فى رثاء المرحوم حبيب بابكورى

فى البدء نسال الله العلى القدير ان يتقبل اخونا المرحوم حبيب وان يسكنه مع الصديقين والشهداء
ابن عمى الشاعر الكبير محمد على نصر الدين نظم هذه المرثيه وارسلها لى فى الموبايل وانا بدورى انشرها لكم فى هذا المنتدى الرايع جدا
الموت حق علينا وكل زول راجيهو
ومعروف اصلوا درباً اى يزول يمشيهو
والموت عبره للمومن يفكر فيهو
والقدر ان وقع مجبورين رضانا عليهو
يوم جانا الخبر شلع قلوبنا الفينا
اتهجع البكاء وجفت دموع عينينا
فقدك يا الحبيب والله قاسى علينا
انكسر المرقوانشتت الضالينا
يبكيك الشعر الكنت ليهو اساس
وبكيك ود فضل وخلف الله ود كباشى
وتبكيك الجنيات الفى دريبك ماشى
من بعدك منو البقدر يقول ويشاشى
تبكيك المناصير جمله غير تفصيل
وتبكيك ام دقاق والجبل توتيل
تبكيك القوافى الكنت ليها دليل
وتبكيك الدروق والسيوف والخيل

رحم الله أخي حبيب .. وليتنا نستطيع جمع أشعاره وطباعتها في كتاب ..

اللهم أرحمه وأغفر له وأعف عنه وتقبله عندك قبولاً حسناً وأكرم نزله وأجعل قبره روضة من رياض الجنة ..

اللهم أرحم الأخ حبيب وأغفر له وأعف عنه وتقبله عندك قبولاً حسناً وأكرم نزله وأجعل قبره روضة من رياض الجنة _
أدناه مرثية كتبها الإبن عثمان عبدالله سليم على الشاعرالطالب بآداب الخرطوم الذى أفجعه خبرفقد حبيب المناصير فجادت قريحته بالمرثية التاليه :-

فعلاً يا خلوق الدنيا جد فراقه
بفقدك يا حبيب جرت الدموع رقراقه
قامتك يا الحبيب جد ما بنطيقو فراقه
واحسرة خلوق ليك بالسنين مشتاقه
لكنو القدر ودّر خطاك وساقه
فقدك يالحبيب جد لينا أصبح عاقه
كت شمس الفرح دائماً يضوى إشراقه
كت بحر العلم وأمواج حكم دفاقه
شامخ فى الرجال زى النجوم براقه

فقدك ياالهمام هز البلد بيى ناسه
حزنانه وتنوح وإتكتمت أنفاسه
ياحليلو الرحل كان للمحّنة أساسه
مفتاح العقول كت للعلوم نبراسه
الزين والعديل فيك مابدورلو كواسه
قال فوق البلد بيشعرو نظمو تراثه
من بعدك خلاص المرة نشرب كاسه

تبكيك المناصير بى كبار وبطانه
تبكيك والوداع خلى الخلوق حزنانه
الموت يا الخلوق شالك ترك دنيانا
كت فارس الـشعر كلمات يسر عنوانه
تبكيك كسلا بى عربه وبدو ورطانه
ودّعناك خلاص ياقائد الركبانا
من بعدك بقت الدنيا جد خربانه

صح قالوا الخلوق فى الدنيا تب ما دامو
لو كان كل زول بى يدرى بالقدامو
ما كان الخلوق في الشوارع حامو
الموت ما قدر لا بد نرضى أحكامو
مهما الزول يروح لا بد تصيبو سهامو
يا رب العباد العالى فوقنا وسامو
راضين بالقدر ما فينا زولاً لامو
سألتك يا كريم يا من صدق فى كلامو
تغفر للحبيب وتحفظ كمان أرحامو
ويسكن فى الجنان العاليه تبقى مقامو

*************************

االلهم أغفر لحبيب بكورى وعافه وأعف عنه وأكرم نزله ووسع مدخله وأدخله الجنة وأعذه من عذاب النار _
أدناه مرثية متواضعة نظمتها فى فقيد وحبيب المناصير وقد جاءت مقتضبة وقد نظمتها على عجل فمعذرة :-

