ماهو شعورك وإنت قمتا الصباح قبل شراب الشاي تسانق جبادتك ولقيتا تنتق

شكرا الصدوق –
لكن رجعتنا لذكريات جميلة ايام الصبا والجبابيد والمتعة –
اولا زى ماقلت الشمس ما شرقت والبحر كارس-والسكون والهدوء –كل شىء صامت –تلمس الموية فى البحر تجدها دافية ولاتجد الخيط فى مكانه وهى دلالة مبشر فقد يكون غاتس فى الطين—
اما الاسئلة—فاذا مسكت الخيط ووجدته عاصر الحجرة ويرتفع عن اخره مع ظهور جزء من الحوتى (بلغت) بقوة فى مستوى الخيط –فهذا كور –دشقوق-(دقشوق) فما عليك الا ان تسانق دون تردد ويمكن ان ترخى شوية اذا كان كبيرا فذلك يؤدى الى ان تملا بطنه بالماء ممايحد من مقاومته –
اما اذا تحركت الحوتى مبتعدة عن الحجرة (شاققت)-مع قوة النتق وتواصله-حتى تأتى تقريبا فى اتجاه رمى الجبادة فى الاول وعندما يقصر الخيط يبدا ظهور جزء من السمكة وهذا هو الكلد او الدبسى وهى صعبة الامساك واحذر ان ترخى الخيط فى السينيق كما فى الدشقوق عندها سوف تنشرم-
اما الشلمبايي فلها نتقات خفيفة متباعدة ولكنها ذات ايقاع واحد-
- صديق ماعارف انت كنت (لغيم) عندنا فى النعوفاب مشهور محمد الحسن ابوقرن –كلنا كنا ننتظره وخاصة فى الصباح ليسانق جبادته –كمان فى ناس يأتوا بخلسة ودون ضوضاء مخافة العين

إجاباتك كلها صاح يا سلمان
صاح محومااد ود أب قرن كان لغيم. وكنتا مرات بشتري منو.. لكن أنا ما كنت لغيم.. لغيم خميس سليمان أب حنة.. ولغيم كامل ود النعيم..
محومااد ود أب قرن من شدة ماهو لغيم كان يرجاك مربط الكناكيج جملة في خيط فرعي في الجبادة وراميهم في البحر للعايز يشتري

إذا جبادتك قابضي ولكن وكراني في سارة والله حجر والله طرفايي وما عايز تشرم الحوتي. لازم تعوم ليها وخيت الجبادة في يدك وانت رافعو لافوق. بس تعمل حسابك وإنت عايم ما توكر فيك جبادة.. وكرة الجبادة الله قال بي قولك ممكن تغرقك..
أو تكون جبادتك قريبة من مشرع المركب تدخل في المركب وتخلي خيت الجبادة في يدك لامن تصل محل الوكار قصادو بالضبط وترفع الجبادة لافوق.. كدة تتفكا معاك.. وحوتك 90% ممكن ما تتشرم..

هسي دي لا جبادة ولا حاجة مع لجج مياه البحيرة.. قالوا تقطّع بصلتك وتخلي البت تقلا فيها دوب ما البصلة صفّرت تكون جبتا حوتك وجيت من البحر.. من شدة ماك ضامنا..
الحوت والسمك رقد حمطرش
..
معتمد البحيرة يدعو سيادة الوالي لفطور من سمك بحيرة المناصير الطازج على شط شري الغراء والاجتماع هناك حيث يسهل النقاش على أنغام العزف السمكي المحمر والمقلى..

كلمة يسانق دي ذاتا منصوريات ومناصير العاصمة ما حا يعرفوها
.............
نعمل شريط ترجمة والله شنو؟؟

ويا صديق لوجبادتك اتلولوت والدنيا عصرت ومغربت خلاص-وانت زهجت والكلتيب قطع لحمك –
كذلك اذا رميت جباتك المغرب والبحر ماشى مشى شديد (قايم من صفحتو) وعجزت تديرا لافوق –جيت الصباح لقيتا غرقانى وماعرفت محلها بالضبط-
مع ذلك مشى البحر له فرحة شديدة للكبار والصغار عشان بيسقى باقى اللوبا وغيره من القشوش والقواريق (الله يرفع عمادو)-والصغار الحوت يكتر والفجيك

ها ها ها سلمان ما تهبش الوتر الحساس..
تتذكر يا سلمان طماطم إدريس ود أب جقة في الجرف.. يسقيها بالجوز وهو راجل مشلول ويبيع منها للناس غير يوم السوق.. شوف الهمة العالية دي كيف؟؟؟؟
تتذكر كدوس إدريس ود أب جقة والتمباك الأخضر

وانا كمان عندي ليك سؤال ياهندسة
اذا الجبادة اتقطعت عليك وراحت في البحر تمرقا كيف ؟؟

ود الخبير
حدد السؤال
إتقطعت ما ذاتا خشم بيوت..
1 اتقطعت وهي قابضي
2 اتقطعت. قطعتا مركب وكرت في دفي اللت مركب
3 وكرت في ريشة اللت لنش واتقطعت
4 قبضت كور كبير وقطعا وفت بها
5 مشركا بي عرة وجا فرخ تمساح أكل العرة الطعم وقطعا وراح ضرب بيها جزيرة كيوت.. أو جزاير بت عوجات في شري.. أو دخل بيها الحلفا داك الفي جزيرة أترم في شري
6 الجبادة ذاتا راس الخيط فيهو حجر بس.. والله حجر معاهو بنقير.. والله بنقير بس!
القطع ما ذاتو خشم بيوت يا ود الخبير حدد
بعدين نديك الإجابة
صاح
تمام كدة

تحية يا هندسة
طبعا زي ما تفضلت هي فعلا خشم بيوت ولكن :-
1/ اذا الجبادة اتقطعت وهي قابضي ما اظن حا تلم فيها الا لو فيها جهاز تحديد مواقع ، مرة في حلتنا واحد لقا جبادتو مقطوعة وكان الموسم دميرة بعد البحر شرد لقاها وكراني في شدرة سنط في حصاية خور مشرع البل وفيها كلد ابيض كبير شوكتو حمراء والسنارة في خشمو بنا عليها اللحم
2/ لو قطعتا مركب بعد ما وكرت في الدفي وانت عارف المركب وحصلتها ولقيتا قاعدة تفكها منها
3/ لو وكرت في ريشة لنش نفس الشي
4/ قبضت كور كبير وفات بيها نفس الشي كما في 1
5/ لو مشركة بي عرة وجا فرخ تمساح اكل العرة وقطعا وضرب بيها جزيرة كيوت تقنع منها
6/ راس الجبادة فيه بنقير بس والمحل عرق حا تتحدر
7/ راس الجبادة فيهو حجر وبنقير والبنقير اقوي من الحجر والمحل عرق برضو حا تتحدر والعكس صحيح

8/ راس الجبادة فيهو حجر بس وهي وكرت وانت جبدتها شديد واتقطعت او الخيط اتملص من الوتد وراحت دا الكلام الانا قاصدو
اتمني انا اكون قد اوضحت ما اقصده
موضوع جميل فيهو ريحة دبسي يا دوب طالعة من البحر

ها ها ها
ود الخبير والله ريحتني جنس راحة... وفصلت تفصيل دقيق خلاص.. أنا ذاتي ما كان في بالي هذا التفصيل الدقيق منك... تشكر على الإضافة الطاعمة

حليل الجبابيد