كاد منتدي المناصير بلدي ان يصبح مملا

صديق عبدالله علي أبوحنة كتب:دول يا أسامة شباب راقي. حساسين..دقيقين.. ما قدرنا نسمو الى تطلعاتهم ولا قدرنا نقدم لهم الجديد..المفيد.. ولا قدرنا نرضيهم..لابد من تثوير الخطط والإقتراحات..
بعدين مشغولية الحياة... والنت البطئ أحياناً في السودان.. وعدم توفر النت في المنازل والسكن.. لاحظ أيام العطل الرسمية.. تكاد ما تلقى واحد داخل من السودان.. معظمهم يدخل في ساعة الفراغ من العمل بحيث لايؤثر ذلك على العمل في فترة زمنية بسيطة مثلاً..
أنا متأكد قلوبهم معنا..
وقلوبنا معهم.عشان المنتدى أصبح أهلنا الكبير..نتضافر جميعاً للعمل الداخلي داخل المنتدى والعمل الخارجي لأهلنا خارج المنتدى

مصباح محمد مصباح كتب:الابن أسامة لك التحية والتقدير ونشكرك على نشاطك وهمة شبابك أنت والابن مصطفى عمر الحسن وكلامك في مكانه الناس تعرف نفسها وتختفي ولكن لكل إنسان ظروفه وأنا أمثل هذا بفرض الكافية ولكن هنالك أناس لهم مقدرة ويملكون الزاد والعتاد والراحلة ولكنهم بخلوا علينا بما يملكون ولكن اقتراحك هذا ومداخلات الزملاء تكون بمجرد تذكير ونسأل الله أن نراهم بموضوعات يستفيد منها الأعضاء وفي مصلحة المناصير.

الرشيد طه كتب:الاخ اسامة
سلام
اوافقك فى كثير مما ذكرت لكن هناك اعضاء نشيطين ذكرتهم مع الغياب نرجو كما ذكرت من جميع الاعضاء الحرص على المشاركة وترك السلبية وعلى كل عضو ترك بصمته فى المنتدى مع علمنا التام بالمشغوليات وضيق الزمن .
مشكور يا قريبى

ساري الليل كتب:الواحد كلما يدخل المنتدي , يجده كما كان والاعضاء القدامي لم يحاولو تنشيط المنتدي , والاعضاء الحالين لايرتقي عددهم وعدد الاعضاء المسجلين , والموجود فعلا ومسجل لايكلف نفسه عناء المشاركه الا نادرا ,, المنتدي كاد ان يصبح مملا .
وممازاد الطين بله ناس ودالفكي , وابومصطفي , وود القبائل , ومونتاري , وهيثم الدوسوقي ريحانه المنتدي طال غيابهم عنا .
ومش كده وبس ناس خال ابرار و علي حدوري وفارس الزين وهمس الخواطر الدينمو المحرك سجلو غياب تماما .
اسماء كتيره خالص خالص بقت مشغوله ومادايره تكلف نفسها نصف ساعه تشوف الحاصل شنو والسادة المغتربين الاعمام مصباح وفتح الرحمن وعبدالغني وعزالدين المنصوري والنفر ومحمد بروي والدكتور النافعابي برضو لاحقوا المقيمين .
والدكاتره كما قال ابومصطفي ظهروا واختفوا بدايه بالدكتور البروفيسير صلاح عوض , ود كروم ود اليسع بعد ماأقترح موضوع التواصل عبر موبايل معين لتنشيط العمل الاجتماعي انشاء الله المانع خير والمصرفي محمد خليفة طلحة مالو كمان .
وبنات حواء ناس( الابنه هناء) كما يقول الاخ يسن مصطفي كانت نشيطة جدا ولازلت اذكر تلك الصور التي ارسلتها من سوق السلمات وهويدا سليمان وهويدا شرف الدين وبت الحسناب وبت الماحي , وناس مؤسسة الشلال الرابع وين القافله ولاراحت في خبركان وشري 51 , وسميه السيد , ووين اقتراح القافله بتاعت ناس جامعة وادي النيل ياأمل عبدالرحمن الشيخ ؟؟؟؟؟؟ شنو هي مجرد خواطر فقط ياناس جامعة وادي النيل ووين الخريج ايهاب واخوته .
ابومازن بعد الحجة ماشافينك تاني ؟؟؟؟؟ ابداعات ودالناصير اختفت !!!!! , النزير العوناب وعبدالرحمن قمر الدين ووالفيل بكتاباتهم المميزه دائما , راحوا في شربة ميه !!!!!
الاستاذ القدير حسن عثمان الزين لا أجد له عذرا ابدا ابدا , وكمان سلمان الحومري والعم الطيب محمد الطيب وودالسادي صاحب مقترح عنوانك وتلفونك والناس كتار الاختفوا وكمان الاخ صالح حسن بمقالاته وحركته الدائمه في مجالس المناصير واعاده توثيقها , وودالحمود والله افتقدناك صاحب بوست (افتقدناك اخي فيصل ) وين تكريم الاستاذه يامحمد ودسليمان الحمود . دكتورشنكوكه المغترب عبدالواحد جبريل كما ذكر العم مصباح عنه ان لديه افكارجيده لسع ماشفنا شي !!!! والاخ هاشم خليفة سجل وظهر ببوست عضو جديد فهل من مرحب فرحبنا به ولم نجده !!!!!
الاخ زاكي الدين حبيب نتمني ان نراك بيننا في هذا المنتدي .
واخيرا الشكر لحواء المنصوريه التي لاتزال تقتطع جزء من وقتها ( منال, هيام , انتصار) والشكر للاخ خالد عابدين رغم المشغوليات تراه دائما , كل اداري ومشرفي المنتدي والاعضاء الاعمام والاخوان والاباء بدون فرز و رحله العيدالجايه حقوا تأجلوها للسنه الجايه !!!!! اصلو العدد بتاع الاعضاء غير مشرف ولاشنو عمنا سلمان عقيد .

على عيسى كتب:اخى ابو الرميساء
لك كل ودى وتقديرى ودائما مانجدك تحمل الهموم وتحس الجميع..على التواصل ..واثراء المنتدى بالجديد .من المواضيع....والى الامام

على عيسى كتب:ابو المعز
السلام عليكم
وين ماظاهر وماشفنا براد شايك ولاقدحك على الديوان
مالك ياخوى المانع انشاء الله خير ناس سبنقه وام دافوق.وقضروف سعد..ناس العاصمه وخارج السودان .قدحم انشاء الله ..بام شعيفه والابى ملح ماغاب من الخلوه ..

ود المناصير كتب:الإحساس المرهف ... ونسمة ودعاش المنتدى ..الرائع أبدا ساري الليل .. سلام يا روعة

لن يكون المنتدى مملا ولا طاردا ما دمتم ريحانته وقادة دفة الحوار والنقاش فيه

لن نحيد عنه ولن نفارقكم حتى وإن حاول البعض ذلك بجرنا إلى متاهات أخرى

سنكون معكم ... ولن نترككم أبدا

لك كل الشكر والتقدير

وكل سنة والجميع بخير