جمع وتدوين قصائدى

من طرف **الفكى احمد** السبت 01 سبتمبر 2012, 6:11 pm

هى محاولات وتجارب متواضعة تخللت ثنايا زمن ممتد من الماضى لم أكن ألق لها بالا ولم يدر بخلدى أنها ستنشر ، ولا يفوتنى أن أزجى خالص شكرى وامتنانى لكل أهلى أعضاء المنتدى سيما الذين أشادوا وشجعوا وأخص منهم الأخ النشط الهمام مشرف {منتدى شعراء المناصير} عباس محمد ، الذى ماانفك يحثنى ويحض على تدوين وتوثيق ما أقدر عليه من قصائد متناثره بعضها لم ينشر وبعضها موجود فى حنايا منتدانا على فترات متباعدة ’ وسأبدأ الآن بما هو أمامى ولا أعد بترتيب زمنى ، بل كل حسب ما أستطيع أو أجد له سبيلا ، والله ولى التوفيق ...

فى ذكرى المـــولد النبوى الشريف وقد تم نشرها بالمنتدى فى ذكرى المولد عام 1432ه

باسم الإله وبحمده نبــــدأ ــــ الله أكبر فردا واحدا صمدا

ذو العزة الجبار نحمـــــده ــــ ونسأله عفوا وهداية وهدى

وعلى نعمة الإسلام أكبر مِنة ـــ نثنى عليه ثناء دائما أبـدا

وفى نعيم الخلد يارحمن أدخلنا ــ وأحشرنا إليك مع الأبرار وفدا

أزلت الشِرك والإسلام إرتفعت ــ راياته وسمت بمبعث أحمدا

أنعم بمولده الشريف فإنه ـ فى الأرض محمود وفى السماء محمدا

وأنعم بــــــه من نبى مرسل ـــ ذكراه فى الذكر الحكيم مخلدا

من قبله الظلمات حالكة الدجى ــ يعم الورى جهل ولون أسودا

فبددتها أنــــــــوار مشعشعة ـــ وردد الكون فيما بعدها حمدا

وضجت الأكوان كلها طربا ــ وأتت البشائر أن المصطفى وُلدا

وازدان الوجود بخير الخلق قاطبة ــ فالحمد لله حمدا إثره حمدا

أتــانا بشرع مـن الله مُنـــزل ـــ ولمكارم الأخلاق دلً وأرشدا

فياقـــــــوم بُشرانـــا لـــنبتهج ـــ ونحتفى بمولد خير من وُلدا

ونُحى ماكــــــــان من نهج ــــ ومن سُنن له معروفة ومُؤكدة

فيــا خير من عبد الإله موحدا ـــ ولدينه الإسلام ظل مجاهدا

عليك صلاتى والسلام أسوقه ـــ فى كــل حين دائما متجددا

مُضمخا بأريج الزهر أرسله ـــ تترا مواكبه زحفا بلا عدد

مالاح نور لامع فى سمائه ـــ أو ناجى ربه فى نفسه متعبدا

وماحط طير طائر فى وكره ـــ يشدو بلحن رائع ومُغردا

أو بزغ فجر كل يوم أو أتى ـــ من بعده صبح بِطل أو ندى

أو دب فى الأرضين حى أو سعى ـــ ساع ملبيا النِـــــــداء

منى الفقير أنا لله ياذخرى ـــ أرجو بها للحوض أن أردا

مع الأهل والأحباب كلهم ـــ مع الشفاعة حين ذاك الموعدا

وعلى الآل الكرام سلامنا ـــ يسرى مدى الأيام باق سرمدا

********

عليك صلاتى والسلام أسوقه ـــ فى كــل حين دائما متجددا
تمام ياهندسة –واختيار
هذه القصيدة بالذات كبداية هو عين الصواب –(سوى الفر) نحنا فى الانتظار--

من طرف **عباس محمد** الثلاثاء 04 سبتمبر 2012, 4:04 am

هكذا عهدناك ونعلم تماما مناشدتنا لن تضيع هدرا

لك منا الاف التحايا والتقدير

من طرف **النفر** الثلاثاء 04 سبتمبر 2012, 5:30 am

حياك الله أستاذنا وشاعرنا وأدبينا وكبيرنا الفكى أحمد ... كل عام وأنت بخير وربنا يتقبل منا ومنكم صالح الأعمال ويزيدك علما ً وتقى ... لا فض فوك ولا جف معين شعرك ... واصل الإبداع ونحن متابعون _
تقبل تحياتى وودى ،،،

سلمان عقيد النعوفابى كتب :ــ عليك صلاتى والسلام أسوقه ـــ فى كــل حين دائما متجددا
تمام ياهندسة –واختيار
هذه القصيدة بالذات كبداية هو عين الصواب –(سوى الفر) نحنا فى الانتظار

مشكـــــــور اللبيب سلمان على المرور الطيب وإنشاء إنتظارك مايطول ...

عباس محمد كتب :ــ هكذا عهدناك ونعلم تماما مناشدتنا لن تضيع هدرا

لك منا الاف التحايا والتقدير

شكرا لك أخى عباس والفضل لكم وإنشاء نكون عند حسن الظن وتزول نهائيا أسباب التأخير حيث أنه مازال هناك منها شىء ...

النفر كتب :ــ حياك الله أستاذنا وشاعرنا وأدبينا وكبيرنا الفكى أحمد ... كل عام وأنت بخير وربنا يتقبل منا ومنكم صالح الأعمال ويزيدك علما ً وتقى ... لا فض فوك ولا جف معين شعرك ... واصل الإبداع ونحن متابعون _
تقبل تحياتى وودى ،،،

شكرا جزيلا أستاذنا وشاعرنا الذواق أخى عثمان النفر لك الود والتحايا من على البعد ، شكرا على مرورك الذى أسعدنى كثيرا وعلى ما أوردت فيه من تشجيع وإطناب ...

كنت قد نشرت فى آخر شهر رمضان ــ قصيدة فى وداع رمضان ــ غير

مكتملة ، وقد حاولت فيما بعد محاولتين لنشرها كاملة ولكن خذلنى إنقطاع

النت فى المرة الأولى وذلك بعد أن أكملت طبع القصيدة وفى لحظة الإرسال

كان الإنقطاع المفاجىء ، وخذلنى التيار الكهربائى فى المرة الثانية بعد أن

كدت من إكمال الطبع ، والآن أنا تحت رحمتهما وربنا يستر ...

