دخل القش ما قال كش كش

دخل القش... ما قال كش.. كش..
ده شنو ده!!!
وفي ناس نفس الحجوة يقولوها ( دخل العيش بلا كشكيش)

مين يعرف الإجابة
او منى تعرف الإجابة

من طرف **ود المناصير** الأحد 27 مايو 2012, 4:07 am

قالوا :

دا الضُل

من طرف **علي الكليس** الأحد 27 مايو 2012, 4:10 am

وهاك دي كمان ياهندسه مادام فتحت حجانا القديم
عمي في دكانه وياكل في مصرانه

من طرف **ود المناصير** الأحد 27 مايو 2012, 4:15 am

علي الكليس كتب:وهاك دي كمان ياهندسه مادام فتحت حجانا القديم
عمي في دكانه وياكل في مصرانه

دا الفانوس

يا ود المناصير أنا كنت عايز اقول الفانوس... من جيت تكابس كدة؟
هاهاها
نعم بالنسبة لسؤالي الاول صاح إجابتك هو الضل..

بالله شوف يا علي الكليس ويا ود المناصير.. اهلنا زمان كانوا يفردوا مساحات بالليل للأطفال.. احاجي طويلة.. احاجي قصيرة.. يعني نادي في غياب النوادي في البلد..
تربية اطفال في سرعة البديهة في الرد هذه الأحاجي القصيرة.. والاحاجي الطويلة للتسلية..
يعني بالرغم من إنشغالهم بالزراعة طوال ساعات اليوم. لكن لم ينسوا ان يخلقوا للاطفال برامج تسلية من الحبوبة او من بنات يحجنهم هذه الاحاجي..
عشان كدة الطفل المنصوري قام قومة سوية صميمة تربي في نفسه الإهتمام والشجاعة.. ويشعر أنه بين الكبار عنده مساحة لوقته الخاص.. هذه حكمة من ناسنا الكبار أكسبت الأطفال صمامة وزكاء وقدرة في بنيته..

عمتى عابدي... في الجرف لابدي
دي شنو

من طرف **ود المناصير** الأحد 27 مايو 2012, 4:41 am

صديق عبدالله علي أبوحنة كتب: عمتى عابدي... في الجرف لابدي
دي شنو

كدي ندي الناس فرصة ـ عشان ما تبقى هات وخذ زي كورة برشلونة

من طرف **علي الكليس** الأحد 27 مايو 2012, 4:49 am

دي السلوكه ياهندسه ..طبعا ود المناصير اكيد بيكون عارفها الزول باقي لي تربية عجوز...طبعا ياود المناصير الفانوس صحيحه ..لكن انا عندي واحدي يمكن تعصلج معاكم شوي
بول عناق فوق حجرا رقراق

صاح يا علي الكليس.. عمتي عابدي في الجرف لابدي... صاح هي السلوكة..
ود بروي قال Sad

رقيص نسوانا سلوكة)
.......................
أما بول عناق فوق حجرا رقراق..
هي المرايا.. ناس بادية المناصير يقولوا ليها ( الرُقــَّابه )

دي موهبة ثالثة لى علي الكليس..
...................
والله علي الكليس ده لو كان خليتوه من المحاججة والملاججة بتاعة القضية دي؟
ياما كان يبدع ليكم. والله ممكن يطلع ليكم فنان كمان؟
............
والله برضو بعد ما نروق ونحل قضيتنا والمحلي يعمر وكل زول ياخد حقو..
بعد كدة نتجدع فوق سرايرنا ونحجي متل حجانا ده! وبعد كدة علي الكليس باله يصبح فاضي ويبدع في مثل هذه المجالات. بس هسي دي بالو مشغول بتشتت الجهود في الهم الاساسي لاي قائد منصوري مهموم بهموم اهله الاساسي مثل علي الكليس

من طرف **علي الكليس** الأحد 27 مايو 2012, 5:02 am

صاح ياهندسه اجابتك لكن كلمة المنضره مااحلي من المرايا
هاك دي .... رموهو رطن شالوهو سكن

