الدعــــــــــــــــــــــــــــوة للقاء جامــــــــــــــع لكافة اعضـــــــــــــاء المنتدى

اللاخوة الاعضاء الكرام سلام---
عقدت ادارة المنتدى اليوم اجتماعا بمنزل الاخ الريس خالد وذلك من خلال الزيارة التى سجلت له –وفى سبيل تنشيط اعمال المنتدى وانشطته تمت مناقشة عدة قضايا –واهمها وتحقيقا لرغبات الكثيرين من الاخوة الاعضاء تم الاتفاق على ان يكون هنالك لقاءً جامعا وكرحلة ترفيهية تعارفية لجميع اعضاء المنتدى تم الاتفاق على يكون ذلك فى الجمعة الموافق
3/12/2010 م –وذلك ابتداءً من الساعة العاشرة صباحا بجناين الحلفايا جوار كبرى الحلفايا الجديد-
وندعو جميع الاخوة الاعضاء التأكيد على الحضور من خلال هذا البوست –مع الاسراع بتسديد الاشتراكات الشهرية—
ونحن نعلن لهذا اللقاء قبل وقت كافى حتى يعلم به الجميع ويستطيع كل فرد ان يوفق اوضاعه واعماله وبرامجه من الان –ونيابة عن ادارة المنتدى ارجو من الجميع الحرص على الحضور واكرر التأكيد على ذلك من خلال هذا البوست حتى نكون على علم بالعدد الذى سوف يأتى ومايترب عليه من خدمات و ضيافة وبرامج وغيرها حتى يتم الترتيب لذلك من خلال الاجتماع الذى سوف ينعقد للاعداد والتخطيط ووضع التكاليف والبرامج لذلك اللقاء – كما يتم من خلاله التفاكروالتباحث حول كيفية تطوير المنتدى—
-----------للجميع شكرى وتقديرى-------------

هذه فكره ممتازه ونعلن موافقتنا علي الحضور ( حلاه الجمعه يومه وسمحه جناين الحلفايا مقيله) ومادايرين نتم الباقي خوفا من الجماعه الباقي يتموه العزاب يازول نلمح ويحصل اليحصل
( كل زول بي ..... عيون لعيون .... وشفاه لشفاه ..... خليهم يقولوا زي ما يقولوا
لكن ارجو ياسلمان ان يكون البرنامج مرتب ومعد بطريقه جيده فهذا مؤشر مهم جدا وماداير اقول ان هناك طريقه تتم عشوائيه فأذا كانت الطريقه غير موفقه في الترتيب والاداء فهذا سوف يكون مؤشر سالب
لابد من الاعداد الجيد جدا وحتي لو تستعينوا بالخبره الاجنبيه في طريقه الاعداد اكرر وارجو ان لاتكون باالطريقه البلديه (ليالي الانس تبان من عصاريها ) فنحن ياسلمان دايرين الحكايه تبان من قوله تيت لمافي ذلك من راحه نقسيه تجعلك مشدود ومنتبه للبرنامج وتطلع الاجتماع يثمره وخطوات ( نقول ثوريه او تقدميه علميه استراتجيه وربك بستر ما تكون حضاريه علي وزنه المشروع الحضاري)

شكرااستاذ سلمان (ده القبيل راجنو نحن يوم تبشر بيه غيمه ).بالتوفيق وربنا يسدد خطاكم .ولو حيين اكيد حاضرين .

الأخ / سلمان :
لك التحية.
ربنا يوفقكم ويوفق أعضاء المنتدي ويوفق أبناء المناصير جميعاً .. نحن معكم قلباً وغالباً .. بعد المسافة بين حدائق الحلفايا وبيننا لم يمكننا من لقاءكم .. لذا نرجو توثيق ما يدور في جلساتكم وطرحها لبقية أعضاء المنتدى .. لك التحية والتجلى.

