دعواتكم.. سوف أتغيب عن الكتابة لمدة أسبوع

تسلم قريبيnative guy

صديق عبدالله علي أبوحنة كتب:تسلم قريبيnative guy

بس ما تتاخر علينا

والله بقيت لينا ياباشمهندس
زي حبوبتي صبيحة الله يرحمها
كل يوم نسمع كلمة جديدة علينا
حاول شيل معاك بـكابـكونكشن عشان ما تنقطع خبارك

موفق باذنالله

الاخ الفنان الرايع صديق
والله حيرتنا عديل كده
ذوق وادب وفن والتزام بمبدا الاسره الواحده
اقولك تمشي وتجي بالسلامه ولو اننا سوف نفتقدك

ما شاء الله جامعه الامارات مرة واحدة

عموما تمشى وترجع بالسلامة يا صديق

وربنا يوفقك فى محاضراتك

ود الطرشان وخالد ومصطفى وانتصار. لقيت فرصة سغمبتوتية كدي قلتا أرد عليكم.. يا كباية شاي. يا ارد عليكم.. عشرة دقايق. رديت عليكم وتركتا كباية الشاي..
سبحان الله.. قدم الخير تجده. قنعتا من الشاي. ما اشعر إلا واحد جا ختا لى كباية مدنكلة جنبي ومعاها كيكة كمان.. جنب البورد بتاع مكتبة الجامعة
قاعدة دينية( ما تحرص على الأنا.. أحرص على الأنت.. تجد الأنا بأكبر مما تتصور)

الصدوق رحلة عمل موفقة باذن الله -
معليش تأخرنا عليك كنا فى عزاء الراحل حبيب -
نظل نترقب العودة السريعة -
رغم اننا سوف نفتقدك ياهندسة لكن الفرة فيها الدرة -

والله يا ابو حنه سفرك دا تب ما عندى خبرو وانا زاتى اكنت مشغول شديد وياالله ياالله امشى على ناس الرياضه وباقى اليومين ديل عندى معاهم موضوع
لكن فعلا فقدتك فى القاموس وكوانيه وتناقيره وعدويته ولفتيه وسواقيه المخدره بى وجودك ديمى فوسيبا لاوى وشال يا الحنين
عليه كل المانى بالتوفيق والعوده سالم غانم مفرفش

تمشي وترجع بالسلامة عمنا ابوحنة.
ورحلة عمل موفقة إنشاء الله.

لما ترجع بالسلامة وترجع كتاباتك الجميلة
يا سنا المنتدى ويا مدامو ويا عواطفنا النبيلة...
ف الانتظار

الاستاد ابو حنه ربنا يوفقك وترجع بالسلامه
والله الدي شدني الي هدا المنتدي اسلوبك وكتاباتك السلسله الشيقه
دمت ودامت كتاباتك لنا وعقبال ما تجي تلقي لنا محاضرات في المناصير او هنا في الخرطوم

الباشمهندس صديق عبدالله ابو حنه
ترجع بال سلامه 70كيلو مابعيده
يعنى زى مسافه الاخ النفر من الخرطوم
اثناء المحاضرات اسال من اهلنا المناصير بالامارات

بالتوفيق يا قريبي وعوداً حميداً إن شاء الله

بالتوفيق يا قريبي وعوداً حميداً إن شاء الله

بالسلامة يازعيم

ترجع بالسلامه .وحانفقدك...

حمدلله علي السلامة
وح تفوتك حلات رحلة

فعلا يا ود الطرشان,و أنا أحب اللمة وكان بي مرادي كان قطعت تذكرة وجيت لللمة دي.. نسوي شنو عاد؟
ميتبن نشوفكم ماني عارف.. حتى الإجازة الصيفية ذاتا قد تكون فيها عرقلة بسبب الشغل..
الشغل هو نوع من أنواع الاستعباد في العصر الجديد.. حرية مافي

ربنا يرد غربتك
ظافر وسالم
بنرسلها ليك فديو وصور
انشالله

ود الطرشان.. بس العين مازي الصور.. الصور ما راح تكون كل شئ.. وهناك مقص الرقيب في الصور...( صورتك الخايف عليها..) كما في بوست الحاج شرف الدين
وقال الفنان يا ود الطرشان( يوم الليد تسالم الليد.. عاد ما يومنا داك يوم عيد)

