حاجات غريبه

التاريخ اكتوبر 1980 المكان مدرسة عطبرة الثانوية الفصل الاول كان ملخبط مناصير رباطاب ناس من الباوقة جعليين من بربر وجاد الله والمحمية ودالر مالى .الاستاذ يقرا الاسماء يصل لاسم محمد على احمد لم يكمل الاسم الرابع وقفت لاحظت ان هنالك شخص اخر ايضا وقف اذا هنالك شخص يحمل نفس الاسم وعندما اكمل الاسم الرابع اتضحت الرؤيا تلك كانت اول معرفة لى باخى وصديقى محمد على احمد على الحسين لاحظ تطابق الاسماء(محمد على احمد نصرالدين الحسين) وان طال بينا العمر نواصل لسرد هذه العلاقه التى امتدت حتى الان ومازالت



































































9

اللأخ محمد علي تحايا وأشواق بالكوم

لقد عرفت هذا الثنائي الجميل ونعمت بصحبتهم---نعم الرجال --نعم الأخوان

كان التفريق بينهم محمد علي المنصوري ومحمد علي ود الباوقة

لم أقابل ود الباوقة مدة من الزمن بالله يا محمد علي أرسل لي تلفونه

لا أود الإسترسال --حتي لا أقطع حبل الأفكار والسرد الجميل--الكلام سمح من خشم سيدو

مودتي

عدت بعد غيبة والعود احمد.نواصل ’تعرفت على صديقى محمد على مذ تلك اللحظة وخلال ثلاثة اعوام فى عطبرة امتدت صداقتنا ومن خلالها تعرفت وتوثقت علاقتى باولاد الباوقة كما تعرف هو على ابناء المناصير وكانت بيننا تنافس شديد فى الكورة وكنا نحن اكثر المجموعات التصاقا ببعضنا وكان لنا تيم وتمارين يومية وكنا من الكاب نجمع قروش واشتراكات(الكافتان)(اعرفوهم ) كنا اكبر دفعة من مدرسة شرى تجى عطبرة حولى 23 طالب امل ان اتذكرهم بالمناسبة فى صورة تجمعنا سوف انزلها لاحقا
على الحداد
سيد احمد على سيد احمد
مامون على الحسن
على عبدالغنى
عثمان محمد عثمان
عثمان ود اللحيمر
وداللمباشا
حسن على موسى
سرالختم كرار
بابكر احمد الحسن
عبد القادر احمد حماد
عبد السلام الحسين
الباقين نسيتن الان نعود لهم مرة اخرى
نرجع لى الموضوع تواصلت صداقتنا الى ان امتحنا من عطبرة 1983 وتوادعنا وافترقنا على امل اللقاء ونواصل

لك التحية الاستاذ محمد علي نصرالدين ولأهل بيتك الكرام . فعلا يامحمد الأسماء السودانية تتشابه لدرجة كبيرة ولا تستطيع أن تفرق بينها ويمكن أحيانا حتى الجد السادس . مشكلة الأسماء السودانية تفتقد اسم العائلة ( Family Name ) وهو الذي يفرق بين الأسماء لذا نجد اهتمام به من سكان الخليج العربي وحتى الخواجات كمان. ويزيد الطين بلة وجود الأسماء المركبه مثل محمد علي ، محمد خير ، محمد سعيد ... إلخ وقد بحثت كثيرا في الأسماء السودانية وكان موضوع بحثي للدكتوراه وهو كيفية الوصول إلى صيغة متفق عليها للأسماء السودانية وقد توصلت إلى الكثير من الحقائق.
استاذنا محمد علي أنت ما زلت صغير وكيف تنسى أولاد دفعتك في الثانوي . وتذكر منهم القليل . ذكريات المدرسة الثانوية لا تنسي . هل تعلم يامحمد علي أنه أخونا سليمان حامد سليمان يحفظ أسماء أولا دفعته في المدرسة الابتدائية من سنة أولى حتى السنة الرابعة وبالاسم الرباعي. إنها ذكريات الدراسة والأيام الجميلة. لك التحية ثانية وتقبل مروري.

ظهرت النتيجة لم تمكننى من دخول جامعة الخرطوم فقررت ان اعيد السنة وكانت فى مدينة كسلا (امتقاق) ويالها من مدينة لكن ما كنا فاضين ليها كنا ناس كسر بس وفى فترة اجازة نص السنة سافرت الخرطوم لاستخراج الشهادة ومن ثم ذهبت مع ابن عمى عبد الغنى الى جامعة الجزيرة وكانوا finalist ومعه عسكورى وشرف الدين عمر الخليفة اخدت معاهم اسبوع وللحقيقة كان هذا الاسبوع قوة دافعة لى لبذل المزيد من الجهد لدخول الجامعة لما رايته بام عينى الحياة الجامعية والمستوى الراقى طبعا دا كان زمان اسع الله يكون فى العون وانا احيى ابن عبد الغنى الذى كان المحفز الاول لى فى الدراسة منذ الابتدائية المهم رجعت كسلا وامتحنت وسافرت البلد ومن ثم سافرت الخرطوم لانتظار النتيجة واذكر ان الاخ عبد الغنى سالنى كم تتوقع (البوكسنق)قلت له والله ما اعرف لكن نمسك مادة مادة وكان يسالنى دى بى تجيب فيها كم وانا اديهو المتوقع وكان المجموع 373 ولما ظهرت النتيجة الحقيقية كان المجموع 375 والذى اهلى لدخول اقتصاد الخرطوم وفى اول يوم فى الجامة اذا بى وجها لوجه مع صديقى محمد على وبعد السلام علمت انه اعاد السنة فى مدنى وقد قبل باقتصاد الخرطوم ولكن المفاجاة انه دخل بنفس البوكسنق اى 375 ونواص ولسه.

سبحان الله التطابق في كل شيء
تسلم ابن عمي محمد علي احمد نصر الدين المنصوري