فيديو- الشاعر محمد الحسن فضل يرثي المرحوم حبيب بابكوري

تسلم ياود عابدين بهذه الروعة
والاستاذ حبيب بابكر له الرحمة
يستحق اكثر من ذلك بكثير
ويا ليت لوسردت كتابة بعد سماعها
ان كان لك متسع من الوقت

تقبل مرورى

رثاء حبيب بابكر من الشاعر محمد حسن فضل
كما فى الفيديو اعلاه

يا مشاعر بوحى بوحى***فرقو سبب لينا اوجاع

دون وداع سافر ياحبيب*** مالو مننا قمت بسراع

سدت العبرات الحلوق*** لما خبرك بيناتنا شاع

البلد غرقت فى الدموع ***تبكى مكلومة قليبة ماع

تبكى فقدت اعز انسان*** دار تموت من وجع الصداع

كسلا آهـ يا كسلا ام تقاق***حبو ليك يزيد كل ساع

كسلا اعتصرت بالالم*** جارى دماعه بلا انقطاع

الجبل موجوع يا حبيب*** السواقى دميعه تراع

فقدو فقد الناس اجمعين*** حتى للساكنين اب سباع

ماله دى اللتنا بقت كده*** تنهتك من بعد الرقاع

مركب الاهات قبلت *** ماشى لا مقداف لاشراع

شايله كبنة كحيلة والكاب *** فيها برتى وشرى والكراع

دربى بونى الحيبة ودماج *** وود سكينة القلبو مرتاع

جارى طافت كل الضفاف ***شافت اوجاع فوقه اوجاع

التمر عماه الهلاك*** البيوت ضايعات فى الضياع

كلهن قالن يا رئيس *** الف مرة خطابك انذاع

مالو يتماص متل البيوت *** والله دمنا زاد ارتفاع

الصبر كملناه جــــت *** الكذب منو شبعنا عاع

ياخى نصبر لك لا متين *** ما بتشوف تونس والبقاع

ما تخلونا نقول كلام *** يبقى فتنة يجيب النزاع

الوطن بيها يروح شمار *** وتانى ما بيلقالو شفاع

مركب الاحزان قبلت *** ماشى لا مقداف لا شراع

فيها عصمة وناسا الحنان *** رامى من فوق راسه القناع

تسأل الشادى محلو وين *** شرف القاعات والبقاع

كان يضلنا من الهجير *** مالو خلانا بلا وداع

المكارم ليها مقدام *** كان تقى ولى مولاهو طاع

دار قمر تدعولك كتير *** كنت سيفه وليها الضراع

كنت زى توتيل فى الشموخ *** ليهو يا ما كنت طلاع

كنت بسمه ونسمه وربيع *** ولقمة فى افواه الجياع

الرفيق والخل الوفى *** وقبله لليادوب فى الرضاع

شمعة فى ليلا فوقنا طال *** فجروا قرب لاح الشعاع

كنت لينا حبيب يا حبيب *** انطبع فى قلوبنا انطباع

نحن مفجوعين بالغرق *** والفراق زاد لى صاعنا صاع

اصلو ما غلط على زول *** زول عديل سمح الطباع

فيهو عشمانين الكتير *** المحن يومى تمر تباع

فوق خلايق الله الموت يدوش*** اى زول من كاسو جراع

يا رفيق الموت حق عديل *** نرضى حكم المولى المطاع

مدحو يبقى عزانا الوحيد *** بيهو زاد الناس اقتناع

بالشعر خاض الميادين *** فيها لغة الضاد ليها باع

فى نفوسنا انساب الشعر*** ليهو حتى عدونا سماع

لى بلدنا نظمت القصيد *** فى ربوع الدنيا انذاع

يا شهيد اثمرت الحروف *** قعدوا أهلك رغم الصراع

فوقه ما قعدن التمر *** ما فى زول للذلة انصاع

الشعار مرفوع فى العلن *** اما فوقة واما فى القاع

يا كريم لينا حبيب حبيب *** دخلو الجنات الوساع

الجحيم من جهتو ابعده *** فيها كب العاصى و الصاع

ادو سبعين من الحسان *** زيدو واحدة ومثنى ورباع

وفى المحلى يدور الحديث *** يلقى اخبار اى اجتماع

والزم اهلو الصبر الجميل *** لينا من جم يبقى شفاع

الوطن داير تضحيات *** مافى حق يبرد دون نزاع

باقى فى جوانا مطبوع *** للببيعو يحل المباع

فوق ارضنا ترانا قاعدين *** كى للخاينين والرعاع

اصلو معروف ودالحرام *** ليها نار الفتنة ولاع

انطفت بصدور الرجال *** خلو وحدو يسوى البعاع

والوليد الما عندو ادب *** قال يمين اقلعم اقتلاع

قلو ليها اهلنا حراس *** فوقو ما دقيت لك كراع

مرة تتعارض فى الحلق *** غصة ما بترضى الابتلاع

فى الختام يا اهلى الكرام*** انتو لى امجادنا صناع

انتو علمتونا الصمود *** وكيف نعرف الصاح والخداع

والكريت خلوها التطير *** زاتا راكى فى يات فراع

