قصتي مع الثوار و كتائب القذافي

والله واحشنا عديل كده يا ود القبائل غيبة طويلة حمد لله على السلامة


تحياتى
ابو مصطفى

ود القبايل حمدا لله على السلامه
والخلوة كانت فاقدي برادك أب لبنا مقنن

منتظرين تكمل باقي رحلتك

ياجماعه ود القبائل متين راح منكم بعيد الزول ده اصلا ماغاب ودايما حضور فى الملمات وقاعد وسطكم وتلفوناتو اصلا مانقطعت مره بالسودانى ومره زين ومره ام تى ان واصلها دى مشكلتو يغير الارقام بالرغم من انو ماقاعد يتعامل بالشيكات وماهو مديون
اخر ظهور ليهو فى الملم الكبير الجمع الناس كلهم بجميع الوان الطيف السياسى والاجتماعى حقت المناصير
ماهو زول واصل ومؤصل وزول اصل فى لحظه هو معاكم

سلام لكل الاخوان
الريس خالد
ابومصطفي
ود البلد ربنا يرد غربتك ياجنا
ود الفقراء سلاااام عليك شايف وترتك مقبلي كُتر اولا بشكرك كتيييير علي نضمك لكن ياود الفقراء انا مامشيت البكانات البيتتكلم فيها دي وياريت نخطر ونخضر
وشايفك زي ملخبت بيني وبين زول تاااني
الايام الجاي بي تثبت ليك كلامي دا
بعدين انت بدل ماتسعلني من الخروف القلت اجيبو الاحتفال الجاي تقوم تصاقرني
المره الفاتت انت انكربت تب وماقصرت برضو المره دي افتل فوق حبلك وانا مامعروف اقدر اجي ام مااجي لكن بأذن المعبود الخروف بيصلك جيت ولاما جيت بيصلك بيصلك دا اول هام
تاني هام قصتي مع الثوار وكتائب القذافي الامنيه الفترته القضيتها معاهم فيها الكتير زي رحله اخونا نور الهادي ربنا يمد في ايامه ويجيبو راجع
داير افتل فوق حبلي دا الضيق خلو براي امبقت الظروف اتحسنت اجيك محل ماك قاعد واعرفك بي نفسي
افو انا ود القبايل البقوم مع الفجراوي اكابس الخلوه بالبراد ومعرفة الرجال الناس تفتش فيها في خلا ابوحمد بالكراكات ( اقصد الدهب)
تخريمه
مره ياالحاج في المنتدي بتاعنا دا عضو ظريف عجبو المقطع بتاع ( اقوم مع الفجراوي اكابس الخلوه بالبراد ) الظاهره كلمه الفجراوي راحت عليهو ومالقاها كتب " ازيك ياود القبايل البي تقوم مع الدغشاوي ؟؟؟؟
ضحكت
تلك هي دعوتنا وذلك هو المراد ود القبايل بسمته صدقات علي اوجه القادمين الي المنتدي المناصير بلدي وفاتحي صفحاته التي تموج حبا وألقا لوطن احبه الرفاق
بواصل الفواصل بأذن المعبود في العنوان المرصود
ود القبايل

ود القبايل ده زول نادر

افو ريحانة منتدي المناصير بيحالو ودابوحنه سلام يابابور بلدي المدوره لاوقود لاغاز
يعني ممكن تقول اتماتيكي اتماتيكي) كما ذكر عادل امام لخاله في مسرحيه شاهد ماشافش حاجه
لك التحيه ياعلم بلادي الرائع وجعلك المولي دخري لبلد تتاوق لأبنائها خجلا

اول بدايه رحبو بينا شديد وزي ماعارفين الزمن داك كانت الحكومه دايخي الدوله تعباني تعب الموت الرغيف الماقمت الدغش الجوع يضربك تب والصفوف خيوط
دا كان وضع بلدنا الزمن داك
لقينا الوضع مختلف (في ليبيا) بلد تتترع في هواء الله
المهم قالو ياالاخوه السوادنين ( قاعدين يقولو كدي ماني غلطان في الكتابي) بدنا اول شي نتعرف علي الكتاب الاخضر رمز ليبيا والحقيقه كل المباني تلقي مكتوب فيها مثلا
لاحياة لشعب يأكل من وراء البحر وتاني تمش شوي تلقي مكتوب السلطه و السلاح بيد الشعب وتاني تمش خطوتين تلقي مكتوب ان الصحراء لاتنبت العشب والكلاء انما تنبت القيم والمثل الاسلاميه العليا وتاني تمش الاستاذ بتاع الكوره اظنه استاذ بنغازي الدولي( الجنا داااك مونتاري نجيض في الكوره يمكن يعرفه اكتر مني) تلقي مكتوب علي مدخله علي الجماهير التي تجلس علي المدارجات ان تقتحم الملعب وتمارس حقها المحروم
غايتو وسخوا اي حيطه واقفي
المهم بدأ الخروبي في مدح السودان والسودانيين عشان يكادن جدوله ومويته ماتلقي البعترلها ماخلي شي الامبرياليه الصهيونيه والجماهيريه الليبيه الاشتراكيه العربيه العظمي حاجي تمخول ( مره صدام حسين الله يرحمه في احدي اجتماعات الجامعه العربيه قال اشكر الاخ معمر قائد الجماهيريه الليبيه العربيه الاشتراكيه العظمي قال لعلي مانسيت شي اخي معمر هاي المرجله في الاسماء )
اقيف هني وبجئ اتم الباقي واوريكم كيف وقف الخروبي محيئا السودان عندما رد عليه صديقي ضاربا بالكتاب الاخضر وماحواه عرض الحائط ؟؟؟