اخي سلمان
تمامنحن جاهزين
بس الاشتراكات بتسدد كيف او التبرعات

اْاْكد حضوري انشاء الله

شكرا هندسة--وبالفعل سوف يكون هنالك ترتيب محكم لاخراجه بالصورة المطلوبة--
شكرا محمد --
شكرا حسن وياخى حضوركم ضرورى ولو تعسر سوف نوثق لكم كل شىء باذن الله--
شكرا محمد
شكرا يس
-------------------ومزيدا من التفاعل--------------------------

سوف اكون في الموعدانشاءالله

جاهزين وبالتوفيق إنشاء الله

ااكد حضورى وسكينى فى ضراعى وخروفى كان صغير او كبير فى ضهر عربيتى وربنا يبعد المرض ويدينا العافية ؟؟؟؟؟؟ اى كلام ؟؟؟؟ الجيش نظام ؟؟؟؟






ابو مصطفى

شكرا--احمد--
شكرا --جبريل
شكرا --ابو مصطفى وعفيت منك --وحبوب حلالى--
بعدين يا ابو مصطفى اول ما نخلص من الضبح والقطيع وبصفتى المشرف الاجتماعى سوف نسحب منك السكين--حتى نهاية الاحتفال-

سكين ابو مصطفى مهمه يا سلمان
لو سحبتها كانك سحبت الرماه من اماكنهم وجعلت خلفنا مكشوف
وان كان هنالك من يود ان يحمل سكينا عليه اولا ان يضع خروفا فى ظهر عربته

نؤكد علي أهمية هذا اللقاء ونجاحه وارجو من الجميع أن يعطو هذا اللقاء اهمية غير عادية حتي يأتي بالفائدة علي أهلنا القاعدين فوق الحجار كما نؤكد علي أن التنظيم سوف يكون علي مستوي جيد جدا ونحنا كل املنا حضور يشرف المناصير ويجمع الشمل

باذنه تعالى وقبل الجميع بما فيهم خروف او خريف ابو مصطفى سنكون حضورا"..................
ننتظر وبكل الشوق..

شكرا سلمان:
نتمنى ان يتم اللقاء وان تكون الجدية سمة للجميع من اجل قيامه

خال ابرار خريف خلاص خروف كبير ليه قرنيين تانى عندك كلام ؟؟؟؟


تحياتى
ابو مصطفى

ح نسجل حضور انشاء الله [b]

ارجو ان يتم ابلاغ دكتور اليسع ودكتور حجازي بالدعوة ولغاية الأن ماسمعنا رأي اخونا حازم طبعا هو زول حارة وحاجة زي دي مابتأخر منها

شكرا هناء --شكرا --فارس--
ويافارس د.اليسع اكد--لكن الاهم د. حجازى(الغتس دا )
ولابد من حضوره وان طال السفر--
وحازم باذن الله كالخيول الاصيلة يجى فى اللفة--وكما ذكرت زول حارة--

ونحن من خارج البلاد نشيد ونبارك هذه الدعوة لهذا اللقاء الجامع وكم كنا نتمنى أن نكون حضورا بينكم _ نتمنى أن يوفق الجميع فى الحضور فى الزمان والمكان المحددين وأن يكلل هذا اللقاء بالنجاح ويكون له مردوده الطيب ويعود بالنفع على أهلنا وديارنا وأن يكون فاتحة خير لمزيد من اللقاءات والتفاكر والتلاقح حول قضايانا العالقة _دمتم فى خدمة أهليكم وحفظكم الله ورعاكم _

تقبلوا تحياتى ،،،

نحن من ارض المشوره الشعبيه
بداية نشيد بالفكره الممتازه
حقيقة المنتدي غرس البذره الطيبه ولكنها تحتاج الي من يتعهدها بالسقاية
والسقايه هي الاشتراكات والعمل الاجتماعي الذي يلم الناس
نحن لن يمنعنا عن الحضور في الموعد الا الشديد القوي لاننا نريد ان نلتقي بتلك الوجوه النيره التي شغلتنا قساوة الحياه عنهم واخرين نود معرفتهم ولنا شوق كبير لهم
انني اتوق شوقا في انتظار ذلك اليوم الميمون .

