قاموس المناصير اللغوي

تذكير بمساهمة فاتح الموضوع :

يقول ليك الكورة قوقلا وشوتا. اي اضعها على كوم صغير من التراب ، لكي تكون ساهلة في الشوت.. مهوية من الارض

والله يا هندسه وفى اللقاء الاسرى بالباسقات طبعا زى ما تم زكره كان يوم تاريخى وكل البرامج كانت  ناجحه وبنسبه عاليه
 لكن فى شى مهم جدا مافى زول قالو ليك
 اخونا المشرف الارباب سلمان عقيد زكر وفى المايكرفون وامام الجميع
قال بان الباشمهندس صديق ابو حنه قام بجمع كل الكلمات فى القاموس اللغوى لقبيله المناصير وينوى القيام بطباعه هذا الكتاب وسوف يرى النور قريبا مما يجعلك امام تحدى كبييييير اامل لك التوفيق والسداد 
 برضو سلمان ماقصر زكر بان الاخوه الفكى احمد والحسن سليمان واخرين عاونوا صديق فى جمع هذا القاموس ومن ناحيتى انا  جاهز 
 تقبل مرورى

والله كان على انا مبروووووووووووووووووووووووووووووووووك
 لكن شايف العموديه دى فيها دفسيبا شديدى

هههههههههه تسلم يا   حسن..
 اصلو الأرباب سلمان نحن ممسكنوا شراع المركب. يقبلوا محل ما الهواء يعجبوا.. وهو عارفني أنا بوافقوا في كل شي هو يقولوا..
 هذا عمل ما ساهل والله.ولا زلنا في مرحلة البحث والتنقيب.. كل مرحلة بي  مرحلتا.. سلمان وأنت والفكي وود الطرشان  ويس مصطفى وساري الليل وغيرو وغيرو. يكون العمل تضامني وفي شكل مجموعة.. وممكن يكون عايدو لإنسان المحلي

الصـُرْمـَة: الفلس العوز.. الفقر.. واسم الفاعل فيها صرمان.. والجمع صرمانيين

حـِمـْبـِرْ ينط في الشئ وماهو عارفو.. متسرع ورايو خطأ... يريد الشكر من غير ما يعرف حل للمعضلة..

عينو مجنقلى : يقال فلان ده عينو واحده مجنقلى ، يعنى أقل
اتساعا أوشبه مغمضة ...

ههههههه
كلمي سمحي خلاص وطاعمي دي لقيتا وين يا الفكي؟

يا ولد عراقيك ده معرتو بي شنو؟ دابي اشتريتو ليك البارح؟

مَـزَوزَو :ـــ بفتح الميم والزين الأولى والثانية ، وتعنى متردد ، متأرجح
          غيرثابت .

فـاووه : تعنى فاضى أو فارغ أو لامعنى له ــ مثلا الزير ده فاووه أى فاضى .
       والكلام القالوا فلان فاووه أى كلام فاضى لامعنى ولامضمون له ..

فاووه
ههههههههه ضحكتني شديد دي يا الفكي لأنها كلمي منصوريي طاعمي شديد وناقعي

يَحَسحِس : تعنى يشذب ، يحسحس الشتل أى يقطع ويحش منه الجريد الأصفر
والجاف ــ الشعّـال ــ ويحس فى اللغة يقطع بآلة كالسيف أو يقتل ،
أقطع لى جريدى وحسحسا أو سلميى ــ تعنى أقطعها ونظفها من الشوك لتكون
جاهزه للجلد مثلا ...

سلام يا هندسه صاحب الديوان وكمان الفكى صاحبك الاسهامات الطاعمى
هس عليك الله يا هندسه عينو مجنقلى دى جابا بحتا من وين هههههههه والله ضحك شديد
وبعدين يا هندسه قاطعى الدرجى برضو قطعت مصارينى بالضحك وخاصه (الهوائل والنمر السائب)
عليك الله كلو عرفنا النمر الشائب دا شنو

هسي عليك الله مسونها لى (سولعيئ)ما طبعت القاموس دا مالك
بعدين حقو بدل قاموس المناصير اللغوى نقوم نسميهو
ديوان الصدوق للعاميه المنصوريه
مع تحياتى

حسن تسلم
لسه القاموس بدري عليهو.. وترانا لسه نكمرق..
لى قدام كدة مطلوبة مساعدتك.. في حسحيس الكلمات التى وردت هنا..
من أصعب أنواع الطباعة القواميس.. تحتاج لتشكيل وصف ورص مبالغ فيه..
لسه نحن نكمرق يا حسن

تسلم
تراكم كل مره تجيبولكم واحدى
فعلا مازال البحث جارى
لكن الشغل دا ما ممكن يتعالج ويتنقح عن طريق الكمبيوتر
بمعنى يتم استبعاد الكلمات المكرره
وكمان ضبط الشكل والمعنى
لتتم عمليات الرص والحسحسه
وتكون حسا وسا
ومدروجه ومربطه زى حزم الجريد
لا شق لا طق

بالضبط هو كدة يا حسن بالكمبيوتر صعب..
عايز فرز زي الزول البي يجلّود ليهو في عيش موديهو الطاحونة
.......
ودي كلمة جديدة وهي
يـَجـَلْوِد : يعني يضري ويغربل من الروس والحصى.. وهي كلمة منصورية بحتة
........
بعدين نحنا قلنا في البداية قد تكون بعض الكلمات مشتركة مع قبيلة أخرى..
لكن نحن قلنا ( دي لغتنا ولهجتنا البي نتكلم بيها) كان تداخلت بعض كلماتها مع الجيران ما عندنا شغلة؟ لأنو دي لهجتنا كدة..

هههههههههههه
يجلود حلوه شديد
والله ممكن نغربل الكلام المنصورى براهو
والكلام المشترك مع اخوالى الرباطاب والشايقيه وبقيه القبائل
براهو
بعدين برضو انت كان جبت كلمه (الشنقلوتى) والله اضحك فيها لسه
لكن برضى زكرتنى (النالوتى)ههههههههههههههه
معاليكم للشرح والتوضيح

النالوتي :حشرات دقيقة زي الكنتيب أو الكلتيب يا حسن؟
النالوتي: برضو تطلق على ناس سايجة في بعض سواجة في الفاضي.. زي سواجة الشفع الكتار..
استعمالها: ( حسن طلق فينا النالوتي دي وراح )

برضو يبقالى معنى النالوتى هى حكه وكاروشه فى الجسم


الفك:بضم الفاء تطلق على الزول كبير الحجم وعقلو صغير
وزول عوير كدا

أيوااا برضو تطلق حكة وكراش في الجسم جراء بعض الحشرات..

ترانا يا زعيم ( نلك ونعجن ) فى الشنقلوتى والنالوتى والرتوتى والرهوفى
بابورنت دى مويتا ابت تمرق تب
اها رايك شنو فى اللك والعجن دى

لت وعجن تمام يا حسن

l
مَـطَنبَج :ــ ملىء ، معبأ ، ممتلىء . الزير مطنبج مويه يعنى مليان ،
الجدول مطنبج طنبيج يعنى مليان ملى ...

( لى ودعينو)
بمعى مليان للنهايه
تسمع الواحد يقوليك الزير دا مليان لى ود عينو

الكـردفـاله :ــ بضم الكاف هى دوده تنهش وتأكل جذور شتل النخيل { الفسائل }
المزروعة وتبطىء نموها أو تؤدى إلى موتها ، فهى آفة من آفات جذور النخيل .
لمحاربتها كان يعمد إلى الحرجل ويوضع على الأرض وحول الفسيل المصاب
ويسقى بالماء بعد كل فترة ...

يحترب : بمعنى ياخذ من الشى بصعوبه بالغه
جنب : بفتح الجيم وسكون النوب تعنى بالقرب من
جنب  : بفتح الجيم والنون وسكون الباء يعنى صعب

جنى وجن الجنا الجنب  القاعد جنبو جانبو

كلمات مترادفه لها معانى ودلالات
 يلف ويدور تعنى يراوق بى مكر
يسوط ويلحس معناها زول مشغول ويدخل ويمرق
يهايت ويبايت تعنى مثلا زول مشي لى عرس بعيد وتم ليهو كذا يوم مترجع بيتو دة يسموهو الهيييت والبييت
**فى جلات::تعنى عشان خاطر فلان

الجد إضافات رائعة يا حسن

مِتفـَرجِخ :ــ قاعدا القرفصاء
مَقــُـوقِـل : جالس على رجليه دون أن يلامس عجزه الأرض .

الفطقه الجلولئ::عوير

مَـقروقه : القاف الاولى والثانية يمنية ، مقروقه مفردة تعنى حُفرة . أعمل مقروقه أى أحفرحفرة .
قاقرو : القاف الاولى والثانية يمنيه ، والكلمه تعنى مجوف ، فارغ ، فاضى
مَقروَد : القاف يمنيه ، والكلمه تعنى مجوف ، محفورمن الداخل .

البشنتيق : هو عقاب البرش المصنوع من السعف ، أى قطعة برش قديم ...

يفلك ويملك    يتكلم كتير

يفلّك ويملّك
.......
 تسلم يا حسن

الـكشـوتى : هى ماجف من أعلى بسبب تعرضه للهواء مدة كافيه لإحداث بداية التجفيف
          فكل سائل مخلوط بمادة ثقيله يبدأ أولا بالكشوتى على السطح ثم يجف تدريجيا .
والكشوتى أيضا هى الكسره أو الفطيرة التى تجف على الصاج حتى تعلو حوافها ...

مَطربش :ــ ملىء ... الزير مطربش موية لود عينو ،
أى معبأ وملىء بالماء  ...

كَـرَو :ــ فارغ أو فاضى
الزير كـَرَو ، يعنى فاضى ...

النــَد يــَـبْ : جهة الساق الأمامية لرجل الإنسان أو الحيوان أحياناً
 القــِـرْ بــة : قربة الكراع اي فخذة لحم رجل الإنسان.. تسمى  قربة الكراع عند المناصير
 عضيم الشيطان : عظمة إلتقاء الساق مع  خف الرجل فيما يخص جسم الإنسان
 أب قـَــبـــِــيح :  ا مؤخرة عظم الساق التى تعلق منها البهيمة بعد الذبح حينما تسلخ

الــدَلــَجى :ــ الأرض الصلبة ...

صُـرُف : كلمة صُرُف تعنى أغلب أو معظم أو جُل
مثلا يقال { اللحم الذى إشتريته اليوم صُرُف دهن }أى يحتوى على كثير من الدهن
أو معظمه دهن .
قالوا القريب فروت ده صُرُف دم ... يعنى فيهو غذاء ويساعد كثيرا فى زيادة الدم
لمن يتعاطاه ويأكله ...

صُـرُفْ : لقيتا وين يا الفكي دي! حلوة شديد
..........
 هي كلمة منصورية .. يمكن مشتركة مع بعض جيراننا.. لكن هي لغتنا التى نتحدث بها على كل حال وهي لهجتنا
.........
 وهي لاتبعد عن العربية كثيراً... بل هي هي
..
 قال شاعرهم: أدر صرفاً خمور الأندرينا.. على شعث الرجال النادرينا
..............