المناصير بلدي
الزائر الكريم مرحبا بك في منتدى المناصير بلدي
ان لم تكن مسجلا فيرجى الضغط على زر التسجيل وملء بياناتك لقبول عضويتك

حوار بين ضُل الضِحي وأهل الفريق.

استعرض الموضوع السابق استعرض الموضوع التالي اذهب الى الأسفل

حوار بين ضُل الضِحي وأهل الفريق.

مُساهمة من طرف أبو ضوة الوراريق في الإثنين 28 مايو 2012, 3:12 am

بسم الله الرحمن الرحي
حقك علينا ياضل الضحي.
ضل الضحي:
والدموع تنزل من عينيه آه يا أهل الفريق وااااحزناه علي أخي وحبيبي الذي كان يسعادني ويحمل معي الهم في القيام والجلوس.آه..أين أنت يا أخي أراك ممدد اليدين والرجلين وبلا حركة..قد غدر بك الغادرون وسلبوك حسنك وجمالك وباعوك في الأسواق وبأبخس الأثمان.مين يقدر يشيل قدرك..آآه يا أخي يا ضل النخيل..منو البقدر يسد خانتك.ما أظن يجي البيسد محلك يا ضل النخيل يا شيال التقيل..
أهل الفريق:
أسكت كفي يا ضل الضحي،كفانا جروح ..كفانا ألم..كفانا دموع.إتصبر زي ما نحنا صابرين الموت حق ونحن حزنانين علي ضل النخيل أكتر منك لكن شايلين الصبر ونحنا حا نجيبليك البديل.أصبر..صبر..الفقد واحد يا ضل الضحي.
ضل الضحي:
والعبرة تكاد تخنقه
يا أهل الفريق أصبر كيفن وإنتو عارفين ضل التمر ده الخدمي البيخدمه ما فيكم واحد يقدر عليها،قعادكم من الصباح في ضل التمر.دق الجريد في ضل التمر..لعب السيجي في ضل التمر..وكشتينتكم في ضل التمر..ومقيل حاج إحمد بي شوالوفي ضل التمر..ولعب شفعكم في ضل التمر..وبت مُحمد من الصباح بيقفته تصابح ضل التمر..وحتي الصُبار بالليل تجي تكوس رزقه في ضل التمر..وحتي الطيور من الدقش غناها في ضل التمر.آآآآآآآآآآآه يا ضل التمر رُحت وخليتنا بلا وداع.
أهل الفريق:
ياضل الضحي مالك تنوح التقول إنت الشايل الحمل عندك شنو غيرعنكريب العِدّي أم حبالاً مقطعات ولاّالقفة الطايري حداك ولاّ اللبريق أم خشماً مكسور مجدوع فيك..ماتبقي كدي الله يخليك.
ضل الضحي:
هووووي يا ناس الفريق أنا أصلي حدثتكم من هسَّع حمل ضل التمر ده مابقدر عليهو وأنا فريقاً مافيهو ضل تمر ما بقدر أعيش فيهو والله يا ناس الفريق مابتعرفو البي،أنا يوم داك يوم جونا ضيوف كلمت الديوان قلت يشيل معاي لقيتو عندو أربعة عناقريب بس وقال لي خلَّهم يمشو ضل التمر،دحين ياناس الفريق شوفولكن بصارة من بدري أنا زاتي ما حا أباريكن با قي أيامي قرّبت وحا ألحق أخوي ضل التمر أي ضل الت..التتت..مر ويسقط ضل الضحي مفارقاً الحياة ويلحق بأخيه ضل التمر.
ناس الفريق ويعلو صياحهم وبكاؤهم:
هوي ..ياناااااااااااااااس البقت بقت..ويصيح حاج عثمان هوي يا حريم قومن ونسة شنو ضل الضحي مات ولحق ضل التمر..ويأتي الفريق المجاورويتحدث كبيرهم حاج حسن:يا إخوانّا إنتو دايرين النصيحي ولّا الجمبها،فيرد الجميع:قول..قول يا حاج حسن.
حاج حسن:
أسمعو يا رجال أول حاجي نشوف سبب موت ضل الضحي ده شنو وبعد داك نشوف الباقي.ويعم المجلس الصمت والسكون.ثم ينهض شاب ويشرح لهم أن ضل الضحي قد مات بسبب مرض النَّز .لأن البحر عندما سلبهم ضل التمر وطردهم وأصبح يساككهم حتي زاحمهم في بيوتهم.فكلما يري ضل حيطة بااااارد يفسده عليهم بالنَّز الذي يبدأ كالسرطان في الحيطة حتي تهوي علي الأرض ويطرب فرحا ليكلم البحر بإنجازه.
وينهض الجميع وينظرون في إتجاه الشمال جميعهم.فيلمحون شخصاً علي البعد يهرول ناحيتهم حتي وصل إليهم بعدما شال نفسو وختاهو،فقال لهم عارفين القاتل ؟فقالو لا والله القاتل هو الخزان...القاتل هو الخزان.
ورددت أنا معهم القاتل هو الخزان.نعم هو الخزان ولم يكتفي بقتل ضل التمر وضل الضحي فحسب.فقتل منا مراتع الطفولة والصبا وقتل مناحضرة الجروف والجداول والسباليق.
وقتل منا أعزّ أميرة وهي درة المناصير الجزيرة شيري وسلبها جمالها المعهود.وقتل منا مدراسنا ومساجدنا وخلاوينا.وقتل ..وقتل..
عزراً يادار منصورلو جابني الشوق..ما بقدر اقعد.اقعد كيفن والضل رهراه
فالحيبة تنوح .تصرخ كبنة.تبكي السلمات..وين دار خيرين وين الغابة وااامناصيرااااه
(من زفير نفس أبو ضوة بعد الشيق الطويل)

أبو ضوة الوراريق
عضو موقوف
عضو موقوف

احترام قوانين المنتدى : 25

عدد المساهمات : 111
نقاط : 8572
تاريخ التسجيل : 03/05/2012

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى