اكلتك المفضلة ... تحت المجهر

سأبدأ انا



اكلتي المفضلة هي

قراصة بدمعة دجاج ويكون بجانبها صحن شطة او سلطة << شكلى بكتب فى البوست وانا جعااانه

طبعا بفضل عملها يوم الجمعه لان يوم الجمعه يوم مميز فلازم يكون طبقي المميز موجود

شكرا انتصار علي هذه اللفته ..
اكلتي المفضله قراصه بويكه حمراء...واعني بالويكه الحمراء دمعه ضاني جامده وعليها ويكه وطبعا اهم حاجه الشطه الحمراء وصحن السلطه,,والويكه لازم تكون منشفه في البيت ومدقوقه بالفندق لا بالسحانه,
وايضا الملوخيه المفروكه بالكسره...

انتصار ونجلاء والله انتن مريحات خلاص اتخيلتا انوا جتونى فى البيت ...

يعنى ما حاتعب معاكم الا ويكه نجلاء البفندك دى

صدقوا اراجع فى نفسى انا اكلتى المفضله شنو؟ ما لقيت حاجه معينه

بس الحلويات امممممممم يا سلام

بس عندى بت عمى اخت العضو د\ عبد الواحد لو عملت ليكم باميه فرك بالقراصه اكيد حا تاكلوا اصابعيكم وراها

انتصار الله يجازيك جوعتينا

سلام .. ناس الأكلة الهنية الشهية ..والأفكار السوية ..

وجبتي : قراصة قمح بلد 4 بوصة .. بي دمعة مسبكة .. بي لحم ضاني تكون حارة من نارا بوخا حدو السما

ومعاها .. بصل أخضر .. وشطة حمرا بي ليمون

وكم نفر كدي .. عشان الاكل مع الجماعة دايما لذيذ

** وكمان بحب الملوحة المسبكة .. بي قراصة كاربي وبصل وشطة حاارة

**

شكراً لصاحبة البوست----ويا ناس القراريص سلام

البوست دا عجبني جداً واتمنيت كل الناس يجوا بى جاي---يعني الواحد وكت يعزم الجماعة يكون عارفهم بيحبوا شنو وما يبدأ يحك في راسو

القراصة وفي ناس يسموها العصارة وناس يقولولا السنبوسة

وإبراهيم الشاعر زمان قال

شوف النفس كيف أمارة

وكتين تضرب العصارة

الكباية دايري خبارة

والكباية هني كباية شاي---ماها ببسي ولا ميرندا أو عصاير----وما ها حاجات تاني حامياني

يا أميرة الحلويات مقدور عليها

ويا إنتصار---نجلاء ---ود المناصير

المخزن مليان قمح--قمح بلد أصلي إنتاج صمد ساقي قديم الله يديه العافية --والباميه والويكة ساهلي---الشطة ساهلي---

المساطر كمان راقدي---وكمان معاها متر----عشان يقيسو القراصة كم بوصة---واحد---إثنين ---ثلاثة --أربعة ---وعيك

االبصل الأخضر ----أها المشكلة هني----التلفونات شغالة من البارح--نستشير فى المهندسين الزراعيين عشان يشوفوا لينا تيراب بصل يقوم علي مدار العام

واحد قال البصل الأخضر خزنوه من الموسم في ثلاجات---المشكلة في الكهرباء البي تقطع --ناس قالوا --علبوه --مالقينا مصنع



نرجع لموضوع البوست

اكلتي المفضلة هي : دمعة جداد بلدي مزركش ماهو الجداد الفطيس داك الموجود فى التلاجات جداد بي علاعيلو وسارح في الحيشان وماهو عجوز

الدمعة ماتكون حمراء بلحيل--لونه أغبش شوي--يعني الصلصة ماها كتيري---الدمعة لازم تكون تقيلي بصلا كتير ومهرود

الدمعة تكون في صحن أبيض كبير لا ألمونيم ولا زجاج----اللحم لازم يكون كتير محل ما تنزل يدك تعتر

الدمعة لازم يكون معاها فطير قمح بلدي رهييييييييييف

الجماعة البياكلو معاك لازم يكونوا كاباسين وهدافين أكثر من ميسي العين في الكورة والمرمى على طول والعجب لو قالوا ك فيها في النهاية