*********************************

فى وداع شهـــــــــــــــــــــــــــــــــــــــر رمضان

يا شهرا به الرحمن أكرمنا وأنعم ....ومن بين الشهور أعلاه شآنا

نراك اليوم يارمضان مرتحلا ، تنوى الوداع مُلملم الأطراف عجلانا

فى لمحــــــــة أيامـــك إنصرمت ....كلامع بـــــرق فى الدُجى بانا

وبمثلها قدرا أعمارنا ولت .... سبحانك اللهم بارىء الخلق سُبحانا

كـــان بالأمس القريب إحتفاؤنا ..... وشع نورك عم بلـــــــــــدانا

هـــــــذبت النفـوس حتى تسامت .....وكنت دليل الخيـــــر عنوانا

فكم من قائم فى الليل يدعـــــو ..... ومن ذاكر ومن تــال لقُرآنا

وكم من بارز للخير ينشده ..... مُشمرا ساعد الجد يرجو غفرانا

أرحمهم جميعا رب واشملهم .....بعفوك وأعتق كل من صاما

وأجزهم جزاء أعلى منزلة .....لايسمعون حسيسها أبدا ودخانا

نقول إلى لقاء قادم فامنن .....علينا به نرجوك مولانــــــــــــــا

علينا يعود بإذن الله بالنعم .... وبالأفـــــراح نلقاه ويلقانــــــــــا

تعم بلادنا الخيرات والبشرى .. وتفرج عن بنى منصور أحزانا

تحل روح التسامح والتصافى .... يدوم الــُود بينا يبقى أزمــانا

وأجمع شملنا على الهدى أبدا .... وأخذل عــدونا كائنا من كانا

وصلى اللهم وبارك كل حين .... على خير الورى إنس وجانا

********

من طرف **الفكى احمد** الخميس 06 سبتمبر 2012, 4:58 pm

هذه القصيدة {صبرا ساكنى الراكوبة} تحكى عن الفترة التى تلت

إغراق المناصير بوقاحة وإزدراء وعن سبق إصرار ليكونوا أمام

الأمر الواقع فيخلوا ديارهم ويرحلوا عنها إلى حيث هم أرادوا .

فقد باغتتهم مياه السد المسرعة فلم يتمكنوا من إنقاذ مواشيهم

وممتلكاتهم كما يجب وغرق المأوى والمسكن وخاف من خاف

فرحل خارج بلاد أجداده آثرا السلامة الرخيصة ومصدقا لوعود

السدود اللعينة الجوفاء الله يجازيهم ...

فلم يستسلم الناس ولم يتباكوا فآذر بعضهم بعضا ورحلوا إلى

حيث إنتهت مياه السد التى لو إستطاعوا ــ أى ناس السد ــ

لأغرقوا كل شبر من المناصير حتى لا يكون أمامهم مفــــر

وشيد الناس الكرارق والرواكيب وكل مأوى سريع مـؤقت

وقد شاهدت وعايشت المرحلة التى تلت ذلك ، أى بعد أن إستقر

الناس فى رواكيبهم وهدأت حمى الرحيل شيئا وبدأ المقتدرون

منهم فى تشييد المساكن الثابته . ومن كل ذلك الزخم كانت

قصيدة ـــ صبرا ساكنى الراكوبه ـــ

**********

صبرا ساكنى الراكــــــــــــــــــــوبه

شـوف حكامنا باعـونا .....ياما شعوبنا مغلــــــــــــوبة

كيف تحلم هى بالدايراهو ..... وعلى الماباهو مغصوبه

غرقوا لى ديــارنا محوها .....مابترجع محال الأوبـــــه

أغلـقوا عن قصد أبوابو ..... جاتنا المويه طالقى دروبا

فرحـــوا وشمتوا لاحولا ......عشان خلوا البلد منكوبه

لا فى عدل ولا فى دوله ..... أراه مجـــــــــرد أكذوبه

سادى إضنيها عـن مأساتنا ..... وحتى عيونا معصـوبه

وينا وعودا وين ناساتا ....... ويــــــن منـــــــــــدوبا؟

نحن جزانا كان تشتيتنا .... ولى غيرنا الخيور مسكوبه

وبس ماتنسوا فى خـاينين ..... وفى إيد السدود ألعوبه

تب مـــاعندهم فد غيره ...... وحتى إرادتم مسلوبــه

هم يااخوان سبب بلوانا ... وفى الأمثال يفوقوا عجوبا

سُمعتا شينى ، عملت فتنة .... خرابة ممالك ســـــوبا

..................

حليلو زمنا داك يااخوانى ....شوف الحال بقت مقلوبه

بعد حوشا فسيح ووسيع ....وفيهو الراحـــــه مجلوبه

وبعد ديارا تعج بى ناسا .... بقت السُكنى راكــــوبه

وبعد ضُلا رهين وكبير .... الرقراق يجيك من فوقا

ما بتاخـــــد عدلتك فيها ... دابك دابا دُوب يا دُوبــــا

وكان داير كمان تتمغى ... راسك بى تصيبو اللــوبه

وما تغفل كمان فد مره .... بالك لى جحور جكنوبه

ومن عودا مدلدل نازل ... وشوكة فى عقاب كروقه

ومن عفشا مردم فيـها ... إلا اكان تقلب الهُوبـَـــــه

ما بتعرف مكان الدايرو .. كان عراقى كان مركوبا

خليكم معاى ، البقية بعد شويه إنشاء الله ***

متابعين اخي الفكي وفقك الله

متابعين هذا الألق
كدي جيب لينا أول محاولة شعرية عندك منذ زمن اليفاعة.. كانت متى
ومتى اكتشفت أنك عندك ملكة شعرية؟
هل كان هنالك شعراء في دفعتكم! خاصة في المرحلة الابتدائية؟

من طرف **الفكى احمد** الجمعة 07 سبتمبر 2012, 3:31 pm

0 تسلمى أختى نجـلاء على المرور الداعم وبحول الله سنواصل ...

