضابي تلك الايام لاتعوض لايكن تتنسي ولاتفارق خيال
والله كل مااشوف صورتك بقيف عندها واجر الشريط
شي مشاكل شي كور شي غني شي دافوري شي مديح شي اكل

انا عشت في مجتمات كثير في الداخل والخارج
انا ذي فتره ابوحمد انا ماشفت
اكان العوضابي نلقا الزرق والفاقه
نتلما ونسوي القاقه

والله انا كل مالقا معاك واحد في النت عامل شمطه
اقول دا زوله وانا اعرفه
دا السمن دائما منتصر يكون بفوق السمن ما يحتل
ياخي انت كل زوق وادب فن يافاكهه المنتدي انا والله اول قبل ماخش كلمني
الزعيم المشاركه اقوله اصبر شويا يوم قاعد معاه قال المنتدي كرب
قتلو كيف واحد اسمه الطيب محمد عبد الرحيم (ابومصطفي)
قلته دا العوضابي قطيع شك من وين اسال من دماج
قال من دماج وعكازه معاه بس اياه العوضابي
واشترك من داك اليوم
مااجمل ترحيب بالبوست
سفيان خلف الله انت وين
الذي ترك كبير الاثرفي نفسي
كاما شاخت علاقتي بالمنتدي اذكر ذلك لببوست
لله درك ايها المنصور الغيور ولنا عوده

تلفون دفع الله قريب ياتيك في الرسايل الخاصه يافتح الرحمن

بارك الله فيك ياسليل الكرام ولايعرف الفضل الااولي الفضل

والله يا ابوسفيان ليك وحشة والعجيب فى الامر البدلة والكرفتة واسع انا بى هنا فاكى الوهمة لى ناس على نعمان وحقد وكلمون قلت ليهم ابو سفيان شغال مدير شركة الراجحى للصرافة قالوا لى ادينا تلفونه قلت ليهم هذه الايام ايام الحج والزول دا بى يكون مشغول بكل العملات من جميع انحاء العالم والتلفون ممنوع الاتصال بى ابو سفياان الا بعد موسم الحج قالوا لى انت يا عوضابى جنيت ما عندو ساعة راحة قلت ليهم الا بعد الحج راحة ماها فى ؟؟؟ واصلى بقيت زى جحا يكذب ويصدق نفسه ؟؟؟؟؟؟؟؟ وقوم جارى يقص الكذبة ؟؟؟ اسع دحين الشغل كيف ووين فى السعودية ؟؟؟؟؟؟؟؟؟؟؟؟؟؟؟





تحياتى

ابو مصطفى