يا ناس هوى ؟؟؟ ناس الادارة والنظام انتو وين ؟؟؟؟ انتو قايلين الحكاية بعيدة والله قربت خلاص كلها الباقى ليهاعشرة يوم وانا خايف الحاج اخوى زول الجنينة البى نقعد تحت ضلها ما كلموا وقالوا عندى ناس جاين هنا ؟؟؟؟؟ غايتو الله يكذب الشينة ويجيب يوم 3-12 -2010 ونعرف ناس الحارة ؟؟؟؟


تحياتى
ابو مصطفى

إنشاءالله الموعد قائم ياالطيب ونرجو من الأخوة الأعضاء التفاعل اكثر مع الحدث وكل زول يجيب معاهو نفرين تلاتة من الأخوة الأعضاء ومامطلوب من اي زول تكلفة فيما يخص هذا اللقاء الأمور كلها مرتبة

تحياتنا للجميع وانشاء الله الكل بخير
تقصيرنا فى الايام الفايته لاسباب قويه وفوق الاراده
الامر مرتب والمشوره بيننا لم تنقطع فنحن دوما على اتصال مع الاخوان
نقبل الاقتراحات وننتظرها من بقيه الاخوان عبر الموبايل او البريد الالكترونى او الرسائل الخاصه او علنا ومقرؤا على ظهر المنتدى
ونتمنى ان نجد من بينكم من يود المشاركه معنا فى اخراج هذا اللقاء الهام ونحن فى الانتظار

كل عام والجميع بخير--
وشكرا لكل المتداخلين للتذكير باليوم اواللقاء--وبعد ان عدت الايام المباركة والسعيدة--يجب ان يعمل الجميع على ان يخرج هذا اللقاء بصورة جيدة --
وزى ماقال الحاج التلفونات بيننا --وهنالك بعض التكاليف نود ان نعرف اين وصلت --كذلك اقترح ان يعقد يوم الجمعة القادم اجتماع لاكبر عدد من الاعضاء ليبدوا ارائهم ومقترحاتهم وان يبدأ مباشرة التنفيذ للتكاليف والاعداد لانجاح البرنامج --
كما اناشد بقية الاعضاء الذين لم يبدوا او يوضحوا رايهم بالحضور التفاعل والمشاركة من خلال المداخلات فى هذا البوست --ومن الان ان نعدى على بونى ----

اسمعنى كويس يا عضو المنتدى القريب ماك بعيد يوم تلاتة اتنعشر لازم تشرف الاحتفال العام عشان نعرف الجادى منو والما جادى منو ؟؟؟؟ مع تقديرى لكل الظروف والناس ظروف ومعليش يا جماعة انا ذاتى يمكن تحصل لى ظروف الله الله الله الله يسهل ؟؟ لكن خلى بالك معاى يا الرشيد ؟؟؟ اصلى انا لو جيت والله سهل لى وقطعت الكبرى من ام درمان على الحلفاية وما شفت لى حركة بعمل يو تيرن واروح اجيب لى كوتة من اهلنا النوبة واعمل احتفال ليه شنه ورنة ؟؟؟ نقارتو تجيب الطاش ؟؟؟؟