*تحية لك وألف شكر باشمهندس صديق إنت راسى وبحرك غريق

باقى نضمنا نخلى بعدين ،دحين هسع وعدت الناس بمواصلة ماانقطع

من القصيدة ـــ

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

تكملة { قصيدة صبرا ساكنى الراكـــــــوبه }

ما بتعرف مكان الخاتو ........ كان عراقى أو مركـــــوبا

وبوصف ليك بردا فيها .........كان هبت هبايب طُــــوبه

وفى أمشير غبار كتاحة ........ ما بتقـــدر تضارى هبوبا

والريح التســوى الصــو ....... معاها الــرؤيا محجـــوبة

وين كان الهدوم مشرورة .....كمان وين طارت التقروقه

وكان براقا شايل قبــــلى ...... تـــال عتمــــور وعرقوبا

وعـُقب صبة مطرلاتحكى ... مكان يوشل ومكان سبلوقه

سايلى المويه جنب الـعتبه ..... ناخرى وعاملى مقروقه

وهناك تالا الصريف الغادى ... قايمى التربى والعميُوقا

*******

شوفوا أهلنا كــم عانوا ...... إلا إرادتم مكـــــــــروبه

لا نخــــــلا يقيلوا تحتو ...... لا جـرفا يورقو لـُـــــوبا

فجأه إتغيرت أحوالهم ... بعد كان ساهلى فيها صعوبه

وين ناس الغرب جيرانـا؟ .... أضحت دمعتم مسكوبه

ديارهم صار بعيدة خلاص .. بى بحر المحيط مزروبه

وإنشك البشـــــر كشتينا ..... هناك الأم وهنا الحبــوبه

جنبها فى صغير نايـــم ...... تهبب ليهو بى تــــــوبا

سارحى مع زمانا الفات ..... حُلوة الذكرى مرغوبه

تتحسر علـــــــى أياما ...... طاريه دَكتا ودَحــــلُوبا

للمُسحانى لى رابــــانا .... ومُعلاق فيهو كادق روبا

للكر ولى دعُولا الفيهو .. للخُس وعُش سِرير النوُبه

ولى قمريها فوق أغصانو ... يـاما عليها غنى وقوقا

وشايا بى لبينة ضـــان .... شخيبا من ضرع محلوبا

طبيعى ما من بــودره ..... يرقش فى كبابى الشوبا

عاد نقول لا حول لاقوة ..دى كلها فى القدر مكتوبة

ونشكى أحوالنا للجبار ..... غافر الذنب قابل التوبة

وبعد العُسره حتما يُسرا ... صبرا ساكنى الراكوبه

صبرا ساكنى الراكوبه..... صبرا ساكنى الراكوبه

****00***

من طرف **الفكى احمد** الجمعة 14 سبتمبر 2012, 7:04 am

ومما كتب فى بوست {جرف روكه} وبعد أن حكى الأستاذ سلمان عقيد بأنه
قطع بمركبه البحر من النعوفاب وركز عند حرازة كير ودعيسى وآثر أن يمشى
بالجروف حتى اللشيو ليستمتع بالخضره وكان الوقت عصرا ..
الجرف متمدى من الجار وللجار ... يبهر المارينبو إنبهار
الصغيرين وحتى الكبار ...يجبرن على الفرجى إجبار
من حلاتو وزينتو الخدار ....... ودعقيد شاقيهو كدار
بالمتيره وحدو كجار ...... للعصير وغياب النهار
وحالتو راجع تانى مشوار ... ما شبع ومل الإنتظار
ثم رد سلمان عقيد وكتب :ـ
الجرف تانى إزداد عمار ...شب لُوبا وعما الخدار
وانشبك سلكو مع الخدار ... غطى من الحَجره للبار
الفكى والنفر والزعماء الكبار .ختو فى كل عقده منشار
وانصحوه القاصد الكجار ... لا يجدع لايجيب حجار
كتروا الطلات الكتار ....... الصغيرين حتى الكبار
مابنفارقو جرفنا مهما صار . سيدو قال من برتى للعار
وسنواصل بإذن الله ,,,

من طرف **الفكى احمد** الجمعة 14 سبتمبر 2012, 4:35 pm

ثم كتب أستاذنا النفر قصيدة يقول فيها :ـ
سلام للفكى وودعقيد .... ولكل شبابنا والعقد الفريد
والجرف بقدومكم سعيد .. لوباهو نور وفرهد فرهيد
وعبق زهورو يفوح من بعيد . عاد ياهو منتجعنا فى العيد
مهرجان وكورال ونشيد .... وللشعر نعشم للمزيــــــد
وكل زول يبدع بالجديد .... تبقى لمه وكل زول سعيد
ويبقى عيد للماعندو عيد ... زيى أنا القاعد فد وحيد
ـــــــــــــــــــــــــ
وكنا على مشارف عيد الأضحى المبارك للعام الماضى وكان
شاعرنا النفر لوحده فى الغربه بدون عائلته التى كانت بالسودان
وكان اللبيب سلمان عقيد فى إنتظار عودة أخيه نور الهادى من
هولندا لحضور العيد ’ فكتبت القصيدة التاليه :ــ
سلامى لأهل الجرف الفريد
ولى عيال منصور كلهم القريبين والمن بعيد
وللمغرب وللمشرق وللفى السافل والصعيد
وللفى أبــــــــــــها رُكنا العتيـــــــــــــد
ندعو لهم الله نبارك العيـــــــــــــــــــــــد
ولينا إنشاء الله يبارك يزيـــــــــــــــد
عافيـــــــــــــه صحـــه وعمرا مديد
بالصلاح والسير الحميــــــــــــــــــد
والطـــريق ممــــدود ســـير مـــريد
وكـــــــــل زول ياخـــــد مايريـــــد
ويالنفر القاعـــــــــــــــد وحيـــــــــد
إنت توزن جبــــــــــــــل الحديـــــــد
الفرج قــــــرب مــــــــــو بعيـــــــد
وتنعـــــــم الأيــــــام من جديــــــــد
وإنشــــاء بالإثنين تــــانى عيــــــــد
يطــــل علينا النـــور ودعقيـــــــــد
يهنأ سلمــــان ويشكـــــــر الســــيد
..............

من طرف **عباس محمد** الجمعة 14 سبتمبر 2012, 5:07 pm

والله يا باشمهندس هذا قصدت
فقد قرانا واستمتعنا بمشاركة الاهل
لك التحايا الحارة مرسوله بى طيبة العبق

فقط واصل وما تقطعنا فى دقش

من طرف **الفكى احمد** السبت 15 سبتمبر 2012, 4:34 am

تسلم أستاذ عباس وتشكر على المرور وربنا يوفقنا وما تنقطع
فى محطة لامن تصل بالسلامة ...
..............
نواصل :ـ
وكان شاعرنا الكبير م بروى قد كتب ردا بقصيدة يقول فيها :ـ
المهندس خلقه صنديد ..... جاب دروس فى نظم القصيد
من زمان أنا محسوب مريد .... عندى ريده وحبـــا شديد
للمهندس ونضمو السديد .... فى مسيد ودعيسى العتيـــد
بق نورو وبق المسيـــد ..... يـــرشد الناقصلو ترشيــــد
ومنو كــل الناس تستفيد .... زمــان نشوفو ونفرح شديد
لمـــــــــــا نترسل للبريد ..... نلقى منو العلم الأكيــــــد
منو ننهل ونطلب مزيــــد ... لاهو غالات ولاهو العنيـد
لاهو سكير لاهو عربيــد ... وفى الأدب والأخلاق فريد
يجمعنا رب الكون من جديد . تانى نضحك ونفرح شديد
ـــــــــــــــــــــ
وكنت قد غبت عن المنتدى مدة طويله وعند رجوعى وتصفحى
لبوست الجرف وجدت القصيدة الفائته من سيد الجرف ، فكتبت :ـ
لقيت لى هديــــه بى تلمع وترقش .... من شاعر رقيق فنان ومدهش
ولقيت الجرف أخضر ونوارو يرقش . لاناموس ولا كلتيب منو تهرش
وعلى مــــــد البصر ماهو المكنش ... يسبى جمـــالو للناظرنو يدهش
قــول ماشاء الله ياخـــوى لا تلبش ... تعاين فيهو عينيك تــابى ترمش
من حسنو وجمالوتحوم فيهو وتفتش .. وعلى كيفك تورق منو تخمش
وعلى كيفك مكان ماتدورو تهبش . فيهو جميع صنوف عناب ومشمش
*********

من طرف **الفكى احمد** الأحد 16 سبتمبر 2012, 4:23 pm

كان أستاذنا عثمان النفر قد دون ووثق قصائده وذكر بالتفصيل المناسبة التى قيلت

فيها كل قصيدة وقد راقنى ذلك كثيرا فكتبت القصيدة التالية :ــ

يالنفـر كتر من غُنـاك

واطرب الواردين منتداك

وبالشعر سجل خواطرك

ودون الحدث الكان هناك

مهما كان هو لينا ذكــرى

نستطيبـا وتـــــانى تتــلاك

وللشعر تنجذب النـفوس

ويفرحك تلقــــاهو تالاك

ويندرع فيك زى اللبس

ومابيهون منـو الإنفكاك

*******

قصيــدة الغـــــــــــــــــراق

قصيدة الغــــــــــــــــــراق
ــــ.ـــــ.ــــ
بإسمو نبدأ لآنو واحد ونشهــــد أنو محمد رسول
بإسمو نتعوذ وبى نلوذ يكفينا شـــر الظالم أبشُرور
ويجازى من قاصد شتاتنا ينعكس فعلو عليه ويؤول
والبظلم الناس فى الحياة ليهو يوم لابـُــــــد مخذول
،،،،،،،،،،،،،،،،،
نبدأ من وين وللا من وين ياجماعة الخير شن نقول؟
يا سنة تمانيه وألفين مـــالو بحـــــــرك قيدو محلول؟
جاتنا فيك أخبار بلدنا يحكوا قالوا المنظر مَهـُــــــول
قالوا ساحة حـــربا ضروس خلفت آثـــار ما بتزول
وقالوا كشر بحـــر البخت جانا هايج وسيفو مسلول
بالله كيف فى أيام قليله يغمر الوديان والسهـــــول؟
ودون بديــل تغرق بيوتنا وحتى عيشنا السوا قندول
ومن السعايى نفق الكتير والكباشى الكانت دعــول
وينو شجر الدوم الطوال والحراز وشجر الكعاكول؟
ليه يتم إغراق النخيــــــل قبل حشو وقلع الشـَتول؟
كلو أصبح جـُوه البحر تانى لادفيق لا مغمــــــول
طفش الطير من جريدو وفى عشيشو فريخو مقتول
والحمام من أبراجو طار ونجعت أسرابو فلول فلول
للقصيدة بقية :ــــــــ

