كيف تفرق بين زغرودة فرح، كرح، مرة ولدت ولد بالليل، زغرودة لعب باشي، زغرودة زول جاء من السفر

محتاجين تسجيلات صوتيه عشان نعرف الفرق بين انواع الزغاريد. بالحروف الفرق ما ظاهر

الموضوع ده ذكرنى قصه.كان جدنا الشاذلى معانا فى البيت وصادف بت عمنا نجحت وزغردو ليها .جدنا عليه رحمة الله اتهجم ونط من السرير وجانا يجرى وهو مهجوم فى شنو؟ المات منو؟ . قلنا ليه بتنا نجحت .بقى يسب ويلعن وقال انتو ما بتعرفو الفرق بين زغاريد الفرح والبكاء. الوقت داك اول مره اعرف انه فى انواع للزغاريد.

نعم يا هويدا جدكم الشاذلي الله يرحمو ركيزة في البلد.. وكان الموضوع ده حصل في أم لقاديب كان جر عليهن المكرير..
هو طبعاً هناك مافي مرة بي تغلط ابداً بين هذه الزغردات.. والغلط يجر الى عاقبة وخيمة.. ويجوا ناس من القرى المجاورة ويلعنوا هذه المرأة التي ما عرفت زغاريد الفرح من الكرح؟
وإنتو طبعا معذورين عشان بقيتوا مناصير عاصمة مخلوتين موية ساكت موش نجاض
وطبعا العم الشاذلي احترمكم عشان ضيف عندكم؟ وإلا مارس عليكم الطقوس البي يعملوها في مثل هذه الحالة؟
دي غلطة كبيرة لاتغتفر في البلد؟ وأصلاً ماحصلت ولا راح تحصل؟
أما حكاية الزغاريد عايزة تسجيل صوتي
دي عاد ما بقدر عليها؟
ياريت تجي مرة تزغرد؟ وتسجل

مبروك التلاتة كديسات يا أختنا هويدا

تمام التمام هجعة فرح ان شاءالله
كل مره نكتسب معلومات جديده وملاحظات اجمل
،،،،،،،،،،،،
صحى يا هويدا حكايتك مع الكدايس شنو
اوعا من قومت الكدايس عليك ههههههههههه

اول مرة اعرف انو الزغاريد فى فرق بينها

سبحان الله





هويدا ضحكت طبعا فى الورطة دي

هويدا ابوشعر كتب:محتاجين تسجيلات صوتيه عشان نعرف الفرق بين انواع الزغاريد. بالحروف الفرق ما ظاهر

