عمرك عرفت ربنا بيحبك قدر ايه؟

بصراحه انا حبيت اوى اكلمكوا عن الموضوع ده لأنه فعلاً مهم جداً وهو حب الله للعبد مش حب العباد لله لأن كتير من الكتب دلوقتى بتتكلم عن العباد وازاى هما حبوا ربنا لكن اللى لازم نعرفه كلنا الاول هوا ازاى ربنا بيحبنا ...



سبب من الاسباب اللى خلتنى اكتب الموضوع ده انى شايفه ناس كتير دلوقتى شباب وبنات بقت علاقتهم بربنا علاقه تكليف وبس يعنى بنصلي ياعم وخلاص ماهو مكتوب علينا ..ليه بس يارب فرضت الحجاب .. ادينى هاتحجب بدل ما ادخل النار .... العلاقه للأسف اصبحت روتينيه
بس لا والله يا جماعه العلاقه بينا وبين ربنا عمرها ما كانت كده ..العلاقه اصلاً اساسها الحب ..





اسمع الآيه الجميلة دى كده :

" فَسَوْفَ يَأْتِي اللّهُ بِقَوْمٍ يُحِبُّهُمْ وَيُحِبُّونَهُ أَذِلَّةٍ عَلَى الْمُؤْمِنِينَ أَعِزَّةٍ عَلَى الْكَافِرِين "

..شوفت ربنا عز وجل قدم ايه على ايه ...قدم يحبهم على يحبونه ..هو اصلاً بيحبك من الأول من غير ما حضرتك تعمل حاجه ..عارف ليه ..اقولك
هو لما حد فينا بيعمل حاجه بإيده بيحبها ولا لأ ؟؟ اللى مثلاً كتب قصه او مثلاً ولادك بتحبهم اد ايه ..بتقول دول بتوعي دول حته منى ...برده ربنا سبحانه وتعالى هو اللى خلقك ..اسمع الآيه دى لما ابليس رفض يسجد لأبوك آدم :

" قَالَ يَا إِبْلِيسُ مَا مَنَعَكَ أَن تَسْجُدَ لِمَا خَلَقْتُ بِيَدَيَّ أَسْتَكْبَرْتَ أَمْ كُنتَ مِنَ الْعَالِين" .

.شايف خلقت بيدى .. طيب اسمع الحديث ده


عن الرسول صلي الله عليه وسلم :

" إن الله إذا أحب عبداً دعا جبريل، فقال: إني أحب فلاناً فأحبه، قال : فيحبه جبريل ثم ينادي في السماء فيقول: إن

الله يحب فلاناً فأحبوه فيحبه أهل السماء، ثم يوضع له القبول في الأرض"
....ليه ؟؟؟






ليه ربنا اذا احب عبدأ ينادى جبريل ويقوله انى احب فلان ..اما كان يكفيك لو ربنا حبك انه بس يحبك ؟ ! لا .. لا مش دى العلاقه ..ربنا لو حب عبد يعبر سبحانه وتعالى عن حبه .. مش احنا اللى لما تسأل واحد فينا يقولك دنا قلبي عمران بحب ربنا دنا بينى وبين ربنا عمار ..تقوله طيب بتصلي ياعم يقولك لا والله ...ازاى بقا ..في بيتين شعر بيكلموا صاحبنا ده بيقولوا :

تعصي الإله وانت تظهر حبه ...هذا لعمرى في القياس بديع
لو كان حبك صادقاً لأطعته ...إن المحب لمن يحب مطيع






بس على فكره في ناس كتير فاكره انك تنال حب ربنا ده حاجه صعبه اوى ...حب ربنا يا جماعه مش مقصور على بس الصحابه أو الأنبياء ..ده ممكن يكون شاب دلوقتى عنده 19 سنه وبيقرا كلامى ده يكون ربنا بيحبه ..ممكن حد يكون بيقرا دلوقتى واسمه بيتردد في السماء لأن ربنا بيحبه ...تاب دلوقتى من ذنب كان مصر عليه فربنا حبه ..

طيب مين بقا اللى ربنا بيحبهم ..." إن الله يحب التوابين ويحب المتطهرين " " إن الله يحب المقسطين" إن الله يحب المحسنين " ...أصناف كتير من الناس






طيب بص الحديث ده وشوف اللى ربنا بيحبه هايعمله ايه :

قال رسول الله صلى الله عليه وسلم: إن الله تعالى قال: من عادى لي وليا فقد آذنته بالحرب وما تقرب إلي عبدي بشيء أحب إلي مما افترضت عليه وما يزال عبدي يتقرب إلي بالنوافل حتى أحبه فإذا أحببته كنت سمعه الذي يسمع به وبصره الذي يبصر به ويده التي يبطش بها ورجله التي يمشي بها وإن سألني لأعطينه ولئن استعاذني لأعيذنه وما ترددت عن شيء أنا فاعله ترددي عن نفس المؤمن يكره الموت وأنا أكره مساءته ولا بد له منه "