تحياتى
ابو مصطفى

شكراللجميع----
لازلنا فى انتظار تأكيد بقية الاعضاء الذين يودون الحضور ---نناشدهم بالاسراع بالتأكيد--حتى نرتب ونضع خططنا وبرامجنا على العدد واتمنى من الجميع المشاركة --فهو سوف يكون يوما تاريخيا باذن الله---
حتى الان بالاضافة للاداريين--اكد كل من :
هاشم--الطيب-محمد عمر--احمد الفيل --د.اليسع-تاج السر -جبريل --هناء--مصطفى عمر الحسن--ويتابع من على البعد --فارس --النفر--وايضا من الداخل البعيد --حسن عثمان--
واستأذن اديبنا الكبيرمحمد بروى لاقتبس الاتى:
حدايق الحلفايا الجنب الكبرى الجديد
تلاته ديسمبر جاييها عيد
يملاها حس طمبور شديد
ان بقيت جيت الفرح يادوب بى يزيد
ومن المشاركين دايرين المزيد
ومنتدانا يردد نشيد
الدنيا بهجة ومقلوبة عيد

يارجال الله قولوا كب--
مزيدا من المشاركات والتأكيدات والتطمينات--رغم المشغوليات --
-------------------------up

الله يحبس العوارض .والله يوم 3/12 ده عايزنه يبقى عيد وبالجد نحن نعاين ليه ذى العيد .وعندنا فيه امل كبير .

ياسين مصطفي انت عكاز هذا اللقاء قول لينا رأيك

[quote="فارس الزين علي محجوب"]]ياسين مصطفي انت عكاز هذا اللقاء قول لينا رأيك

كل عام وانت بخير اخونا فارس الدينمو المحرك لهذا المنتدي الدافع الحقيقي لقيام هذا اللقاء .اطمنك انو كل الاخوان مدورين صباح ومساء في الترتيب لانجاح هذا اللقاء

قولى يازول كيف اللقاء واحكى لى وادينى المزيد ؟؟؟
التاريخ يعيد نفسه مناصير اتلمت وفرحة بدون حدود
السعادة والسرور وقمة الحضور ؟؟؟

تحياتى
ابو مصطفى

انشاء الله نكون حضور

يــاحـــازم ويـنـك طــبــعــا انــت عــامــود الــنــص لــهــذا الـلـــقــاء وانــت مــالزول الـبـيـوصــو عــلــي أهــــلــــو
ولــك أجــمـــل الــتــحـــايـــا

المكان نفس المكان
والزمان نفس الزمان
وانت فى طريقك الى مدينه ام درمان عن طريق كبرى الحلفايا الحتانه
المدخل الى الكبرى تقاطع به اشارات مروريه قبل مدخل الدروشاب شمال
الطريق متجه الى الكبرى وبعد نهايه اخر مبنى على يدك اليمين جهه الازيرقاب تجد مدخل يؤدى الى المزارع
المكان جنينه السيد محمد الفاتح ود ام دوم
وهى فى بدايه كبرى بحر سماح قبل الكبرى الكبير (بحر سماح ده خوى قبل وصولك كبرى الحلفايا متل خوى كدر كده)
الوصف العمومى
الجنينه توجد على الجهه الشماليه لمدخل الكبرى من جهه الحلفايا على يدك اليمين وانت طالع الكبرى بس لازم تدخل على الطريق الزراعى (طريق الخواجه مور) قبل وصولك بدايه الكبرى
المهم ان كنت تريد المشاركه ان تؤكد ذلك كتابه على هذا البوست
وحضورك يترتب عليه بعض الترتيبات والالتزامات من قبلنا

تم عقد اجتماع تحضيرى --حيث تمت مناقشة عدة امور تخص اللقاء -منها:
1-تم الاتفاق على المكان والذى كلف به من قبل الاخ الحاج --وهو حدائق كبرى الحلفايا(ووضحها الحاج)
وتم التوجيه بان يسدد المبلغ ( الايجار) فورا--
2-تم الاتفاق على ان يكون اليوم مفتوحا من الساعة الثامنة صباحا وحتى السادسة مساء
3-تمت التكاليف الخاصة بتحضير المعدات والادوات والخضاروغيره-
4- تم الاتفاق على شكل البرنامج وفقراته-
5-تم الاتفاق على ان يكون الاجتماع الثانى والنهائى يوم الثلاثاء القادم باذن الله-
كان حضورا --هاشم --خالد--الحاج --ابومصطفى --الرشيد --يس--جبريل --وشخصى --
غدا تفاصيل اوفى=

