دهين بارود

دِهـَـــــيــن بـَـارُوُد
 كلمة منصورية خالصة لايستعملها غيرنا نحن المناصير
 ماذا يقصد المناصير بهذه الكلمة؟؟؟!!!!
( دهين باروود.. عمّك موروود )

وما علاقة الإسم المعنى
بـالدهن
 وما علاقته بالبارود؟؟
 وانجمعت الكلمة فصارت ( دهين بارود )

والله ياهندسة قاعد تجيب حاجات---يمكن نكون سنين --ماشفناهااو حتى ذكرناها-دهين بارود عمك مورود فى جزاير الدود--والدهين دا حاجة سودا كدا توجدغالبا فى شكل مجموعات على تحت سطح الماء --واحيانا يغرف مع الموية فى الصفيحى ويتكب فى الزير---ولعله عندما يقال له عمك مورود--يتفخ ويزيد حجمه--نحاول نجد العلاقة بين الاسم--البارود والدهن--وهنالك مقولات تقال للاشياء --فيتغير شكلها مثال شدرة الفاس --الفاس جاتك---ففى ثوانى تذبل اوراقها او اوراق وصفق الغصن الممسك به--وايضا القريفى عندما تلمسها تقعد كانها ميته والكدندداية عندما ننفخ عليها برضو تقطع الحركة ويقال لنا تقل (نفس ود اب نادم عفن-)وهذا الحركات والسلوك غالبا مايكون وسيلة دفاع عن النفس او شئ من هذا القبيل --لكن بعضها للتحدى او الحث على الايتيان بحركة جديدة  او اداءعمل--عندما كنا نشاهد (بدير) يرفرف بجناحيه فى الهواء متابعا سمكة كنا نقول له --بدير كضاب --بدير كضاب ونكرر العبارة كذا مرة --يقوم بالانقضاض على السمكة --ويأتى بها ونشعر باننا حرشناهو--

يا سلام عليك يا أرباب ما خليت لى شئ ممكن أقولو.. شرح وافي جداً..
تسلم سلمان لى مناصيرك..
 نعم كنا نقول ليهو : ( دهين  بارود.. عمك مورود.. أو عمك موجود في جزاير الدود) وفعلا كان يتنفخ.. ويقال أنها شرنقة الضفدعة.. كانت توجد في الترع المقطوعة من البحر..

ولاعلاقة  للإسم بالدهن ولا بالبارود.. بس إسم منصوري ( دهين بارود) جات كدا..

طبعا كلامكم دا يا صديق وسلمان زول حا يفهموا ليكم مافي الا العواجيز الزيّكم
اه يا مخرفين
لكن بيني وبينكم توثيق ممتاز وذكريات ممتعة
تسلموا يا رايعين

هههههههههههه
تسلم يا أبو أحمد؟
 أول نحن قصدنا شنو؟
عارفنوا ما بيفهموه إلا الزينا!
القصد هو تفهيم الجيل الجديد ما فقده بالإعاشة، الى ما يفهمه بالتعليم والتعلم.
هذا هو القصد..
والقصد فهم ثقافة الماضي، كيف كان آباءهم وجدودهم يمتطون صهوة هذه الثقافة البكر. والتى أفضت بهم الى واقع ندر أن تجد مثله في قبائل السودان الأخرى.
 والماعندو قديم قالوا ما عندو جديد.. عشان تجعل ثقافة الماضي وسيلة للإنطلاق، والإنعتاق.. والماعندو كبير، قالوا يشوف ليهو كبير..
.........
 تخريمة :-
 أبو أحمد أيه رايك أنا عايز أكون والي نهر النيل.. رايك شنو؟

عارف يا صديق
خليفة خوجلي دايما كان بيقول انا عاوز بس اكون والي نهر النيل لمدة شهرين عشان  اجيه المناصير
انت عاوز تكون والي نهر النيل لي شنو؟؟؟!!!!
طبعا نحن عنصرية ساكت حا نصوت ليك
لكن عاوزنك تنجح في الانتخابات وتنجح كوالي ولذلك عاوزين برنامجك يبقي واضح وكمان حزبك يكون من الاحزاب الكويسة ،او تعمل حزب براك عشان زول يقول انت حزبك فعل ولا ترك مافي!!!
تخيل يا صديق واحد من المرشحين كان برنامجه الانتخابي الذى طرحه علي الناس فيه جملة واحدة( اريد ان ابني مستقبلي)
الناس قالوا ده برنامج واضح وعملي وصاحبه رجل صادق ونظيف ولذلك صوتوا له واكتسح الجماعة
علي العموم ماتتردد وعين ود بروي وكيلك للانتخابات

