مرثية رفيق دربه المرحوم/ابراهيم الشاعر

هذه المرثية قالها الاستاذ/عمر البركل وهو احد حواريى المرحوم فكانت مرثيته كالخطبة البتراء
تحكى عن حاضر وماضى الراحل :ــــــ


الدوام لله ما فى شك وبى تضوق الموت كل نفس
واصلو لو فى الموت خيار الرسول ما دخل الرمس
وقالوا يقصد أخير الناس وفى الاخير يبقى المحمصص
الرجال اعمال صالحات ماها عربات فاخرة ولبس
الرجال من الكون تزول وتبقى اعمالا تحدث
شفنا فى ابراهيم الزعيم المقادير ما بتتحبس
وفقدوا فقد الناس اجمعين وكسرك الما بجبرو ترمس
كنا داخرنك للتقيل وكت سيفنا البتار يقص
من وراك للناس مين يقود ويدفعن وليهن يحمس
ومن مشاكلا فى المناصير كنا دايرنك تخلص
كنت حاضرنا وكت امس
وكنت نور ماك نارا تعس
كت فى ظلام ايامنا الشمس
وكت ضلنا من الشمس
فى الصعاب ساعة نتغمس
والأمور فى الراس تتلبس
بى نجيك نشكى ونحدث
كنت من راى ما بتفلس
ولى غقول الناس تفلس
كنت راسنا شعار عزنا وكت صديق وللناس مخلص
كت مريض وكت لينا تحرس
وكنا بى كعب جمبك ما بنحس
كنت انسان نضمك سلس
وكنت مضحك وكت مونس
ومجلسك ما احلى مجلس
للمناصير كنت ريس
ولى مشاكل الناس تحسس
والبمس الناس ليك يمس
كنت طيب تب ما بتدس
كنا من شعرك نقتبس
من زمان وكتين مدرس
كنت ظاهر ماك متغمس
وكت للواجب تقدس
كنت تاريخنا من الضياع وبيك تاريخنا آبنطمس
بيك للمناصير والرباطاب وحدة دايرنها تنغرس
ودندح العرجون بالثمار والجريد بالشيل متهرس
من قبل ما ينجض عديل مالو عرجونو بدا الملس
يا المناصير حظك نحس
كل العديل البمرقلو حس
فى القبر حالا يندمس
أما يا شرى البلآلام تحس
كين غشاك الخبر النحس
قمحك اللخدر داك يبس
ودمعك الجارى ابى يتحبس
موت الزعيم بلحيل يجرس
ان شاء الله فى الفردوس النزول ومن بنات الحور تعرس

تمت المرثية
مع المعذرة ان كانت هنالك اخطاء املائية او غير ذلك

حيا الله رائعنا عباس ... وأنت تبحث وتنقب فى إرث وأدبيات القبيلة وترفدنا فى كل مرة من هذا المعين الذى لا ينضب ... لقد أبدع الشاعر عمر الدمرى فى مرثيته فجاءت نظما ًمموسقا ً ووصفا ً ناطقا ً .... نسأل الله المغفرة والرحمة للقامة السامقة إبراهيم الشاعر _
والرجال من الكون تزول وتبقى أعمالن تحدث _
لك تحياتى وودى ،،،

مروركم الكريم
الاخ القامة عثمان النفر
عمدة المنتدى ابو مصطفى
فى نفس اليوم الذى وثقت فيه المرثية اعلاه
ما هو الا ثمرة اهمية مانقوم به من جمع تراث
شكرا على المرور

لك التحية ابننا عباس وشرق وغرب وكل مايقال في القامة إبراهيم الشاعر لا يوفيه حقه ولو كنا نقرض الشعر لقلنا في استاذنا الكثير. وأهبش خالك ما تنساه وعاوزين من شعر جودي الكبير وعندو قصيدة مليانة في الجدة الكبيرة بت مساعد وأكرر أدي خالك لكده وعندو الكثير والعطمانين عودتنا بالكثير وكمان شوف العم منصوري. تسلم عباس وواصل.

شكرا الدكتور مصباح بهذا الاطراء الذى نحن ادنى منه
شكرا على المرور