العلامة على الحسن العدرقاوى

العلامة على الحسن العدرقاوى ولد عام 1918 بسور درس القران بخلاوى الحاج نور عام 1930 فى بداية حياته ثم ذهب لبربر خلاوى الفكى على بعد ذلك التحق بمعهد ام درمان التعليمى 1941 وتخرج 1950 .
عين استاذا بمعهد المسلميه عام 1952 قدم استقالته ومارس التجاره بمسقط راسه حتى عام 1964 .عين مرشدا دينيا فى المناصير توفى فى ام درمان صبيحه الجمعه عام 85 ودفن بمقابر احمد شرفى .

العدرقاوي أسم شيطان ولا اسم زول
أصلوا جنا صلته الله وجانا في ثور
من قصيدة أحدي نساء المناصير وطبعا المناصير يحبوا اللعب.
حمدالله سلامي يا نادر يا رائع وتقبل جغمزتي دي..

ياود هبرم ما العدرقاوى ودكمدكى اسم والله اسم شيطان دى قالها على الشاعر
اما ديك فقالها كرار ودحمد وهو من سور
عند ود حجازى الببلع التور
الكواريك فى الجبل تلقلاله عنبور
ده جنا سلطو الله وجابو فى سور
قالها عندما منع البكا والزغاريد

شكرا الابن نادرعلى الحديث عت العلامة الشيخ الجليل على الحسن-والذى اثر تأثيرا بالغا وملحوظ -حيث استفاد الناس من وعظه واحاديثه وافتائه خاصة انه اتى فى وقت كان الناس فى امس الحوجة لذلك -وانا اتذكر دكانه فى يوم السوق يكون مكان للكثيرين لسماع الاحاديث والشرح والاسئلة وغيره وحتى الان نجد ان البعض يقول شيخنا على قال كذا وكذا--كما تميز بالذكاء والبديهة الحاضرة وسرعة الرد--ارجو ان تكتب المزيد عنه---
اما ودكمدكى كماذكرت قاله الشاعر على ودسلمان (الشاعر الكبير)--
اما ودحجازى--وعنبور--
انا لدى رواية ثالثة اضافة لما اوردته انت وكذلك الاخ هبرم-
بما ان ودحجازى كان الشيخ الكبير فى المنطقة(الفقير)
كما قال الاستاذ محمد الحسن قمر الدين :
يابا تاتيب فى المناصير
ودحجازى الجد الكبير
تلحقونى يجينى السمير
ومابطيقو رقاد السرير-
والناس يعتقدون فيه وفى كراماته ويقال انه ينقلب تور حسب اعتقادهم --الشاهد فى الامر انه رغم ذلك لم يتشدد فى ارشاده مع الذين يشربون الخمر--فاتى شيخنا على وقال ان الخمر(المريسة) حرام-
فكانت هذه المقاطع من الشعر مع ملاحظة انها قد تختلف من منطقة لاخرى --وقد اوردت ذلك فى هذا المنتدى ولابأس من ذكرها هنا --حيث قيل :
التمر(المريسة) ماحرمو ودحجازى البنقلب تور
الكواريك فى الجبل عاملو عنبور
دا بلايا ربنا بلابو ناس سور
-------------------تقبلوا مرورى--------------------

شكرا استاذ سلمان وزي ماقلت تميز بسرعه الرد ومن اقواله قصه تمر الهبوب لمان سألتو المره الفي شيري وقالت ليهو مامرمي الهواء ساكت قالها الهواء في العقبه كتير امشي لقطي منو.وقصصو كتيره.وهو كاتب المصحف بي خط يدو

ابننا نادر نور الهادي علي العطا لك التحية والسلام الكثير وسمعنا عنك كثيراً ولكن لم نراك حتى الآن ولكن أعرف والدك نور الهادي جيدا وقد كان يسبقنا بسنتين في المدرسة وأذكر رحمه الله كان شعلة في ليالي السمر التي كانت تقام بالداخليات في ذلك الوقت ولكن رحمه الله أصيب بمرض وهو في السنة الرابعة الأولية بمدرسة شري وافتقدته الساحة في ذلك الوقت وأظن الذي أصابه كان (عين ابن آدم) فقد كان أبوك وسيماً وذو صوت رخيم وذو أخلاق عالية وربنا يغفر له ويرحمه. أما الشيخ الوقور الداعية الكبير علي الحسن قد جاء في وقته كما قال ابننا سلمان عقيد فهذا الرجل أذكر لكم خصلة واحدة من خصاله فقد كان حريصاً أن يبيت في فراش البكاء (زمان لما كان رفع الفراش بعد اسبوع واسبوعين) يعني يوم يصبح رفع الفراش وكان يأتي من العصر ويأم الناس في صلاتي المغرب والعشاء ويقدم درساً فقهياً بين الصلاتين وكان وعظه وأمثلته من صميم البيئة ومن بينها تمر الهبوب الذي كتبت عنه بوستا في السابق وفعلاً كان يطبق التربية البيئية التي ينادي بها أصحاب النظريات التربوية رحم الله شيخنا علي الحسن ولي عودة إن شاء الله للموضوع.

شكرا مصباح على المرور والكلمات التى قلتها فى حق والدى . اما العدرقاوى فله اسلوبه المتميز فى الاقناع والفتوى كما قلت .

الابن تادر هتاك نقطه اود ان تتأكد منه وهي بخصوص عمل العدرقاوي باالمسلميه كمعلم بخصوص تعيينه في المسلميه تم تعينه كقاضي هناك الا انه رفض العمل في القضاء لمبرارت
معينه ( كان تبريره ان القضاء مهنه صعبه وهي تتعلق بحقوق الناس وكان يخشي هذا ) ولم يعين كمعلم

على الحسن العدرقاوى من اعلام وشيوخ المناصير وقد درس فى الازهر وكان من الاخوان المسلمين وبايع الامام حسن البناء فهو قيادى اسلامى وسياسي اتى قبل اوآنه ,رحمه الله رحمة واسعة واسكنه فسيح جناته

نورة دي عندها معلومات كتيرة خلاص .. ظاهر عليها من جيلنا والله شنو؟
شايفا ضرعت المناصير رجل كلب.. قطعت شري.. وراحت الغرب ومشت الضقولة ومرقتا في سور.. الحكاي شنو؟
العديرقاوي ده مات زمان ..عاصرتو والله شنو؟ من وين جابت المعلومات دي؟

الاخ الحنونى
السلام عليكم
براحة على انا ما قدركم انت دفعة عبد العظيم سيد احمد (قريت موضوع دفعة ابوحمد) وعبد العظيم سيد احمد (سرنا) كان مقيم معانا فى الحاج يوسف درس جامعة الخرطوم واتخرج 1982 وذلك الوقت كنت فى الفصول الاولى للابتدائى. لكنى مهتمة جدا لتاريخ بلدى ولى والد مهتم وملم بكل تاريخ المناصير وكان دائما يجلس مع اجدادو الكبار ويتعلم تاريخ المناصير واصول وانساب المناصير وهو رجل موسوعه ولو ما اصبح كفيف البصر كان اثرى هذا المنتدى فهو رجل متعلم . لكن دون باقى اخوانى لى نفس اهتمامات ابى ودائما ما انهل من بحره العزب.

ومن فى المناصير لا يعرف الشيخ العدرقاوى الذى كان ينشر الدعوه وسط المناصير من اولها حتى آخرها واضيف ليك معلومه اخرى عن العدرقاوى ,عندما طارد نميرى الاخوان آوى الشيخ العدرقاوى محمد الكارورى عنده فى سور حتى انتهت الازمة. والسبب ان من بائع حسن البناء من السودان خمسه منهم الكارورى والعديرقاوى يعنى لو المناصير بهتموا بالعمل السياسى كان العدرقاوى شانه كالترابى وازيد ولكنه اختار الدعوه والدين التى اراحته من فتن السياسة.

نورة برضو البرجوب دفعتنا..!! هسع البرجوب ده تشوفيهو تقولى زول في العشرينات
صاح
والله ما صاح!!

ليه انت شايف عبد العظيم كبير فقط المرض.
بالمناسبة دفعتكم فعلا مميزه نصهم اهلنا وانت ما بعيد مننا بتذكر يوم سليمان سلمان عليه رحمة الله استقبلك فى المطار كان جيت لوفاة وقتها اول مره اعرف انو عمر عبد الله عندو اخ بره السودان سليمان ابن خالى وارملته هى شقيقتى.