ههههههه
 خليفة خوجلي راجل لطيف.. بس انا ما بقدر أقول زيو كدا.. لأنو الناس حا يقولوا الزول ده واضح. بعد ما يشبع ويكون مستقبلو. حا يتلفت على المناصير يعمرها.. وكدا كويس.. أحسن من الغـَـمـِـت المستمر بلا فكاك ولا شبع.. دا زول واضح جدا خليفة عشان كدا يدوه..
......
 أها أنا عندي خطة قريبة من خطة  خليفة خوجلي دي.. بس أنا زول بفهم في الألاعيب كويس جدا.. والألاعيب لمصلحة المناصير.. أول حاجة ما حا أترشح تحت لواء حزب.. لكن بشوف عين الموية ماشي على وين من الناس الكبار وبمشى عليها لامن أصل الى هدفي وهو تعمير المناصير.. ما بقول من أهدافي تعمير المناصير.. لأنو في ناس قد يكون هدفهم الأساسي عدم تعمير المناصير.. ممكن يسقطوك.. لا.. أنا حمدو في بطنو لامن أصل المنصب.. أنا عصايي نايمي وعصايي قايمي لامن أصل المنصب.. أنا ( أدق لهم على كراعن ).. أول شئ اتحدر مع العرق تب..  أمشي على مويتن.. بعدين أجي مشاقق زي التمساح في خدمة التعمير.. أنا راح يكون عندي شعار وهو ( البرهان بالعمل) ( الأنتاج فوق راسنا تاج) يعني حكاية  خيارنا محلي وحقنا كاش.. دي بخليها شوية.. نعمل شعارات تسكت العدو قبل الصديق..  راح أكون والي التخصصات.. أو معتمد التخصصات.. أتخصص قمح بس.. موسم شتوي.. بعدين بجيب فسائل نخيل  أحسن من التى كانت في المنطقة. وموش أجيبا شتل صغار، بجيبا تمر  مقلوع طولو مترين عشان يشيل في سنة واحدة.. موش صغير ننتظروا أربعة سنوات.. وأبدا أزرع ليك المنطقة على شط النيل حول أطراف البحيرة من أم سرح لغاية الشمخية والعال شرق غرب.. من نتاج المحصول من القمح والتمر.. بشتري لكل بيت منصوري في المحلي ثلاجة وتلفزيون مسطح.. على الحائط.. وبتو جاز كبير  بي فرن ودش هوائي فضائي. ومكيف. وأ شجع الشباب والشابات على الزواج.. بعد دراسة الثانوي طوالي.. تمشى الجامعة وأنت متزوج.. ونبني لكل عريس جديد بيت جاهز في المحلي.. بس يجي يولع اللمبة ويدخل على غرفة النوم طوالي.. أشجع الزواج من الثانوي قبل دخول الجامعة..  لأسباب كثيرة ممكن أجي لى طرحها فيما بعد.. عشان يكون المنصوريات عمود العفةّ الغايبة للوطن كلو ، وليس للمناصير فقط.. نهدي الناس التايهة قيم..
 أستجدي المنظمات العالمية وكل صاحب ضمير حي أن يساعد في تسكيننا حول بحيرتنا..
 المراكب بتاعة الفايبر دي والمراكب بتاعة الحديد دي  فيها خطورة لما يكون في هواء.. وقبل كدا في شنكوكة اتقلبت غرقت ناس... بجيب .. يخت كبير.. قريب لى بتاع البشير.. بجيب منو أثنين ثلاثة يجوبوا البحيرة عرضاً طولا..
 عشان نشجع المسؤولين الكبار يجوا يزورونا.. على أنفاس نسيم مياه البحيرة تكون الرحلة.. أغريهم بي فطور السمك الطري الطازج الحي كل ما يشتهوهو.. العرسان البي يتزوجوا من الثانوي. بندي بعد تصديق المعتمد بتاعي كل عريس تلاتة أيام في غرف اليخت على نسايم البحيرة مدفوعة الأكل والشرب ومدفوعة شبكة النت.. والواتساب..
 حزبي لو عندي حزب دا بيكون خاص بي أنا فقط.. العامة يعرفوني من خلال انجازي وليس من خلال حزبي..  دا إذا اقتنعت أصلاً بي مبادي أي حزب..
 بعدين بفتح قرى التهجير على المحلي.. وبفتح المحلى على قرى التهجير.. لأنو أصلو الحصل حصل ما بيتصلح.. بل فيهو تطور وانشرار للقبيلة.. أفتح المحلى على قرى التهجير.. يعني انتاجنا في المحلى لهم قبل غيرهم.. وافتح قرى التهجير على المحلى ، يعني إنتاجهم لنا في المحلى قبل غيرنا..
 بي كدا يتطور المحلي وتتطور قرى التهجير..
يتطور المحلي الأصلنا معروفين بتطويرو.. وتتطور مناطق التهجير( نحن من نفر عمرو الأرض حيثما قطنوا) تتطور قري التهجير.. حتى عمليا ترتفع هذه القرى في الفداء وفي المكابراب تكون آية من الجمال في أي شى.. ترتفع ارتفاع نهضة عمليا تكون أحسن بما لايقاس من المناطق القديمة الحولها.. ويشهد خيرها المتدفق جيرانهم لامن يحسد حاسدهم ويموت بي مغستو ولامن يفرح عاقلهم ويقول الحمد لله الجوا المناصير هنا.. أكلوا وأكلونا معاهم من خير أرض قبيل ما قدرنا نعمرا.. ديل ناس كسروا الحجر في موطنهم وزرعوا فيهو برسيم وتمر؟
 بكون أهدافي سامية وبعيييدة
حتى لما أجي أنوم بالليل بكون تفكيري كيف أبني خطط جديدة كل ما تنجح خطة أفكر في البعدها. وإذا فشلت خطة ما بيأس.. أكررها أو أشوف غيرها
 بحاول اقلل عدد الناس الحاسيدن على المناصير ما بزيدهم. بأي سبيل بحاول اقلل عددهم ..  وبالبرهان وأن أكسبهم.. حتى يكون ليس لنا حساّد.. حتى العايز يحسد ما يقدر يحسد.. لأنو الناس كلهم ساعتها بالبرهان راح يقولوا ليهو يا زول هيييي ديل مناصير  مصلحتهم مع مصلحة الوطن الكبير
 يا زول هييي ديل مناصير ما بيخلطوا الأوراق
 يا زول هييي الوظيفة براها ومساعدة أهلهم براها.. الشغل شغل.. التعمير تعمير.. الوظيفة وأسراراها براها..
 يازول هييي دي قبيلة عرفناها بالبرهان العملي..
 هذا هو برنامجي يا استاذ أبو أحمد

ماشاءلله كلمة رائعه دهين بارود تسلم الباشمهندس علي هذا المعين الذي لاينضب من ثقافتنا الجميله بالجد كلمة طاعمة  وبرنامجك الانتخابي سمح بالحيل انا بصوت ليك باصابعي العشره بس قروش قدر دي تجيبه من وين والبلد بقت بترول مافيها واتأكد ياخالي البلد فيها تماسيح كبار اكان مانشفت تب كرويه مابيسلموها توكر في رقبتك دي ياخالي تقول احسن مهندس في ابوظبي ولا والي في السودان هههههههههههههه 

عارف يا صديق اخوي برنامجك ده ما بطال لكن برضو عاوز شوية تكريب
كدي نشوف راي الجماهير في المنتدي كعينة من الناخبين
شايف بت اختك الزبلعانية ماها دايرالك الدرادر

ابو احمد السودان كلو زبلعه شغال بي ربع الميزانيه وخالي الكلام دا مامتعود عليهو ااحلامو كبيره في الانتاج والمدخلات مولعه السماء والمزارع معسر بالرغم وجود الموارد كبيره لكن لايمكن استغلالها الا كان يجيب معاهو مستثمرين من الخليج ونبقي ذي ماليزيا استثمار بس والاستثمار داير سلام وشايفه خالي مطنش بند السلام دا طبعا اكبر بند حايلحس القروش كلها ونرجع تاني لي مراكب الحديد والفايبر

ههههههههههههه سير يالخال نحن معاك قلبا وغالبا نورناك بالحاصل في البلد منعا للجهجهه بعدين والفنجطه لكن اكيد خبراتكم الاجنبيه ستجد حل لمشاكلنا المستعصيه والي الامام