الاخ العزيز ود القبائل
لك التحيه والتقدير اينما كنت واينما حللت
وعين الله ترعاك وتحرسك من كل حسود
والله لقد استمتعت جدا بسردك الجميل
واصل نحن في الانتظار

تتمها لينا في اللقاء الاسري
وتكون احدي فقرات البرنامج

يا رقم صفر

سلام ود القبايل
حمدلله علي السلامة.
انا من عشاق مثل هذه المغامرات،لقد اتحفتنا كثير واصل

مشكورين الاخوان
مصطفي عمر الحسن الرجل الطيب ابن الرجل الطيب عاجبني ياجنا نضمك في الله قال والرسول قال
ود الطرشان قدلتك عاجباني ومواصلتك لللرحام مبسوط منها تب اقدل ياود الطرشان لأنو اسمك يذكرني بالاصاله وعبق الماضي التليد
جبريل شاب شايل هموم بلد ووطن ياجنا ربنا يقويك ويعدل طريقك شق ماتمش
ولكل الاخوان الجو بيجاي ومانزلوا في الديوان
وقفت المره الفاتت عند كلام الخروبي هو طبعا عضو مجلس قياده ثوره الفاتح من سبتمبر وزول ايدو لاحقي من ضمن الكلام القالو عن الريس عمر البشير ( ياجماعه ماتقولو ود القبايل عمل ليهو وثائق قبايلوويكلسكي ) المهم قال انا والله مبسوط من عمر البشير لأنو قال للملك فهد
" يافهد يجب ان تحترم الارادات دون املاءات الاخرين ؟
رد الملك فهد قائلا : اولا ياعمر البشير انا اسمي الملك فهد وليس فهد ؟
قام عمر البشير قال : الحمد لله الماقلت لي ياعبد ؟؟؟؟؟؟؟
هنا قال الخروبي الريس عمر البشير رجال والله مافيش حد بيرد بهاي القوه علي الملك فهد انتو تعرفوا امريكا وعلاقتها بالسعوديه عندما اوقفت ضخ البترول الي امريكا والعجز الذي حدث في ميزان الناتج القومي الامريكي والبطاله
المهم ورجغه ماعندها حد ليبيا وزعامتها للدول العربيه ومناهضتها للامبرياليه الصهيونيه وما انسحب ذلك عليها
قام صديقي قال ليهو " لااحد ينكر الاستهداف الامبريالي الصهيوني للجماهريه اليبيه
ولااحد ينكر دور ليبيا تجاه القضيه الفلسطينيه وقد ظهر ذلك الاستهداف خلال اجتماعات مجلس الامن الاخيره حول مسأله تحديد المياه الاقليمه للجماهيريه فبدلا من اخذها من بنغازي المدينه المطله علي البحر تم رسم الحدود من خليج سرت ؟
بحسبان ان خليج سرت للداخل ممايقلل من عدد الكليومترات داخل البحر وبالتالي تخسر الجماهريه عائدا ماديا ضخما من خلال حركه السفن التجاريه بعرض البحر . اضف الي ذلك عدم تمكين الجماهريه من رصد حركه الاسطول السادس الامريكي المتواجد في البحر الابيض المتوسط بحجه حمايه المصالح الامريكيه
اتدرون ماذا قال الخروبي بعد ان سمع رد صديقي
فاتح خشمه زي المفقوه لغايت ماكمل صديقي كلامو
وقال " دي مرقت منو دون استأذان
المره الجاي ببدا بيها

شكرا ودالقبائل واصل نحن لانقرا السطور ولكن نغوص بينها لعلنا نكتشف الذهب

ود القبايل
لك التحية
تعجبني بين السطور رائحة البارود ... لك ودي

لكل الناس وطن يعيشون فيه الا نحن فلنا وطن يعيش فينا
وننتظر............................. بشوق

,والله ياود الفقراء كلامك يخوف تب
ومابقالي الفقراء بيغلبن شي
اهلك ياجنا يريبو المويه ( يبقوا المويه روب)
بس في حكايه ود القبايل بقالي طلقت الدرب تب
وخوفي كلو من الزول البيقراء علم الباطن
علم الظاهر ياود الفقراء يادوب نحن في سنه اولي
سيدنا عمر بن الخطاب قال : بلغت الاربعين عاما حينها فقط تعلمت الصلاه

