فوق دبرته مُحمّد يشيل

بعد نشرنا لقصيدة النجومي توالت علينا التلفونات معجبين بهذه القصيده الرائعة ومعددين لماثر الر جل فقلت لبعضهم أكتبوا رؤاكم بالمنتدي فقالوا لي (نخاف) أرجو أن لا تكون نخاف هذه أصبحت منهجاًعند المناصير الذين لم يعرفونها في سابق تاريخهم ..أتصل بي أحدهم وحكي لي قصته مع النجومي فقال كان بتنا عياني شديد وحددوا لنا عمليه في مستشفي هواشا بمبلغ 11000 أي حيدعشر مليون ولملمنا من جاي ومن جاي ومن الأهل عشرة مليون وقابلنا النجومي وحكيناله الحاصل وطوالي قال لينا أول حاجي نمشي لي ناس المستشفي ينقصونا شوى وفعلن نقصونا خمسمائه...أها فضلت خمسمائه قالنا كدي اللشوف ماهيتي لو جات فما كان منه الا ان استلم الماهيه وسلمنا لها وحلف منها وقالنا بعد دا فضلكن المواصلات وبكرة بجي اشيكن للمستشفي وفعلاًجانا الصباح وشالنا للمستشفي فقال الشاعر أبو القاسم في الرد علي القصيدة السابقه


ود فضل مليونين سلام ----يا رفيق القول والزميل
دار أقول زيك مسادير ----في النجومي الضل الضليل
دار أكون زيك في ضراه----همبريبه يحلي المقيل
الا قول لي أبدا من وين----في طلوع الجبل الطويل
مافي جيهي نقول تنطلع----أي جانب واقف عديل
اللسان اتلولوعلي----والكلام مني شرد عديل
قال لي دار تكتب بي شنو----الا يبقي مدادك النيل
ان كتب لي أبد الابدين----في مُحمّد قولك قليل
ان جمعت الشعراء ومشيت----في مُحمّد ما بتمشوا ميل
زي مُحمّد فلتة في الناس----في الشباب لا ند لا مثيل
زي مُحمّد معدوم شبيه----حتي لو عزلت عزيل
نوع مُحمّد معيارو خاص----الطبع والوزن التقيل
كيف هو زول أهله مع النجم----يبقي زي الناس ..مستحيل
طينة معجونة تقي وعفاف----خالي قولة قال ولا قيل
كم برك شال حمل الضعاف----ما بهمو خفيف كان تقيل
ما شكا وقال مليت كفاي----فوق دبرته مُحمّد يشيل
جيبو حق الناس كلهم----بيتو مفتوح ليهن سبيل
لو نزل مطرو علي مكان----منو كل الوديان تسيل
كرمو ماهو كرم وجيهات----حاشا مو دايربو طبيل
زيو لاشفت ولا سمع---- الا كان في حاتم قبيل
قمة.. لو جدعتو يديك----الثمار زي طبع النخيل
زول يمد لك راتب جناه---وفي سخا يسمح لك تشيل
ما وقف بالمال وحدو---- تاني جاب عربيته ترحيل
جابني للضفة بعد غراق----في الوضوح صار لي الدليل
اللقيف لي هنا يا اللبيب---هو الاصل لا غير لا بديل
ما بجازيه حديث سطور----حتي لو سويته ترتيل
هو تاج قبيلة من المكرمات----فيه كل الاوزان تخيل
أسأل المعبود يحفظه----الحفيظ ربنا والكفيل

قريبي دا بدري كان زول واصال وإجتماعي لكن من بارا ناس السدود غتس تب وإتحدر
الكلام السمح الإتقال فوقو ده أظن كان بدري
ياود حبيب
تشكر على الشعر الرائع

أنت ذاتك زول ما هين يا خالد وقريبك زول ما هين بالرغم من اختلاف الرؤي لك ودي

الشيخ الوقور محمد حبيب التحية لك ولضيوفك وللشاعر ابوالقاسم والتحية للارباب الدفعة النجومى ,فأنا وانت لقد زاملنا النجومى بمدرسة ابوحمد الثانوية فالنجومى معروف للجميع بأنه أول واحد يكمل مصاريفه فى الشلة فكان لا يهتم بالمال ولا بالشكليات فكان كل همه ان يسعد الآخرين بالرغم من انه ليس من اسرة غنية ولكن نجده نقش اسمه على صخر الزمان كى يبرهن للناس معنى الكرم والتواضع والوفاء ,وكان يلفت الانتباه بعفويته أحيانا وبخفة دمه حينا آخر ويجذب الانظار أكثر بأدبه وخلقه الرفيع فهنيئا لنا بمعرفة هذا الرجل وبزمالته فى المدرسة وفى نادى السكة حديد ابوحمد .

