ونـَـسـِـي في بـَـاشـِـي

ما وثقتموه عن اهلكم من تراث وثقافة محلية
ارجعتنى تماما لما كتبه القامة الاديب الطيب صالح
والذى نال به الجوائزالعالمية فى الادب.
كتاباتكم تذخر بالكثير من المفردات المحلية وتحكى عن واقع المنطقة
اجمل مافيها الحوار الذى يدار بين الاشخاص يجعلك تعيش الواقع كما هو
ارجوا ان توثق هذه الكتابات لكى تجعل منها كتابا عن المنطقة يحكى عن ثقافتها وتراثها

لك التحية والتجله
هذا التعقيب من الاخ صلاح ابوعاقلة
صديق لابناء المناصير

مرحب بصلاح ابو عاقلة صديق المناصير يا عباس
لكن أنا ودكتور مصباح.. والنفر.. ومحمد بروي ، انا قايل الكبر لما..

صلاح ابوعاقلة رجل من اهلك المسلمية
يتابع معى كتاباتك وهو موظف معى بشركة سالكا
وهو يرد لك التحية باحسن منها
بس واصل وما تقطعنا فى دقش

جزاه الله خير.. ناس المسلمية احبابنا واكيد هو راجل ذواقة ومتعاطف مع المناصير..ولي فيها أصدقاء.. وحصل زرتها مرتين..
تحياتي لصلاح ابو عاقلة
اعرف من المسلمية.. محمد المبارك وأسرته. عندو اخوات كتاااار.. وواحدة منهن متزوجة معانا في الإمارات وساكنة الشارقة.. ناس طيبين كلهم ناس المسلمية..

بعد كدة فضلنا على القعييدة والسيرة.
الغريبة يوم داك في السودان سمعتا قالوا
العروس بقت هي التى تسير للعريس في معظم الحالات.. والعريس يكون قااااعد... يبـرِّم في شنبو! منتظرا تجي سايري
.......
برضو راح نتطرق لى قطع الرحط عند المناصير

رمضان الزول بيكون مشغول فيهو.. بالعمل الروحي.. وإلا كان ممكن نختم الموضوع ده
ونكتب عن ( القعييدة) و( السيرة ) عند المناصير.. و( قطع الرحط).. هو الحاجة الكويسة إنو موش رمضان يعني الحاجات دي ما دين؟
لا
برضو دين تراثنا دين..
ليه
ناس جادين
يعني مافي مخالفة كتيري يقولوا عليها. يعني الواحد كان تحدث عن تراثنا في رمضان او غير رمضان عادي؟
لأنو ناسنا بيعرفوا الدين من قبل الناس ما يعرفوا الدين. دين بالفطرة والكرم والشهامة، والضكرنة والفرسنة، ونصرة الملهوف.. نصرة الملهوف الله قدما على كل شئ..
كان ممكن نكتب
بس لأنو رمضان بنأخذ منو راتبنا الروحي للسنة كلها.. طبعا زي ما الزول عندو راتب مادي يجيهو آخر الشهر، كمان الناس الموحدين بيعرفوا أنو عندهم راتب روحي. ورمضان خير فرصة لإستغلال الفرص.. ختم القرآن... الإكثار من قيام الليل في الثلث الأخير..( ينزل الحق عز وجل في الثلث الاخير، ويقول هل من داع أستجيب له! هل من مظلوم ارد له مظلمته) حديث بإسناده.. يعني الثلث الاخير من اليوم والناس يستهويهم النوم.. وانت صاحي مع ربك..
قالت السيدة عائشة رضي الله عنها( كان صلى الله عليه وسلم يقيم الليل بعشر ركعات، لم يزد عليهن ، ولم يتركن لا في حضر ولا سفر.. وكان يطيل القراءة بطوال السور فيهن)
.........
اها في رمضان الزول بيكون مركز على إنو يأخذ مونة السنة كلها من هذا الشهر الفضيل.. لأنو باقي الشهور البركة موش زي مافي رمضان..
نكون زي النمل حقو.
النمل قبل الخريف يبدا يشيل مونة السنة كلها يدخلا في جحروا.. استعدادا للسيول والمياه.. يعني خزن راتب سنة مادي النمل من القوت الضروري..
اها الزول العارف العابد البي يعرف من اين تؤكل الكتف.. يوظف رمضان توظيف لأقصى حد.. عشان ياخذ مونة السنة كلها وراتب السنة . بعدين البركة بي تنزل خلال السنة في كل شهر على حدة.من حصيلتك الروحية الكبيرة دي الأنت جمعتها بكدك وعملك في رمضان...
.........
النبي صلى الله عليه وسلم قال: ( ألا إن لدهركم نفحات، فتعرضوا لها )
أهو رمضان واحد من النفحات دي
نأخذ منو راتبنا الروحي
والراتب الروحي أدق عند الله من الراتب المادي..
الراتب المادي يجيك كل آخر شهر
لكن الراتب الروحي بيجيك كل لحظة
قال صلى الله عليه وسلم ( أعطوا الأجير أجره قبل أن يجف عرقه)
عشان كدة مشغولين شوية برمضان.. وإن كان ما مشغولين عنكم في التواصل. لأنو مواصلة الأرحام دين..
نفطر وبعدين نختم البوست ده بي تراثنا في الحاجات القلناها.. قعيدة سيرة قطع رحط.. سبوع..
وإذا كان لى شوية المرييسي دي البي يشربوها اهلنا زمااان وهن ماكانوا عارفين حلالها من حرامها!
الله فضلوا واسع في المغفرة، والفضل العميم الكاسح. والله احن بي عبيدو من اي مخلوق..
والنبي صلى الله عليه وسلم قال الخلق عيال الله، احبهم لله ، أنفعهم لعياله)
يعني الخلق كلهم هم اسرة الله.. زي ما انت عندك اسرة حريص على قوتها ولباسها ومسكنها.. كمان الخلق الكتااار ديل الإنت شايفهم هم اسرة الله.. بس إنت اسرتك صغيرة واسرة الله كبيرة .. لكن في النهاية دي اسرة ودي اسرة..
احبهم لله أنفعهم لعياله
يعني المقرب عند الله هو الذي يساعد اسرة الله في شؤونها بدون منه ولاتكبر.. يعني يخدم الناس.. وخادم القوم سيدهم..
حاج الماحي قال: ( عصاتنا البيشربوا الدكاي مع الصديق سديس الراي)
يعني يتمنى لهم المغفرة وأن ينضفوا ويطهروا ويكونوا عندك زي صحبة صاحبك ابوبكر رضى الله عنه .. وهو هنا يخاطب سيد الوجود ومدده ونوره. نبينا محمد بن عبد الله عليه أفضل الصلاة واتم التسليم..

