القصة ما قصة جنوب القصة قصة جيوب

الفاتح جبرا....ساخر سبيل

أول أمس إنفصل (الجنوب) .. هلل البعض لإنفصاله .. قال البعض (يغور في ستين
داهية الجنوبيين ديل هم الأخرونا ) !! هكذا قام البعض بتحميل الجنوب مشكلة
فشلنا (وحالنا المايل) الذى لا تخطئه العين !
كما إستمعت إلى إمام أحد المساجد يقول فى خطبته : بعد انفصال الجنوب لم يعد
هنالك عذر لعدم تطبيق الشريعة ! وكأن (الجنوب) هو من كان يعطل أحكام الشرع
!
العبد لله يقول بإنو القصة ما قصة جنوب .. القصة قصة (جيوب) .. قصة ضمائر
.. قصة تطبيق لمبادئ العدل والنزاهة والمساواة تلك القيم التى أرساها ديننا
الحنيف .. وعشان ما نكون بنتكلم (سااااكت) أقرأوا معى خبراً نشرته الزميلة
(الصحافة) قبل أقل من شهر يقول :
هدد مواطن تسلق صهريج المياه بمستشفى أم درمان بأن يلقي بنفسه من أعلى، اذا لم يحضر والي الخرطوم ويحل مشكلته.
وعلمت «الصحافة» أن المواطن الذي يقيم بمنطقة الثورة الحارة «75» حضر أمس
الى مستشفى أم درمان بغرض اجراء عملية في الفخذ لابنه البالغ من العمر خمس
سنوات، وبعد الفحص رفض الطبيب المسؤول أن يمضي في التقرير بحجة أن والد
المريض عجز عن دفع مبلغ رسوم العملية «مائة جنيه» ،ما أثار الغضب بداخله
وتسلق صهريج المياه، وهدد بأن يلقي بنفسه من أعلى اذا لم يحضر والي الخرطوم
ويحل مشكلته .
وأكدت المصادر ، أن الشرطة هرعت الى مكان الحادث بعد تلقيها بلاغا، وأقنعت
المواطن بالنزول، وأحضرت له التقرير وعليه امضاء الطبيب وبعده اقتيد الى
قسم الشرطة ودون بلاغ في مواجهته بتهمة الشروع في الانتحار.
وتعالوا معى لنقرأ ما صرح به (مؤخراً) السيد وزير الماليه لرؤساء تحرير بعض
الصحف الساسية اليومية بعد أن تمت إماطة اللثام عن دفع الدولة لمبلغ
(32.391.70) دولار أمريكي .. (إثنين وثلاثين ألفاً وثلاثمائة واحد وتسعين
دولاراً وسبعين سنتاً) وذلك لعلاج (طبلة أذن) إبنه (عمر) بإحدى المستشفيات
الأمريكية لنقرأ (إفادات السيد الوزير) يعقبه تعليق (العبد لله) .
الوزير : لم أطلب من جهة دفع فاتورة علاج ابني !
العبدلله : مصدقنك يا سعادتك .. الحكومة في الحاجات بتاعت المسئولين الزى
دى بتشتغل (فل أتوماتيك) يعنى يمرض ليك زول تلاقى الفاتورة (منها وليها)
إتدفعت على طول
الوزير : قطعت تذكرة السفر لابني ووالدته بالدين
العبدلله : يا حرررام ... بالله إنتو زينا كده برضو بتتزنقوا وكمان بتتدينوا
الوزير : من يملك دليلا على تورطي في شبهة فساد فعليه التوجه إلى رئاسة الجمهورية وتقديم شكوى ضدي
العبدلله : العفو يا سعادتك .. مش ولدك ده مشى (القمسيون) الطبي وقالو ليهو
لازم تسافر عشان مرضك ده هنا مافي ليهو علاج وكلو شئ ولا (طبل أضنين أولاد
المسئولين) !
الوزير : إن الوزارة هي التي طالبت بدورها بدفع قيمة فاتورة العلاج باعتبارها حقا كفله القانون ، لاسيما أنه كان في مهمة خارجية.
العبدلله : دى الوزارات وللا بلاش .. الباشكاتب يمرض الوزارة تطالب بتسديد
فاتورة علاجو .. المحاسب (عمل ليهو عملية ) تطالب بدفع قيمة علاجو ..
والتصديق يطلع علي طول بدون أى مساسقة أو لوائح أو قوانين ! وبعدين يا
سعاتك (لا سيما أنه كان فى مهمة خارجية ) دى دخلها شنو فى الموضوع ؟ عشان
نفهم لأنو مرات فهمنا بيكون تقيل شوية !
الوزير : لم أطالب الوزارة بدفع الفاتورة على الرغم من أنه حق كفله لي القانون !
العبدلله : أهو دى أنا ما فهمتها .. إنتا وزير على العين والراس .. لكن
معليش (ما ظنيت) يكون فى (قانون سائب) بالشكل ده ! يعنى عشان إنتا دستوري
يقوم المواطن الغلبان بدفع ليهو ما يعادل (مية وعشرين مليون جنيه) عشان
(ثقب في أضان ولدك) ؟ إنتا ما شفتا (الزول الطلع الصهريج؟) طلعوا عشان كم
جنيه؟
عزيزى القارئ : كما أن السيد وزير المالية عندما واجهه ذلك الصحفي بالزميلة
السودانى بذلك العقد الملياري الذى يخص السيد مدير سوق الأوراق المالية لم
يناقش موضوع العقد بل طلب من الصحفى أن يدله عن مصدره تاركاً أصل الموضوع
متحدثاً عن (هامشه) .. (على طريقة ده ما مهندس ده فني ساااكت) .. ها هو
الآن السيد الوزير يصرح بأن أحد المستشارين يقف وراء الموضوع من أجل
إبتزازه (ياخى يقيف ولا ما يقيف ده ما موضوعنا) موضوعنا هو هل يكفل لكم
القانون علاج من هم فى كفالتكم بهكذا مبلغ وأنتم شخصياً تدعوننا لربط وشد
الحزام تقشفاً وأكل (الكسرة)؟ وهل إلتزم سيادتكم بأخذ التصديقات اللازمة من
الجهات المعنية لهكذا علاج؟ وهل إستوفى إبنكم كافة الإجراءات المتبعة التى
يسمح فيها العلاج بالخارج ومن ضمنها تقرير (القمسيون الطبي) وهل لو أن
إبنى (ناجى) حدث له ما حدث لإبنك (عمر) سوف يتعالج بنفس الطريقة لا سيما
وأن العبدلله ربما يكون حينها في مهمة رسمية ! (أو كما قال) !

