قصيده من امرى الجديده

من طرف **nader nor elhadi ali** الأحد 29 مايو 2011, 3:10 am

يالمقدم ربك يعين فى خلاك اتوكل زرع
شلته تيرابى وقم سدر وفى حشاك قسمتو وزع
ومره بى مصروف العيال ومره افتش ناس الفزع
وفيك تميت البوغه تب وللتقانت الواقعى رفع
وابديت راجى الرى يجى وطول نهارى انا حارس الترع
اجرى لى اب عشرين واجرى صاد مره اصل وكم مرات اقع
وفى وقعتى اتزكر النيل لما فاض فات القيف طلع
شربت النخلات الشموخ والصبيط اتنه اتفدع
وبى فرح خضرت الجروف ولوبه هايش دابو اتفقع
والغنيمات شبعت خلاص وطيرنا فرحان غنى وسجع
ولما من الوقعه اترفع فى كلاى حسيت الوجع
والعيون دفقن دمعتين وبطنى طمت وفجاه صدع
شوفى حالى اتغير خلاص صرت اسود وراسى انصلع
وبالشواليت امشى واجى ومن مسافه تشوف الضلع
النهار يكمل فى الخلاء وبرضوا القى اليل اتفرع
وارجع البيت مليان هموم ياكريم ياربى ترفع
وعن خشيم الباب الصغير يمه ابوى يهو داك رجع
وبى حذر تسأل امهم انشاء الله مويه لقيته وقرع
داير ارد وغلبنى النضم لى تحت دنقر واتفقع
وبى طريف التوب القديم قشت الدمع السال ترع
ارفع ايديك اسال كريم ما حصل لى عبدو ضيع
حالنا للكافر مابسر خلى لى زول كبر ركع
\والله اسلامن ماصحيح كلو محشى خرافه وبدع
كنا عايشين امن وامان جانا محتا بينا انزرع
سوى فينا سياسه اليهود وكيف اجاده وفيها ابدع
فرق والوالد والولد ولى نويره الفتنه ولع
دقه طبل الظلم ورقص ولى غنا الشيطان استمع
والحقوق ضاعت وانتهت قبل توب الحق اتقلع
كنت متفائل كل خي الا خاب ظنى واتفجع
وصرت محتار اعمل شنو صبرى ستف زاتو ونجع
فجأه صوت العز والشموخ من دواخل الوجدان نبع
لا تنكس راسك تزل وانت زول فيك الاباء انطبع
لا تحاول تحنى الجباه واوع لى غير الله تركع
ده النخيل علمك الثبات موتو واقف قبال يقع
ديل بشر دايرين يزلوك بالعطش والجوع والجزع
جاء الوزير غير كلو شى وفى ابادتنا خلاص شرع
لا شجاعا ينصف الحق لا رحيما عينو تدمع
كاتب اسلامو على الورق من سياسه اللوبى يرضع
والله قال بى قولك تقول او مظالمك بيها تدفع
وبرضو ماخايفين النموت لو خلاص الرزق انقطع
بس سؤال مطروح للجميع هل زمان الرحمه ودع
وهل صحيح انعدم الضمير ومافى زول فى حالنا بشفع
ردو محتاج الرد سريع وفى الشرع خلهو ...