مع اقتراب موعد الرحلة ورغم بعد المسافة مئات الكيلومترات والساعات بين فيافي الولايات والعاصمة التي ابتعدنا منها كثيرا وظروف العمل في الولايات سوف نقاوم المستحيل للحضور ولو لعدة ساعات للحضور ,,, بوركتم وانتم تكابدون الصعاب في جمع صف المناصير اجتماعيا ,, بوركتم وانتم تبادرون لمثل هذا الغرس الجميل .

ضرورى ياسمسم طولنا منك تعال انت نسيت اظنك تعال

قولى كيف نتلم ويجيك ابو مصطفى ايدو مليانة دم يقولك نتعال نتلم وناكل المرارة نم واغسل ايدى من الضبيحة وبعد داك نسوى النم ؟؟؟؟ وينو حازم ؟؟؟؟ ما قريب من الجنينة وينو دكتور خال ابرار ؟؟ وينو الرشيد العنيد ؟؟؟؟ وينو خالى ودبروى التليد ؟؟؟ وينو النفر الحبيب وينو نور الهادى البعيد ؟؟؟؟؟وينو ود ابحنة صديق دايرنو يكون لينا زاد وصديق ؟؟؟؟ وينو يسن ودمصطفى بشير وينو الحاج شرف الدين ؟؟ وينو اسامة وينو ود القبائل ومنوفلى ؟؟ وينن بناتنا ؟؟؟ ناس زوبا وناس العقد الفريد ؟؟؟؟ماهى لمة وتحلى بوجود العديد ؟؟؟؟؟؟


تحياتى
ابو مصطفى

نتمني التوفيق للجميع واقترح تقديم دعوة شخصية لعضو المنتدي ود الفكي اخصائي العيون د الفاضل الفكي
ولو موافقين يا سلمان انا بحاول اجيب معاي تلميذي محمد عبد الله ( خلف الله حننتنا)
مع امنايتنا لكم بالتوفيق وانتم تنحتون الصخر باظافر العزم

الاخ سليمان وكل الاخوان كل عام وانتم بالف خير وربنا يديم نعمة الصحه والعافية للجميع
حقيقة لم اكن موجودا الايام الفاتت ويادوب وصلت من البلد
واتصلت من هنالك علي الاخوان لكي يبلغوا تحياتنا ومعايداتنا لكل الاخوان وخاصة الذين خارج حدود الوطن سائلين المولي ان يجمعهم بالاهل ويمتعهم بالصحه ويحقق أيمانيهم
رغم حلاوه العيد بالبلد وحرارة اللقيا بالاهل لم تنسينا اولائك النفر (والنفر ) الذين ارتبطنا بهم وصاروا يشكلون ارتباطا اخويا فريد تغذيه مجادعات الفكر والتفاكر فلهم شلالات الود ودعوات المحبه

اما بخصوص الاجتماع المرتقب باذن الله سنحضر
وياريت التنظيم يكون كما تمني الجميع وذكر الباشمهندس الجزولي
ودام الجميع في وئام
حازم

انا اتفق مع دكتور اليسع في دعوة دكتور الفاضل الفكي وهو عضو اصيل في هذا المنتدي وهو خير دليل للتواصل بين المناصير والرباطاب

تسلم يافارس الفارس ودوما احس بانك قريب فى الكلاكلة اللفة او القبة ؟؟؟؟ ومشكور على كل المساهمات التى تبذلها فى سبيل ربط الاسرة المنصورية وربنا يرد غربتك سالم وغانم ؟؟؟؟؟

تحياتى
ابو مصطفى

حياك الله يالطيب دماج ويارب (نتلمه ونسوي القاقه في ديوانه داك ابطاقه)