موش ما بعيد منكم ... قرابة شديدة
.........
سليمان سلمان لسه جرحو حي وهو صديقي
هو و عباس على خليفة
وعثمان صحن.. عثمان خليفة حسين
وأحمد الحسين الحسن
ونفر يزيد عن مائة منصوري
استقبلوني في المطار للعزاء في والدنا
وسليمان اصر يأخذني بعربيتو ويوديني بيت عمر أخوى في الراشدين بالرغم من وجود عربية.. ركبت معاه وونست..
عباس أحاطنا بخدماته ماخلى لينا شئ..
.............
نفعنا الله بجاه علي الحسن العديرقاوي..
...........
فعلا عبد العظيم سيد أحمد لولا المرض هو صغير..
مرة اتصلت بالمرحوم سليمان من هنا في أبوظبي
كان يمرر ويداب ضبح ضحيتو..
ومعه المجموعة مجموعتكم كلها سلمت عليها فرداً فرداً..
فرح جنس فرحة سليمان لا حولا
غايتو الدنيا دي ما فيها فائدة
برضو نكبنا في عمو علي شوال زوج سعاد عمتك
علي ده أحسن زول في أسرة الشواويل.. من جميع النواحي.. لسه برضو جرحو حي في نفسي
سلام مربع

شكرا باشمهندس صديق ونرجو انو نكون ما خرجنا من الموضوع
وسلام لكل اهلنا فى الغرب من ام عطرون وحوش فرينيب والنعوفاب والحنانين والدقوله والسلمات

شكرا باشمهندس صديق ونرجو انو نكون ما خرجنا من الموضوع

لا.... دخلنا في الموضوع..
الموضوع هو مناصير يتلاقو على الأثير لله في الله.. وحديث عن صلة الرحم
قال صلى الله عليه وسلم( الرحم معلق بعرش الرحمن الى يوم القيامة، يسبح ويقول: ربي صل من وصلني واقطع من قطعني)
شفتي عظمة اجترار صلة الرحم دي كيف؟

بفضل المنتدى وببركة الشيخ العيدرقاوى التى اتمت التعارف والتواصل .
واننى فى غاية السعادة ان اتعرف على اهلى خاصة المبدعين من الادباء

نعم يا إنتصار نعم شقيق محمد الحسن

مشكور الاخ نادر

سمعت عن الشيخ العدرقاوي من والدي رحهمهما الله الاثنان رحمة واسعه

ما سمعته عنه انه كان مجتهدا في تعيلم الناس امور دينهم وانه زار كل المناصير حلة حلة وذاع صيته

هناك طرفة تنسب له لا اعرف مدى صحتها

وهي ان هنالك من ساله يامولانا صحي قالو الحصى البعلق في جبهتك من المسجد اذا نفضته خارج المسجد ببكي

الشيخ قال ليه: انت سمعته قال : لا

قال ليه : خلها تنفقع

رحم شيخنا العديرقاوى
طبعا قالو عندو اسلوب عظيم فى الاقناع والوعظ
مره فى واحد اسمو قمر ودالبيشانى الله يرحمو كان بشرب المريسه وطبعا شيخنا العديرقاوى داير يقنعو بتركها قام قال ليهو والله ياقمر انت زول كويس مافيك تب بس عيبك انك قاعد تشرب المريسى بي ان خليتا يكون مافيك نضم تب
قام قمر قال ليهو والله شيخنا انا المريسى خليتا لكن بسرب المشك بس
فضحك الجميع

سيرة عطرة لشيخ كبير قابلت شقيقه محمد الحسن بابكر وحكى لي كثيرا عن شقيقه علي الحسن وهو يكن له كل الحب وقد ذكر من صفاته أنه كان واثقا من نفسه لا يخاف في الحق لومة لائم وكان دائما يقول أنه فالح ومحمد أخي فالح يقولها وهو واثق منها. رحم الله الشيخ رحمة واسعة . ونأمل أن يتحفنا ابن أخيه عادل محمد الحسن من أمريكا بسيرة عمه العطرة.