...ياااااااااه
تخيل لما يكون الله عزوجل سمعك وبصرك ؟ تخيل لما ربنا يحبك يعلن الحرب على اى حد في الدنيا يأذيك ؟؟ بس سمعاك بتقولى بس الله تعالى قال ولياً وانا مش ولى ...ماحنا قولنا ..بص الآيه دى وانت تعرف :

أَلا إِنَّ أَوْلِيَاء اللّهِ لاَ خَوْفٌ عَلَيْهِمْ وَلاَ هُمْ يَحْزَنُونَ «62» الَّذِينَ آمَنُواْ وَكَانُواْ يَتَّقُونَ «63» "


ايه ده .؟؟ بس كده ..يعنى الأولياء هما الذين آمنوا وكانوا يتقون ..أيوه هما دول ...طيب يتقون دى يعنى ماعملش حاجه غلط خالص ...لأ يعنى يكون الغالب على حياتك انك بتدور على طاعه ربنا والبعد عن المعصيه وإن زللت بتوب ..
يالا بقا ..ادخل في حب ربنا مستنى ايه كل ده...
طيب انا اعمل ايه؟ ..
الخطوة الأولى : يلا كسلان ليه .. ابدأ وخد بإيد صاحبك , أو صاحبتك
شايف الحديث بيقول ايه " وما تقرب إلي عبدي بشيء أحب إلي مما افترضته عليه "






ادى اول خطوه ..الفرائض .. صلي الصلوات في معادها وقوم صلي الفجر .. ما تأخرش الصلاه عن معادها بالله عليك ..طيب خلصت الفرائض وتمام ..

الخطوة التانية ادخل على النوافل : صلي السنن او اعمل صدقه مثلا

..ابتسامه في وجه اخيك .. كلمه طيبه ..
اوعى تضيع الفرصه دى ..اوعي تكون مسكين ..

المسكين بجد اللى ماحسش بحب ربنا ليه .. بجد والله هو ده المسكين ...

طيب شوف ربنا اد ايه بذاته عز وجل بيحبك ..شوف الحديث ده وحسه بقلبك ..
عن انس رضي الله عنه قال سمعت رسول الله صلى الله عليه وسلم يقول :
(( قال الله تعالي : ياابن آدم ، انك ما دعوتني ورجوتني ، غفرت لك على ماكان منك ولا ابالي.. ياابن ادم : لو بلغت ذنوبك عنان السماء ثم استغفرتني ، غفرت لك.. ياابن آدم : انك لو أتيتني بقراب الارض خطايا ثم لقيتني لا تشرك بي شيئا ، لاتيتك بقرابها مغفرة )) .






يااااااااااه!! حاجه تكسف بجد اننا بعد الحب ده كله نعصيه وعلى أرضه واحنا بناكل من خيره ...بعد كل الإحسان نقابله احنا بالإساءة والمعصية .....وعشان كده احد الصالحين يقولك ايه : (ليس العجب في عبد يتودد إلى سيده ..ولكن العجب كل العجب في سيد يتودد إلى عبيده )..

ها ..لسه كل ده قلبك ما اتحركش ...ازاى ربنا يكون بيحبك كل الحب ده وانتا غافل عنه ...بزمتك بعد كده تستخسر تقوم تصلي الفجر ؟! بعد كل الحب ده ؟

شوف سيدنا على بن أبي طالب ازاى ادرك الحقيقه دى وان ازاى ربنا بيحبنا فقال :
( لو قالوا لي يوم القيامه سنجعل حسابك لأبيك وأمك ..لرفضت ) !!





انتا لو قالولك يوم القيامه هانخلى والدك اللى يحاسبك ..يااه هاتفرح اوى ..بس لأ .والله ربنا بيحبك واحن عليك من أبيك وأمك ..وده اللى سيدنا على عرفه وفهمه رضي الله عنه..

طيب شوف بقا ازاى ربنا دلل على حبه لينا بأدله عمليه ..وهيا أدله كتيره مع إن كان يكفينا إن ربنا كان يقول انه بيحبنا وأكيد هانصدق ..بس ربنا سبحانه وتعالى حبه لينا ليه تطبيق .( وده تقريباً الفرق بين كلمه الحب والود أن الود بيكون ليه تطبيق فعلى ) عشان كده ربنا إسمه الودود ..





من الدلائل دى إن ربنا يدى ثواب كبير اوى على حاجات صغيره ..زى ايه ..أبسط حاجه إن الحسنه بعشر أمثالها والسيئه بمثلها ..إحنا لو هانتكلم عن العدل ..تكون الحسنه بحسنه والسيئه بسيئه ..امال ليه ربنا خلى الحسنه بعشر أمثالها إلى سبعمائه ضعف إلى اضعاف كثيره ؟؟
بيحبك ..