أخي المبدع نور الهادي لك ودي

أخونا النجومي هو أخو أخوان بالرغم من أختلافي الشاسع معه في الرؤيا حول قضية أهلنا المناصير في حين أري منذ البداية ان يتولي أمر هذه القضيه من ابناء المناصير من ليس لهم علاقه من اي نوع مع الدوله لا الذين يتولون مواقع تنفيذيه ولا مجلس المؤتأثرين لعلاقته بالدوله ..لان ذلك يجعل الدولة ليس لها يد علي المفاوضين.. في حين يري هو أن البقرة يطلقوله جناها

أما الذي دعاني لنشر هذه القصيدة وسابقتها هو



أولاً: لنشر قيم التسامح والتصافي...._ بالرغم مما أصابني شخصياً من الطرفين_



وثانياً: لأن القصيدتين كعمل أدبي من أجمل ما قرأت من أدب المناصير الحديث

شيخنا محمد حبيب ... سلام .. ورمضان كريم

والله بالرغم من أني ما بعرف صاحبك دا ... لكني أقول قاتل الله الحاجة

وقلبي معاك مما أصابك من الطرفين وربنا يعينك فأنت أكبر من رذاذ كلمات أو أقلام

وإن كان عندي رأي في الشعر المصنوع لكني أقول لك جزيت خيرا

أستاذنا ود المناصير لك ودي ورمضان كريم

وانت يا ود المناصير أول من رفعت راية التسامح ونحن جينا قعدنا معاك في ضلها

محمد حبيب بشير هبرم كتب:أستاذنا ود المناصير لك ودي ورمضان كريم

وانت يا ود المناصير أول من رفعت راية التسامح ونحن جينا قعدنا معاك في ضلها

وأنا على عهدي ... شيخنا ... ولكن كيف الوصول إليك وإجبارك هكذا لإخراج كل ما عندك ؟ كيف .؟ إستفزازا ؟ أم إثارة ؟ أم حناسة .؟ أم رجالة ؟

غلبتنا كل الحيل قل لنا متى وكيف نستفيد منك ؟

حتى الآن الشيخ محمد حبيب الذي أعرف لم أجده .. إيه رأيك ؟

وآسف جدا لهذه العبارات فمثلك لا يخاطب إلا بجميل القول وحسن اللفظ

لك شكري وتقديري

يا ود المناصير بالمنتدي أراء جيدة نتفحصها ونستفيد منها... أما كتاباتي وطيها حار شوية وكتا ما جا.. ولو تذكر حينما كتبت في موقع عسكوري السابق شبكة المناصير سلسلة مقالات (المناصير ضبابية الرؤية ووضوح الهدف) سارداً لبدايه النضال وواجهته بأعتباره أحد أعضاء اللجنه ببعض الاخطاء التي وقعوا فيها أوقف المقالات !!!! وبعدها كما أوضحت في هذا المنتدي من قبل آليت علي نفسي ان لا أكتب عن السياسة في أي تجمع للمناصير لذلك تراني أهرب للتراثيات _راجع بوست قصائد متفرقة_ يا أستاذنا دعاني لهذا السرد الحاحك المتكرر وأنت رجل غيور علي أهلك وبلدك.. ولكن أعدك بعد زوال الضبابيه أن أكتب ما عندي للتاريخ فأنا شاهد عصر علي كثير من تفاصيل القضيه... ولكن الان دع الشباب يكتبوا رؤيتهم... وارجو ان يكون هذا الكلام ارضاك يا زعيم.. أوع يكوني حالي وحالك كحال النكته

اتنين مساطيل راكبين عربيه بشارع النيل بالليل واحد سايق وواحد راكب ورا وفي شجرة مضروبه جير والسايق قايلها شرطي مرور .. دز وقف ولما تبين أنها شجرة اتحرك وضحك.. بعد اتحرك صاحبه الراكب ورا قال له

التافه دا قاليك شنو

لك الله يا شيخنا ... وأنا أعرف أنك تأذيت كثيرا ... في نفسك وفي مالك وفي عملك وفي كل متعلقاتك .. وهذا لأنك صاح ..

