من ذكريلت زمان يا صديق ود الحنونى

من طرف **الفكى احمد** الثلاثاء 27 يوليو 2010, 6:22 am

بعد السلامات والتحايا العاطرات فقد اثار فينا سردك ثورة الاشجان وذكريات الماضى مع الاهل والحبان ولكل مادار فى فلك ذلك الزمان وفتق الجروح وكوامن الاحزان فيا لها من ذكرى ويالها من ايام 0 ايام كانت للحياة حلاوة الروض النضير 0 والله ذاكرتك ماشاء الله عليها ما خليت زول فى ود عيسى والعبابسى لى عند بت الرييم وقد طفت مع حكا ويك وكا نى اراها امامى راى العين فقد نسيت فى تلك اللحظات كل شى وبقيت مع ذلك الزمان وقت الناس حنان الواحد ما عارف يبدا من وين ويقول شنو فالذكريات والخواطر تتزاحم وخاصة فى مثل هذا الشهر حيث البوش والدميرى ام بحرا ريط وربربو وزمان كانت الاجازه الكبيره فى الصيف مش زى هسع فكنا نتفرغ تماما لاشباع رغباتنا من لعب وسمر وحدريبا وقرو ومزرقى وزلقونيى وفجيك وكيشين وعويم الصريمى والبحث عن الرتيل ودقير الطين والشريك للقمرى والدباس والترنار والعلج والتليسى واللبودى ولقيط التمر والكعاكيل ومعيط الليف لفتل الحبال التميمى والعصايى وكنا نعوم البحر سدارى ونركز فى الغرب ونعود ادراجنا والحدث الكبير كان لما الخوى يكسر وكتل ترعة ام لقاديب
وان نسينا لا ننسى يوم الاثنين يوم سوق النعوفاب حيث كنا نقطع بمركب عبد الله العجمى او عبد الله الحنونى التى كان يمدح فيها الحنونى وصديق مكى سيد الاسم عليهم رحمة الله وكنا نرجع من السوق فى المركب الاولانيه عشان نجيب لحمة الفطور ولنا ايادى فى مساعدة الغيرمن بوغه وحش ونوريق وحروس اللقاديب وهز الحبال امات كشاكيش واصعب موقف لما اللقبه تتماص وماعندك كون شبر مليانه واطه
وفى ايام القطر نقعد فى المشرع نحرس مراكب الكاب وكان اشهرها مركب حموده وعبدالله الحنونى ولما نتعرف من بعيد على من فى المركب نجرى وناخذ البشاره وكانت تترك البضا ئع فى المشارع عدة ايام لا يمسها احد وهنالك مركب قصيرون تجيب العيش للدقيق فى طاحونة سليم
وللذكريات بقيه
ماهي قصة الجرجير بالشاى
الفكى احمد

من طرف **م بروي** الخميس 29 يوليو 2010, 4:01 am

ياسلام عليك ياهندسه
ذكريات مهندسه للآخر
جرجير شنو يافكي ماتقول العيفنونه
رجعت في هذه الليله لسنوات ما أحلاها رغم القساوة قلع البصل(دي أكتر حاجة أنا بكرها وكمان أفرضوا ليك كلو) واسقي الحمار وديروا في تمرة مديني وجيبلقك قصبه من البريق أكسرها ليهو
وامش ألحق أخوك أقلع معاهو الكفان.
أه جبت ليك جانب الشقاوة والتعب.
قصرت معاك؟؟
وينو صديق الغتيت ده غتس وين؟؟
تحياتي للأستاذه

من طرف **الفكى احمد** الخميس 29 يوليو 2010, 5:40 am

سلامات يافنان كيف عامل مع جبال عسير انشاء الله تكون الامور ميسره واضيف ليك من الحاجات المتعبه القراعى الصنهار فى
عيش الصيف الطوال وحش القمح الراقد وطلوع التمره المافيها كمروق
تقبل تحياتنا
الفكى احمد

من طرف **نورالهادى** الخميس 29 يوليو 2010, 6:21 am

متابعين ياهندسه ويا شاعرنا محمد بروي ولكن شايف اخونا صديق مشغول ولكن لو رجع بيضع النقط فوق الحروف .

من طرف **(الحاج شرف)** الخميس 29 يوليو 2010, 1:57 pm

حقيقه هذا المنتدى يااخونا ياخالد عابدين ظهر بلاوى
الجماعه ديل بالجد مخزنين زكريات ماعاديه
محمد بروى و ال2 مهندس
مؤهلين لتاليف الاف موسم الهجره الى الشمال
تقول لى الطيب صالح براهو

ود بروي.. ود شيخنا شرف الدين.. النور الهادي..
أنا عارف من زمان الفكي ما ساهل في تراث المناصير ورجل صاحب نكته هادفة..

من طرف **حازم** الثلاثاء 24 أغسطس 2010, 4:22 am

ياسلام ياسلام ياسلام كلام يرد الروح تقراء وتدمع عيييييييك يازمن ؟
الجنا دامن وين الفكي احمد يازول سلام عليك وتاني سلام عليك كلامك والله مادرناه يكمل شدة ماهو سمح ويحكي عن اصالة وبصاره وسماحة ناسا تاكل وتقش في هدومن
كلامك يا الفكي احمد ذكرني قصه الجعلي الجاء الخرطوم زياره لي صاحبو واظنو اكرمو كرم جد والجعلي قال لصاحبو حرم تجيني في البلد انا برضو داير اكرمك الظروف ودت صاحبنا هناك والجعلي قام بالواجب وشاف نفسو مقصر وهو مباريهو عاوز يودعوا قالو وكت ماك عاوز تبيت معاي تاني يوم حرم لازم تسولك شكله في السوق دا وتخلها لي معمري ؟
السلام للاخوان الحاج شرف ونور الهادي والقامه بروي والباشمهندس صديق ودابحنه ..00حازم

الفكي أخذ من هدوء إحمد الطنبوري... وتسربل بسرابيل جمال وروعة زينب بت الفكي في حب المناصير وأهلها
.................
الفكي إنت شتلة المشرق الغليدي ديك القايمة قصاد بيتكم جنب جدول البابور دي حقت منو؟ حقت ابوك والله حقت حسن الفكي.. ..جنب الجدول طوالي. مقابلة لى خشم باب حشوكم.. من برندتكم تشوفا..

سلامات أخونا الفاضل صديق كل سنه وأنت والأسره الكريمه بألف خير
ياحليل تلك المناظر التى صارت أثرا بعد عين ، والمشرقيى الغليدى ديك
السعلت منها هول ناس عبد الدائم ،أكان تشوف فيها تمرا زى القعُو .

من ذكريلت زمان يا صديق ود الحنونى

من ذكريلت زمان يا صديق ود الحنونى

رد: من ذكريلت زمان يا صديق ود الحنونى

رد: من ذكريلت زمان يا صديق ود الحنونى

رد: من ذكريلت زمان يا صديق ود الحنونى

رد: من ذكريلت زمان يا صديق ود الحنونى

رد: من ذكريلت زمان يا صديق ود الحنونى

رد: من ذكريلت زمان يا صديق ود الحنونى

رد: من ذكريلت زمان يا صديق ود الحنونى

رد: من ذكريلت زمان يا صديق ود الحنونى