ونسة الباشي أول بي تكمل أو!

جريناها هنا لافوق لى سهام
 كان فاقت من شغلة رمضان لتقراها
 أصلها سهام ماها قاعدة تغتس لى تحت .. تحتــّل
 ودائما الدرر والجواهر تحت..
 هسه الناس البي يفتشوا في الدهب ديل في جيهة أبوحمد  كل ما غتسوا لاتحت لقوا دهب كتير
 حتى في البحر.. الجبادة والصريمي الطويلي البي تروح نص البحر وعلّي يرموها بالمركب.ز دائما تجيب الحوت الكبار
 ماها زي جبابيد الحجرة القصيرة البي تفننا وتجدعا.. دي تجيب شلومبايي.. وكان بالغت كانكيج صغيير

الكلام الفات عن رمضان ده بالله من رمضان السني الفاتت..
 يعني موش رمضان  السني دي؟

الناس نزلو التمر..
....
راح نكتب عن التالتي.. والسبوع.. برضو قاعدين يحتفلوا بيهم المناصير.. وخاصة السبوع..
العريس كان عندو طعم زمان.. بس سلمان عقيد الأرباب في بوست الزغاريد بي هناك قال .. هسي دي العروس هي البقت تسير للعريس.. حاجة عجيبة

يا أخوانا سهام قاعدة تحب كلام اهلا المناصير.. وحبوبتا علمتا الكثير.. وكانت تحرص على زيارات البلد بي عيالا كل مرة؟
ياربي ما علقت على الونسي دي مالا؟
والله طاشي شبكة؟
والله ما عجبتا الونسى بتاعة الباشي دي؟
والله ناس الجزاير باشتن كتر؟

والله ياصديق ونسة الباشي دي قبل ماترفع البوست انا قريتا وبي سببها بقيت شايلي تيرابي وتكن بي وراك افتش محل جروفك واجي شايلي تيرابي وهو عشقي ومحبتي لاهلي وأشياء كتيره اتظلمو فيها ومنها ماذكرته في بوست المدرسه