فقدك يالحبيب فقد للبلد بيى حالا
تبكيك دارقمر من برتى ليعن عالا
تبكيك البوادى والقرى وحلالا
حتى فعالا قالد ليى جبل شلالا
إتباكن عديل وزرفو الدموع مدرارا
فى عصمة السواد غطى ليى أنوارا
عماها الحزن وأتبدلت أحوالا
عزوك الجميع أرتال وراء أرتالا
أدميت القلوب وجرت الدموع شلالا
كت فارس الحمى الشاعر المغوارا
وديمه حضور فى كل المنابر تنثر الأشعارا
شايل همنا وتصدح بكل جدارا
موقد نار عديل مابترضى أى حقاره
سائل الله الكريم يغفر لك الأوزارا
تسكن عالى الجنان وتنعم مع الأبرارا
وسنظل نذكرك أجيال وراء أجيالا

.*************************

الشاعر الاستاذ خلف الله كباشى –يرثى الراحل حبيب بهذه القصيدة الرائعة-والتى فى بدايتها يرد على الاستاذ فضل مشيرا لقصيدته الشهيرة –حيث يقول :

ياككك بى وين الدرب—وككك هو لقب الاستاذ فضل-



ياككك بى وين الدرب اصلى فى وصفو خلاص محن

بدرى كنت اكتب فى عجل وللقوافى سريع ادوزن

والشعر يأتينى منساب فى نظام ساهل فى الوزن

الا بس قولو لى ياناس الجبيب يرثوه كيفن

دمعنا السائل مابقيف فى سخاء يهديه الجفن

الحبيب قبل الطلة راح لاوداع لا اخد الاذن

الحبيب خلاها ورحل المناصير تبكى وتئن

وليها حق تبكى وتنتحب ماهو كان ليها المؤمن

والحبيب عاشق للديار ولى رباها دوام كان يحن

طلة طلة على المناصير خالدة فينا كأجمل لحن

اصلو ممكون يهوى البلد وفى هواها محال يهادن

يهوى كل الناس الحبيب وقلبو للحب باقى موطن

فى المحلى مجاهد كبيروبى حبو فى المحراب منسجن

مابيفوتو متل ود نعوم الا فيها يموت يندفن

الحبيب كان حاضر دوام وكنا نلقا محل ما نتبن

ردوا كان جاهز ودايما حضور وسيل معينو محال ما بون

الا وا اسفاى يالحبيب مين وراك ينقح ويكاشن

وللزرع فوق الضفتين مين يسلك ومين يدفن

راح حبيب الطلة ياناس ولى منو الاسلاك بى ترن

والقوافى صباحن اصبح تانى مين يكتب ويلحن

اصلها الاقدار يا صحاب تانى للمؤمن تمتحن

والقلوب يارب ثبته وفى امتحانو يقولو نجحن

ربى تم امنية الحبيب وفى المحلى دليبنا اليدن

ياكريم الهبنا الصبر وللنفوس يالله يقن

ان شاء الله نظفر اخر المطاف ويبقى كل زول للحق ضمن

نصدّر الخير للمساكين وفى مياه الخير نعتطن

والحبيب فى الفردوس هناك يكون بنات الحور جالسن

نفوسنا يارب العالمين فى النواح والويل سامحن

الصبر غالبنا يارب والمصائب فينا كترن

ربى هيئ لى محمد يبقى خليفتو تقيل الوزن

والجميع الهمن الصبر وللعيون الفى كسلا البكن وارواحنا يارب العالمين معاه فى الفردوس تجمعن

والله ياحسن سليمان زميلنا محمد ودعلى مو هين
ماشى فوق درب عمه سليمان ودنصرالدين ورثو تب
انشاء يجتهد ويتحفنا بالجديد واعلم ان له قصيدة معبرة
تغنى بها على الحمود
تقبل المرور

عمنا الاستاذ النفر فائق شكرنا بما سطرت عن الحبيب له الرحمه والمغفرة
وما نقلته عن الشبل الصغير عثمان ود عبده سليم وهو من اسره الشعراء اصحاب الاسم
لقد سمعنا له وهو فى اول العمرفقد ادهشنا بادائه المتفرد واجتهاده المتواصل وله قصائد فى الخزان
ربنا يوفقه ويحفظه فلك اخى النفر ان تضيف ماسطرت هنا فى صفحتك الخاصة بك
مع تقديرنا وشكرنا