ويا جماعة إتفضلو

تخريمة أولى

الواحد لو جاء بي جماعتو يأكلوه على مزاج مين فيهم

تخريمة ثانية

الواحد تلقاه عازم الجماعة وخسران وجايب خيرات الدنيا تلقى الناس تفتش في الفول---جينات بأأه ---وأهلنا الجعليين يا ود الطرشان أم رقيقة لازم -----

أصلو الشعب السوداني لو غزيتو في جروفنا ونزلت عليه مطر طوالي يقوم فول وويكة

تحياتي

اهلا نجلاء

ليك وحشة

وتصدقي كمان القراصة بالويكة رهيييبة

لكن يا بت امى ماصعبتى الحكاية بالفندك دا

شكلى اذا عزمتك يوم بقول ليك جيبي لي ويكة ناشفة معاك



ومشكوووورة

اهلا اميرتنا بت الحومري

تصدقي اتخليتنا نحن الثلاثة انا وانتى ونجلاء

لمة حلووووة وبيننا صحن قررراصة كااارب



بس كمان شوقتينا لبامية فرك من ايدين اخت عبد الواحد



وبالنسبة للحلويات عندى وصفة لتحلية اتعلمتها من السعوديات رهييييبة

قراصة ضهرا أحمر ضهر غزال..معمولة بي قمح بلد..موش قمح صعيد.مرشوشة بي دمعة خروف ولحم مكوم من فوق... وجنبها بصل أخدر مقلوع من الحوض هسه دي بي عروقو وغسل في جدول بابور مويتو ماشي موش موية حبس.. وجنبو صحن شطة ممصور عليهو ليمون أخدر.. الشطة نفسها خلطة من الدكوة والشطة وشوية ملح معجونة بي موية الليمون فقط. بدون إضافة موية عليها.. وجنبها شوية جرجيرات أو عيفنونة
...............................
الأكلة التانية( فاصوليا.. الحبة الدقاقة موش حبتها كبيرة.. مهرودة على نار جمر فحم شديد شديد.على لحم خروف... صلصتها موزونة موش الصلصة الكثيرة.. يظهر فيها بياض الفاصلوليا أكثر مما يظهر حمار الصلصة
أكلات مفضلة في الغربة( بييتزا هوط.... كنتاكي) وكدة

بعد التحيه أهلي : دمعه ضان بي فطير ول سخيني بي فطير برضو .....

طبعا انا بقيت المنتدي ما بلحيل عليه
لكن الاكل دا ما منه مفر
طيب انا بحب الاكلات البلديه جدا جدا
كسره مريق بلد تكون عايساه امي ماهن البنات
ماتكون معيوسه بكوز ماهي قرقريبه
تجيك الطرقه او السنسنه ذيترعه المويه اكت يرمواالحجر حلقات حلقات
من كتر الدوار تقول قعرقفه سعف
بعدين تكون ماه رهافه شديد
يكون الملاح خضره (ملوخيه)وتكون معاه شوية قرون
باميه يعني غلط ناس زمان يسموه ابو حبيبه
ماعارف هسع اسمه شنو
بعدين الملاح علي شرط يكون بايت
ويكون شط خضره ماهي مدقوق مدروشه درش علي خفييييييييييف
ومخلوط معاه ملح بسيط ومويه ليمون
تجيب الطبق جنبك حله ىالملاح بجوارك
تغسل ايدك وتمشي تنوم
الباقي اتمه بكره

أبوسفيان خلف الله كتب:طبعا انا بقيت المنتدي ما بلحيل عليه

لييييه ؟؟

تقول لينا ما تمشوا .. وتجي تقول كلامك دا ؟

قراصه قمح بلدي 4 بوصه وملاح قرون وشطه وليمون مبااااالغه

عصيده بملاح روب (معمول بروب موش ذبادى) ,شيه ضان (لحمه سمينه )على الجمرمع كسره مررره , الحلو كل الحلويات المعموله بالسمنه البلديه.

فاصوليا بايته ورغيفه بلديه