بعض المواقيت والازمنة المستخدمة فى المنطقة

بعض المواقيت والأزمنة
كتبت هذا الموضوع فى شبكة المناصير وهو نفس اليوم الذى اغلقت فيه - مع بعض الاضافات –اسمحوا لى ان افتتح بها المنتدى الثقافى هذا فى الوقت الذى شهدت فيه كل المنتديات انتعاشا ملحوظا –بالاضافة نغير شوية من الكلام( الكبار كبار دا) ونفتح طريق او باب للمصطلحات المستخدمة فى الانشطة و الحياة اليومية وكذلك الاجتماعية مع ملاحظة انه كلما جاء التوثيق لهذه الاشياء بالعامية يكون اجمل وابلغ وانا شخصيا دائما افضل ذلك ان يكون مدعوما ببعض ابيات الشعر،
واورد هنا بعض المواقيت والأزمنة فى المنطقة والتى ترتبط بالأنشطة اليومية ومعظمها لأمور الزراعة ومايختص بتوزيع أوقات الساقية بين المزارعين ( للقراعى) السقى وهى موجودة عند كل القبائل المجاورة تقريباً-ومن امثلة ذلك-فجراوى-دغشاوى –وغيرها وتضبط هذه الأزمنة (بالتتق) أو(التتك) وهو عبارة عن حجر أوعود يثبت فى الأرض ويكون ارتفاعه بين ثلاثين إلى أربعين سنتمتر تقريبا.ويوضع فى مكان شبه مكشوف ويكون توزيع الزمن بواسطة الظل الذى يتركه وهو بمثابة ((timer لتنظيم أوقات المزارعين وتوضع على امتداد ظله علامات تبين زمن كل مزارع وكلمة تتق كلمة نوبية-(وكاتب هذه السطور شاهد وعايش هذا الامر) ،كما إن هنالك أوقات أخرى مثل –قلعة النجمى-ختة الكبايى-الحمار(بفتح الحاء والميم )-الضحوى-وهى أيضا مشتركة مع قبائل أخرى لكن هنالك مصطلح لااظنه لغيرنا وهو (سكة عمى) –بكسر العين وافتكر المقصود به (صنة نهار والناس كلها مقيلة ومابتشوف الا (كلاب الجهيرى) ،كما يقال ايضا (دكت الحزى)-(بكسر الدال) اوفى حزتا-وتعنى -(فى لحظتها)،
وهنالك أيضا ربط الأحداث العامة بإحداث كبيرة مثل :
1-الفيضان (التساب)-1946م
2-سنة ستة 1306هجرية وهى سنة البقارة(سنة ستى)
3-سنة القبورة (1954م) تقريبا
كذلك سراية بابورى وهى المطر الشهيرة التى ضربت المنطقة ويمكن ربط الحدث بوفاة مشاهير فيقال زمن ميتة فلان حتى يصلوا إلى أول عامن أول ثم عامن أول-
واختم ببعض الأبيات ذات صلة بالموضوع –ففي سراية بابورى قيل:
جانا ساعة ليل مو نهار
حسو يرزم وقلنا طيار
شال شتيل ناس احمد الخال
المجبد والدابو شال
ساق حمار تاجرنا ابعدار
وكر الجنزير فى الحجار
نجرى بى شنكوكة الحمار

والحطب راح دنقلا أم نار
كما قال احد شعراء المنطقة فى مدح احد العرسان :
مشيت عن عمر لقيتو عريس ومحدر الطاقية
فتح الشنطة حس ابعشرة يقلى قلية
دا التساب الغرق الشايقية وفات القيف درب ضحوية
(ابعشرة –يعنى الريال وليس السلاح)-(درب ضحوبة-يعنى فترة الضحوية –(يعنى ضحوية بس غرق الجماعة)
كما جاء فى بلال احداهن :
الضحوى ليهو بروق دار اقولك بخيت (يعنى مطرة ضحوبة قوية صاحبتها البروق)
وفى سنة البقارة اورد قول الشاعر ود سلمان عندما اخذوهم البقارة وفى طريقهم للشايقية وجهة الكربكان تقريبا ضربتهم جوعة شديدة ووجدوا دخن مزروع وقد استوى فاخذوا يأكلون منه فظهرت صاحبة الدخن ونهرتهم وطردتهم منه فقال الشاعر :
شوف بت دار ام صليح نهراتنا لينا
نحنا دخنو ولوبا خلينا جبنا
وانتى فى وقتا قريب بى تلحقينا
ويقصد ان الدور جاى عليها والبقارة وصلوا قريتها
ولى عودة لو فى العمرباقى0