نواصـــــــــــــل :ـــــ
ليه يتم إغراق الخضار قبل نفعو وقلع البصــول؟
والبيوت صار سُكانا حُوت فيها يطمس ويقلع يجُول
لامتـــاع محفوظ من زمان ولا بصيلا دابو مشتول
وكتيرمن المدخور من سنين فى دقائق يمشى ويزول
وين تمُر رمضان مخزن منو نأكل عامنا للحــــول؟
والمدارس يــا حليلا جــــاها كاسر وأفلت أفـُـــــول
خلاها تحت المـُويه والطين جاها هادر كابى جندول
لارَحـم تعليم لاعلم غــرق المـكتب والفصـُــــــول
حتى المساجد والمقابر ، خالف الآعراف والأصُول
لادانقه لا قاطـُوع لاجكـُب كلو راح فى بحر السيول
وانعكس مجراه من الجنوب داهم الأشجار والحُقول
وأم لقاديب جــاها كاسر للجبـــل ولحوش العمــول
وإنحدر تيارو عكسى بالفـــراسيب ميسو عبضـُول
لارحم ناسا غلابـــَــه ولامريضا يشكى مَعلـُــــول
ولاعجوز صاحب عنقريب ولاصبيا زندو مفـتول
حتى إنوالجار القريب ليهو أصبح صعب الوصول
وإنعدم كل مظهر حياة والبلد عماها المحــُــــــول
وأصبح الكل بيعانى عيشتو صعبه وفكرو مشلول
والهموم زادت على الناس وكل زول عن زاتو معزول
رب أرحم شيخا كبير إيدو ترعش وجسيمو منحول
فى مكان دار بيتو خايض ماشى جايى حايم يجول
أحفظو واستره يــارب لايجن لا يبــقى مهبــــول
وأم وحيدى تسل فى الجريد من رُكام بيتا قبل يزول
تحاول التقـدر عليهو جَاِرى تـُــوبا وراها مبلول
قايمى وحيدا وتصارع أصلو كل زول بالو مشغول
نواصـــــــل:ــ

ول

رائع أخى الباشمهندس الفكى ومتابعين 0 ( لكن ده من زمان داسو وين )

مشكور الأخ سامى على المرور ، هذه القصائد منشوره فى المنتدى من قبل

وكلها طلعناها من القسيبى الفى القاطوع ...

نواصل { قصيــــدة الغـــــراق}
الحصل فى الحسبه إجرام وإنتهاك مين عنو مسئول؟
ده الحرام والله ياناس فى الشرع والدين مى مقبول
كيف تجبروا المابى الرحيل وللوطن مشدود ومغلول؟
لمتين هذى المآسى؟ خوفى لسنوات قد تطــــــــــــول
بقين لاجئين فى بلادنا ، هله هله مصيرنا مجهـــــول
أصلو كان النية صافية يا حكـــومة الحكم الشمـــول ،
قفلة الخزان مابتجوز قبل ماتشوفوا لينا الحـــــلــول
وكان قبل واقعة الغراق تعملوا الواجب ومعقــــــول
تبنوا لينا بديل محلى ، نأوى ليهو وما تخــــلوا زول
حينها يرضى الناس عنكم ويكون ستار الظلم مسدول
،،،،،،،،،،،،،،،
وفى الأبيات التالية يرد النيل معتذرا ويرمى باللائمة على
أمراء السدود الذين أجبروه على إغراق البلاد دون أن يدع
أى مجال للناس ليأخذوا على مهلهم مايمكن من متاع ،،،،
يقـــول النيل :ــــ
البحر قال يرجو السماح ، سدوا دربى خلوا مطبـــول
أعذرونى أنا يامناصـــير من الحصل متحشم كتيـــــر
إنتو عارفنى أنا لما أفيض كل عام مره وكل حــــــول
كُت براعى مصالح البشر وكنت متمهل مى عجــُــول
مابخرب أروى الجروف كنت معروف خيرى مبهول
دى فعايل أمراء السدود حتى أصابتنى أنا بالذهــُـــول
شوف كبيرهم قولو مو زين ، كيف يكون الزيو مسئول
قال لى أسدُر أمشى لافوق لاتفكـــــــر تب فى الــنزول
أجبرونى أفوت الحــُــــــدود وأسوى كل الماهو معقول
وأمثل الأدوار معـــاكم والمـــــآسى بكــــل الفصـــــول
عشان يكون الأمر واقع وبالضغط تختاروا الرحــُــــول
وللآسـف فى نــاس مننــا لااحسنوا فعلا ولا قــُـــــول
إنجروا فى جانب الخلافات ومسلكم كان ماهو معقول
ماراعوا أبدا صالح البلد ومع السدود واقفين على طول
وكــان هناك تفريط فى الأمـــر وما جنيناه ماثل مثول.
تـمــــت ...........

من طرف **الفكى احمد** الأحد 23 سبتمبر 2012, 5:46 am

فى إحدى أعياد الإستقلال كتبت :ــ
اليوم عيدك يابـلادى فافرحى
اليوم عيدَك ياوطـن به نحتفى
حيى العَلم وارفع لهامك ياأخى
فالحُرُ حــُر لا يُضام ويرتخى
يفخــــر بمجــد بلاده لايستح
مجـد تليد لن يــزول وينمح
قدم لوطنك مااستطعت وأمنح
كل مايروم ، وأسع لخير واصلح
وأرفع لصوتك بالنشيد وأصدح
كُن فى ميادين العُلا ألزم لها لاتبرح

من طرف **رجعنالك** الإثنين 24 سبتمبر 2012, 3:49 am

جميييل الاخ الفكى وانا فى اعتقادى ان الام المنصوريه ترضع صغيرها حليبا وحديثا مموسقا ارجع الى هدهدة الطفل واللولاى

من طرف **الفكى احمد** السبت 29 سبتمبر 2012, 3:48 am

شكـــــــرا على المرور الجمييييل رجعنالك وربنا يجزى الأمهات عنا كل خير فقد
أرضعننا كل الحنان وإنشاء الله مثواهن جنان ...
نواصــل بقصائد ملحمة المناصــــير
وكانت بمناسبة إعتصام المناصير بالدامر :ــ
ياهم ديل أهلى المناصير بيهم إعتز وافرح كتير
من زمان معروفين رجال أسألوا العارف والخبير
للحروب كم خاضوا الغمار فى الكتب كان ليها تسطير
بالكرم فى الساحة بارزين ولكل أمر جد أوخطـــــير
حيروا المستعمر زمان وكم قُتل جنرالا كبيــــــــــر
وما خلت ساحات بلادى من بطولات المناصيـــر
فارسا النعمان ودقمــر كان فــــدائى وسام العمير
قول لى يازول وين مثيلو ؟ كونه فارسا مالو نظـــير
مافى واحدا سوا زيو وهو عارف أيه المصــــــــــير
أرخى لى فرسو العنان وميسو كـــان الحصن الكبيـر
زى شهاب الظلمه طائر صاقعه نزلت فيهو تدمــير
لله دره الفارس الهمـــام سيرتو بيها الرُكبان تسـير
هو ورفــــاقو لينا نبراس فى ســمانا بــدورا تنيــــر
للقصيدة بقيه ...