صمت الخروبي من كلام صديقي ورده الزي الرصاص
فجأه قال"
أنتم تفهمون هازاي؟
ليش يقولون السودان جعان؟
عيونو في نص راسو ويبحلق
قال صديقي له"
نحن اقل قامه من القابعين هنالك في السودان .
قال الخروبي "
والله انتم تدرسونا الكتاب الاخضر مش نحن اللي نخبركم به؟
ايها الساده انتهت مهمتي بكل امانه ولااستطيع ان اقف امام عقول كهذه ناطقا بحرف واحد
قلنا له " يازول واصل تجدنا قمة الامتثال هكذا تعلمنا في مدارسنا الوطنيه والابتدائيه.
قال"
ماذا يعني عندكم الوطن؟
فقلنا له "
المثل الشعبي عندنا بيقول " وطني ولاملئ بطني.
قال والله هون نحن عم بنقؤؤل بطني قبل وطني ؟
حينها دخلنا في فلسفه جدليه ايهما احق الوطن ام البطن ؟
وبعد استعراض للتاريخ واستقراء للواقع امتثل الخروبي وانفض السامر وصببنا جام غضبنا علي صديقي الذي بدأ بالرد علي الخروبي حيث قال له اخر: يا........ يااخي عندنا في البلد كان الراجل قاهر مرته (امرأته) نقناق وترفاك للنضم بعدين المريه(المرأه) احضرت فقيرا يريب المويه وقالت له ياشيخنا راجلي دا منشف ريقي بالنباح دايراك تخلو لي زي النعجي ( يعني يخلي النضم الكتير والنباح) الراجل كان الساعه ديك دخل لبيت ولبدلو في ركين وسمع كلمة خلو لي زي النعجي ؟
الفقير قال ليها كلاس (خلاس) اخليهو زي النهجي تمشي اي بكان مايسعلك
بس الفقير طلع من الباب الراجل عمل فيها يادوب جااي
المرأه بدت تسعل فيه ؟
اها الشغل اليلي كيف ؟
الراجل قال : بااااع
ياراجل انا اسألك من شغلك حكايتك شنو؟
بس صاحبنا شبكها ليك بااااع بااااع ؟
بس المريه فتحت الباب وفرد جريه لحقت الفقير ياشيخ تعال تعال ؟ الفقير قالها مالك : قالت ليهو ياشيخنا الراجل بقي نعجي عديييييييل ؟ فكو شووووي ؟

دحين ياصديقي الليبيين ديل شوي شوي عليهم؟
الاسبوع التاني بس صاقرونا ليك ناس الكتائب الامنيه
ناس جبلو للولاء والطاعه العمياء للنظام
فيهم من لايدري من هو ومن اوتي به ؟
لاقانون يطولهم ؟
يفعلون كل شي واي شئ وقتل الخصوم حلال في شرائعهم المستمده من الكتاب الاخضر
يركبون العربات الفارهه ويسكنون الاماكن الراقيه
امكانياتم تفوق امكانيات الدول
يستخدمون الوطنيه في اعلي مراتبها والخصه والدناءه في ادني مراتعها

ليبيا دوله غنيه البترول راقد زي الهم في القلب
التمور ماعندها حد انواع واشكال شي تمر واحات وتمر صحراء
عندهم النهر الصناعي العظيم
عندهم المعادن والمصانع
بلد غنيه بكل ماتحمل هذه الكلمه بس عندهم عدم الانتماء للارض والوطن ودا كلام تحتو كلام كتير ؟؟؟؟؟
زرنا الاحياء ببنغازي والاسواق والمدن التي تقع علي البحر
بس ناس الكتائب محل ماتمش مصاقرننا
غايتو مرات نباصرم
بعد الاسبوع التاني قال لي صديقي ياجنا مانمشي نشوف الخلق دي عايشين كيفن نشوف بكاناتن الثقافيه زي المسارح والنوادي ومحلات السينما
مشينا السينما لقينا الفلم المكتوب عمر المختار
حقيقه عمر المختار ارسي تاريخ حقا يفتخر به كل مناضل وباحث للحريه
( نحن لانستسلم نموت او ننتصر )
ذهبنا لأخري وجدنا نفس الفلم
كل دور السينما موجهه يديرها اصحاب العمامه الخضراء ( عناصر الكتائب الامنيه)
الحياه هنالك تسير وفق تعليمات مرسومه من الدوله
لاابالغ ان قلت لكم حتي الافراح والاتراح لاتتم الأ بأستأذان السلطات
الانسان هنالك مسير في مايملك ولايملك وليس مخيرا فيما يملك
عشان كدي انا موقن ان الحرب الدائره الان لاسبيل لنهايتها قريبا
وقودها اطراف سلبت تفكيرهم الشخصيه الكاريزميه للقذافي
والطرف الاخر يحبذ الموت من البقاء تحت حكم القذافي
دي الحياه هنالك الناس يتنافسون علي ارضاء اللجان الثوريه مكرهين
يشك الاخ في اخيه والوالد في ابنه وولائهم جميعا للكتائب الامنيه مكرهين لاراغبين
زي كلام ودالقبايل البيسوي فيهو دا ( انا ود القبايل البعدل المايل البقوم مع الفجراوي اكابس الخلوه بالبراد) تلقي نفسك في الجوخ( دي سجون تحت الارض )
هناك ود القبايل والبعدل المايل واحد بس هو القذافي
اوعك من الاشعار البيتمجد الحبيب والمحبوب
اوعك من تقول لي زول يازعيم اوعك من تقول لي زول ياسيد البلد لو قلت كدي قيامتك ربطت
بقيف لي حد هنا وبواصل نحن يادوب في الاسبوع التاني