الف حمد الله علي السلامه
ياربي مالو اسمنا مافي اللسته مع اننا من اوائل المفتقدين لك ولكتاباتك مع اني من اؤائل المعلقين علي البوست

نجلاء زمراوي قريبتنا شكرا على المرور.. آسف يا أستاذة جيت مستعجل.. معقول نقدر ننساكم وأنت علم في منتدى المناصير
تسلمي

الزعيم عبد الغني ذاتو بي جاي.. تسلم يا زعيم في تفقدك لنا.. وهذه حالة الزعيم
إنجليزيك تمام مالو.لا ركيك ولا حاجة.. تمام
تسلم

حمد لله على السلامة صديق ابو حنه
والعود احمد

يا انتصار قريبتي فعلاً العود أحمد... تسلمي..
ناس الإمارات ديل من أحسن عرب الخليج في التعامل مع الغرباء.. وهي أحسن واجمل دولة في الخليج.. وعدد سكانهم بسيط 2 مليون فقط..
عشان كدة الخريجين قبل ما يتخرجوا بي يحجزوهم.. وكل هيئة ومصلحة تبعث ناس منها تروح تحاضرهم عشان يجوا يشتغلوا فيها وأجورهم عالية جداً.. مهندسيهم معنا خجولين.. وفن الخطابة وعرض البضاعة يحتاج الى ملكة خاصة.. وكلما قدرت تقنعهم يجوا يشتغلوا معاك، كلما أسهمك كبرت في شغلك بعدد الناس الجبتهم يشتغلوا معاك.. شفتي مدلعنهم كيف؟ ويدوهم نص الراتب من المصلحة المعينة وهم لسه ما تخرجوا في الصف الأخير.. لما يتخرجوا راتب كل واحد منهم 40 ألف درهم شهري والدرهم زي الريال مع زيادة طفيفة..

لك التحيه الاستاذ ابو حنه
والله الرحله كانت فاقداكم انت وكل الاخوه المغتربين وانشاء الله عقبال ما نحتفل برجوعكم الي ارض الوطن
اول مره اطلع رحله منصوريه كانت في قمه الروعه والترتيب وكل الاعضاء اللفي الرحله غايه في الذوق والترتيب ولا استطيع ان ازكي احد لانهم كلهم سواء
واهم ما يميز الرحله حضور الاسر وقد تعرفنا علي بعضنا عن قرب ولعب اطفالنا مع بعض
ففي الرحله قد ظهر لي الكرم المنصوري بحق وجقيقه
وساترك المجال للاخوه ليحدثوكم عن باقي التفاصيل

.. نجلاء زمراوي كتبت ..والله الرحله كانت فاقداكم انت وكل الاخوه المغتربين وانشاء الله عقبال ما نحتفل برجوعكم الي ارض الوطن
اول مره اطلع رحله منصوريه كانت في قمه الروعه والترتيب وكل الاعضاء اللفي الرحله غايه في الذوق والترتيب ولا استطيع ان ازكي احد لانهم كلهم سواء

إن شاء الله يا نجلاء.. قولي يايمين بس .إن شاء الله نقدر نحضر لينا رحلة معاكم .. والحمد لله في المنتدى السخر ليك تطلعي أول رحلة مع المناصير.. المناصير يشرفوا.. واي واحد فيهم من طرف يقام مقام أخوك أو أبوك أو زميلك..
أنا خفتا ماتجي الرحلة والله.. لأن الإنطباعات عنك. أنك زولة متدينة شديد وتراعي ربك شديد.. لكن الحاجات الزي دي مافيها حاجة لقاءات أخوان.. ما شايفة حتى صور الأخوات ما جابوها.. ناس يعرفوا الواجب بلا زول يقول لهم أو يحدد ليهم.. عشان كدة زودي العيار شوية في أن تعطي منبر المناصير كل طاقتك في جميع المناشط.. نحن المناصير نتعامل مع المرأة بعادية شديدة.. الند بالند.. ودا ناتج من إنو نحن المناصير المرأة معانا منذ الصغر في اللعب.. في الزراعة ترمي التيراب.. في حش العيش في النوريق في جميع مناحي الحياة .. بل المرأة تقوم بالدور الأكبر.. عشان كدة مساندتكن للمنبر وتغذيته بالعلم، يستفيد منها الناس شديد... تسلمي..

