قصيدة تحث الناس على البقاء بمناطقهم

قيلت هذه القصيدة ايام اللجان والمفاوضات
الاولى بارض المعسكرات /سوبا
تقريبا العام 1998م

والى نص القصيدة

تحيات طيبات لى زول يقدربلدو ومطلوب التحيات للزعيم برجوبا
عبدالعاطى واحمد والمعاهم كلو والمقدوم ولدنا اياهو فارس الحوبا
عكريب الوزير والمعتمد عباس هامين البلد الا النفوس مغلوبا
مابننسى العميد يحضن قضية عمودا الكربات رجل خطط خطط يمشوبا
زغردى يامناصير ما بنفارقك نحن ان برج الصعاب ناسا يقلبو الهوبا
يعجبنا الرجل دايما يكون قدامى وان ظهر الصقر يلبد سرير النوبا
سمحة بلدنا رغم الحاله نعتزابا رايقة رضية بالخير لى اهلنا حلوبا
ابدا ما كمل للدنيا دوما طامح يكفيه الشمال غرب البلاد وجنوبا
يضويهو الشرق كل المناجم تدوي ترتاح البجا ويبرج عديل ادروبا
المعروفة بى كل المعادن حبلى خاصة الفضة والماس والنحاس وضهوبا
يا حليل البلد يا حليل ليالى صبانا ويا حليل المشارع كانوا يندلوبا
صرخات الصغار فوق الشواطى تملى الكاك القرو حس الطبل والنوبا
ايقاع الطنابير الدليب الباشى الشبال ينح تنكعنا بى ام روبا
يا البلحك سمح قنديلة وودلقاى وقراصة قمح من نارها رابط روبا
نحن فتاتنا تتحزم تجرو خروفها تحزم خوستها والعزة مالى جنوبا
اهلا بالضيوف مرحب حبابكم عشرة خيمتك ياكرم فوق الدرب منصوبا
من ضو بى تنوم كل العروض محروسة وا اسفاى على القيم التبيت مصلوبا
لم النيل يرشرش فوق جروف حلتنا ترتاح النفوس لمان تجينا هبوبا
ياحليل النخيل وام شير تداعب فيو يقلدا بى جريدو ومابدورو هروبا
قالها اقيفى يمكن تانى ما نتلاقا مامعروفة اهات الزمان ودروبا
نار شوقك سلام ياحلوة حلوة وباردة نار حسادنا عاد انشاء الله يندفوبا
الناس مابتريح والعوازل كتروا قطعوا قصة الريدة البدت يا دوبا
قالتلو البلد كيف حالها والجاييها قال ليها الحكاية عصية فيها صعوبا
الفسفوس مرق والناس يدسدسوا فيوقالوا تحت تحت من الغريب مخطوبا

القصيدة طويلة كالمعلقات القديمة
وسنكمل باقيها لاحقا عندما يكتمل الجمع لها
ونعتذر ان كانت هنالك اخطاء املائية اوغير ذلك

اكتب لنا باقيها عباس
علي الاقل هذي ايام انا لم اعيشة
وكمان ماعليك من املائيه المضمون مفهوم
اكتب وبس اكتب
سلاممممممم وتقبل المرررررررررررررروووووررررررررر

شكرا الباشمهدس ود جيب الله على المرور
وانا مجتهد فى اكمال القصيدة
لانى اريدها مكتملة غير متقطعة من على وحى الذاكرة فقط

