وعنك بعيداً أبيت الرحيل

استوقفتني اليوم بشدة رائعة الاستاذ الشاعر محجوب شريف (وطنا الباسمك كتبنا ورطنا )
وانا غارق في احساس عميق بالغربه بدواخلي وفي كل شي حولي (الوطن... الاهل...الاولاد
...الاحباب .....الاصدقاء...الديار) غربة حتي في تذوق الطعام
الي ان وصل الموسيقار الراحل (وردي) الي مقطع (وعنك بعيدا ابيت الرحيل)
وتساءلت في نفسي متي يضمد وطننا جراحاته ويضم جناحاته علي كل ابنائه
ليردد الجميع (وعنك بعيدا ابيت الرحيل)..متي ؟؟وكلما مات جرحا بجسم الوطن
اتونا بجرح اعمق وساستنا (لاماتو ولا رضخوا) لتطلعات مواطنيهم وانصارهم المغلوب
علي امرهم بل حتي صادروا منهم حلم العيش حياة هنيئه . وهذا كله بسبب (بلف)البترول
والنزاع حوله وعائداته التي لاندري الي اين قد تذهب (اللهم نسمع فتحوا البلف وقفلوا البلف )
وفجأة قطع هذا الصمت والاحساس احد الاخوة السودانيين نقيم معا بعبارة اخرجت الجميع
من احساسهم وتفكيرهم الي جو من الضحك قائلا(تسمعوا شنو؟؟؟هو عليكم الله نحن لوما ربنا كاتب لينا الشقاوة
ماكان قسم لينا مجاورة سلفاكير)...ويبقي السؤال هل العلة في سلفاكير ؟؟ام في قادتنا وساستنا الذين فقدوا حاسة الاحساس بالشعب؟؟؟

وعنك بعيداً أبيت الرحيل
وبيك اعتزاز الصباح الجميل
جميع الأغانى اتكالن عليك
جميع الأغانى اتكالن عليك

ويــــــــــــــا وطــــــــــــــــــــــــن ديــــــــــــــــــــمـــه لــــــــــيـــك بــــــــــــــــــــحـــــــــــن

ولكم ودي

ربنا يرد غربتك أخونا الدنقلاوي ويخفف عليك مرارتها

وترجع لأهلك سالم غانم

اتمنى لك عوده لكل احضان المحبه ومرورا بمنتدى المناصير بلدى

الله عليك ياالدنقلاوي
وربنا يرد غربتكم سالمين وغانمين يارب
وغربه كل اخوانا خارج البلاد

والله الوطن حالو يغني عن سؤالو
ينزف من جميع الاتجاهات
الكل فيه يعاني من كل شي
لك الله ياوطني
عزانا هو حميميه الاهل الاقارب الجيران الاصحاب
ومازال الخير موجود رغم كل شي

البعيد عن وطنو مهما طال غايبو مصيرو يرجع لي اهله وصحابو وينسي الامو وشجونو

سهام علي محجوب كتب:البعيد عن وطنو مهما طال غايبو مصيرو يرجع لي اهله وصحابو وينسي الامو وشجونو

 ياسلام اخت سهام رائعة الفنان الرائع الطيب عبدالله يالها من اغنية تحكي غربة داخل غربة
خاصة لما يردد (الا قلبي ياحبيبي في هواك طال اغترابو)

متين نرجع لأرض الوطن وحضن الأهل وننسى الغربة ونردد
 
لما نحن نتلاقى ونبل الشوق     بننسى الدنيا فراقة ونطيب ننعم