نعم يا علي المنضرة أحلي... لكن نوريك دي؟
مناصير الخلا يقولوا للمنضرة ( الرُقــَّابه)

أما رموه رطن.. شالوه سكن.. دي هنا وقف حمار الشيخ في العقبة
كدي خلي يجيك ود العجوز ده ود المناصير
اكيد بيكون عارفا

الأخ المهندس صديق والإخوان ود المناصير وعلي الكليس لكم التحية وأنت تثرون هذا البوست بهذا التراث القيم ولقد قلت كلام ياصديق عن تقيف الأطفال وتسليتهم بهذه الألغاز التي فيها الكثير من المعاني وإنها فعلا أفكار مربيين على طراز عال . وأضيف واقول برضو كان هنالك حجو الأمهات تجلس الحبوبة وتقول فلانة عندها ثلاثة أولاد وبنتين من يعرفها ويبدأ الأطفال يتسابقون على الإجابة الصحيحة وفي هذا تعريف بالأسر و العائلات وطبعا قبل البدأ في الحجوات تحدد الحبوبة المنطقة الجغرافية التي تشملها العائلات مثلا تقول من بهية حتى العطمانين وكلما زدات ثقافة الأطفال زيدت الرقعة الجغرافية وصدقني كنا نعرف شري كلها وياحليل أيام زمان تربية على الطبيعة في بساطة أهلنا المناصير أما إجابات الألغاز حقو نتركها للجيل الجديد عشان نعرفهم بتراثنا الخالد.

لا نجيب وأضيف واحدة وأقول :

عمي طويل وما بلحق الكعاكيل ؟

تسلم دكتور مصباح على الإضافات الشيقة وخاصة اديك ساقي من بهيي وحتى أم لقاديب.. فلاني عندها تلاتة بنات واربعة اولاد. تعرفوها..؟ وكدة على هذا المنوال. يتعرف الناس كما ذكرت على بعضهم دون عناء وفي اسلوب سلس وشيق..
أما
عمي طويل وما بيلحق الكعكول
دي هي
المحجان.. والمحجان ورد شرحها في القاموس. وهي اداة او عود رفيع به زوائد في راسه شكل الرقم سبعة. يستعملوه اهلنا في خبط الشجر.. وتنزيل البرم والعِـلَّف..
أما مثل على الكليس وحجوتو لسه مطروحة

في ده أخفقت يا هندسة وكدي النشوف علي الكليس ود المناصير ونشارك الجيل الصغير معنا

لا لا لا عرفتها يا دكتور مصباح( الدرب) درب السلطان طويييييل لكن لى فوق عشان يجيب كعكول من شدرة ما بيقدر... اما المحجان يقدر ونص وخمسة
عشان كدة هو الدرب

طيب هاك دي يا دكتور مصباح
عمتى في ديوانا... وتاكل في مصرانا

أولاد الزمن ده، وبنات الزمن ده؟ يا دكتور مصباح هل حا يعرفوا الكعكول ذاتو شنو؟
مرة دكتور عبد المطلب الفحل يتكلم مع واحدة مذيعة سغمبتوتية كدة... بت خرتوم... وورد في كلامو . كلمة البرم.. ذهلت وبحلقت في عبد المطلب الفحل وقالت ليهو البرم ده شنو؟

شيتاً ربنا خلقو
تحت الواطة زرقو
لاخـَـدَّرْ ولا شفنا ورقو
............
ده شنو؟

حاولتا وستعنته بصديق وبرضوا ما فى فايده

تسلموا كتير

نعلمكم تراث بلدكم.. يا بنات واولاد المناصير ناس العاصمة.. نحن ومصباح وود المناصير وغيرنا.. نخاف على أمجادنا من الضياع. عشان كدة نغرسها في سمعكم سادتي..