نواصل
من دهب ام سباع الكان يحلى قوامها بستنة الجبال حتما تفوت بعقوبا
بالماس والرخام ان داروا تبقى مصانع ينسر القلب بى خيروا تلبس توبا
يكون شهر العسل داخل فنادق عايمة ريحة الحوت تعطرب والحليب مشروبا
يابس حلقو شارد من عناصر خلقو النيل الزلال المويتو فيها عزوبا
عجيب زولا يقول نرحل نخلى الموية وفى كل الدول خلق الله موقدة حروبا
الناس بالغلط لو قاموا خلوا ديارهم قبل الحول يحول بى يعدموا البشروبا
ان داروا الرجوع ما بيلقوا فى مجموعة عادوا فرادى فقراء والجسور مسلوبا
يبدوا من الصفر لاغله لا فى حله لافى مدرسة لادابة بى يصلوبا
معروض المتر مليون ومليونين فى ارضا عديلة وديمة زايدا خصوبا
والداير المدن من عوضو يشرى منازل ويمسك فى البلد بى ناسا يعتزوبا
خمسة مئات مناصير فى ادرعما زرعوا اصبح ضو رجعوا الناس مضوى جيوبا
لوكان الرزق يجى من ترع منسابه مشروع الجزيرة وصل مشارف سوبا
هل ربح المزارع وريح البيعولو ما تخلونا ياناس من نضم حبوبا
الزول الببيع وطنو يحضر كفنو زى ناس حلفا باكر يبقى فى المعقوبا
فى السودان بحيرات خمسة بى خيراتها خشم القربة سنار والجبل والنوبا
ممتدة الجروف للراعى والزراع والحواته شحنة لورى ما بيرضوبا
خيرك فوق درب وأصلو الرزق من الله لى بحر السراب مالها النفوس ملهوبا
نقعد فيكى نرجاها القيامة قبلنا شمسك يامناصير ما بندوروا غروبا
ما بنصبح شتات فوق القبائل عاله والمابى البلد اقرولوا ص والتوبة
مابنبعد بعيد الموية فى عينينا نسبح فى البحيرة بعد يقيف منسوبا
نكركع منها نرعى ونصيد حيتانها سمحة ضفافها حتى ان كان سكن راكوبا

يتبع
اى نواصل لاحقا

نواصل ماتبقى من القصيدة

لمان تنحسر تترك جروف مروية نزرع برتكان منقه وعنب واللوبا
وما تنسوا المياه فى الجوف بتبقى قريبة يرتاحوا العرب من سانى لى هريوبا
سكان حلفا نصحونا وسمعنا كلامهم قالوا رحلنا للقربة وعرفنا عيوبا
بعد سنوات رجعنا الشوق يدافر فينا لليوم المؤن من الغريب مجلوبا
فرخت المصائب ريشة قد عيوننا ابدا ما بتحن قاسيات تملى قلوبا
فارقنا الامانى انشاء الله قطر الشوم شوم حلفا الجديدة الما بنوم بعشوبا
استنشقنا عبقك ياتراب حلفتنا واتغبرنا فى الغربة الحرسنا غروبا
نارك مابتموت فى الجوف تملى توح آهـ يا حلفا حلوة وفى النفوس محبوبا
فرحان القمر فيك يعد ايامه لكن فى الجديدة ايامه ما محسوبة
اتشتتنا فى ارض الله ما اتلمينا والوقعت علينا انشاء الله ماتقعوبا
تحملنا الامانة وبى امانة فشلنا لامتين نتحد كل النفوس مخروبا
اتحملنا هما نحن اصغر منو ما بنملك وثائق بكرة يحتجوبا
ياقادنا ختوها الامور فى نصابا انسد البحر والناس بقت مزعوبا
الناس فى هلع والفتنة مادى رقابا قبال الاوان احسن تسدوا دروبا
فينا الاحمق الضاقت على حياتو سايق ليلو يسخت والدموع مسكوبا
لامشروع مرق لازول يطمن أهلو زمبرت اللجان وبلدنا بيها طروبا
وينا قرانا نحلم بى وجودها جديدة لامساح مسح لاخرطة لافى طوبا
مالا التمرة ارخص من حمار المويه قايمة براها والله من القنب منهوبا
وحقنا وينو فى السلطة ووظائف الدولة ليه دارودقمر من الفرص مسحوبة
فى ناسا يقولوا لهم تعالوا وسالموا نحن اهلكم وفى وجه المناصير القبل مزروبا
ما لا الدولة فى واحدا تقلدوا عليها وفى واحدا تملى تدوسوا بى مركوبا
نقول لك يا بشير ام زين وراها رجال تبقى عداله فى كل البلد مطلوبا
وان بقت الحكاية حقارة واستغفال حتما مابنخاف حالفين نخوضها حروبا
نحن ولاد قمر كل الدول عارفانا كتلة كربكان فى المانيا يتحكوبا
فراس من قديم مافينا زولا ولى ما ختينا سمعة الناس يلوكوا عيوبا
كلونيل فى ام دويمة اهلنا طلعوا جنو قتلوهو ورفاقتو وستو ما سعلوبا
موجودة الوثائق باقى لى أجيالنا السيف واللبس والباخرة المقلوبا
فرقك يا بلد والله ماراضنو نار شوقك تبق جو القلوب مشبوبا
طمسك للابد بالمرة ما دايرنوا وان وقع القدر بى نرضى بالمكتوبا
رحالك ما بتقوم كارفات تراب عزتنا حالفات ما بتسير كين ينبحن كلوبا
عفوا يا أهل النية صافية سليمة والقصد الوحيد تبقى الرجال مكروبة