والحديث حتما ذى شجون *** اعتذر قد آن اليراع

اعتذر قد حن اليراع *** اعتذر قد جن اليراع



وانا اعتذر للتاخير

قصيدة اخرى فى رثاء حبيب بابكر

دمعة تالتة عليك يا الحبيب يبقى بيها المجروح يطيب
بى عجل طار سرب القطا لينا دا يبحث عن حبيب
عنو سأل القمر المنير قالو مستعجل للمغيب
والشمس قالت فى حياء مانى عافى ازداد اللهيب
والنجيمات سكتن عديل منهن لم يلقى تعقيب
كلا اندل على الارض حل فوق توتيل العجيب
قالو هوى ما شفت اللبيب عنو ما خليت لى دريب
قالوا اسال منو ام تقاق مرة اخطأ ومرات اصيب
كسلا قالت قام للبلد ليو من قام اجمل حبيب
راح يعزى الاهل الحنان فى مصيبتا حلت قريب
بى عجل طار سرب القطا طاف عليها ديار اللبيب
فيها ما خلالو فد فج البحر زازاها تخريب
يا ما فيها اتبدل الحال قالوا من نعجتم ام ضنيب
وبرضو ود الجيران غريب ليها هد ومن دون سبيب
الله يا خلاق ياقدير فى الديار السووهو عيب
اصلو ما بخطر على بال من شناتو الشافع يشيب
وقالوا قاعدين رغم الحصل ليها لى انسان ما بنسيب
فيها قابل امو الحنون قاعدى فوق راس العنقريب
ليهو ردد فى شوق شديد دابو فات من عند الضهيب
وفوق ودى عصمة سرح مرح ومنو هبالو الهمبريب
ولما دا يسال للتمر شافو غرقان من النحيب
عنو ما خلاهو الشجر حتى للطندب والدليب
وعنو ما خلاها الحبوب حتى للحنضل والكريب
وعنو ما خلالو حشرات البعوض ناموس وكلتيب
وعنو ما خلالو حيوان الصبار كدسة وكلاديب
وعنو ما خلاها الطيور الدباس والبوم والبليب
القمارى حنيبنة بلحيل قالن انتلتبن تلتيب
وعنو ما خلالو ايقاع حتى للطمبور والدليب
وعنو ينده فى الصالحين حتى لى تاتيب وود قنيب
ويا مشايخ كسلا كدباس الهناى ادوه فرنيب
ويا مناصير قومو من جم المحلى حبيب الحبيب
وصرخة للشعراء بلا فرز الخلف وبركل وود رجيب
ويا الرجال الراسين جبال ابو قرون العند السهيب
الاهل وجيرانو القراب موسى ودعثمان والتليب
والحسن زرقانى فى الكاب وفى مناى ودنور القريب
قالوا يامقدوم قوم معاى الامر اصبح صح مريب
اسألو الشادى محلو وين شوفو وين العلم النجيب
أسألو الشادى محلو وين ليو ابدا مافى مجيب
فى النهاية سأل للقطار قال رقد ارتاح فى درديب
وقالو قال رايح للجنان مل وضع الدنيا الربيب
اتملت بالناس اللئام التقول ارنب تلقى ضيب
وفاتت الروح لى خالقها وكركبت دنيانا كركيب
وليها اقرو الفاتحة يا ناس الله للمضطرين يجيب
كان يريدك يادار قمر يا سلام مات منك غريب
يوم خبير الشوم جابو لى سارى فى زى سم الدبيب
ومالو يوم الاثنين كدى زيو ما شفلى يوم عصيب
طولو زى ليل الظالمين فيهو ما فى خاطرن يطيب
الوطن كلو حزن عليك انضرب فى الراس والنديب
ام تقاق انقلبت قلب لما طق الخبر الرهيب
فى ثوانى اتلموا الخلق من طرف شبان وشيب
خرجو ا حتى الدابو اتفطن شيعوك فى موكب مهيب
اللبيب قمرات دار قمر الحريم زيك ما بتجيب
وكنت زى توتيل فى الشموخ وزى برق عتباى ما بخيب
وما بتملو معاهو الحديث كالنسيم والغصن الرطيب
بى وجودو الكون كان رحيب لينا كشر وشو الكئيب
كان عقدنا وفجأة انفرط تانى ما بلقالو ترتيب
والله ياموت امرك مطاع ليو اى انسان يستجيب
ليو سائلين رب العباد القريب ابو فرجا قريب
فى جنانو يطيبلو المقام منهن يختار ما يطيب
وربى اكرمو من الحسان منهن ادو اكبر نصيب
والزم اهلو الصبر الجميل امو واخوانو والنسيب
والحديث عنك ذو شجون عنو يعجز اشهر اديب

المعذرة للتأخير من جانبنا

تسلم مديرنا الهمام

تسلم شاعرنا الكبير

وتسلم عباس الراقي

والرحمة والمغفرة لحبيبنا الغالي

التحية لك ود المناصير
من غيرك يتابع ويشجع
معك نرتوى بحبنا للمناصير
البلد الاصل التى تتجسد فى شعرائها الافذاذ
تسلم يا ملك

الشكر لكم ايها الرائعون
شيخ العرب ودحاج على التشجيع والمرور
نورالهادى عقيد سفير بلادنا ومحرك منتدانا على التشجيع والمرور