الصديق الإستعنتي بيهو ده! يا استاذة اميرة الحومري
اوعا يكون انتصار حجازي!
ابيض زي ما بيقولوا المصرين. كان تستعيني بدكتورها فالح في المواضيع التراثية دي؟

ابدا استعنتا بدكتورى المعاى ولقيت شبكتوا طشت

[quote]

نعلمكم تراث بلدكم.. يا بنات واولاد المناصير ناس العاصمة.. نحن ومصباح وود المناصير وغيرنا.. نخاف على أمجادنا من الضياع. عشان كدة نغرسها في سمعكم سادت

ونحنا متابعين وتسلموا كتير

تسلم ياهندسة أياه الدرب. حقتك الأولى ( اللمبة ) أما الثانية والشالوه سكن وقف فيها حمار الشيخ . أما بالنسبة لبنت الحومري خليك ساكته واتفرجي وصديقك ودكتورك المعاك أنا شامي فيه رائحة التهرب من التراث يعني عاوز يعمل فيها خرطومي وود بندر ناسي أنه من أم كدسة لكن نحن عارفين ولو اتعلقت في السماء ماني مخلنك وحا نجبدك من كرعيك وعندنا طائرات تطير في علوات مختلفة وما بينفعك إلا تنضارا في دكتور حسين. لك تحياتي دكتور عبدالمنعم الوظيفة الجديدة مباركة وده طبعا زرق وبخت ناس ليال وإن شاء الله نزورك في مدينة المصطفى.

الأخ المهندس صديق لا بد أن نرسل السيرف ونقول واحدة :

براريد وبراريد من هنا للصعيد ؟

دكتورك المعاك يا أميرة الحومري.. اصلو ولاد الحوري ديل من قاموا قاموا في عز ورفاهية وغربة ما شافوا الحاجات دي كتير، ولا إتمرمطوا في البد كتير.. يعني شوية المرمطة في في البلد عندهم ، لكن موش للدرجة البي تعرف الحاجات دي؟
صريها في طرفك ولما تمشي إجازتك السودان اسألي اي منصورية فوق لى 40 سنة من طرف أسألي.. الحاجة بي تعرفا..

براريد.. براييد من هنا للصعيد.. دى دون مواخذة خرا البقر؟
صاح والله أنا غلطان

من طرف **ابوسما** الإثنين 28 مايو 2012, 3:02 pm

صديق عبدالله علي أبوحنة كتب:براريد.. براييد من هنا للصعيد.. دى دون مواخذة خرا البقر؟
صاح والله أنا غلطان

يا حليلك يا صديق الداير تعلم المناصير تراثهم
بقيت منصورى لندن
البقر قاعدة تسافر بالخلاء للصعيد وتتبرز لما تصل؟
ده درب الجمال يا ابوحنة

صاح صاح يا ابوسما.درب الجمال..
تصدق بعد ما كتبتا درب الجمال. تاني شطبتو..
...........
اما عمتى في ديوانا وتاكل في مصرانا.. هى اللمبة يا دكتور مصباح
.....................
يلا أعرف لي
شتياً ربنا خلقو
تحت الواطه زرقو
لاخدّر ولا شفنا ورقو

من طرف **م بروي** الإثنين 28 مايو 2012, 6:34 pm

إن شالو رطن ...وإن خلو سكن
(الجنزير).

إفتكر هي الجنزير يا حمود
ونقول جنزير المركب
كدي لامن يجي علي الكليس يصححا لينا
................
شوف يا حمود هذا بنك معلومات في أسلوب قصصي للأطفال..
إنت يوم داك استغربت إنو الواحد في أطفالنا زمان يدخلوه الداخلية عمرو 7 سنوات او 8 سنوات.. يتولى امورو كلها يدخل سريرو يفرشو يقوم المدرسة ينتظم في دراستو بلا زول يصحيهو الصباح.. والفي الخارجية يعشي حمارتو ويسقيها ويجيب الموية ويساعد الناس في الزراعة ويرفعوا ليهو حزم القصب فوق الحمارة يوديها الحوش ومحل الهبر ويركب فوق الحمارة يروح يدقق العيش في أم لقاديب..
ده من شنو؟
لانو اهلنا والنساء يفردوا لنا مساحة في حياتهم برغم مشغوليتهم مساحة تعليمية للاطفال قبل دخول المدرسة؟روضة مجانية متحركة.. التعليم بالفطرة ده إسمو... وهذا لايصاقع..
هسي دي شوف عوين الزمن ده كيف؟
عشرين سنة ما يعتمد على نفسو