بحمد الله اكتملت القصيدة
وهى تحمل فى طياتها سرد واستقراء لمستقبل قضية المناصير
مع العلم انى كتبت اعلاه تاريخ كتابة هذه القصيدة
وكأن الشاعر يحذر من الذى سيحدث فى المستقبل
وقد حدث فعلا ماحذر عنه الشاعر

ايضا القصيدة تحوى تاريخ المناصير وما عانوه ايام الاستعمار
ومقاومة المناصير للاستعمار علما بان مات فى السودان خمسة جنرالات منهم اثنين فى ارض المناصير
مازالت انصبتهم التذكارية موجودة فى الكربكان وام دويمة ومازالت باخرةغردون المسمى بعباس موجودة بالمناصير

شكرا الرائع عباس دائما نستمع لسيرتك العطرة ومواقفك المشرفة عند الأخ عبدالواحد وأنت عارف الغربة السوتو فينا كثيرا وهذا توثيق رائع وعاوزين اسم الشاعر لا تضيع مثل هذه الدرر وكأني اشم فيها رائحة شاعرنا الفذ عمر الدمري هذه من الرائعات وكثيرا من الناس يستهترون بالشعر ويعدونه أقاويل شيطانية. ولكن هؤلاء لايعرفون قيمة الشعر فكثيرا من المسائل النحوية التي اختلفت فيها مدرستا النحو البصرية والكوفية كان الفيصل فيها للشواهد الشعرية من شعر جاهلي أو إسلامي أو أموي وما أروع شعر العصر العباسي . تحياتي لك عباس وللأهل ونتمنى أن نرى تراث وشعر المناصير محفوظ موثق حتى يحفظ للأجيال القادمة.

شكرا الدكتور مصباح على المرور
شكرا الباشمهندس الفكى على المرور

الاخ مصباح هذا الشاعر هو محمد حسن فضل معلم من قرية الكراع
وهو مشهور بلقب ككك وله الفضل الكبير فى الدفاع عن الخيار المحلى
ويتقلد منصب مسئول الاعلام بالمناصير البلد او المحلى
ونحن اعتمدنا طريقة صفحة الشاعر الخاصة به حتى يجد كل شاعر فيما بعد
كلماته محفوظة ومرتبة اما عن صاحبك الدمرى فله صفحة خاصة فى بداية هذا المنبر

تشكر استاذنا عباس للتوثيق لهذا القامه محمد حسن فضل

مشكور الاخ المناضل قسم الله على المرور
واعادة نسخ القصيدة لقوتها ومكانتها الكبيرة
لاجيال المناصير المتعاقبة بماتحوى سرد رائع
يخص الزمان والمكان فى المنطقة