نواصــــل :ــ
وفى أبحمد عُمدانا داوس نال شهادة العــِـز بتقدير
وفى أم دويمى شيخنا فكَر قال لهم عاوزين كم بعير
وبى هناك رسل رسولو أمشى للسلمات جيب نفيـــر
جابو خبر إستيوارت هناك جندلوهو ولاقى المصير
وأجدادنا فى يوم الكربكان كالأسود كان ليهم زئير
وكان معاهم فارسا همام فَد رصاصة وماعندو غير
تحرق النار فى جسيمو ومنتظر ماهمى السعيــــــر
شاف بعيد فى صيدا سمين دايرو يدنى يقرب كتير
هيـــا قرب ياأبدبابير هيا أســرع جــِــد المســـــير
ثم سَــم اللـه وكبـــر وصـوب البــارود بتقديــــر
وبالرصاصة الواحده باقية طاح هناك الوغد الحقير
هذى أمثال من بلادى وغيرها غيرها هناك الكثير
وحتى فى تاريخنا هسع حين ينادى الوطن الكبيـر
تجيك فوارس منصور سريع يلبوا حالا مافى تأخير
بس هناك اليوم فى غصة شوفوا كيف جازوا المناصير
الناسا ضحوا وقالوا مرحب لى فداك ياسودان نسير
نمشى فى الشوك ونرقى الجبال لايهم حر أو زمهرير
وفوق لهيب النــار نصقر مع النحاس ودق النقاقير
والــوطن يدعينا نســـرع دون توانى وللا تقصيــر
للقصيدة بقية ...

نواصـــل :ــ
ويـــوم خلاص إتقرر السد ، بى ضمان طمنا الـزبيــــر
وقال نشيلكم فوق رؤوسنا إن دعا الحال أو فى القصير
ليهو مننا صالح الدُعاء وعننا إنشاء الله جزاهو خيـــــر
بس عمـــــايل بعض الـبشـــر منـــها الكـــافر يستجير
إزدراء وتلفيق وأحقــاد أقوى من أحقاد البعـــــــــــير
وبى قصــــد واضح للعيان غرقونا وما قالـوا خيـــــر
همهم بس تخلوا الديار من جنس مخلوق حتى طيـــــــر
لايـهـم وين يمشوا يمشوا وللبيقعد مــــافى تعمـــــــير
والوعــود كلها كان كذب ، كالسراب ماكانت غديــــر
والدليل لى يومنا هـذا ، لااستجـابـه ولافى تقـــديــــــر
ونحن مظلومين نعــانى ، وكلــهم هانى ينـــوم قريـــر
بس ظلـم ما شفنا زيـــو ، قـــولوا ياستار يامُجـــــــير
هذا حكم القـوى على الضعيف ، كلــهم راجيهم شبير
كل من أهملنا عمدا ، كان صغيرا أوكان كبيــــــــــر
كل ما سُمناهو منـــــو ، فى رقبتـو مـعـــلق أســــير
نحن ماطالبين عطيه ، بس حُقوقنـا مش تـانى غيـــر
لها بقيـــــة ....

من طرف **الفكى احمد** الخميس 04 أكتوبر 2012, 5:30 am

نواصــــــل :ــ
ومن قبل كم مـره أصدر فى حقوقنا قرارو البشير
قال لهم فورا وحــالا أنصفــوا اخـوانا المناصير
كأنو فى مالطـا بيـأذن ، لامُجيب سبحان القــــدير
والليله طفح الكيل يارجــال ـ للأمام هياكـم نسيــر
مابنمل لى بكره قاعدين ثم صامدين وصابرين كتير
ياعمر وينك ياريس ، لاتكلنا على مين وزيـــــــر
يللا أحكم هــذى حوبتك ، انت مسئول انت الكبير
هيـــــا أصـدر بالمعجل كـــل تعويض للمناصير
لأنها الأيام مابتدوم وكل عمير مهما طـال قصير
لاتغر السلطة زايلـه ، أنصفونا وأطروا القبيـــــر
كل حى فانى ولى زوال ويبقى وحدو الباقى القدير
كل حى فانى ولى زوال ويبقى وحدو الحى القدير
ــــ ....... ـــــ
***
تمت ...

من طرف **عباس محمد** الإثنين 08 أكتوبر 2012, 2:45 pm

مشكور الباشمهندس الفكى احمد
فقد اجبرتنا ان نتمترس امام شاشة الكمبيوتر
الله لى عيونا من الطشاش

من طرف **الفكى احمد** الخميس 18 أكتوبر 2012, 5:37 am

مشكــــــور أستاذنا عباس تسلم العين من الطشاش

من طرف **الفكى احمد** الخميس 18 أكتوبر 2012, 6:16 am

كتبت فى الذكرى الثانية لتسجيلى وانضمامى عضوا فى منتدى المناصير بلدى :ــ
أهــــــــــــــــــــــــلا منتدانا البيهو نفخر ....لإرث القبيله لم سطر
شاقى طريقو نورو الضاوى يبهر . حانى علينا نرتع فيهو نسمر
نصفـح فيـــــــهو فرحانين ونسهر .... سهل للجميع بالعندو عبر
وقرب للبعيد ولجهودنا وفر .... وكل أعضاهو مهما كانوا سكر
نياتن صافية ما بتتخج وتعكر .... معدن أصلى زى دهبا مجمر
كلنا قيهو روكه جرفنا أخضر .... مشكورين شبابنا الفيهو فكر
هــــم راعنـــو لامن لـيــنا يكبر .... فألـف تحية ليهم منى واكتر

*****

فرد الأستاذ اللبيب سلمان عقيد بهذه الأبيات :ـ

مبـروك يازعيم المنتدى بيك يكبر
جرف الروكه فرهد ولوبا خضر
هندست التراث وليهو سطر
ركبت السواقى ولمصطلحاتا فسر
شجعت الشباب وكان إنتاجن أكتر
صافيت الجميع كل ما الجو تعكر

فرديت عليه بالأبيات التاليه :ــ

هسع انت خليتنى مع السحاب
ليك شكرى وألف ترحاب
وأنا فى كلامى وقولى الشباب
ودعقيد سلمان فى الحساب
أصلو معروف فى النعوفاب
رايو قاطع حلال صعاب
وبى يقول الحق ما بيهاب
جهدو باين ماهو السراب
تلقى قدام قايد الركاب
وللتراث دون بإسهاب
منو ننهل نشرب شراب
وللنظم كان جيتو أرباب
عينى دايمى وبحرا تساب
وفى الأعالى يحلق عـُقاب

