بيت المريسى

من طرف **نورالهادى** الأحد 24 يوليو 2011, 4:28 am

تقدم الزمن بخطوات مسرعة فترك الكثير من الاشياء التى أصبحت على قائمة التراث وتحولت لتجلس على متحف الزكريات أو تحفر اسمها على سطح الجبال التى اشتهرت بها المناصير فبيت المريسة احد أعمدة تراث المناصير فيوجد بهذا البيت مجموعة من الازيار مجلدة بخيش الجوالات ومجموعة من المصافى مصنوعة من سعف النخيل او الدوم واخذت الشكل اللولبى فى صناعتها ويوجد أيضا مجموعة من القرع ولكن سنتحدث عن الثلاثة الاهم .الاولى كبيرة الحجم وهذه تصفى فيها المريسة والثانية صغيرة الحجم تعرف بالشربوق وهذه توزع بها المريسة على الجالسين ,اما الثالثة تكون ثابتة داخل زير المريسة وهذه تستعمل لغرف المريسة الى المصفى وباقى المريسة التى تبقى فى المصفى توضع ايضا فى قرعة كبيرة او قدح دبكر كبير وهذا يعرف بالمشك وفى بعض الاحيان توضع فيه كمية من الماء لفترة ويتم تصفيتها مرة ثانية وهذه تعرف بالغباشة وتعطى لصغار السن ,واكثر أنواع المريسة التى اشتهر بها المناصير مريسة الزريعة وهيه عبار عن حب مريق تتم زراعته فى منطقة رملية بقرب النيل او بمعنى احر دفنه لفترة معينة وبعدها يتم تنشيفه وطحنه .قبل ما نبدأ فى طريقة صناعة المريسة وما هيه المناسبات التى تعد لها المريسة اتوقف هنا وأترك المجال لكل الاخوان للحديث عن بيت المريسة وعلى رأسهم قاموس تراث المناصير الباشمهندس صديق عبدالله ولكن السؤال الذى يحيرنى هل المريسة كانت عادة ترفع صاحبها عند قومه ام هى جهل ؟ولكن الحمدلله لقد ترك الناس هذه العادة المحرمة والتزموا طريق الدين .

من طرف **اميره الحومرى** الأحد 24 يوليو 2011, 6:21 pm

سلام اخوى نور الهادى
دا شنو ياخوى نحنا راجنك بهناك تقوم تجيب لينا مريسه وتجى
الله يستر رمضان على الابواب
الله يستر الجماعه ديل ما يشيلوا مريستك دى ويمشوبيها الباسقات

من طرف **ود القيايل** الأحد 24 يوليو 2011, 7:07 pm

سلام اخونا نور الهادي
واكتر مااضحكني كلام اختنا
اميره الحومري
انا من زمان حاسي انو نور الهادي دا شايل من سماحة ماضينا الجميل جغمه كبيري
ولابس توب اجدادنا ملفحه
وكمان ركابته خيزرانه مضببه
انا اقرأ واضحك ؟
اقرا و مابتمطق
كمان جاء تعليق بت القبائل اميره الحومري من الضحك نامن عويناتي طششن
الله يهكر العدو
ياجنا العنوان دا جبتو من وين ؟
خالد عابدين قال مشيت البلد وبعدين العصير كدي وانا نازل شفت لي صبره ؟ جريت فوقه كدي وقلت الصبره ؟؟؟؟
وقفت واتلفتت وقالت ههه دا منو العرفني وماعرفتو؟ ياحليلك ياجنا الغربه اخدتك مننا ؟
دحين انت يانور الهادي الليلي جبتها ضنبها يكركب ؟
كلامك دا يخلي الزول يغبش ؟؟؟؟
زمااان زمن الزمان زين والشعر مغطي الاضنين
عندنا طهور جابو الجراري مليانه تبقبق
وحرم وعلي الطلاق واقعي قرش ونص
والصفقه مدوري
والله ليل ليل ولينا
قام واحد ينقز بفرد كراع
زولنا داك خاتي قدامو جردل بيض ( الجابو شنو ماعارف)
قال انا خايف الزول داااك الرافع كراعو مايختها الا فوق جردلي دا ؟
فعلا ماكمل كلاموا ؟؟؟ تسمع زيط
الجريدل بما فيهو اتفجخ ؟
والتلقاهو راكب فوق حمارو مقبل لاوراء
والتلقاهو يكورك ارقد ياعيش انا جرابك
والشفع يضحكوا
والكبار يجعروا
غياتو حاجي تمخول ؟
لكن الناس طيبين ياجنا ؟

الاخ الهادى –

اولا دعنا ان نقول (المريسى ) لتأخذ مكانها –

وقد كانت عادة سائدة فى المجتمع المنصورى ومعظم القبائل شمالا –وعندنا اصبحت اشبه بثقافة مجتمع او عادة اجتماعية –استخدم المجتمع ما ينتجه من محاصيل من زرة وتمور فى صنع هذا المشروب –وكما هو معلوم فان المريسى مغذية جدا وغنية (بالكاربوهيدريت)-ولكنها بالطبع حرام –ويمكن ان يكون المجتمع حينها استفاد من البيئة واستعان بها للتغذية والتسلية وقضاء وقت الفراغ وقد تكون لنسيان الهموم اوللمساعدة على اداء الاعمال الشاقة-

