تفتيق المعاني في شرح المباني... في القصيدة الخطيرة الجابا نور الهادي من حمـَّيد

نحنا الروقة والمهلة ونحناالبي نداوس الناس

الروقة.. معروفة من راق يروق.. كلمة عربية فصحى
وعلي قصيرون في السجني إسمو على الروقة..أي إسم الدلع أو الإسم المشهور به
والأغنية المنصورية تقول
روقة الروقة وين
يا الله يا ربي نروق متين
....................................
المهلة: طولة البال معروفة
الدواس: يوم الكريهة يوم الحرب.. والدواس الضرب لما يحمى الوطيس

نحنا جدودنا في الحلي ونحن اهل من حنك ولا اوسلي

يريد ان يقول نحن الشايقية والمناصير واحد
حنكّ بتشديد النون.. قرية صغيرة جنب الكاب بعد القطر يتحرك توشفا.. وهي قرية عضوة المنتدى هويدا شرف الدين
هذا من ناحية
إن كان الشاعر يقصد هذا المعني
أو هناك قرية صغيييرة جدا كانت جزيرة في مناطق الشايقية تسمى( حنك ) برضو.. قريبة من القرير تسمي حنك برضو بتشديد النون
أسلى.. هي القرية القريبة من مساوي في الشايقية

نحنا بنعرف الساقي ونطوع بالجريد في ايدينامدقاقي
أهل سواقي
نطوع: كلمة عربية
يدق الجريد ليتطوع ليصير ( ألس ) للساقي أو حبال لأي شئ
مدقاقي: مدقاقة.. تقوم مقام الشاكوش لضرب الشي إلا انها لاتقطعه كما الشاكوش معروفة المدقاقة تؤدى اعمال كثيرة للمزارع تصنع من الخشب ولها مقبض

نحنا بنطعن اللقلوق ونحنا بنوزن الفاشوق
اللقلوق.. والفاشوق.. مفردات نوبية من مفردات الساقية

نحنا بنضفر الكران.. والمصران..ونحنا البي نسوق ميزان
الكران: يقصد الكارانة وهنا يجي بعض الاختلاف بين الشايقية والمناصير
نحن نقول لها الكارانة.. تضفر من جريد التمر تكارن بيها العر والدبس والصفصافة والسرنكلايي الصغيري.. اما الكاران عموما عندنا هو الروث والدفيس والحطب الصغير البي يجي شايلو السيل أو البحر لما يمشى
.............
يضفر الكارانة وحريمن كمان يضفرن المصران بتاع البهيمة لما يرموه في الحلة محمر أو سلقية في زول يا جماعة ضاق حلاة المصران المضفور كيف؟
يسوق ميزان
اي عندهم سمودة يعرفون الوقت وينجمون بالميزان.. وبنات نعش والزهرة والعنقريب وغيرها من فنون النجوم

نحنا بنوزن البدقوق ونحنا جبتي للمخلوق
..................
رجع تاني الشاعر لمفردات الساقية يبدو انه معجب بها لتمويه القارئ في هذه المفردات الغميسة
البدقوق من مفردات الساقية
جبتي.. تشديد الباء.. نحن المناصير نقول ليها( قوتي) بتشديد التاء.. وهي حفرة الساقية مما يلي البحر تحفر عشان تجيب الموية من البحر للساقية

نحنا البي نسوق ارقوق ونحنا بنمرق السبروق

أرقوق.. الثور الكبير القوي لوحده يسوق ويحرك دولاب الساقية .. وعادة يكونا ثورين في الساقية مع بعض..
نمرق السبروق.. يطلع لنا من الساقية ملاح السبروق المعروف وهي مشتركة بين المناصير والشايقية
( الجرف سبروقه ملح) بتشديد اللام

ونحنا بنعرف القادوس والالوين.نحنا تملي متعاونين ومتكاتفين
..................
رجع تاني لمفردات الساقية
القادوس.. والألوين بضم الواو وفتح اللام وتهميش الياء بفتحة مهملة من مفردات الساقية.. والقادوس معروف
تملي: كلمة مشتركة بين المصريين والسودانين.. المصريين يعرفوها

نحنا البي نسوق لا نصايص الليل
....................
رجع تاني لى مفردات الساقية
نسوق لى نصايص الليل
يقصد تتق العشاوي.. اي الدور على المزارع الفلاني عشاوي يسقي عيشو ويجيب بقرو وتيرانو .. زي ناس البوابير تجيب صفيحة جازك وتجي تدور وتسقي عيشك

ونحنا البي نسوق كلتوت نصارع النيل
رجع تاني للعامية الموغلة
وهنا تتحرك اللهجة قليلا بين المناصير والشايقة
في كلمة كلتوت
ونحن نقول ( كلتودة) وهي لما القيف يكون عالي.ز تربط ساقية صغيرة تدي ساقية كبيرة ثم تخرج المياه للبر من الساقية الكبيرةنصارع النيل يرمز لقساوة ساحله وبالرغم من ذلك تحدينا النيل وساقية تدي ساقية.ز لامن اخرجنا مياه النيل من جوفه الغائر