شكراً اخوى خالد على المرور وانا قصدت بان نتناول فى هذا المنتدى (الثقافى) تلك الاشياء الجميلة والمفردات الايلة للاندثار وبطريقة سلسلة وونكثر فيها من العامية ؛وبعدين ضل الخسار دى (بحتها )من وين،واحيانا كثيرة تذكر (بالتصغير)ضليل-فى ضليل الشتلة انتكيت شفتها وشافتنى وبكيت
قالت لى اتفضل على البيت نفسى صغرت ودرت المبيت
وحتى اسماعيل حسن اظنه بخياله قال:
بالله ياسرب الحمام لمان تروح دار وقمر---الى ان يصل النعاج الراقدة فى العصر
وبعدين البيتين الفى الاول ديل من اغنية (الله هوى) الشهيرة والتى احفظ منها الكثير وكنت اعتقد ان معظمها للمناصير
ولكنى بعد اطلاعى لتوثيقات منتديات البركل عرفت ان معظمها للشايقية تنسب لود صليليح وقد تكون تراثية ممتدة عبر كل المنطقة
ولكن هذا ليس مكان مناقشتها وناوليها قريب-لكن لاحظ اخى خالد لهذه الابيات:
العريبى الجالب الملح والمسافر وجايب السمح
مابجيب مهرك يام شلخ الاواحدا سايق القمح
وتورو تحت الارقوق ينح-

الاخ سلمان ود عقيد كيف حالك ذكرتنى بالاخ الهادى الله يطراه بالخير فقد كان يحفظ الكثير من هذا الشعر والظاهر انت الذى اثرت عليه فى هذه الناحية على عممنوعما كنت اظن وارجو ان تلمنا سريع فى النص الكامل لهذه القصيدة المنصورية

شكرا اخوى المنصورى على المرور والتعليق والاضافة وانا دايما اقول نحن نساعد بعضنا البعض ان شاء الله بيت واحد حتى نصل لاصول تلك الاشعار ونحنا ناونين ليها باذن الله -وكلامك صاح فى اغنية الله هوى -والله يا المنصورى من كثرة عشقى لشعرنا القديم واحفظ اسلوبه ومفرداته كنت قايل الله هوى دى كلها حقتنا حتى اعرف شعراء المنطقة الذين ادلوا فيها بدلوهم مثل السبد ود الحسين وحمد ود ضقولى ولكن اتحفظ على ذلك حتى ارجع لمصادرى الخاصة والتى اثق فيها بعدين نبين ذلك- لكن اكيد زى ماقلت عندنا فيها

الاخ خالد مشكور لكنى اقسم بالله العظيم اول ماقريت (ضل الخسار ) فى ردك الاول اتذكرت الكرورى-وكنا (ندودرو)يا ضكرالكرورى البجرى ويرورى ---الخ)-معنى (ندودرو) نشهه لكى يتحرك على الشركة ويشوف الدودى-
اماشرحك للبيتين انت فهمتنى تماماً لانه انا ماعايز الشرح لكن عايز اوضح لمن تكون هذه الابيات وطالما قلت المسافر دا الطيانى وضح الامر -ورغم اننا متأكدين لكن نظل متحفظين حتى ياتى الخبر اليقين وقريب ان شاء الله-ضف الى ذلك هذين البيتين فيما تأصيل للزراعة واعتزاز بها-
بعدين الارقوق دا:هو عود من اجزاء الساقية يوضع على رقبة ثور واحد ليسوق الساقية-
واجزاء الساقية دى باذن الله سوف نفرد لها مساحة لاحظت قبل شوية اثناء مرورى على اشعار اخونا ودبروى ايضا كلمة( سندقيق) وهى الاعواد اوالاخشاب التى توضع على الحلقتين فى شكل تروس حيث يتلامس السندقيق بالحلقتين محدثا بذلك حركة-(وزمان فى مثل يقول ليك فلان دا او الناس ديل سلامن سلام سندقيق)يعنى سريع زى مابقولوا و بالانجليزية just touch ) يظهر برضو ياخالد انا سرحت

واصل اخونا سلمان
نحن متابعين وسامعين
ومحتارين
على مااعتقد استفدت من سكنك جوار سوق النعوفاب
ولا اقول سوف السلمات ولا اقول سوق مسره (امشى شويه فى الاتجاه ده )
دايما بعد نهايه السوق كل الناس راجعه مستعجله ويبقى بس الناس اللى عندهم صلح او حل مشكله او عقد صفقات تجاريه ويزحو لغايه مايكملو الطل
وانت عشان اهلك قريب تتابع كل ماهو داير
ووووااااصل اخى سلمان

