فيحاء أحمد تيتو

الوضع اتغير يا صديق نحن ساكينين فوق لى احمد تيتو
حى ارقى من مرزوق والله بهذا السرد الشيق رجعت بنا الذاكرة
الى بداية دخولنا الخرطوم للجامعه فاول ما عرفنا مرزوق والعشوائى

انشاء الله تيتو يلقى خبر بهذا السرد
تسلم ياهندسة

بعدين المرة التانية القابلنا فيها أحمد تيتو هي برضو بعد أواسط الثمانينات. يوم عرسو في شري..
في نفس الليلة كان كمان عرس محوماااد ود أب قرن في النعوفاب.. وبي هناك في شري عرس أحمد تيتو.. قلنا هسي دي نسوي كيفن؟ ده جارنا وداك في شري عزيز علينا..
قلنا نضرب عصفورين بي حجر نمشي شري نودي عانتنا ونسلم على أحمد تيتو العريس ونحضر جزو من الحفلة ونرجع النعوفاب نحضر كمان جزو من الحفلة.. وحفلة احمد تيتو كانت بالفنان عيسى بروي..
عيسى كان عندو راي حالف ما يغني في شري لاسباب كدة؟
يوم عرس أحمد تيتو فكا حلفو وجاها من كريمة مخصوص.. وكمان حفلة ود اب قرن في الغرب في النعوفاب بالفنان عيسى حامد ومعاه الفنان خليفة ود المدينة.. غنى شوية..
صاحبي المنصور حسن على كان جايب ليهو معاه جماعة من معهد الموسيقى والمسرح معاهم عود كدة قالوا إلا يشاركوا في حفلة احمد تيتو
بمشي وبجي بحكي ليكم قصتهم

قاموا الجماعة ديل قالوا للمنصور حسن على إلا تكلم ناس الحفلة ديل نعمل لينا فاصل بالعود..
المنصور قال ليهم ياجماعة هوووي
ناسنا ديل ناس طنبور وصفقة ورتوتي وراح تدخلوني في ورطة الناس ديل ما بيطربوا لى غناكم ده؟ ومرة بي ترقص لكم فيهو ذاتا مافي؟
المهم مشوا يوقعوا في اغانيهم البي يغنوها في طرف الحفلة كدي
شافن ليك ( الدمكي )
والدمكي كان شالع شوية
قال : ديل يسووا في شنو؟ ناس الصعيد ديل؟
قالوا ليهو يوقعوا في عودهم ده ، قالوا يشاركوكم بي غنوات كدي؟
قال ليهم: وحات ابوى هنا ما يغنوا
يغنوا إلا اكسر ليهم عودهم ده فوق راسن
الجابن هنا منو؟
قالوا ليهو المنصور حسن على صديق
قال : يندقا المنصور الجابن. ديل ضيوف ما عندهم ذنب
قالوا ليهو لا لا المنصور ده زول زعيم ود زعيم ود بلد كيف يندقا؟
الدمكي: أنا من الله خلقني ولى هادا حالي ده.. غنى الصعيد المقلب ومعوج ما بينفع معاي ويحرق روحي

فجاة المايكرفون اعلن.: ضيوف المنصور حسن على يشاركونا بي فاصل غنائي
ومشوا على المسرح
وقبضوا الدمكي عشان ما يضارب ومشوا بيهو بعيد من الحفلة عشان ما يخرب باشة الناس
والجماعة غنوا ليهم غناء كدي ما عجب الشباب قابلوه بالضحك وبعدين كدي جاملوهم صفقوا ليهم شوية واصلا مرة رقصت فيهو مافي
المنصور أثناء الحفلة غمت للدمكي كدة جنيهين عشان يسكت .. وما يتكلم في الكلام ده تاني

الأخ المهندس روعة و لا تعليق عندي تسلم ياهندسة وكلامك ده وداني بعيد وذكريات أخونا العصامي المرحوم المنصور حسن علي ربنا يغفر له ويرحمه وربنا يبارك في أحمد تيتو السنة الفاتت في إجازة الصيف ذهبت مخصوص لزيارة أحمد تيتو في منزله وأنت عارف زوجته سرنا ولحم ودم ووجدت الفيحاء قد اقتربت أن تكون فيحاء تعج بالضيوف والكرم .

هههههههههه دكتور مصباح
اكيد تجد الفيحاء لازالت عند أحمد تيتو يا دكتور
نعم أعرف زوجته سركم؟ إنتو البلد كلها مقرنيين فيها.. شري. الغرب.. النعوفاب. لى عند الكراع مشتيو.. ما شاء الله يا المناصير. المناصير هنا إسم خاص يعنى به عائلة ناس مصباح.

اردنا ان تكون لنا موطئ قدم بينكم
تسلم يا عمده ...سرد ممتع

ولسه صاحب الكير ماظهر
خلونا نسكر وننتشى وسكر كتابة ودابوحنة سكرا حلال

عرس احمد تيتو كان في عيد الضحية..
كل الخلق دي جاتو من اصقاع المناصير.. وشري دي أتملت لامن دفقت وفاضت عندنا في الغرب بي غادي من ضيوف العرس..
..
عايز احمد تيتو يقرا بوست مدرسة شري الإبتدائية وفيه كلام كتييير عن والده السيد سليمان سعد