البعرورة سايقي تورا

مقطوع من مقال( مدرسة شري الأولية) للذين لايحبون تصفح المواضيع الطويلة بي هناك
الـبـَعـَرورَه:-

يقولوا ويغنوا لها ( البعرورة سايقي تورا) تعني شنو! ما عارف، بعرورة كيف ما عارف.. سايقي تورا كيف لا أدرى، المهم توارثتها الأجيال جيلاً بعد جيل في مدرسة شري الأولية وهي ثقافة داخلية في المدرسة
ماهي البعرورة:-
البعرورة هي بعد الملاح الفي الصحن يكمل.. تفضل الكسري في الصينية.. يقوموا يلموا الكسري الفي الصينية دي و( الفـُوُتـْرِنْ) يلموه كلو في الصحن الفاضي ويكبوا عليهو موية وشطة وملح..أو ( دُ قـّـَة) والدُقة تكون كل مرة على واحد من أفراد الصينية.. وتتفنن أماتنا بقا في الدقة.. في دقة فيها كسبرة مقلية.. وفي دقة كسبرة وبصلة محمرة.. وملح وشطة وشمار وكدة.. وفي ناس فقراء أمهاتهم بس تديهم شطة وملح جريش.. وكان الناس يفرحوا المعاك في الصينية لما تجيب دقة مدنكة.

من طرف **ابوسما** الجمعة 23 مارس 2012, 3:06 pm

تصدق انك جوعتنا!

تصدق انك جوعتنا

هاهاهاه
تصدق يا أبو سما مرات البعرورة تكون أحلى من الملاح الأصلي ذاتو! بالذات لما تقطع فوقا بصلة وشوية زيت سمسم ناقع جديد. النوع الأخضااار داك!

من طرف **ابوسما** الجمعة 23 مارس 2012, 4:59 pm

انت عارف يا صديق احلى وجبة تكون تقرع فى الموية ويجيبو ليك قراصة بى روب وملح وشمار وتقلع ليك بصلة خضراء من الحوض الجنبك وتقطع جذورها بى خشمك وتقشرها وتغسلها فى الجدول
انت عارف طعم موية الجدول يجيك بارد فى خشمك

من طرف **عازه** الجمعة 23 مارس 2012, 9:16 pm

البعرورة دي سمحي بي باقي ملاح القرع تتلمي في الصينيه وتسكب عليها ملاح القرع وتضيف عليه مويه وشطه وملح حلوي شديد كل مره يجيك طعم مختلف مره ملح ومره شطه ومره سكر بالضبط ذي السلطه البيضاء بالانناس.

من طرف **ود حاج** السبت 24 مارس 2012, 6:25 am

قريبى البعرورة سمحى تكون انت ساكن فى الداخلية ويقوم الناس المعاك فى الصفرة يقسموا باقى الكسرة القروض بعد ما كمل الملاح وتشيل كومك وتمش تختوا فى برشك وتضع عليه المخدة وفى الراحة تقوم تعجن الكسرة فى برش الرقاد بعد ماتفتش حته نظيفة ما فيها بول وغالبا ما تكون على جهة الرأس وتكب عليها الكسبرة المطحونة مع البصل المقلى وتكون عندك بصلة . والله حلاتها ما فى الا فى القراصة بالزيت فى كدباس مدد ياجعلى .