نحنا تمام والدفيق ونحنا البي نبل الريق
...................زز
تمام: يقصد التميم وهي مرحلة من مراحل نمو ثمار النخيل.. وهي تبدأ مرحلة التميم بعد القروعة مباشرة اي قفيز النخيل الأنثى بالضكر..
الدفيق مرحلة متقدمة من التميم لما يكبر التميم يصير دفيق ممتلئ وكبير الحجم . له رائحة مميزة.. البنت الخضراء خدرة ناعمة دقاقة نشبهها في أغانينا بالدفيق
( الدفيفيقي الماربت. لونا أخدر من الشبت. لى أضاي قلبي هي خربت.. ماني خايف من الشمت.. ماني زي ود سعدين ظرط)
>>>>>>>>>>>>>>>>>
الدفيفيق الما وضح
لا اتغمل لا شكوك سبح
تورو سايق ارقوق نبح
يا حلات دفيق البلح
تومة من نارك أح واح
ماني فايت اب سرجين برح
إلا تومتي أنا بيها افرح
دي والفوق كلها كلمات منصورية

نحنا اب راس والبقع

أم راس مرحلة من مراحل أستواء رطب النخيل
البقع: بتشديد القاف أي البقوعي.. قاف يمنية مشدده.. برضو مرحلة من مراحل أستواء ثمار النخيل..
شايفين نحن المناصير ومعانا الشايقية النخيل ندلعوا كيف
اي مرحلة من مراحل ثماره عندنا ليها إسم

ونحنا الخمة والقيساب
الخمة بفتح الخاء: مرحلة من مراحل ضريي العيش في التقاه.. قريبة من المرحلة الأخيرة
القيساب: مرحلة أخيرة من مراحل العيش ضروهو وفرزوا منو الروس واصبح جاهز مقنطر عايزين يعبوه في الشوالات .. هذه هي المحصلة النهائية للمزارع بعد عناء في السياقي والتعب والسهر والقراعي..
القيساب الإجابة النهائية للمسألة الرياضية
( فوق قيساب تقاتو نبيت...
ويلحقني أم بقيت قحيت
ابداً عيشتو ماها كفت
وفي الصلاه ما بيفوتو وكت

ونحنا كرام ولاد ارباب ونحنا الكيلة والشوال
خرج من الساقي ودخل في المقاييس والمكاييل.
وهي برضو مفردات غميسة عند الشايقية والمناصير
كيلة: يعني عبوة الصفيحة من التمر أو العيش
والكيلة دائماً محددة تساوي ربعين .. عشان ما تجيب صفيحة كبيرة تقول دي كيلة وتغش الناس

نحنا كشر والتدي نحنا للضعيف ايدينا ممتدي
يقصد مثلا ممكن نديك أو نكشر فيك ما نديك
والمثل بليلة مباشر ولاضبيحة مكاشر

نحنا الحوش واللقدابة والقاطوع نحنا اللقمة ساعة الجوع
حوش وسام والحوشاب فصيلة من فصايل الشايقية. قالوا يحوشوا الواطة عشان يسوقوها وما بيسوقوها وما بيدوها الناس زمان خالص جدودهم كانوا كدة.. ثم الحوش بمعنى عام معروفة
القاطوع غرفة داخلية بعد الدانقة وتسمى مرات القطيع
اللقدابة... الحاحاية للطير... ايضاً البرندة في البيت مرات تسمى اللقدابة.. خاصة إذا معروشة من الجريد والخشب وليست مبنية من الطين..

نحنا صبيطة القفاز ونحنا للضعيف ننحاز
.........................
البي يقرع التمرة يلقحها.. بعدين لما تستوي له سبيطة من كل نخلة حق معروف له
شطر القروعة
وهناك شطيير القمريي

نحنا طواري والكارديق ونحنا الراحة بعد الضيق
.....................
اي يرفع التقنت اي أطراف الحوض يسندهم بالطورية عشان الموية جاياه.ز عشان يشيل اكبر قدر من المياه.. بعد أن يكون قد انطمر حرف الحوض اي التقنق باثر الرياح أو اثر غرغارة أو رتيلة او فارة قدت الحوض
والمناصير مرات يقولوا تقنق
ودائما قصبة التقنق غليدي وكبيري وسمحي وقندولتا عيري
لذلك يشبهون البنت الحسناء فارعة الطول جميلة القوام.. ممشوقة، يشبهونها بقصبة التقنق.. والشايقية مرات يقولوا التقنت
( قصيبة التقنت الدفق سرابك
ارضك طيبة من النيل شرابك
المزارع حرص فيك واعتنابك
كادن جدولك. رفع سرابك
..............ز
هناك في جزيرة سور بالمناصير في مرة إسمها مريم بت الكادان... عليه الرحمة
سمي بالكادان عشان يجيد مهمة الكادان