كسرة
المواطن الطلع فوق الصهريج قبضت عليه السلطات وتم فتح بلاغ له بتهمة الشروع في الإنتحار .. المصيبة إنو يقوموا يغرموهو .

لا حول ولا قوة إلا بالله
دي اسمها موت الضمير ..
وبرضو امريكا بتكيل بمكيالين ؟ طيب البتعملوا فيهو دا شنو ؟
والله الجماعة ديل يعجزوا ابليس ذاتو ؟ والشيء البسو فيهو دا إبليس ما يسويهو
ياللا بلا مشروع حضاري بلا لمة
شكرا عبد الرحمن
شكرا الفاتح جبرا

فعلا القصة قصة ضمير والضماير بتاعت المسئولين ديل ماتت زمان ومااظن تحيا تاني
شكرا ودالمناصير على المرور

يا سلام يا سلام يا سلام ... وكما يقول الفنان البعيو في أغنيته المشهورة - ويقولون انه عندما تأتي الساعة 11 مساء مواعيد نهاية الحفلات في الخرطوم يقوم يطالع في الساعة ويكرر مرات ومرات بحسرة يا سلام ياسلام

والله في الحقيقة انه مآساة كبيرة

شكرا الأخ عبد الرحمن بن قمر الدين على اختيارك لمثل هذه المواضيع المضحكة وشكرا لود جبرا ونحن الواحد ماعنده نفس عشان يقرأ كل الجريد


لله في امره شئون

تقبلوا مروري