شكرا الأستاذ خالد –للمرور –واللديق:الأرض الواقعة بين التمر وارض الساقي (الفوق) والتى يفصلها الجدول الضكرعن اللديق ،وفى بعض المناطق نجد هذه المساحة بها تمراو شتل وعيش فى ان واحد و يسقى الحوض او يقترن بحوض وحفر الشتل ، وشتل هذه المنطقة اكثر حظا من غيره فدايما رويان حتى لو (بالنز) :

الشتيل الفوق اللديق

سيدو حارسو معلى السبيق-----



واطعّم هنا الإجابة لخالد بالمواصلة فى الكلمات والمصطلحات:

(اندهــــــــدهنا)-

و(يدهدهنا) وتعنى التاخير (فيدهدهنا ) تعنى يأخرنا ولا تندهده لاتتأخر

-ثم فى العكس لذلك نجد كلمة:

(وشــــــيك):

ووشيك تعنى سريع .ولعل لها موسيقى بجاوية ويمكن تكون هنالك علاقة بينا وبين البجا كما ذكرت فى بعض كتب التاريخ فى الاستعانة بهم ضد الغزاة (ويحول الكلام للاخ هاشم)-كذلك نجد اللفظ (اوه) فى اخر الكلام او السؤال عندنا –(ماك مندلى اوه) وعند البجه (اوه تعنى ال--) مثالاوه نو توبيه) –وتفسيرها اين انت ذاهب فيقول مثلااوه سوق نبا) انا ماشى السوق ف (اوسوق) تعنى السوق معرفا) -

أيضا كلمة :

فجــــــــلات-

وتعنى عشان اولأجل ولعله تداخل مثل (فطن )و(فشان) والتى فى الاصل فى شأن كذا أيضا بنفس المعنى –ولعل الدكتور عون الشريف قاسم أورد ذلك فى كتابه العامية فى السودان حيث ذكر ان بعض الكلمات تدمج اوتزيد او تنقص (فى السودان عموما ) مثل:

بتّ----تصبح فى العامية (تب)

نضج --–تصبح ( نجض)

جأر--- تصبح ( جعر)

واساس ---(البيت ) تصبح (ساس)

شج—تصبح ( فشق) وهكذا

واذكر هنا أيضا البروفسير عبد الله الطيب ذكر في إحدى محاضراته إن كلمة (أجى) التى تستخدمها النساء للاستغراب كلمة فصحى اى بمعنى إنها أصلا تعنى)Lاجىء بهذا الكلام أو الأمر أو أتى به-

أما المصلحات الزراعية وبعض أسماء المناطق والجزركما ذكرت وذكر الأخ خالد معظمها من أصل نوبى وسوف نأتى لذلك ومنها أيضا :المسورالدميرة والشيمة وغيرها وهى موجودة فى مناطق أخرى --

الرائعان سلمان وخالد شكرا كتير علي هذا المجهود ويا سلمان كان احد اعمامنا له ميول عاطفيه تجاه احدي قريباتنا فكان يردد
دار أزور الجار الحمار
ودار اسوي الحيلي جيب نار
اي انه يتعزر بالنار لشاي الصباح 000والحمار حمارين حمار الصباح وحمار المغرب
اما عن الورود اخي خالد فهي دائما تعني الوصول لمكان الماء في العربيه وعند اهلنا أعراب المناصير ويا خالد انت ورودك ضمي ولايوت ولا غب ولاربع ولا خمس 000
أماياسلمان اخوي فان كلمه عود والتي يذكرها اهلنا بمعني كبير قال شاعرهم
كنت يوم البارح جني وامي رابطي السناده لي
ماني عود الشيب غار علي
فتابع طاش ماطاش السعودي تجدهم يقولون للكبير العود 00فتامل

الله فعلا كلام درر شرح وافى لكلامات نسمعا احيانا ولا نفهما ( الممنصرين)
يا ريت تواصلوا لينا ونحنا متابعيين

شكراً الرائع الريس خالد والله فعلاً بوست سمح ... وأنا والله بعد بوستات الكجار والمناكفات والاتهامات الما في محلها لاناس لا علاقة لهم بالمنتدي... أصبحنا نرد بحر الرباطاب ونجي نتاوق مره مره ونفوت ...لأنه طبعاً الاهل ما بنفاتو... ( والزول ما بتف فوق جسمو مهما كان جراحو أليمه )