*****

أولاً ابدئ اعجابي الشديد بهذا الحس الشاعري عند الباشمهندس.. وعلينا ان نؤاذر ونبدئ ملاحظاتنا علي هذه الأعمال حتي ندفع به في منافسات علي مستوي القطر ..فقدلاحظت تشجيعنا أشبه بتشجيع الكوره ...فمثلاً أنا لست من الشعراء ولكنني من المعجبين بالشعر .. كنت أمني نفسي ان أجد مجادلات واسعه في كل بيت كتبه الباشمهندس... ومدي مطابقته للعروض وبحور الشعر واين الضعف في الاسلوب والصوره الشعريه وأين أجاد .. نشكر للباشمهندس عرض بضاعته ونشكو تقصير الشعراء في النقد... لأن روح الشعر النقد.. فقد حضرت جلسات كثيره للنقد عند شعراء كبار مع ميلاد كل قصيده.. بل حضرت جلسات تلحين يسخن فيها النقاش لدرجه لاتتصورها حتي يخرج العمل جميل ومعافي.. الأخ عباس أرجو أن تضع في خطتك عمل صوالين للمناقشات العلميه لمثل هذه الاعمال

من طرف **عباس محمد** الخميس 18 أكتوبر 2012, 7:04 pm

بقدر ما اتت من مداخلات فى هذا القسم لم تعجبنى بقدر ما اعجبت من هذه المداخله
يا ود حبيب وانا اعطيك الاذن بان تعمل ما تشاء فى هذا الاتجاه
وجال ذلك بخاطرنا ولكن نريد من الشعراء انفسهم اى يتداخلوا على كل قصيدة تكتب هنا باعتبار صالون لكل قصيدة حتى يستفيد الشعراء من ذلك كثيرا

لله درك يا محمد حبيب الذواقة

من طرف **الفكى احمد** الإثنين 22 أكتوبر 2012, 6:46 am

لك شكرى وتقديرى أستاذنا محمد حبيب هبرم على هذا المرور الجميل والإطراء والتشجيع
ومما زادنى فخرا أن ذلكم كان من قبل رجل أديب يحب الشعر ويتذوقه ، وقد أعجبنى جدا إقتراحكم
نحو ما ينبغى أن يكون من عمل يؤدى فى النهاية إلى إزدهار وتجويد شعر وفن المناصير
والرقى بهما نحو آفاق أرحب وحجز مكانهما المستحق بين الشعر والفن قى بلادنا السودان .
وياليتك أستاذنا محمد حبيب والأستاذ عباس وآخرين تشرعوا لنا فى دراسة هذا الأمر ليرى
النور ومن جانبنا لن ندخر جهدا فى كل ما يطلب منا ، وكــــــــــــل عام وأنتم بخير ...

كان شاعرنا الفذ ود البروى قد غاب عن الظهور فى الجرف مدة تقارب الشهر وهذا ليس من عوائده
وتساءلنا وخاصة الأخ أبو مصطفى وقلنا إن شاء الله المانع خير وكانت هذه القصيدة :ــ

ودبروى جرفك روكه ...رويان وطينتو مبروكة
مزروع نزو بالطوريى ... وعند الحَجرَه سلوكه
تعال شوف الجرف كيفنو .. مافى قِطيعى متروكه
وبى فوق ليهو فرهد بارو .. ترتر جدولو أبسبلوقه
مشمر سيدو متحزم ... وجنبو الكونشبر موسوقه
تربه غنيه دون كيماوى ... ما محتاجـــه ماروقا
جابوا له الفطور سمبوسه .. بملاح باميه مفروكه
تعـال مندلى لجرفك ... كتير من ناس يراجـــوك
متحبكين هناك كل يوم .. ناس ود أختك وأخـوك
راجــــين جــيتك يعاينو ... طـــولـوا دار يشوفوك
ويومى على الجرف واردين . عسى ولعل يلاقوك
وابو مصطفى ديمه يسأل . هو من ديل البعزوك
تعــال ما تطـول عليهم ... تـرى كـم هم يحبوك

من طرف **م بروي** الثلاثاء 23 أكتوبر 2012, 6:13 pm

سامى احمد محمد كتب:رائع أخى الباشمهندس الفكى ومتابعين 0 ( لكن ده من زمان داسو وين )

إخواني الباشمهندس وسامي
لكم التحايا العطره
الليله يومي كلو راح في المحل السمح ده ولا ندم
اندهشت لروعة النظم واستغربت مثلك ياسامي
وقلت زيك(من زمان داسو وين؟؟)
وتاني راجع

قصيدة كتبت أثناء الإعتصام بالدامر .

تحيـــة للمعتصمين بالدامر

نُحيى أهلنا فى الميدان ، عيال منصور شادى حيلا
ســـــــــلام الله بغشاهم ، فجر ونهار وكل ليلة
رجـــالا صابرة وتجالد ،، بحق هم فرسان قبيلة
ناس تاريخهم مشرف ، كرم وأخلاقا نبيلة
للسلام مادين إيديهم ، والسيوف عارفين صليلا
يحيوا الدامر الأبية ، بلاد النخوة الأصيلة
نعترف ولناسا نشكر ، فضلهم شكرا جزيلا
للمعانى السامية حازوا ، ننحنى نقدر جميلا
نصرة حق بارزة ليها ، رجالا باعهم طويلة
ومطالبنا عشان حقوفنا ، بنكرُبا مابنرخيلا
سمعنا الإنقاذ تعمـر ، عجب موباين دليلا
غراق وخراب لبلدنا ، وحكاية التعويض حليلا
وينا عهودهم معانا ، عـُقب فى الآخرة ياويلا
لكل من سام ناسنا ظلما ، حسابهم حتما عسيرا
نروم لحقوقنا ما بنشحد ، ولا طالبين مستحيلا
ومهما طـــــال إنتظارنا ، تـانى نلـــم نعبيــــلا
وأخير اليوم قبل بكره ، تحقوا الحق للقبيلــة .

أخى الرائع دوماً الفكى

سلام

اليوم إستجمع قواى وألملم أشتات شجاعتى وأنا أرتجف وأكتب شيئاً مما يجول بخاطرى منذ زمن بعيد :

* طيلة معرفتى بك لم أعرف أنك تقرض الشعر وتنظم القصيد إلا هنا . لماذا ؟

عرفناك فناناً !

عرفناك تهوى التصوير الفتوغرافى وكم صورة لراحل ومسافر بالسنين وكبير عرفنا ملامحه عندما كان صغير وجدنا كل ذلك فى إلبوماتك الكبيرة !

عرفناك رساماً تجيد التلوين وتناسق الألوان بريشة مبدعة وتذوق عجيب !

عرفناك تبنى بالطوب وتعالج الأسمنت وتصنع الأبواب والشبابيك وتطوع الخشب العنيد بالمطرق والإزميل والقلم مثبت أعلى أذنك ، ولم نندهش فأنت مهندس !

عرفناك تصطاد الطيور بالنبلة لا تخطئ التصويب وعلتنى الدهشة وأنا صغير

علمنا عنك الكثير من المواهب !

أما أن تقرض الشعر فهذه إلا هنا حيث المنتدى الجميل

تقبل مرورى واعذرنى على هذا العقوق

من طرف **عباس محمد** الخميس 08 نوفمبر 2012, 7:23 pm

نجحت المدودرا بى هنا ياسامى
وقبلك بكثير كانت اندهاشتنا بشقيقك الفكى
واكتملت الدهشة بدخولك هذا المنتدى وماسطرت فيه
من روايات ونثر وشعرلم نكن نعلم هذا قبل ذلك
فلك التحية والسلام
وللباشمهندس اجل التقدير والاحترام
فكيف لا وانتم قلب شرى النابض

شكرا جزيلا أخى سامى على هذا المرور الجميل وليس لدى تعليق
غير أنك محق فيما ذكرت ...مع خالص تحياتى...