وما دام ما بينك وبين الله عامرا .. فدعك من الناس .. فالله وحده القادر على جعلهم يعرفون قدرك وقيمتك

ثم اعلم أخي .. مهما كانت الإبتلاءات فإن العهد واحد والوعد واحد .. فالله إذا أحب عبدا إبتلاه

وتحضرني قصة لست متأكدا من صحيح روايتها ولكنها تقول :

إن صحابية أصرت يوما على زوجها ان يرحلها إلى بيت والدها وصممت على ذلك .. ولما سار بها على الطريق .. تعثر البعير فوقع الرجل وانكسرت رجله .. فعادت به المرأة لمنزلهما وقالت الإن تأكد من إيمانك

ولعل في القصة أن الرجل ظل سنينا بلا مرض بلا إبتلاء لذلك شكت الزوجة في إيمانه ولما كسرت رجله رجعت به إلى بيته

واعلم أخي إن في الإبتلاء خير كثير

كذلك أمر آخر لابد من التذكير به وهو أن لأهلك عليك حق .. حق النصح والتناصح والتواصل

أخي .. نحن لا نريد أن ننكأ جراحا ولكن نريد أن نؤسس لحياة جديدة ننسى بها كل مرارات الماضي وأناته

لك شكري وتقديري

أشكر ك ود المناصير وأعتز بتعليقك في هذا البوست... وأنت تجعل من الادب محكمة تديرها لصالح قضية أهلك المناصير ولكن يا ود المناصير نحن مرقنا من موضوع البوست والنكته صدقت فينا!!!! و يا خي النجومي دا مي ود خالة ولاد بروي وعز الدين ضقولي وانا لي رأي قديم الشعر رجيلاب ... وأظن ولاد بروي الشعر دا جابدنهن أخوالن

لك شكري وأنت تصنع من عصير شخبتتنا دي شربات لصالح أهلنا المناصير

نعم نسمع بهذا الرجل الخير.. من على البعد.. وهو يستاهل كل خير.. نعم تربطنا به صلة قرابة من جهة الضقولة ومن جهة النسب من جهةالنعوفاب.. وهو يعرفني من على البعد وأنا أعرفه.. بحكم معرفة اهلنا..ولكني ما حصل شفته ولاشافني..والرزاز الذي اصابه من قضية السد. لا أعرف عنه شيئاً بحكم بعدي عن القضية كلها، بحكم ظروف الغربة.. لكن نسأل الله أن يوطئ اكناف القبول لجميع فئات أهلنا.. نحن ناس تصالح.. وجمع الشمل لكل أهلنا بجميع لونياتهم..
والقصيدة نمط عالي في المدح..

شكراً أستاذنا الباشمهندس صديق المنصوري وأنت فعلاً راجل زواقة ....

وطبعاً نحن دايرين ثقافة التكافل دي ما تنقطع عند أهلنا... لانه والله في ناس لما يجو البلد دي محل ما يبيتو ما يلقو!!!... وأنا أضرب لك مثل بي نفسي.. أنا سنة1986 أمتحنت الشهاده من ابوحمد وطوالي سطحت فوق ضهر القطر لمان دخلنا الكدرو الساعة 10 مساء نزلت في الكدرو عشان ما أدخل الخرطوم بالليل.. مشيت حمت الجوامع عشان ابيت فيها لقيتها كلها مقفلي.. بت في السهلي القبلة السكة حديد.. بالليل لقيت مجموعه من العساكر يجرو في من كرعيني قايلني حرامي لما قلت لهن أنا نازل من القطر وما عندي محل أبيت فيه ومابعرف زول في الخرطوم ماصدقو... الا قت لهن الحمد لله الانتو جيتو عشان تسوقوني معاكن محل الشرطة... والله يا صديق دي حصلت لي أنا شخصياً عشان كدي عاوزين ننشر هذه الفضائل

جميل يا محمد حبيب في هذا الزمن ان ( يمسك )الزول في اصحابو قوي !!!

تابعناك وانت تستميت دفاعا عنهم وعن آرائهم

منك نتعلم دائما الجديد

اخى محمد حبيب
قصائد فى قمة النظم
وانت رجل رائع كما عرفت من هذه المداخلات
فربنا يكثر من امثالك ليكون زادا لاهلهم من اجل التراحم والتوادد
تقبل المرور

عباس محمد.. الرجل الزواقه.. أقرأ تعليقاتك فأري فيها الحكمه والنبوغ والاهتمام بالتراث لك شكري وخالص ودي وأدام الله التواصل بيننا

الاخ هبرم

سلام

يا اخي امرق من الجكنوقة دي وتعال في الواسعي عشان الناس تلاقيك وتستمع وتستمتع بطرائف البادية

abuahmed كتب:الاخ هبرم

سلام

يا اخي امرق من الجكنوقة دي وتعال في الواسعي عشان الناس تلاقيك وتستمع وتستمتع بطرائف البادية

لكن يا قريبي ابحمد يلقوك وين
لك شكري
ناس مشكنين بلحيل

يا سلااام ....يا ابحمد والله بعد مرات الواحد فعلاً الزمن يسرقوا كما يقولون ... في البداية أنا قلت ...سنة دي حقت المشاغلة الزمان ديك ...ههههه ....لكن لمان عاينت للزمن لقيته قررررب سنه...
لك العتبه يا رائع