بيحبك ومش عايز يدخلك النار لأن هو اللى خلقها وعارف اد ايه عذابها شديد وهو برده اللى خلقنا وعارف اد ايه مش

هانقدر نستحمل ولو ثانيه واحده فيها ..







حاجه كمان زى صيام يوم عرفه يكفر سنه ماضية وسنه باقيه ..

يا سلام .. يعنى اصوم يوم واحد تتغفرلى سنتين ..اه ..

حاجه كمان ..من قال سبحان الله مائه مره بألف حسنه..دى مش هاتاخد منك تلت دقايق ..وشوف ثوابها كبير اد ايه..اذكار الصباح والمساء اللى ماحدش بيقولها ثوابها كبير جدا مع انها كلها على بعضها ماتخدش نص ساعه

طيب اقولك دليل تانى؟ ...ان ربنا مابيعجلش العقوبه... وانه اصلاً بيقبل التوبه ..

تخيل لو كان اللى يعصي ربنا خلاص ماينفعش يتوب ؟؟ بس من رحمته علينا انه باب توبته مفتوح على طول زى ما بيقول سبحانه وتعالى : "غافر الذنب قابل التوب " أو " ومن يغفر الذنوب إلا الله "أو " وربك الغفور ذو الرحمه لو يؤاخذهم بما كسبوا لعجل لهم العذاب " ...





طيب بص الحديث ده وشوف أد ايه المفروض نتكسف من نفسنا ..

قال رسول الله صلى الله عليه وسلم : (( يتنزل ربنا ، تبارك وتعالى ، كل ليلة الى سماء الدنيا ، حين يبقى ثلث الليل الآخر ، فيقول : من يدعوني فأستجيب له ؟ من يسألني فأعطيه ؟ من يستغفرني فأغفر له ؟)) ..

ده على فكره الوقت اللى كلنا بنكون نايمين فيه .. أو يمكن اكتر وقت الناس بتعمل فيه معاصي كبيرة ....وربنا بينادينا... واحنا غافلين

ها .. لسه بعد كل الكلام ده مش مشتاق لحب ربنا ؟؟

مش نفسك ربنا يحبك ؟؟

قبل مايكون عشان الجنه أو عشان ماتدخلش النار ...

مش نفسك تكون حبيب ربنا ؟؟

والله هاتحس بسعاده مالهاش اول او آخر لأن خالق الكون كله راضي عنك وبيحبك ..والله هاتحس كأن الدنيا كلها راضيه عنك وبتحبك مش بس البنى آدمين وحتى الجماد كمان ..

طيب فاكر مين اولياء الله ؟؟ ها ... (( آمنوا )) (( يتقون )) ..

راعي ربنا في كل اعمالك وخلى هدفك في حياتك رضاه وحبه ..

طيب فاكر ايه اكتر حاجه ربنا بيحبها عشان تعملها... :

" وما تقرب إلي عبدي بشيء أحب إلي مما افترضته عليه، ولا يزال عبدي يتقرب إلي بالنوافل حتى أحبه"






بالله عليك اوعى تأخر الصلاه تانى او ماتصليهاش ..

ده ربنا بينده عليك بيقولك حى على الصلاه ...

بعد كل الحب

اللى بيحبهولك ده تكسل تديله 10 دقايق بس في الصلاه ؟؟ ولو انتا الحمد الله بتصلي قرب من ربنا اكتر وصلي السنن وأعمل نوافل كتير ..

شايف كلمه ولا يزال ؟ يعنى انا مش هابطل اعمل الحاجت دى يا رب .. لغايه ما تحبنى يارب وانا مش عايز حاجه في الدنيا اكتر من كده يااااااااااااارب ..

يالا ابتدى معانا نمشي في الطريق لحب الله ..هنساعد بعض ونقوى بعض على الفتن اللى ماليه الدنيا دلوقتى ..علي فكرة انا لسه هبدا المشوار انا كمان





وهانتوب ونستغفر من كل حاجه عملناها وأكيد ربنا هايغفرلنا ....

زى ما قال حبيبنا عزوجل " قل يا عبادى الذين أسرفوا على أنفسهم لا تقنطوا من رحمه الله إن الله يغفر الذوب جمعياً إنه هو التواب الرحيم "
يلا نشجع بعض يلا ناخد بايد بعض ده حب ربنا 0

(منقول للفائده)

جزاك الله خير أخى مصطفى عمر الحسن _ نسأل الله أن نكون من أحبابه وأصفيائه وأوليائه الذين لا خوف عليهم ولا هم يحزنون _

لك تحياتى وتقبل مرورى ،،،

الاخ العزيز عثمان النفر
لك الشكر والتقدير
وجزاك الله خيرا علي الدعوات الصالحه

الاخ الغالي نور الهادي
لك الود والتقدير
وجزاك الله خيرا للاضافه ربنا يجعله عملا متقبلا