********

تسلم أخى الأستاذ عباس فمنك كان الحث والتشجيع على تدوين
القصائد وأنا على العهد كلما سنحت الفرصة وامتدت الأيام
ولك تحياتى وودى ...

بمناسبة مرور عام على إععتصام أهل الخيار المحلى من المناصيرنجدد نشر هذه
القصيدة التى نشرت إبان الإعتصام بالدامر ...

ملحمـــة المناصيـر
ـــــــــــــــــــــــــــــــــ

الله أكبر يارجالنا ،،،، الله يبارك فى سعينا
الله أكبـــــر ياشبابنا ،،،،هيا صلوا على نبينا
ديل ولاد منصور أشاوس مافى من يقدر يهينا
نحن حين نادى المنادى لبينا حالا قمنا جينا
لحقوقنا العادلة نطلب مهما كان ومهما إبتلينا
بى عزم واحد عزمنا ، وما يهمنا كان فنينا
ومن شهر وأكتر صمودنا ، كأنو يادوبك بدينا
غير مطالبنا وحقوقنا الليها نسعى وليها جينا
تانى مابنرجع نساوم ، زيدوا صلوا على نبينا
واعتصامنا سارى قائم لو يدوم دهرا وحينا
...........
ضحينا لى سودانا ينعم يرقى عالى ويبقى زينا
غير كذب واعـــلام مضلل ، غيرو أبدا مالقينا
طــالت الأيام صبرنا ، كأنو محبوسين رهينه
وكان جزاء سنمار جزانا ، والظلم واقع علينا
من إدارة السد والحكومة وكمان تب سووها شينه
مرادهم كان نمشى نرحل رضينا بذاك أم أبينا
ومن أرض أجدادنا نبعد ويكون خلاص نحن إنتهينا
لاشمل يتلم تـــــانى ، ومــن بعض ننفض يدينا
ونسيب خلاص مرتع صبانا وكل عزيز كائن لدينا
كيف بنرحل عن ديـــــارا نحن ليها وهى لينــا ؟

وللبينعموا بالكهارب ، الكان أساسا سبب نفينا
كان عشمنا الكل معانا تكون إيديهم فوق إيدينا
..............
وين وُلاتنا ؟ وين رئيسنا ؟ وين قراراتو الدفينه؟
إلام هـــــــــذى الحال دواما ؟ دونما ذنبا جنينا ؟
وين قرارات الطُوينا ؟ إشمعنى ما تنفذ فى حينا؟
لا متين تقعــد حبيسه ، ليه نظل راجين سنينا ؟
كيف يهون ترضى فى حقك وينا سلطاتك دى وينا؟
كان ده تخدير لينا منك ماهو زين فى حق ولينا
ليه تسيب الموج يلاعب وإنت ياك قايد السفينه؟
إنت مسئول عن رعيتك ، ومن قبل ليك إشتكينا
كـــــان ده عاجبك والبيحصل منك أبدا مارضينا
لأنـــُـــــــو الظـــــلم ظلمات خسارتو الدنيا والدينا
وبالقـــــــرآن سور وآيـــــات سألنا المولى ينجينا
ومن بعد الصــــــلاة نختم ونصلى آلاف لى نبينا
ــــــــــ ..... ـــــــــــــــــ

من طرف **الفكى احمد** السبت 24 نوفمبر 2012, 6:41 pm

ومن القصائد التى نشرت أثناء الإعتصام بالدامر هذه القصيدة :ــــ

نحن فرسان أولاد قبيـله .... كرم وأخلاقا نبيله
يــروى تاريخنا ويسطر لينا ميراث وانقى سيره
شهدت الأعداء بإعجاب ، حاروا فى هذى القبيله
كان مراسا صعب عليهم أُذهلوا وكم اُعيوا حيلـه
واليوم نسطر أحلى مشهد ، خيار محلى ولا بديلا
بنودنا عشره ولا بنساوم ، نحن جاهزين فى سبيلا
بى صبر جاد وبى عزمنا ، نذلل القاسيه ونزيلا
ديــارنا بى خيرا الوفيــرا ، فيها يجرى السلسبيلا
حَبـــانا رب العـِـــزه بيهو ، أنعم به ربا فضيــلا
فيهو حيـــاتنا كين ينــــزل ، ولمـا يتسِب دميـره
وجــزايرنا وناس قُــرانا ، سنين وسنيناً طويـــلة
حوله عايشين فى محبة ، وعنو يبعدوا مستحيلا
غيرو مادايرين بديلا ، مويتو عذبــه وين مثيـلا
والنسيم المارى بيهو ، يجيك نقى صافى وعليلا
بالنهار منظر جميلا وكذا العصير ساعة الأصيلا
والقمر يتهـــادى يقــدل ، والنجوم تلمع فى ليـــلا
ديارنا سمحه وناسا طيبين ، ما بيهون عنها الرحيلا
نحب جبالا نحب سُهولا مابندور ليها بديــــــــــلا
لأنو حِنيــة أهلنا ، فى النفوس راسخة وأصيلــــة
تجرى زى الدم فى العروق ، وجُوه فى عُيونا بنشيلا
فى القلوب ذكراها حاضره وصورة الناس فى المخيلة
بى خيالنا نطوفا ديمه ، نبدأ بالعــــــال والكـحيلة

للقصيدة بقية ......

من طرف **عباس محمد** الأحد 25 نوفمبر 2012, 4:47 pm

ونحن فى انتظار البقية

نواصـــــــــــــــــــــل :ـــ
ـــــــــــــــــــــــــــــــــــــــ

بى خيالنا نطُوفا ديمه ...نبدا بالعال والكحيــــلة
ونمر بالسادى والحيبى .. وجماميعنا الشكره هيلا
ونروح لى كابنا نغشاهو .. قطارة الركاب حليلا
ونطوف حلالنا لى كبنة .. . شرق وغرب نعديلا
وحتى كوينا وأم بلجى ... وناس الـــروم الأصيله
حباب عصمه وحسيبابنا ... طُبول حوليه كل ليله
وكراع عون الله نمشيلا .. ونعدى نمرق الحليله
وكل حلالنا للبرجوب وللحقنى نطوفن من غير دليلا
وجزيراتنا وسنوده سلام ، واهلنا هناك فى ابرميله
وعمارينا العامره ديمه .. بلــد حــــامد حق جميله
ومن بعد الصفيحه هناك سلمات ودقمر دُره قدر ماعندى باهديلا
وناس حَنـُون أهل مشرع ... وضـُقُوله يضوى قنديلا
ونعوفابنا وبُكره سُــوقا .... تميل ليها القلوب ميلا
وللتومات شرى وشررى ، بحور من شُوق جارى سيلا
نحُومن مانخلى سَـنتى .... وحتى جُـــروفنا نرديــلا
وشنكوكه وعشامينا وشرق عُونابنا ما بننساها نمشيلا
وحوش فرنيب مع الزيناب وبالشلال دُرُوباً سالكى وعديله
والبللاب مع أم عطرون وللسجنى نفوسنا تهيم تشابيلا
وهناك فى الكربكان تاريخ ... مناصيــر عـِــز القبيله
عتاميرنا ورجــــالا عُــزاز ... كـــرام مافيهم بخيــلا
تسرح فيها أفكارنا .... وتهيم فى ظبية الــــــــريلا
وابسباع هـَــرَيوب ولى سانى ، لهم شوقا مو قليلا
ونروح لى أُوس وعُقب سورنا نطُوفن ويارب مهيله
وفى دِربى ودُماج ياناس .. رجــالنا عِيــارُن تقيــلا
وهناك فى بونى فى برتى شباب يملا العين يكيـــلا
وفى بلداتنـــا وقُـــَرانـا .... بنحـــلم يــوت نهاتيـــلا

البقية لاحقا بإذن الله تعالى ....