إنتصار حجازي كتبت وانت اذا علي اسلوبك المميز دا ... أكييد كل الجامعه بتجى عندكم

هو عادة طلبة الجامعة هنا يفضلوا البترول.. وبعدو نحنا في الكهرباء والمياه وبعدو البلدية وبعدو دائرة الأشغال.. لكن أنا والتيم المعاي. قدرنا نقدم ليهم شرح وافي ومحاضرات نالت إعجاب الجميع والشرح كلو كان البيان بالعمل.. شئ افلام.. شئ أوفر هيد بروجيكتار.. شئ إسلايت بروجيكتار.. شئ جبناهم زيارة عندنا للمواقع. شئ عزمناهم غداء في فندق.. حكاية..
عليكي الله يا إنتصار قارني بين الخريجين عندنا والخريجين عندهم..
لكن الشئ الفرحني في المنظومة دي والستة يوم ديل أكاد أكون ما غبتا كتير عن المنبر بفتح اقرا وأعلق بسيط. لقيت زمن وشوية فراغ عندهم.. العين مدينة خضراااا وجميلة. يا ريت تلقوا فرصة.. إنت والدكتور تجوا تزوروا الأمارات.. وكل الأخوة في المملكة حبابهم عشرة..كنت فيها زمان خمس سنوات في هندسة هلتون العين لما أول مرة جابوني من هلتون الخرطوم... أنا ما جيت كايس الإغتراب زي الناس البي يفتشوا في الإغتراب!! جيت منقول من هلتون الخرطوم الى هلتون العين.. والسبب في ذلك يرجع في مساعدتي ..كبير مهندسين جعلي كان رئيسى المباشر.. يعرف مقدراتي الفكرية في العمل الهندسي..وسبقني ككبير مهندسين الى الإمارات.. زول محب للمناصير.. تصدقي ساب أخو مرتو كان شغال معنا في هلتون الخرطوم وود أعمو كان شغال معنا.. وولاد حلتو من المحمية.. كلهم سابهم ورشحني أنا للمنصب.. زول نادر.. وما يبدو لى في مهندس على نطاق السودان زيو!! في دقتوا ومقدرتو.. وتفكيروا.. رؤسانا كلنا كانوا إنجليز في هلتون الخرطوم.. تعبنا جنس تعب في حكاية الإنجليزي ده معاهم!! لامن صقلنا لغتنا.. وإنجليزي الهندسة يختلف عن إنجليزي الطب يختلف عن إنجليزي الآداب. وقيسى على ذلك..
بعدين أهو حصل النصيب في حظ آخر قدمت لهيئة الماء والكهرباء هنا أخدوني..
.............
المهم هسي دي الطلبة ديل قدرنا أخذنا منهم نصيب الاسد..
تسلمي على المرور

الريس خالد عابدين كتب بعد الغياب عودا حميدا يا باشمهندس

بعد الغياب دي أغنية لصلاح مصطفى..
تسلم يا ريس على المرور بي جاي مرات..

استاذي ابو حنه لك التحيه والثناء
فعلا اشكر المنتدي الذي اتاح لي ان اتعرف علي اهلي عن قرب وفعلا وجدتهم غايه في الاحترام والتدين عند المنا صير فطره وعاده فهم يحترمون المراه حق احترام
اذيع لك سرا في البدايه ترددت وعندما خرجت كنت مرتبطه بسمايه في ام درمان فخرجت وعزمت ان اجلس ساعتين وارجع ولكن سرعان ماغيرت راي واعتذرت عن السمايه وجلست الي نهايه الرحله لما وجدته من احترام وتعامل يحمل كل الصفات الاسلاميه التي وصي بها ديننا الحنيف
حتي ان ابني الذي حضر معي قال لي الرحله الثانيه متين
عفوا الظاهراني خرجت من البوست الاساسي

نجلاء كتبت عفوا الظاهراني خرجت من البوست الاساسي

لا ما خرجتى من الموضوع.. معاي أنا مافي زول بيخرج عن الموضوع. كلو في الموضوع.. أنت في صلب الموضوع..
الموضوع أساسو إنو المناصير يلتقوا ويتعلموا ويتعارفوا. في قضايا دينهم ودنياهم.. واي شئ آخر فرعي..