المناصير يحبون التواضع ويعيشونه ويطبقونه

المناصير..كعادتهم متواضعين.. لكن أول ما يشعروا بيك رفعتا نخيرتك!! خلاص تسقط في قاموسهم..
فقد علمونا التواضع في كل شئ.. ولعمري أن هذا هو الدين
قال صلى الله عليه وسلم( إنما أنا عبد آكل كما يأكل العبد وأجلس كما يجلس العبد)
وقال لرجل لجلج في حضرته( هون عليك، إنما أنا ابن امرأة من قريش كانت تأكل القديد).. القديد هو ملاح الشرموط عندنا
........ وكان يقول عليه الصلاة والسلام( خيرت بين أن أكون نبياً ملكاً، أو عبداً.. فاخترت أن أكون نبياً عبداً)
وقال( لو أوتيت مثل جبل أحد ذهباً، لأنفقته في سبيل الله، إلا دريهمات أرصدهن لدين)
..........
هذا هو الدين وقد عاشوه قادة مناصيرنا بلا شوشرة ولاجلبغة ولا ضوضاء..
حسن على عون الله، حسن الفكي، احمد الحسن، ود حمد الله، عثمان العباس، عطا الفضيل ود كدوي، عبد الله ابوحنة، سيد احمد حسب الجابو.. محمد ود البشير.. سليمان ود نصر الدين.. أحمد محمد صالح ود الملكي.. سعد أحمد سعد، شناب، عبد الرحيم ود عوض الكريم..الشيخ سليمان السنقوري، عطا الله سليمان السنقوري، خليفة جنى ود خليفة...حسوني... التهامي محمد آدم.. محمد ود آدم نفسه.. النعيم حمد الملك... أمو البكيرة... بت سعيدي.. سلام وأولاده..محمد علي العمراني.. سليمان العمراني، طه العمراني..علي محمد البصير..علي محمد أحمد الدرويش.. عبد الواحد محمد أحمد الدرويش.. عبد المنعم محمد أحمد الدرويش.. يس محمد أحمد الدرويش.. أبو القاسم عكاشة... محمد علي محمد أحمد الدرويش..سليمان حرجولي.. عمك حرجولي نفسه.. بابكر محمد البصير، أحمد حسب الله،أولاد الشاعر كلهم..محمد ود اللمين..محمد إحمد ود أبيد..على محمد الخليفة..عيسى عثمان حاج قيلي.. عثمان ود حاج قيلي، الحرم بت حاج قيلي، الكوارة جميعهم.. حسن كعدور.. سيد احمد ولد ود أب رية.. سيد احمد ود تنادابي.. خليفة ود العقبة..... والقائمة تطووووول جداً..
.............
العم حسن أحمد الفكي واحد من هذا الرعيل..
لما أبوي عمل الوابور وكان يحتاج لجدول عالي زي بتاع حسن الفكي، فوجئنا جاب محارتو شايلا في إيدو.. وجايب معاهو الطيب ود الحسين عشان يعملو الجدول أسمنت وصبة من فوق زي جدول حسن الفكي لأنو حسن الفكي عندو خبرة في عمل جدولو من قبل
إستحا لم يقل جيبوا لى اللنش من الغرب. قطع عادي بي مركب عبد الله ود العجمي ومعاهو الطيب الحسين ومسك معداية المركب عادي. مرات عبد الله ود العجمي دغيل.. دغل.. فؤجنا في الغرب بحسن الفكي شايل محارتو في يدو ومعاهو الطيب الحسين.. وطبعا ضبحنا ليهم خروف لزوم الكرم.. وعملنا الشية في التمر ما طلعنا الخروف للحريم لى فوق.. و وقطعنا جريد التمر الأخضر وشوينا بيهو زي شية المراسة الزمان ديك. بس دي ما فيها مريسة ونحن في رمضان.. باقي اللحم عملناهو سليقة في حلة كبيرة ليها اربعة قرون بس جمر المليلي تحت ضل التمر. لما عرفوا فيها ضبيحي جونا اصدقاء الوالد كلهم من ناس شري. لمان شافوا المعسي والدخان وعطاريب الشيي..الحريم من فوق من البيوت ما جبنا منهن غير الشطة والملح والدقة والصواني.. وكسرة نكبها في الصيني ونغرف من الحلة ديك السليقة واللحمي المكرضمي والكبيري ومعاها نوع البصل الأبيض داك صغار صغار قبيل رميناهو في السليقة دي وضرضرنا عليهو شمار . حتى البصل قلعناهو من الحوض ما جبناهو من فوق.. وبعد هذه الشبعة شاي جمر على الجمر بالكفتيرة الكبيرة ديك بتاعة البوش.. بالله الخروف قمنا بيهو .. ست..
من تواضع المناصير. نحن كنا طلبة وافندية.. لكن لايمكن ولا يجوز ولاينبغي أن تلبس بنطلون وقميص يوم السوق.. مع إنو الواحد قد يكون عندو عشرة بناطلين. لكن ما يقدر يلبس بنطلون إلا يوم نجي مسافرين ماشين البندر. ابوحمد أو عطبرة أو الخرطوم
والله تلبس ليك بنطلون في سوق النعوفاب يرموا حجرك لى يوم القيامي!!
مرات يجي واحد طايش طايش.طاشي كدة من أولاد المناصير النازحين لى فوق يجي بيهو السوق، مع إنو ناس البيت الطالع منهم للسوق بيكون وصوهو ما يلبس بنطلون.. لكن ماسمع
يسموهو( فرق الإسكاق)..
يقول ليك ود فلان لابس فرق الإسكاق.. أو مكرب جعبتو وحايم في السوق، يعاين للناس الفارشين البصل والملوخيي من فوق لافوق..
عمرنا في سوق النعوفاب ما لبسنا بنطلون... أخ..
صديق عبدالله علي أبوحنة

--------------------------------------------------------------------------------
عدد المساهمات: 320
نقاط: 1251
تاريخ التسجيل: 14/07/2010

البيئة أكسبتهم التواضع

المناصير يحبون التواضع ويعيشونه ويطبقونه

المناصير يحبون التواضع ويعيشونه ويطبقونه

رد: المناصير يحبون التواضع ويعيشونه ويطبقونه