نواصل القصيدة ، وهناك بيت من القصيدة كان قد سقط سهوا وهو بعد ،
شنكوكه وعشامينا وشرق عونابنا ، مابننساها نمشيلا
وسِحِــر حُمُـوداب ودغفيلى ، وجمـال قيزان الرِميـــله
القصيدة ......

ولكل بلداتنا وقرانا .... بنحلم يوت نهاتتيلا
محل ماتمشى إتفضل ... لسه مسافتك طويلة
وبين كل حِله والتانيه ... يلاقيك بارد سبيلا
تبَرِد وتنزل تكركع ... مُوية نيــــل ماها بيرا
وهناك بى غادى فى خلوه ، وفى راكوبة ظليلة
تحُش لى جُوه تنجمَ .. ويكون ليك فيها المقيلا
تجيك الغِديات تتاتى ... كــرم متسلسل سليلا
وكل الأكلات شهيــة ... حتى القليَة أم بصيله
كرم منصورى وحقيقى ، مواريث جيل بعد جيلا
بلاد زى دى انا بيها بافخر ، لأنها زينه وعديله
وفيها الأعيـاد مَواسم ... تلِـم كـل ناس القبيلة
وقريب إن شاءالله بى تعمر ، ويكون سامق فوق نخيلا
ويغـرِد عصفورا فيها ... ويعوم الوزين فى نيلا
وتحُوم فوق الدار حمائم .. تدودِر وتسجع هديلا
ونشاهد قمريها يرتع .. وصِليعى يَرِك فى الحِليلَه
يَحَتِـل من كِسرى فيها .. ويحلق فى الجو يطيرا
يروح لى عشو وفراخو .. يغَــرِد حامــد الجليلا
تعاين شِق يقع بصرك .. شرق وغرب بحر نيلا
وليــدات بى قفا الخلوه ... متحبكين فى بليـــله
وواحدين بى هناك جايطين ، تقول لعبة قارقيرا
وحبـــوبه مَبارى تَقنَق .. تَكـُد بى هِمــه النجيـله
وعنزا سارحى فى البَرَوِد ، معاها عَتُودا وسِخيلا

للقصيدة بقية .... ،

نواصل :ـــ
وعنزا سارحى فى البَرَوِد .... معاها
عتُودا وسخيلا
وتحت ساقى يـربطــوا فيها ....
فازعين ليها النفيرا
وزرع لــمّ البحـــــــر فيـهو ....
واقعيـن فيهو حِتيـــلا
وجُمُوع ناس فى سيره ماشى ، وعَوين
يتحادقوا الفتيله
وحس طنبــور يجيك مُنساب .... مع البـلال
والعديله
وإيقاع زاخـِــر يَـجــِمّـك ....
بألحان عـَـذبه وجميــــله
دى لوحات بس من بلادى ... تخليك إنت
فى حيره
كأنك فى خيال منظور ... يفوق حُسنو
على الخميله
وكل مكــان ليهو ذكـــرى ....
نعيـدها وتـانى نصغيلا
وقريب إن شاء بتعمِـــر ... ونزرعا
نـَقلـــه وشتيــله
وتكــُون لسُكــانا دوحــــه ....
وشبـابـا الفيـها إكليــلا
وتعـُم أفراحا لى بــرتى ....
وتخـَـدِر فيـها الحَـــويله
نجيـــها ونلثـم تــُـــرَابــا
...... ونقبـــل ناسا تقبيــــلا
ومُنانا الكل يمشى هسع .... ده لو
كان باليد حيله
وهمـومنـا البــارىء فراجا ...
يســهلا لينــا سهيلا
والقاصــد بلادنــا بســـوء ...
يتبهـدل ويبقى عليــلا
وكل ظـالم علينا يجــــور ... مـن
الـراجيهو ياويــلا
وعُموم سُـودانا ألف سـلام .. مُؤمن
من كل دخيلا
وصلاة وتسليم لرســـولنا ، الشفاعتو
الأمه تحويلا

تمت .............

من طرف **الفكى احمد** الجمعة 13 سبتمبر 2013, 5:54 pm

الأمُــــــــــــــــــومَـة ـــ { قصيدة}
ـــــــــــــــــــــــــــــــــــــــــــــــــــــ

إن الأُمــومة بحر يحتوى دُرر
بحر المحبة صافٍ مابه كـــدر
عذب المناهل دفاق كما النهـــر
يروى يعم معينه للريف والحضر
وكوكب دُرى يسطع فى سماء البشر
ومائدة الحياة فأين منها الشهد والأعناب والتمر؟
سر الوجود الأم ومايحويه من سحر
رمز المعانى السامية والإيثار والطـُهر
تهب الحياة لنا طوعا وتمنحها بلا أجر
نلوذ بها فنأمن من ضروب الخوف والقهر
ومنها النصح نلقاه إذا ماحارنا أمـــــــــــــر
تذوب لنحيا ، كم ذاقت من الســـــــــــــهـر
وكم قاست بلاشكوى وكم عانت بلاضجر
بثغر باسم تبــــــــــدو وهى تكابـــد الــعسر
النقاء التام هى الأم هى الإخلاص والصبر
وطيب النفس والروح وأنفاس هى العطر
السخاء والجود هى الأم هى الإبصار والبصر
وهى الدوحة الغناء فيها الظل والشجر
ومنها العطر فواحا أريج الفــُل والزهر
فلولاها لما كنا وكان الكون كالـقـفــــر
قليل فيها ماقلنا وماصغنا من الشــــعر
لها يكفى ثلاثا قال أمك منتهى الفخــر
علينا برها واجب وفرض طيلة العمـر

يا هلا والف مرحب

بالاخ العزيز والصديق الوفى

وزميل الدراسه وابن المنطقه البار

وما لفت نظرى ان جل قصائدك توثيق للمنطقه

وما الم بها ومعانات اهلها وهو المطلوب وبقوه

وان دل هذا انما يدل على تمسكك بالعادات والتفاليد

ومواريث الاهل والاحداد

فنعما للمنتدى ولكل اهل المناصير

وبعد كده نحن من المتابعين وما شاء الله كتار

نتمنى لك التوفيق وما التوفيق الا بالله

ولنا عوده

من طرف **الفكى احمد** الخميس 19 سبتمبر 2013, 12:15 am

ياهلا وألف مرحب عزيزى الأخ الباشمهندس وراق ،
لك التحايا ، شكرا على المرور وعلى الترحيب وياهلا بيك ...

ما شاء باشمهندس الفكي زي ما قال ود بروي ده كان وين مدسوس وبعدين كما انك كنت شاهد عيان في الغمر فلقد عبرت تعبير عن الماسأه التي كانت بحجم الكارثه والتي ظلت تؤرقنا زمنا وما السفر للبلد الا لكي نطمن نكرر الشكر علي هذا الابداع