وقد تحدثت بالتفصيل عن كيفية تناولها او احتسائها وصنعها ايضا –

اما من ناحية اجتماعية فقد كانت المريسى ضرورية فى اى مناسبة خاصة فى البوش (الاعراس)-وفى السبوع - والطهارة وحتى فى الفزع –فلابد ات تعد (جرارة المريسى) وتوزع على البيوت المعدة للضيوف والتى توزع بطريقة معينة ومعروفة –ولابد للعريس ان يمر بنفسه لكى يطمئن على جاهزيتها –

(وان بقيت ماسويت المريسى الغنا بجيك)

اما فى بيوت المريسى يكون الانس والسمر والغناء والصفقة مع الضرب اوالدق على صناديق الشاى والتى غالبا ما تستخدم كمقاعد بدلا من البنابر-وبالنسبة للغناء كانت تردد اغانى كثيرة على رأسها –الله هووى –

وهذه البيوت او الاماكن التى تعد لشرب المريسى ليست بالضرورة متزامنة مع البوش ولكن فى الايام العادية –اما يوم السوق فبرنامج ثابت –

ثم ظهر ايضا النبيت ولعله مأخوذ من (النبيذ) وهو ايضا من البلح-غير انه اخطر وسكرته قوية وليست تدريجية كالمريسى –

قال احد الشعراء متخذا من اغنية الله هوى قافية :

داير اقيل وانا دار ابيت

ودار اضوق سكرك يالنبيت

نعود للمريسى وان الناس كانوا لايرون انها حرام جهلا بل كادت ان تكون ثقافة وسلوك مجتمع –ونحنا كنا صغارا نجبر على شرابها –واستمر هذا الجهل حتى اتى شيخنا على الحسن الاديرقاوى والذى بين بوضوح ان المريسى حرام فلم يتقبل الناس تلك النصائح فى البداية وكان الرد المعروف لاحد الشعراء-:

التمر ماحرموا ودحجازى البنقلب تور

دا بلايا ربنا بلابو ناس سور

وطبعا اراد ان يوضح ان شيخ مشايخ المنطقة ود حجازى رغم كراماته لم يذكر لهم ان المريسى حرام

الا ان الناس وبحمد الله اصبحوا اكثر وعيا وانتشر التعليم واختفت تقريبا هذه العادة-

ود القبائل دا ظاهر عليه خبير دولى-

--جاييكم راجع-----------

شكرًا نور الهادي وواصل تميزك

ياجماعه ود الروفاب
روفاب الدغفلي ولاروفاب ام بلجي
وكلاهما وجهان لعمله واحده

روفاب النعوفاب يا ابو سفيان.ز
اما أهلكم هم يا ابو سفيان روفاب الدغفلي وروفاب أم بلجي..
.......................
عايزنك ياالهادي تكلمنا عن ( بيت التمر) بتاع النعوفاب

من طرف **نورالهادى** السبت 15 أكتوبر 2011, 4:41 am

أشكر كل الذين زاروا بيت المريسى وعلى رأسهم الأخت أميرة ويا أميرة والله شئنا ام أبينا فبيت المريسى أحد أعمدة التراث المنصورى وكان زمان اى عرس فى المناصير لازم تكون فيه مريسى وكل المناسبات حتى الطهور وحتى الفزوعات وحتى سبوع العريس وفى بعض الأحيان السمايات ولكن الحمدلله انتهت هذة العادة .

سأرد على كل الأخوة برواقة .

ود الأخت لك التحية ولبنت الأخت الموضوع يحكي عن تراث أهلنا المناصير وإنها كانت من العادات الغير حميدة خليك من حرمتها وكنت مستغرب وأنا أكبر منكم كيف بأهلنا النعوفاب الطيبيين المسالمين يحافظون على هذه العادة والشئ الجميل أنه الناس كانوا مؤدبين وطبعا أهلنا النعوفاب كان بيتهم بتاع المريسة في التمر جنب الساقية احتراما للعوائل والحرم في منازلهم فوق وكنا نسمع أغانيهم وتمتمة (الطرشان) بصوته المميز وفعلا هذه كانت من أماكن الترفيه وصدقني مثل أهلنا النعوفاب لا يقبلون على شئ فيه مضار للناس (ولنترك حرامها وحلالها ) جانبا ونقول أن هذه من تراث المناصير وتحتاج للدراسة وبحث كثيرا وممكن تستخدم فيها المقارنة كدراسة مقارنة بين الأمس واليوم وتغير العادات ووعي المناصير وهل جاءات عادات أحسن منها وغايتو ربنا يعينك ونشكرك على إبداعاتك من على البعد .

بيت المريسى

بيت المريسى

رد: بيت المريسى

رد: بيت المريسى

رد: بيت المريسى

رد: بيت المريسى

رد: بيت المريسى

رد: بيت المريسى

رد: بيت المريسى

رد: بيت المريسى