من طرف **ود عون الله** الثلاثاء 29 مايو 2012, 12:25 am

الصدوق سلام --سلام حبوبات---سلام تربية

أجمل ماتكون هذه الأحاجي في البرد الشديد تلقى الناس متلمين في البيت ومتكرفسين تحت البطاطين ويقرشوا في التمر

وفي نص البيت تلقالك طشت قديم ولا صحن كبيييير مليان واطة وفوقا جمر والعسعاس طالع

وجنب الجمر معصورة حلة لبن مقنن

ودا يشيلا وديك تختها

طبعاً في ناس الكلام دة يشوفو رطانة

ناس بالله شغل الدفاية والمكيف الحار خلي في الهاي

تحياتي لك وللمتداخلين

كبار رجالات الدولة اقصد المنتدى سلام—
شكرا على هذه الابداعات والسياحة فى ثقافة وتراث المنطقة—اتارى ابوسما ماهو هين—درب الجمال—او نقول له درب الحويشيات بالوادى –والبراريد ليست براريد الشاى وهى مأخوذة من البرادى العصارة الصغيرى—وهى على شكل خف الجمل –
اما –تحت الواطا زرقو –
لاخدر لاشفنا ورقو-
دا يكون الوتد—
ايضا: مركبى تعدى غرب شرق وان وقعت فيها قشقشايي تغرق-ودى ساهلة –فقط للمشاركة والتشجيع-

الصدوق سلام --سلام حبوبات---سلام تربية

أجمل ماتكون هذه الأحاجي في البرد الشديد تلقى الناس متلمين في البيت ومتكرفسين تحت البطاطين ويقرشوا في التمر

وفي نص البيت تلقالك طشت قديم ولا صحن كبيييير مليان واطة وفوقا جمر والعسعاس طالع

وجنب الجمر معصورة حلة لبن مقنن

ودا يشيلا وديك تختها

شفتو بالله دكتور عون الله عمليكم خلفيه رهيبه كيف

أما بالنسبة لبنت الحومري خليك ساكته واتفرجي وصديقك ودكتورك المعاك أنا شامي فيه رائحة التهرب من التراث يعني عاوز يعمل فيها خرطومي وود بندر ناسي أنه من أم كدسة لكن نحن عارفين ولو اتعلقت في السماء ماني مخلنك وحا نجبدك من كرعيك وعندنا طائرات تطير في علوات مختلفة وما بينفعك إلا تنضارا في دكتور حسين. لك تحياتي دكتور عبدالمنعم الوظيفة الجديدة مباركة وده طبعا زرق وبخت ناس ليال وإن شاء الله نزورك في مدينة المصطفى.

لا والله دكتور مصباح دكتورى بلدى خالص بس الشبكه طشت من اكل الدجاج
عندوا مواضيع جميله فى منتدى امرى ان شاء الله لما افضاء بنقلا بجاى اصلا انا دايره اجيبوا معنا هنا بس يفضاء شويه
وبالنسبه للوظيفه فعلا كل بت كان معها حدث افرحنا نحمدلله كثيرا واكيد ابوابنا فاتحه لكل اهلنا زوار مسجد المصطفى عليه افضل السلام

مركبى تعدى غرب شرق وان وقعت فيها قشقشايي تغرق

دى العين يا استاذ سلمان

ان شاء الله اجابه صحيحه

من طرف **علي الحمود** الثلاثاء 29 مايو 2012, 2:31 am

العجب العجيب إيدو الملانة غويش تتل التلة لكن ما فى حس كشكيش.ودى رأيك فيها شنو يا خال صديق؟؟الطيب صالح ده مالو ومال المناصير الله يرحمو ويغفر ليهو..قال لمن القطر يجى جنب أبو غربان تشوف عربان على ظهر الحمير يحملون الماء ويرعون بعض الأغنام و الإبل..يعنى مابيعرف المناصير ؟كدى شوف لى الموضوع ده!!لك التحية الخال الباشمهندس صديق وما جيت شربت معاى جبنة بالبيت خليتنى دقيت لك الطنبور ورجعتك للماضى زى ما عملنا فى حفلة الاخ نادر...