ناس مكاجرين بالحيل

ناس سمحين بالحيل

مع ودي واحترامي

شكرا الريس خالد--
شكرا--الاخت اميرة--
وحباب شيخ العرب محومد ود حبيب--
ياجماعة دا كلام من الزمن الجميل وسمح بلحيل--ويامحمد حبيب صدق الكجار بى هناك واقف جلد--دحين اخير نرجع بى هنا ودا الكلام بى نقدر عليهو--وبعدين انت وخالد واميرة --شجعتونى شوية--
بس اناخايف ابدأ بى هنا يجينى واحد
يقول لى الجماعة فعلوا وتركوا--
بعدين جانا واحد من اهلى العرب بساعدنا فى المصطلحات والمفردات التى يستخدمها اهلنا العرب والتى تحمل كثيرا من الحكم والقيم---
ابدأ بمفردة او عبارة قد اوردتها تقريبا فى بوست الامثال واريد ان تكون روّاب :
(دكت الحزى )--
وتعنى فى تلك اللحظة --وقد تكون اصلا (دكت الحظى) وقصد بها تلك اللحظة --واتى القلب او التبديل لسرعة النطق--واذكر هنا ايضا ما اورده دكتور عبد الرحيم فى توثيقه لمعركة الكربكان --ذكر ان المناصير قالوا فى تلك المعركة--
فى يوم التلاتاء ضحى
والمدفع موقا على
وبنات الحور يشابن لى
ما برجع( نضالا) على
ونضالا اصلا كانت (نذارا او نذرا على الا اهرب--وهكذا--
كذلك يقال فى حذتا ---وتعنى فى لحظتها--
اما الحِذى--بكسر الحاء فيقصد بها عندما يكف القميص او الثوب وتوضع عليه اشياء --
وايضا --(اسعيتى ) ونعنى الان--
ويامحمد ود حبيب صورة الجمل ذكرتنى قول الشاعر ودالفراش:
كربت ياجمل الليلة يومك
على دغس العيون كارب شديدك
وقت الليل برد قليت غميدك
ارح يا البارقدم ستك تريدك---والبارقدم -جمل الشاعر----
وان بقيت داير الفراسة والاصل ينفع معاك كلام طه :
قبل نيتى اشد كلسى واقافى الدولة
فوضنا الامر للأولى
باطلة القوة من غير البسويها المولى -
--ان الله مهل فى الايام بجيكم راجع--

حبينا نوثق مرورنا
تسلم استاذ سلمان

نواصل ما انقطع من حديث حول تلك المفردات—شكرا للمتداخلين—
(نهارتا) او فى ذلك اليوم او
ذلك النهار—واحيانا (يومتا) وكما ذكرنا قد تقوم مقام (اليوم الماضى –مثلا التلاتا
الزلت) وللاختصار وسرعة الحديث يقال يومتا—
ايضا ذكرنا شرح (صنت نهار) ونضيف اصلا المقصود نص النهار او منتصفه-وحل القلب (نص
---صن) واضيفت التاء---ولحيانا يقال قييلة الجن دلالة لعدم وجود شخص متحرك وحتى
الجن مقيل—
ايضا هنالك :
الواطا-صنهرت-فللت –ضلمت –عصرت –غابت—ويقصد بها الزمن وهو مرتبط مع الشمس وحركتها—وما يقصد بالارض او الواطا يمكن ان يكون الواطا حرت—
ان الله مهل فى الايام بجيكم راجع

أيوة
قصييير
والضحايا 2
وهنالك شهور ثابتة
برضو صفر الخير
والله يا سلمان ما فضل لينا إلا نعمل تأريخ منصوري
اسوة بالتاريخ الهجري الذي صنعه سيدنا عمر ابن الخطاب بذكائه
.......
السمودة بتاعين الساقية قالوا ليه عملوا الشهور دي المناصير؟
قالوا عشان يزبطوها بالساعة مع العيني.. عشان الزراعة تطلع مزبوطة.. برضو بيزبطوها بالنجم ناسنا.. وسمودة النعوفاب كانوا أدرى بذلك
إدريس
والقاضي
وا بقرن
و سليمان ود الربع
وأحمدون
والفضل ابو ناس ابراهيم فضل.. وهو من كبنة جاء سكن النعوفاب ونسى كبنة

لا نستطيع ان نجد موطىء قدم بينكم ايها العمالقة
انتم تقولون ونحن صناته

لتحريك هذا البوست --وجدت كلمة (الكبست ) والتى اوردها الاخ صديق--ولقيتا طاعمى تستاهل اجيبا بى جاى عساها تأتى بغيرها من الكلمات والمصطلحات الجميلة الخاصة بالثقافة والتراث المنصورى