موضوع شيق يا ود القبايل بس ما تحرق روحنا زيد الجرعات شوية
انت عارف مرة في جامعة الخرطوم جبوا لينا البصات الكبيرة وقالوا اركبوا قلنا الحاصل شنو قالوا القذافي قال عندوا كلام لطلاب جامعة الخرطوم عبر القمر الصناعي في قاعة الصداقة
الطلبة مشوا اتكركروا لي هناك وقعدوا يصنتوا للاهبل دا
وكمان الجامعة ادتوا الدكتوراه الفخرية واظنوا كانوا مفلسين واداهم قروش عشان كدة
المهم انا قلت ما ماشي ومشيت المكتبة لقيت ليك صايد كامل مليان كتب خضراء قريت العناوين لقيتا ليك شروحات الكتاب الاخضر للقائد الاممي معمر القذافي وضحكت جنس ضحك وشتت طوالي بلا قذافي لا نظرية تالتة يا خي شرح القران ما قدر دار
تقبل مروري وواصل الامتاع

مشكور الخبير
انت عارف القذافي بترول ليبيا كلو مضيعوا في الكتاب الاخضر وتنبؤاته
برج الفاتح _ طريق العيلفون دا عندنا في السودان
العالمي وحدات الجيش الايرلندي الثوار في كولومبيا طلائع ثوار التأميل

بعد مضي فتره بمدينه بنغازي وعرفنا اسواقها وناسها وتشكيل قبائلها ومازالت الكتائب الامنيه تراقب تحركاتنا ولكن ثمة اشياء جعلتهم يطمأنوا ألينا اكثر .
تعرفون قضيه لوكربي وتلك الطائره التي تحطمت فوق سمائها ووفاة أكثر من 227 فرد وقد أتهمت الحكومه الليبيه بتفجير تلك الطائره
سيكون حديثي عن رده الفعل لتلك الحادثه والضغوط التي مورست علي ليبيا قبل تسليم النعيمه ورفيقه

واصل
معاك

تعجبني مصاقرة ود القبايل واخونا العزير جدا الحاج شرف
ياريت مايتعاقبوا ويتلاقوا مايتقابوا
شكرا ودالقبايل
شكرا الحاج شرف الدين

تعرف يا حازم ود القبايل دا ابجديا بكون في ضنبو
الليلة ماظهر
كدي نسأل الحاج!!!

الحمد آلاف آ جنا ... الشكر آلاف آ جنا ..
ود القبائل / سرد يفوق الطيب صالح .. عبارات بسيطة منمقة مموسقة تشد القارئ للمتابعة .. حياك الله ووفقك ذخرا لبلادك
تخريمة أخيرة .. هذا الموضوع يستحق أن يطبع في كتاب
ويستحق صاحبه جائزة التميز يا خالد عابدين
مع تحياتي للجميع واعتذاري للدخول المتأخر