هسة يجيبوا لك واحدة بتزغرد من ويييين



بس لاحظى انها واضحه يعنى مد وجذر وكدا





اللى بعرفة يا ابو حنه ان هنالك فرق بين الدول فى الزغاريد

يعنى زغرودة مصرية تفرق عن زغرودة شامية



اما انه المناصير زغاريدهم زاتا تفرق .. فمعلومة جديييييدة

في حاجات أساسية عند المناصير لازم تتعلما من بدري قبل ما يفوت فيك الفوات، وامك وابوك يشرفون على ذلك؟
أولا تعليم العوم للولد والبنت شئ أساسي..( علموا أولادكم السباحة والرماية)
2 البنت لازم تتعلم الزغاريد وهي فتاة وتشرف على ذلك أمها أو خالتها أو مرة كبيرة في الحلة أو نديدتها، ويتعلموه وين؟ في الخلاء في رعية الغنم، بعيد من الحلي والناس، عشان مهما غلطت مافي زول ينزعج. وإلا راح تتلما عليكم الحلال كلها ويدوكم علقة جامدة.. تكورك زي ما دايره البت الفتاة في الخلاء لامن تتعلم من أمها أو خالتها، زي رقيص العروس في المدن شئ ضروري.. زي ما قال دكتور مصباح في تشريف المرأة المنصورية ، قال المرأة الوحيدة في السودان التى لاترقص في عرسها، هي العروس المنصورية)
ويعلموها الزغاريد وهي فتاه. عشان لما تعرس يكون فات فيها الفوات.. وسوف تتعلموا بالعصر والضغط بعدين وهي معرسة.. عشان سوف تصبح مرأة ربة بيت وكونت اسرة ولازم تكون عندها مشاركة في المجتمع، وطقوسه.
هذه لغة الجسد ، في بلد لاتتوفر فيه سبل مواصلات حديثة ولاتلفونات، عشان يخبروا الناس فلان مات أوفلان عرس أو فلاني ولدت أو فلان جاء من السفر..
إعلام بالطبيعة يا أستاذة أميرة الحومري إعلام وتواصل جماهيري.. موش عندكم فرع في الإعلام إسمو( الإتصال الجماهيري؟)
هذا هو الإتصال الجماهيري عندنا أنجح من الدرسوكم ليهو ويوفي بالغرض المطلوب من هنا يمكن يستمد تحليل الزغاريد من حرمته. لإعلام الناس بالخبر..
وحاجات كثيرة المناصير يعلموها بناتهم وأولادهم قبل ما يشكلوا اسرة سعيدة.
تعليم العواسة للبت تعليم تأديب الدحش للولد.. عشان يتطوع الناس يقدروا يخدموا به مصالحهم، وإلا مافي زول يقدر يركب فوقو.. هسي دي الطفل ذاتو زي البهيمة لو ما أدبتوا ووريتوا الواجبات يشب زول كبير ما بيعرف الاصول من الفروع.. وناس كتيرة ماها قاعدة تربي أولادها الواحد بعدين يطلع زي الدحش الما مؤدب.. الإنسان الطفل زي السائمة، لكن اسعفه المولى عز وجل بنعمة العقل يتعلم سريع أكثر من الحيوان.
حاجات كتيرة عندهم ليها المناصير اصول وقوانين.. تقدمهم على القبائل الأخرى ما طلع من فراغ، أهو بي جنس الحاجات دي والتشديد عليها.
ولذلك الغلطة في الزغاريد ممكن تؤدي لكارثة، زي ما ذكرت عضوة المنبر هويدا
وناس تاني زي أميرة الحومري وإنتصار حجازي ما عارفين الفرق بين الزغاريد ذاتو؟ وما مفتكرين اصلو في فرق
أما أميرة علي كما يبدو لى وهي متربية في البلد لآخر لحظة، أكيد تعرف الفرق بين أنواع الزغاريد..
راح يجوكم ناس هسي دي في المنبر يفصلوا ليكم إنو الموضوع ده خطير جدا في البلد ولو في حلة فيها زول عيان ووحدة قامت زغردت لزول جاء ونست عملتو زغاريد بكاء.ز تلقى الحلل المجاورة كلها جات تبكي وتجري والخامش نعليهو والشايل طورتيو و الفي خدارو طوالي شال الشاكوش للحفر وإتوجه للمقابر بدون ما يسأل..
موضوع خطير جداً عند المناصير عدم معرفة الزغاريد

الصوره فيها مخالفه واضحه جدا ياسلمان
وللبعرفه جائزته زياره من الباشمهندس عند عودته
ولو دققت النظر فيها تكاد تقرا او تسمع وهو سارح فى البلد
يسمع موسيقى من مسجل العربيه له علاقه بالماضى او البلد
حاولت معرفه نوع السياره من المرايا وهى ماتايوتا على كل حال ولكنها ماركه جيده وموديلها متقدم
ياريت الاخ صديق يطلع يده اليمين حتى نرى الماركه على المقود
لبس القميص نص كم دليل على ان صاحبه يتمتع بصحه يحسد عليها
ارشح الاخ نادر نور الهادى بماموريه للبلد( حصريا على الخيار الاصل) لان الخيارات الاخرى ربما تاثرت باسواق السبت ومعه اله تسجيل لتسجيل انواع الزغاريدعلى نفقه اى واحد مهتم بالتوثيق

تسلم يا الحاج... سلمان يغالط ساكت الحاجات دي لسه موجودة عند مناصير المحلي.. بس اضافوا ليها الموبايل في بعض الأخبار.. واضافوا لها ضرب الخرتوش للزول المات في جوف الليل..
ماركة جديدة يا الحاج مطورة
هي نسيان فورويل... اسكتريال
............
انا لو بي مرادي لما المرة تولد أقول ليهم زغردوا لمان المرة تجيب بنت..
ولا تزغردوا لمان المرة تجيب ولد؟
ولاد الزمن ده معظمهم ما نافعين.. لافي القرايي ولافي الحياة الزوجية، بالأول الواحد فرحان.. وشهر عسل وكدة!
اول ما يدخل في المعمعة وولد اول وولد تاني.. وحمل وسماية.. اول ما يدخل في الحاجات دي يرخي ضنبوا ..ويبقا ما زول تقيلة، ولا ستار عروض ، ويبدأ الزهج والتمرد.. موش قادر يقدر أنو معاه بنت ناس أهلا تعبوا فيها وعلموها وأدوها ليهو.. وإنو البنت تتضرر أكتر من الراجل لو إطلقت وكدة
عشان كدة بناتنا ومعظم بنات السودان يحرصن دائماً على ديمومة العلاقة رغم الميل، ورغم الوضع المائل، ورغم المحبة الخصبة الخلاقة التي نضبت منذ شهر العسل وبقت الحكاية مجاملة فقط.
البنات حريصات على الإستمرارية والديمومة
و( آخر الزمان خيرأولادكم البنات)

صور من صور الاعلام كانت عندنا متوفرة من البيئة..

قلنا سهام تتسلى شوية في رمضان ده؟
 بدل الشلاقة حقتا؟
 ده إذا لقت ليها زمن من ترج حلة بليلة اللوبا العفن.. وسويي العصيدة والقراصة وغسيل الغدة

الزغاريد