مشكور الأخ سلمان الأرباب وكذلك كل اخوتنا المعقبين على هذا البوست الرائع
أهلنا زمان كان تقويمهم بالشهور القمريه وكانوا يتابعون ويعرفون الأوقات جيدا
ولهم تسمياتهم الخاصه بها والمتداولة بينهم وكا أذكر هى كالآتى :ــــــ
الضحيه العقَابية ـــــــــــــ وهو شهر المحرم
الوحيد أو الوحيد سايق الضحايا أو سايقن ـــــ وهو شهر صفر
الموالد الإتنين أو المولد الأولانى والمولد الآخرانى وهما شهرى ربيع أول وربيع تانى
الجُمادات الإتنين أو جماد الأولانى وجماد الآخرانى وهما جماد الأول وجماد التانى
رجب
قِصيـر وهو شهر شعبان
رمضان
الفطُر الأولانى وهو شهر شوال
الفطر التانى وهو شهر ذو القعدة
وشهر الضحيه أو الضحيه الأولانيه وهو شهر ذو الحجة
أرجو أن أكون قد وفقت فى ذلك ، ولكم ودى وتحياتى ...

الكبست... ههههههه
هسي دي الكلمي دي متداولة والله خلوها يا سلمان؟
تذكرني هذه الكلمة سليمان ود الطرشان رحمو الله.. سليمان ده كان طعم براااهو في النعوفاب..
شوف الناس تنهمك في منطقتا الفيها؟ هسي دي لو قلت لى زول أن سليمان ود الطرشان الضقولة أخوالو ما بيصدق؟ كل حركتو في النعوفاب؟
وبعدين شوف نفيسة.. لو قلت ليهم نفيسة دي شيخة من السلمات ؟ الناس ما بتصدق؟
لأنها منهمكة مع النعوفاب .. وتكاد تكون نست السلمات..
المنى.. زوجة ادريس لوقلت ليهم الزولة دي عمة خليفة محمد خير من حوش فرنيب أخت أبوه.. الناس ما بتصدق؟ لأنها منهمكة مع النعوفاب بصورة نست فيها ناس المدينة وناس خليفة..
ولو قلت ليهم هناك مرة موش منصورية خااالص وكانت ساكنة مدينة مكتملة بي كهربتا ومويتا.. وجات خلتا سكنت النعوفاب.. وهي من الدامر وهي ( حاجة تفلة ) عرسا في النعوفاب الحسن ود أب جقة وصارت تحب النعوفاب أكثر من الدامر.. وقدرت تعيش.. تسوى الترمس وتبيعو في سوق النعوفاب.. وتبيع الجداد وجنى الجداد.. وجات من الدامر قاعدي فوق حق راجلا الحسن ود أب جقة أخو إدريس؟؟
لو قلت ليهم في مرة عرسوها النعوفاب من برتي.. ونست برتي تماما.. وهي خالة خلف الله محمد علي كباشي ( آمني الزرقا ) الناس ما بتصدق؟
بل لو قلت ليهم في زول جاء من الجزاير.. كفنى بوابير. النعوفاب عرسوا ليهو مرة وقعد معاهم فترة طويلة ( محمد صديق عريف ) وعرسوا ليهو فاطني بت آمني الزرقا..
وهناك ناس جوا من كبنة قعدوا في النعوفاب ونسوا كبنة مع أنهم عندهم حق في كبنة.. الفضل ابو ناس ابراهيم فضل.ده ما عندو اي علاقة بالنعوفاب.. بس جاء تزوج آمني بت اب جقة؟ تتذكرا يا سلمان آمني دي؟ حتى بتها واحدي الكبيري تزوجها ناس كبنة أهلا. ناس الفييف.. اي الفوف.. اتذكرا كان تجي تانية العيد مشتهي بلدنا تبراها من السلمات لى غاية سلم بللابي تبارك العيد.. تجي مكنكشة بالدهب. وراجلا الفوف ده من كبنة زول فنجري وكان يسافر الصعيد طياني مقرش كان معجب بيها.. اي توب سمح عندها اي دقة دهب يجيبا ليها.. نحن أطفال كانت تقسم لينا الحلاوة.. تجي كلها شوق للنعوفاب.. لأنها لامن عرسوها قاعدي في النعوفاب..
.............
قلت ليك يا سلمان المؤرخ الفكي وضع النقاط على توقيت المناصير الشهري .. إفتكر كدة تموا... حاول جمعهن