الزول الشهم ودالمناصير ازيك
لهجتك ياجنا سمحي واسمك سمح
حادثه لوكربي ماتوا فيها خلق ماعندهم حدادي
الطياره كانت تابعه للامريكان رحله عاديه بس شلاقة القذافي وكتائبه الامنيه سوها في نفوسهم يعني بصيرتهم عمياني
المهم امريكيا هاجت ولمت الدنيا علي القذافي وتدخلت برطانيا وفرنسا وضغطوا عليه بتسليم المتهمين الامين خليفه فحيمه وعبد الباسط المقراحي
رفض القذافي بحجه ان القانون الليبي يمنع تسليم مواطنيه الي دوله اخري لكن بعد عصروا عليه سلمهم لكن بوساطه سعوديه
المهم ووقع الحظر الجوي والاقتصادي علي ليبيا ودفع الشعب الليبي الفاتوره الباهظه جراء تلك التصرفات الغير مدروسه
طبعا نحن زاتو الصوت لحقنا وكان لابد ان نقف بحكم العروبه وحاجات تاني حمياني؟
طبيعه الارض الليبيه صحراويه عدا الواحات المتناثره هنا وهناك والغريب بنغازي دي جبل مافيها الجبل تلقاه نازل في الواطه يسموه الجوخ بحكم الامر الذي اتينا له فقد ضرعنا شرق ليبيا بالكدوكه وكمان البحر الابيض المتوسط خجناه ( مشينا فيه) من بنغازي للجبل الاخضر لحمنا اتقطع من مويه الملح وكمان البرد (الصقعي) يعلم الله البرد الشفته في ليبيا في حياتي ماشفته وطبعا الرحله طويلي مره نعوم ومره نمشي ومرات نجري ماشين من الساعه اثنين الي باكر الساعه واحدي
اصلنا خشمنا البياكل الكسر دا مافكيناه بس صابرين وماشين رغم الموت ورغم وعورة المكان والشوك زي الحراب
حاله صعبه لكن المقام والمرام كان اسمي اثناء مانحن ماشين من شده البرد واحد وقع في المويه غلبو يمشي والجماعه زولا يجيب خبرك مافي ؟
قلت افو ياود القبائل الزول يقع تخلو دا العيييييب ذاتو؟
ماني منصوري وشليق قبضته من كتفه ورفعته وبقيت ماشي بيهو ؟ اه خلااااص مروتي كملت تب نان اسوي كيفن ياربي ؟ بقيت اجره بالمويه يعني زي جر المركب ( والله ارتحت لانو جرو بالمويه ساااهل ) مرات وانت ماشي تقابلك دشي وشوك الواطه ليل والجنبك مابتشوفو وانا ماشي حسيت الزول بقي يرفس . هبشت صدرو لقيتو واقف تب لابودي لابجيب ؟ مااات ؟ فعلا مات البرد ياود القبايل الجوع ياجنا ؟
الموت في هذه الحظه مقبول وشي عادي زي شراب المويه ؟
شافني صاحبي قال لي مالك ياود القبايل وقفت قلت ليهو الزول دا مات ؟
قالي خلاص نشلوبه الاثنين ( صاحبي داقلبو حااار) واحد من الراس وواحد من الكرعين نامن وصلنا والجنازي تقليلي جنس تقل بس ربنا يعظم الاجر
المهم مااطول الكلام وصلنا
الجوع ياجنا قطع مصارينا
البرد والله شوف عيني نوقد النار ونشيله بي يدينا الدم في العروق يدمج المشي يقلب الزول الكرعين مابتحس بيهن ذي الزول الضارباه امجرق
انا بقالي لو ما التمر الماكلنو زمان في البلد كان رحنا فيها تب
طبعا الغرض من الرحله دي هي ختام لعمل استمر ثلاثه شهور بين الجبال والجوخ واكل الكلاب والطين وهي لم تكن رحله لكن قصدت ان اسميها رحله لكي تكون مقبوله للاخوان لكن الرحله بالغرب وشغلتنا دي البي نسوي فيها بالشرق
بيتموت وتنسعل ياود المناصير الرحله فيها موت ؟؟
بقيف لي هني وجاي لي قصه لوكربي
التحيات الزاكيات لود الفقراء الحاج وود الخبير وودالطرشان وود البلد وابومصطفي وود المناصير وجبريل وللرجل الطيب بن الرجل الطيب مصطفي عمر الحسن وكل الاخوان بدون فرز
ود القبايل

حمدلله على السلامة
طولت علينا
بس عشان نعيش معاك القصة
1- المات جنسو شنو؟
2- وصاحبك الشال معاك سوداني؟

ايها الرائع دوما ,, ود القبايل ..أين أنت ولماذا توقف الإبداع إن شاء الله المانع خير

والله ياود المناصير ود القبايل تقول تمرجي ( طلق) ينسي مواعيد الحقنة تعبنا خلاص

اللخوان :
ود المناصير كيفنك وانشاء الله مبسوط درد وبشكرك كتير علي مرورك ومثلك يضبحولوا البهاتي
اخونا زمان ود الطرشان علك عافي يادهب الجنينه الصافي ( بقالك الجنينه فيها دهب ياود الطرشان ) مانسيت لكن اسوي لي في امور واباصر في الحياة
جد مروركما عجبني ولكم شلالات نياجرا حبا وتقديرا
الايام دي شال هم القذافي ,
وحدين يقولولك ضربوه وواحدين يقولولك شفناه حي
وواحدين يقولولك شفنا الشافو
رغم قلبي مع الثوار ولكن في النفس شي من حتي تجاهه
هو مناضل من الصحراء من الباديه كما قال لكن المكتوبه جاتو؟
كنت متابعهم في الرجبان والزنتان وطبرق بلد عمر المختار
لكن بجي راجع عشان احكي ليكم عن لوكربي وعن ناسا عشقوا المكان
بس اللفك الريقه وارجع

