يداوي في العجين المهرود

وعشان كدة لا أمل ترتجي من حلول من يداوي في العجين المهرود
وكل الحريم في البلد يعرفن إنو العجين المهرود ليس له علاج ولانفع كسرة ولايقوم فوق الدوكة وليس له غير ما تمصمص خمارتك منو وتكشحو..
حاول ألقى ليك منصوري كبير ابو زول كبير. وتكون البت أو الولد عمر 20 أو خمسطاشر
لما يسألك عن زول وإنت مشيت تزورو..
قول ليهو ( زولك ده يداوي في العجين المهرود) شوف المنصوري ده راح يموت بالضحك كيف؟
ويصطمحن فيك كيف؟ وينبسط منك كيف؟
أنك عارف لغة أهلك
وفي النهاية راح يسألك
ياجنا إنت جنا منو؟
كان لقا ابوك ضو قبيلي
طوالي راح ينسبا لى ابوك..
والله يقول ليك يا جنا العلمك الكلام ده منو وإنت ما حضرت زمن العجين المهرود؟
حاول طبق البيان بالعمل في اقرب زيارة
كدة تكون أنزلت ونزلت لهجتنا الى أرض الواقع..
وتكون جعلت علم الكتابة سائلاً في التعامل.. وتكون خلدت لهجة أهلك وتكون كسبت أجر في زيارة كبير..

بعدين م متربي مع عجايز دي قالتا لى أختنا الفاضلة عضوة المنتدى أميرة علي.. وأنا ابداً ما متربي مع عجايز ولافي بيتنا عجوز.. لكن كنت زول حوام في المناصير البكيات والبواشي دائماً ابوي يكلفني بالإجتماعيات دي لمان يبقى هو مسافر مع اللنش للكاب..