هذا هو وجه الشبه يا الهادي ويا اميره الحومري بين المناصير والشايقية في هذه القصيدة..
ما تتعبونا معاكم بالله ونحن صايمين خلونا نفطر؟

ما شاء الله يا ابو حنه

الله يعطيك العافية

يعلم الله انك عارف خط سيرك بالمنتدى .. ومبدع فيه



كلمة انك قاموس قليلة فى حقك

اذا المصريين عندهم اهرامات

فانت احد اهرامات المناصير من جد

تراثنا كلة عندك بس نقول ما شاء الله تبارك الله

ربنا يحفظك ويحفظ لنا علمك





في شرحك الوافي دا حيرتنى جدااااا

بس قلت ما شاء الله موسوووعه وعلم

ما شاء الله

نور الهادي يا إنتصار ذواقة.. هو ولدنا وأنا بعرفو
دائماً يختار الشي السمح..
هم جبدتهم أمهم الله يرحما زهرة كانت مرأة كريمة ومقدامة ومرة ضيفان وطوالي هاشة باشة تخدم الناس.. هسي دي إنتو تشوفو سلمان يخدم وفي الباسقات مع الحاج يجهز.. ويعمل ويوصل ويقدم ده؟
الشئ ده ماهو من سلمان براه؟
ده وارثو من أمو.. الطالعة من بيت كبير بيت محمد ود الخليفة.. بعدين برضو سلمان ورث من ابوه عزة النفس.. وعدم التكبر واحتراف المهنية اكتسبها الهادي من ابوه..وروح العمل..
أمهم زهرة شوال الله يرحما.. مرأة في غاية الحصافة والخلق والدين والأدب وخدمة الناس رحمها الله.. وكانت الله يرحما نظيفة ، جميلة في بلد تمور بكل وسائل الاتساخ.

يديك الصحه والعافيه يا تاج عزنا ومفخرت بلدنا

واسفين تعبناك معانا

لكن اياك ضو القبيله ومنارتا

وكلمتك بنتوه فيها ونتامل

والكلمات فى حقك اصبحت هزيله

ما لينا غير نقول الله يديك الصحه والعافيه

ويديمك لينا فخر وشموخ

اما بلنسبه للقصيده

الكلمات الحيرتنى هى اللقلوق

والفاشوق

وصبيطه القفاز

والخمه والقيساب

وتشكر

تسلموا يا كرام المتداخلين
قلنا الشاعر ذكر مرحلة ( الدفيق) أو تصغيرها( الدفيفيق)
والشعراء يطلقونها على الكناية
ويقصدون بها المرأة
وفي الدفيق.. أو تصغيرها الدفيفيق
قال الشعر المنصوري
الدفيفيق الما وَضـَحْ
لا اتـْـغـْمـَلْ لا شـَـكوكْ سـِـبـَحْ
طيرو فوق العرجون نبح
هنا الشاعر شبه البنت الصغيرة الحسناء بالدفيق أو الدفيفيق، وهي مرحلة قبل النضوج للبلح.. وهذه البنت التى ظهرت فيها ملامح الجمال الأخاذ في سن مبكره.. مما يدل أنه سوف يكون لها شأناً عندما تكبر..
لا أتغمل.. ما تأثر بأنو يغملوه.. ويصير غمولي.. يتغير لونه..
وتأويله.. أن هذه البنت الصغيرة توفرت لها كل عوامل الرعاية والتربية وعادة الدفيق لحلاوة منظره وحسن رائحته الذكية يقوم المناصير بعمل سبحة منه، يلبسها الاطفال على أعناقهم.. من البنين والبنات.. وهذه عادة معروفة عند المناصير( سبح الدفيق)..
اي أن هذا الدفيق لايزال بكراً لم تطاله يد المصنع.. الذي غمله أو شكاهو سبح..
وهنا ترمز الكناية على أن هذه البنت لاتزال غير مخطوبة وهذا تأويلها..
طيرو فوق العرجون نبح..
عادة الطير يأتي للنخلة، ويعمل صوت وضجيج وقتما التمر يستوي ويأكل منه
ولكنه هنا من شدة حلاة الدفيق الذي ظهرت بوادر حلاته في سن مبكرة.. أتي الطير سابقاً لأوانه.. لأن الدفيق وهو الدفيفيق ظهرت حلاته مبكراً مما جذب الطير يأتي لاستباق أكله وهو لايزال دفيقاً.. وهذه مبالغة شعرية وهي جائزة نوعا ما.. وبلاغة من الشاعر المنصوري..
وتأويلها في تجريد المعاني من المباني الشعرية
ان هذه البنت التي وصفها الشاعر . قد ظهرت عليها مفاتن الجمال، مما حدا بالخطاب أن يطلبون يدها من ذويها، باكراً..
ورمز لها الشاعر هنا
بــ( طيرو فوق العرجون نبح)
الدفيفيق الماوضح
لا اتغمل لا شكوك سبح
طيرو فوق العرجون نبح
كلمات في غاية البلاغة الشعرية..