بعد عودتنا من رحله الجبل الاخضر مكثنا في بنغازي ندفع ما تبقي من ثمن الانتماء ؟ توطدت علاقتنا بالكتائب الامنيه اكثر , خبرناهم وخبرونا ’ عشنا المره والحلوه ، تبادلت الزيارات بينهم , كانوا دائما مايرددوا سؤالهم : ليش بقولوا السودان جعان اذا كان فيه رجال هازاي؟
لاانكر انهم احبو السودان عبر هذه الدبولماسيه الشعبيه( قول شعبيه)؟
فقد اثبتت ايامنا معهم معدن السوداني , صدقه في التعامل ,
تصميم في بلوغ الهدف
شجاعه في مواجة الصعاب
ونحن مازلنا نسوي في التيرن ويرن فجأه تحولت بنغازي الي معسكر كبير ؟ دوت صفارات الانزار
تقاطر الثوار وتدفعهم الكتائب الامنيه
الكل يجري
الكل مزعور ؟
ياناس كدي فهمونا الحاصل شنو؟ المصيبه الجاتكم شني؟
المكابسه لزومه شنو؟ العربات دي مدخلنها في الخيران ليشنو؟
الطيارات دي كترت الحوامه الجاته شني ؟
قال لي صاحبي : افو ياود القبايل عينك عمياني ما بتشوف في السلاح بمرقوا فيهو من المخازن ؟
نان ياجنا همتهم دي ماله ميتي ؟
الدهده العليهم شنو؟
المحركه البيسو فيها دي بقالك ياجنا بي تعدلها حال؟
نحن قاااعدين , عاملين اضان الحامل طرشا,
بس فجأءه يجينا الخروبي :
الاخوه السوادنيين ؟؟ والله امريكيا بدها تحتل ليبيا عن طريق ميناء قوينس ؟
شو رائكم ؟؟؟؟؟
قال كلمته دي مازاده وبقي يعاين في وجوهنا ؟ داير يسمع رأي السودانيين؟؟
يعجبوك كان ردهم ( الكلمات لاتصف تعابير المحيا)
اييييوااااا ... نموووووت,,,, وري وشك ارمممممي قدااام ؟
الخروبي : وجم زهل ؟ لم يفهم ماردده النشاما؟
تصدي لهم احدنا واكبرنا سنا؟( انشاء الله تكون عرفت كبر السن ياودالمناصير انا قاصد بيها شنو؟
الحماس دا ياناس كدي خلو ؟ الخروبي داير يسمع رأيكم بوضوح ؟ الناس ديل الامريكان عاوزين يعملوا ابرار من اسطولهم السادس علي الساحل ليبي ؟ هل انتم جاهزون للدفاع عن ليبيا؟
لا استطيع ان اكتب كلمات الخروبي التي تفوه بها بعدما سمع الرد ؟
ولكني سأحكي لكم عن تعابير وجهه وجلوسه علي الارض وهويغالب دموعه
حقيقه عجز عن التفوه بكلمه واحده ؟
بعد ربع ساعه والكل صامت قال : السودان احي السودان
انا بقيف لي هني وبجي اكمل الباقي بأذن الله
متأسف للاطاله

ارمى قدااااام دى ياود القبائل دايرنها هناك من جبال الكاب وقدام
تعجبنى ياود القبائل فى
السرد
والاخراج
والاثاره
انت
اسامه انور عكاشه
يبقال ليك شنو
منتظرين رجوعك وبنرجاك قبلنا

ازيك ياود الفقراء
شايفك يازعمات بروي مقرن مويتك وسايق سياقي ماعندها حدادي
(الخيار المحلي وطن محمي بصدور ساكنيه ) وشايف الطير زاااانقك ؟؟؟
غايتو مرات راكبوتك حباله يشدن ومرات يرخن
لك شكري علي مرورك رغم الحيضان المقرنه والمويه المندفعه ؟ واصل ياالحاج وتأكد ان الشجر الذي يرمي هو الذي يحمل الثمار
وان اجمل الازهار التي بها الاشواك
لك ودي ودي ( الاخير دي ماها زي الاولي )

سلاام لللخوان
ربك رب الخير حبس العوارض
ختينا الحسه في ليبيا زيها مافي؟
تبدلت الموافق واصبحوا ناس الكتائب الامنيه أكثر التصاقا بنا
خبرنا ملأ البلد وصل محل زنقه زنقه قاعد (باب العزيزيه )
بكره ثلاثه طيارات جات نازلي وزنقه زنقه راكب في ياتي ماهو معروف
المهم وصل ؟
النوت الحارساتن يسد عين الشمس
الكل هنالك واجم ؟
مافي زول يتكلم ؟
اصطف الليبيين ؟
دخلو عبر البوابه الامنيه للتفتيش ؟
جلسوا كأن علي رؤؤسهم الطير؟
نحن السودانيين قاعدين غادي ؟
قالو لينا الزعيم بدو يتلكم معاكم ؟
دايرين ندخل بالبوابه زي الجماعه القبلنا ؟
وقف علي حيلو وبقي يكورك ؟
لا لا لا ؟
الاخوه السوادنيين مايدخلو بالبوابه هذه؟