من طرف **علي الحمود** الثلاثاء 29 مايو 2012, 2:50 am

مرة مشينا نغنى فى باشى فى الصفيحة.الفنانين عندهم بيت... عرس ود اسماعيل مرتو الاولى.ضم الوفد الفنى.على الحمود .على كارة..عيسى حامد..انا غنيت كويس وعيسى حامد عزف ممتاز اما على كارة فقلد الفنان صديق احمد وكان غناءه ركيكا لم يؤديه كويس.مدينى بت سيد احمد الله يرحمها دسترت وكراعا ابت تقع فى غنا على كارة.قالت طيرو الشى البدغى دا كدى وجيبولنا قمرنا (قمر على إدريس)خلو يدق النقارية وقالت كدى اتهجكت وتلت ونكعت والنار ولعت والدارة جاطت وعاد اسكت خلها.دى جدعه ليك يا خال صديق.وانت براك عارف بوش الصفيحة..نهاية الحفلة ود اسماعيل ما ادانا العداد وقال امشو كدى مديكن بيت ومن الصباح تاكلو فى الشية وكمان دايرين قروش غناكن ذاتو مجنون ساكت البركة فى قمرنا وعادل السيد الجا حضر القعيدة..

التحية لناس الصفيحة علي الحمود بقيادة الاستاذ حديدون التراث المنصوري يعجبك بالأخص إن غبت عنه .المهندس صديق خليك ريسنا وامسك الدفة كويس وأنت أهل لها بنت الحومري لك التحية والدكتور مالك مطششه شبكته ولي معه لقاء إن شاء الله ومشاركتك في الإجابات ضرورية وأظنه أنا الشبكتي طشت شوية ونسأل الله أن يمتعنا بأسماعنا وأبصارنا وعقولنا أبدا ما أحيانا . علي الكليس لم يظهر ثانية ، عاوزين مشاركة أكثر.

من طرف **م بروي** الثلاثاء 29 مايو 2012, 1:58 pm

سلمان عقيد النعوفابى كتب:كبار رجالات الدولة اقصد المنتدى سلام—
شكرا على هذه الابداعات والسياحة فى ثقافة وتراث المنطقة—اتارى ابوسما ماهو هين—درب الجمال—او نقول له درب الحويشيات بالوادى –والبراريد ليست براريد الشاى وهى مأخوذة من البرادى العصارة الصغيرى—وهى على شكل خف الجمل –
اما –تحت الواطا زرقو –
لاخدر لاشفنا ورقو-
دا يكون الوتد—
ايضا: مركبى تعدى غرب شرق وان وقعت فيها قشقشايي تغرق-ودى ساهلة –فقط للمشاركة والتشجيع-

تغرق في عينك
مركبي تعدي شرق غرب... وإن قعت فيها قشايي تنقلب

من طرف **النفر** الخميس 31 مايو 2012, 3:02 am

التحايا والود للباشمهندس صديق والتحايا موصوله للإخوة المتداخلين ... مشكورين على البوست التراثى الرائع ... ودى مشاركة متواضعة :

أسود كتى كرعيهو ستى

من طرف **النفر** الخميس 31 مايو 2012, 3:09 am

كراع فى الريف وكراع فى سابع اللطيف وكراع وقفوها أبت تقيف

الرابان البي يعلقو فيهو القربي يا النفر..
صاح والله انا غلطان..
كراع في الريف وكراع في سابع اللطيف وكراع وقفوها ابت تقيف ؟

تسلم استاذ النفر على المشاركة
.....................................
شيتاً ربنا خلقو
تحت الواطة زرقو
لاخضـّر ولا شفنا ورقو
........................
هو الملح

أسود كتي
كرعيهو ستي

من طرف **abuahmed** الخميس 31 مايو 2012, 12:13 pm

غايتو المنتدي ده فيهو جنس عواجيز

ربنا يحفظهم من الخرف

ابو أحمد..
عواجيز بفكرهم.. شباب بجسدهم..
أبو أحمد
أديتك ساقية المتيرة