ام منصوووووور

ام منصور ياام الخير
فتحي عينيك لا تتغشي
بالدولار الشيك الطاير
ترضي توافقي بعد إصرارك
تفقدي كرمك تفقدي جارك
تلقي هناك الوضع مغاير
للاقوال الكان بالذمه
تردحي زين في الوضع الرمه
عرقك نازل دمك فاير
تبقي خلاص فرقتي اولادك
ُتُسلب منك ُستره حالك
لما صباحك يصبح باكر
ام منصور طلقانه تلاته
كل العسكر بالبوت شاته
ورغم الغُلب البيها تفاخر
ابداً لا كلت لاملت
لا شالت حق زول انذلت
لابسه تياب العف الطاهر
ماغشاها القال غاشيها
لسه محافظه علي ماضيها
كل عاداته تراثا الزاخر
ام منصور شن بيوديكي
تُسلب كل القيم الفيكي
مادام عارف خيرك ناكر
في ظل الذُل والسخريه
في زمن الذمم المشريه
وسط الناس جابو سماسر
طمس هويه تسلط عسكر
في اولادك مايتسيطر
كل في الكل الناهي الآمر
صبرتي كفايه العالم الله
على تهميشك ما منذله
سوي حساب للحكم الجاير
من النيل إتبلل ريقك
كل سماحة الساكن ريفك
شن اوضاعك ربك ساتر
مدن الحاجي ليله نهاره
ما تتغشي تشوفي انواره
كل الناس خادعاها مظاهر
وكل اولادك راحو إتغشو
من الحرب الداميه إتفشو
جاهد جاهد ضد الكافر
كافر إيه بالله نسيتو؟
كل الامه المن يوم جيتو
مالا إتقرضت وانتو حييتوا
وحتى الفضل فيهم صابر
مالو الكافر يصبح زولك
وترضى تقاسم نص بترولك
وقلتي البينك وبينم عامر
كل الامه غلت في صباحا
ام منصور في وسط الطوه
ماليك حق تقلع بالقوه
ام منصور بي روحه تخاطر
قرٍب جرٍب ُضوق المُره
تلقى هناك الناس الحُرة
حامي حماها وعينا تساهر
ام منصور اوعك تتغشي
تسيبي وطن اجدادك تمشي
سوي حساب للحكم الجاير
والف حساب للشيك الطاير

جميل جدا حقو ىامحاسن تعملى بوست بأسم ادب الاعتصام اختيار رائع لقصيدة اعادت لنا وقفة اهلنا فى الدامر

وناسا فرد وقفه اغلى من الدولار

ام منصور اوعك تتغشي
تسيبي وطن اجدادك تمشي

تسلمي المحاسن..

شكرا عزيزتنا رجعنالك
ام بخصوص اقتراحك جميل
بس في الاول انا عندي بعض الروائع للشاعر العجيب ده
قلت اقل حاجه ننزلا ليهو بي جاي حفظاً للحق الادبي

نجلاء الرائعه شكرا

الولد دا كتاب كان ممتعنا بالجد في الاعتصام ... تشكري الاخت محاسن

لك التحية محاسن في الأول ظننت أن شاعرة ولدت جديد بمنتدانا وباركت ذلك ولكن بعد قراءة التعليقات علمت أنه لشاعر منصوري لم تذكري اسمه. يحبذ دائما أن يذكر شاعر القصيدة والمناسبة التي قيلت فيها لمزيد من التوثيق والجماعة يمكن عارفين ولكن توضيحا للبعيدين والزائرين.

نور بيتنا وشارع بيتنا وبوستينا كلو
بي اطلالتك بي جاي دكتورنا
القصيده لعبد الرؤف الكلال وانا نزلتها في النتدى الخاص بي اشاعرو
فقط ذكرت اسمو
لانو في الصفحه دي ذاتا في بوست منزلو النذير العوناب
باسم الشاعر عبد الرؤف الكلال وتعريفه بالكامل
شكرا تاني

أم منصور جابتا محاسن بي جاي

ايتها الرائعة محاسن
سلام تقدير واحترام
كم كنا نتوق مشاركة الاخوات فى هذا القسم من المنتدى
حتى ياخذ بريقا لامعا لاخذ خطوات لامعة من اجل التوثيق
لشعراء بلادى بكل ما تحمل الكلمة من معنى حتى تبرز
ثقافتنا للاخر من خلال الاشعار الرصينة
تقبلى المرور