بجي راجع واكمل لقاؤنا مع الفاتح

الله يديك العافية ويجعل لك فى كل خطوة سلامة وتتعدل عليك شق ما تقبل يا ود القبايل _ يا جنا نطمك سمح بالحيل وكلامك يعجب تب وكمان أديب وفنجرى الظاهرتربية الخلاوى أثرت فيك يلا عاد واصل حكاويك والعافية تجينا وتجيك _

"النفر"الله يديك العافية ويجعل لك فى كل خطوة سلامة وتتعدل عليك شق ما تقبل يا ود القبايل _ يا جنا نطمك سمح بالحيل وكلامك يعجب تب وكمان أديب وفنجرى الظاهرتربية الخلاوى أثرت فيك يلا عاد واصل حكاويك والعافية تجينا وتجيك

مشكور اخونا النفر
دائما كلماتك طاعمي
لأنك زول طاعم
وقدر دعواتك هاك هنين من الدعوات تبقالك عافيه في عضامك
ويرد غربتك
ويخدر ضراعك
وتنعدل عليك شق ماتمش ياراجل ياطيب

م بروي كتب:ود القبايل
سلام
الأحداث الجارية حالياً في
ليبيا تجعل الإنسان متشوق ليقرأ
ويعرف عنها حتى التفاصيل.
ده جانب
الجانب المهم سردك السمح (بلدي بالرشوشه)
يخلي الواحد يقرأ أي كلام ممهور بتوقيع
(ود القشاير) العاوز يدينا بالقطارة
لك المحبة والتقدير والإعجاب

السامق بروي ازيك وتاني كيفنك
جيتك بي جااي عجبتني
اول هام نضمك سمح
فيه ريحة تراب بلدنا وعبق تمرنا واصالة حكرنا وعظمة جروفنا وحلات حرفنا ( دي تكون بملاح كالبيق )
وتاني هام جيتك قاعدي تبهر الدرب وتظهر الحرف
وتالت هام فيك عبق الماضي الاصيل
وهبة ابواتنا القدام( ماتقول ود القبايل عملني جد) اصلكم انتو ياناس فقاعه عندكم الشيخوخه المبكره لكن اريتنا شيخوختنا ؟
وتاني هام ,,,,,,,(دي بخليها نامن تجي بالسلامه ياصاحب السلام الجمهوري

دخلنا الخيمه القاعد فيها القذافي
الليبين قاعدين قدام ؟ الزول انقرصتو مابجيب الدم ,
ساااكتين التقول في بيت بكاء
البنوت الواقفات وراه يسدن عين الشمس (دا الحرس)
تلاته دقائق رافع رقبتو ويعاين ؟؟؟
السودانيين شعب عظيم ؟
انا بحبهم ؟
رجالا ؟
عرفت موقفكم وشهامتكم ؟
خبروني عندما عرضو عليكم الدفاع عن ليبيا ؟ وهذه الزياره جيت مخصوص لأشكركم ؟؟؟؟
كان ردكم روح في الشعب الليبي ؟
انتو وحوش ؟
وكلامو بالقطاره ؟؟؟
يعاين رافع رقبتو زي المودرلو حاجي ؟
فجأة قطع الصمت واحد مننا ؟
الظاهر عجبو نضم القذافي عن السودان والسودانيين؟
قال بأعلي صوته " القذافي كيييييف ؟
مفجر النهرالصاعي العظيم كيييف ؟
وكان الرد جماعيا ؟
عظييييم
حديييد؟
وقف القذافي علي حيلو ؟
والليبين ( اظنهم اول مره يشوفو ناس تخاطب الفاتح بهذه الاريحيه )
قام من مكانه واخذ يسالم ويقالد ؟
الموقف الظريف من الليبين ؟
بعد راح
جونا ؟
تسلمون علي معمر ؟؟؟والله معمر بحبكم ؟
قلنالهم ياناس رئيسكم موج افتلو بعدا فوق دربنا ؟
سلام القذافي عندهم زي جبل مناي ؟
والزول البسلم عليهو يكون زينا زماااان لما نمشي المحطه وناكل فول نلف ايدينا ومابنغسلها نشم فيها تلات ايام
وكمان لما نرجع نحكي ونحلف وحات ديني فطرت بي فول ( كنايه عن العظمه )

بقيف لحدي هنا
وبجي راجع عشان احكليكم
السودانيين الببكوا وجارين ورانا ؟
وعن استغراب الليبين في علاقه السودانين
وعن اليوم المفتوح العملناه (غناء شعر نكات )
عن مطار بنينا
متأسف للاطاله
وشاكر للاخوان من المدير لي حدي منوفلي

اقالوا في مناصير ليبيين مالك هل صح ام انا قابلت اشخاص من المناصير الارادنة

ود القبايل بين الحياة والموت
يشابي
بقي يشوف رهاب رهاب
الحادثه أثرت علي الغدد اليمفاويه
وفي غرفة الانعاش يكورك
البابور
الاربل
الطوريه ياجنا
المنجل يادرفون
ربنا يسلم ؟؟
هي الدنيا ؟؟
للعرض في باحة المسرح العريض ؟
رغم ضآلة المعروض وكثرة الممثلين ؟
لن تغيب بسمات ود القبائل علي صفحات منتدي المناصير بلدي؟
ولن تتوقف حكاويه مع الثوار وكتائب القذافي ؟
رغم مرارات الالم ؟
ورغم القدر ؟
رغم الفقد ؟
ورغم الالم ؟
فلنعي اليم
وسنظل نحبسه ؟
اتخذ في ايامه الاخيره قبل دخوله غرفة الانعاش من حياةالصحابي الجليل أباذر منهجا وسلوكا؟
لك الله ياودالقبائل

ود القبائل .. وينك .. غيبتك طالت .. بس إن شاء الله فوق رأي ..
مع تمنياتنا لك بموفور الصحة والعافية

والله يا حازم القلوب شواهد زي ما بيقولوا
عليك الله راجع زمن ردك مع الرد أعلاه ستجده زمن ( متوافق ) وفعلا القلوب شواهد

الكاتب الرايع ود القبايل تحياتى وامنياتى لك بدوام الصحه والعافيه كنا متابعين فى صمت لكن طولت الغياب وقلنا ندخل ونوريك انو المتابعين لهذا الحديث الشيق كثيرين ما طول القيبه (والمضحك فى الموضوع هو انو انا بقرا واولادى بيضحكو على الصوره)ودمت دوما ناشر للبسمه

ودالقبائل انشاء الله لينا تسلم حقيقة ودالقبائل رجل تحفة ومصدر بهجة للكل ودايما متابعين حديثو ومن شدة نضموا يعجبنا لمن ماعرفين البنكتبو ودالقبائل دايما بزكرنا اصحاب الطرائف والحكمة الكبار سنا من رموز الاهل وذى مابقولو ربى يلمنا بية فى قيلولة بعد فطور بى سمبوستن سمحة وبعدها شااى تقيل و جبنة عامرى واهلها سالمين :لا قولتلى القذافى نضمو كيفن كلامو بى شنو القطارة :ههههة ربنا ينعم عليك بالصحة ومايحرمنا من كتباتك .

حمدالله الف علي السلامه
نورت المنتدي
وين الغيبه ده كلها

ود القبايل ... سلام يا رائع
والله اليوم دا كان صعب معانا في المنتدى ... واظن عايزين يدونا عمك صالح على طول
لكن لما لقيناك منور المنتدى حمدنا الله إنو الزبد سيذهب جفاءا
متعك الله بالصحة والعافية ... وأنا شخصيا قاعد منتظر الجديد .. يا صاحب السرد الجميل والرأي السديد
وتاني ما تغيب إلا بعد ما تكلمنا عشان نمشي سوا ونجي سوا والرفيق قبل الطريق
أرى الشلليات تطل برأسها ... وربنا يكضب الشينة

سلام لكل الاخوان
الطائف عبد الله مشكور علي مرورك وبخصوص مناصير الاردن عيني ماوقعت فيهم ؟
ود المناصير ازيك وانشاء الله تبقي دائما موفور الصحه
اهلك الكواهله بقولوا الشجر الكبار فيهو الصمغ
والعرب تقول ان اجمل الازهار التي تحمل الاشواك
وان اجمل تعليق ماكتبه ذلك الفنان عندما راي شحاذا اعمي يمد يده للماره كاتبا علي لوحته ( ساعدوني )
فمسحها الفنان وكتب الاتي
هذا فصل الربيع فساعدوني لكي اري جماله
فأمتلأ الاناء مالا ؟
ود المناصير كنت ذلك الفنان الذي يراوح بين اركان منتدي المناصير
بعدين يارائع ماتصاقر ود الفقراء ؟ اكيد لك شكري
ساري اليل انادائر لي فيك لمه نضمك قصير ومحير لك ودي ياطيب
الاخت اميره الحومري ممتن علي مرورك ولك شلالات بحير الحاره الشبعت غراق تحايا وسلام
اخونا وحبيبنا زمااان مونتاري والله مشتاقين شوقا يشفق بس انا زعلان منكم ) معقول من المطار تودوهو وادي الحمار وتلعبيهو نص النهار ) غايتو السواها الحضري الكلب في الخماره ماسواها ياناس ساكواها
مديرنا وتاج عزنا خالد عابدين في محرابك يطيب الجلوس ومشكور علي ها المرور بس اوع يكون لزوم التفتيش وكدا
باقي بيجاي مرتاحييين وزول شايفنا تب مو في ( نشرق ونغرب ) مشكور علي المرور كل الاخوان
وحتما بواصل الفواصل