الرخمة قالت أنا أخير من البقعد مع نسابتو؟

إلا كان يكونوا أهلك شديد.. واتجرسوا عليك ، إنك تسكنوا معاهم لظروف معينة بعد ما تزوجت بنتهم..
أما في الظروف العادية.. تجهز بيتك وطوالي تسوق مرتك ولاترهق أهل مرتك بتكاليف، بل تديهم وتساعدهم تقديراً لهذه الإنسانة المعاك..
والرخمة طائر يضرب به الرظالة.. والوسخ.. لأنو يأكل رمم الناس الميته والحيوانات وهذه وجبته المفضلة
ولذلك ضرب المنصوري القديم هذا المثل تنفيراً من عادة استغلال أهل الزوجة
............
نحن في المناصير كان الزول ما بنى أوضة وبرندة حتى بلاحوش لايمكن يقول عايز بت فلان؟ للبارح دي الكلام ده كان كدة..
أما بالنسبة لى
أنا كنت في( حفرة الصفاح) وبيتي ماجر في أم بده الحارة العاشرة.. وبعد العقد طوالي سقتها منهم.. وتاني الروحة الياها..
هنا جاء المثل المنصوري الحكيييم لينفر من عادة استغلال أهل الزوجة عموماً
( الرخمة قالت أنا أخير من البقعد مع نسابتو؟؟!!)

يبدو هو أن الرخمة عارفة رظالتها.. ومقتنعة بيها..
عشان كدة يبدو إنو في زول شاغلها برظالتها وهو قاعد مع نسابتو؟
عشان كدة اشتغلتو الرخمة!
هي كمان شايفة نفسا الرخمة احسن من ناس.ز
هي معترفة أنها رظلي
لكن في ارظل منها
هو
البيقعد يستغل أهل مرتو

صديق الحنونى.. عيد مبارك
زمان نسمع البنات يقولوا اوع من اوضة وبرنده وشباشب القطع.
يعنى اوع من العريس البقعدك مع اهله ويفصل ليك اوضة وبرنده من بيت ابوه .وشباشب القطع لانها رخيصة ,يعنى ما تكون شيلة شعبية رخيصة.
لكن فى الوقت الحالى الزمن اختلف وبقى ابو البنت يقول للعريس تعال وبسكنك معانا .الزمن بقى صعب والعريس اصبح عملة صعبة
حتى لو العريس قادر ياجر اهل البت يقولوا احسن تسكن معانا وتستفيد من قروش الايجار حتى ولو فى بداية حياتهم على الاقل. بالذات لو كان بيت اهلها كبير.وافتكر دى خطوه ايجابية فى ظل تعقدات الزمن والمشاكل الاقتصادية

بالذات لو بقت البت شغالة بتستفيد اكثر من قعادها مع اهلها ,
ترتاح من مشاكل الحضانة وطبيخ الليل

دكتور محمد عيد مبارك..
العريس اصبح عملة صعبة ليس بسبب صعوبة الزواج فقط . بالذات اهلنا المناصير يبسطون الزواج الى اقل درجة ممكن. لكن نسبة الرجال الى النساء اصبحت ضعيفة وتستمر فى هذا النقصان حتى تصل الى 1:50 يعنى كل خمسين بنت قصاد ولد واحد فى آخر الزمان.

هويدا وخال أبرار اثروا البوست بالحقيقة الماثلة اليوم..
لكن اي شئ يتناقض مع مثلنا المنصوري ماني دايرنو
بعد العرس طوالي تبدا المشاكل.. والعروس تقول عايزة بيتي .. عشان اشعر بكينونتي
............
عاد عرسان الزمن ده بقوا كلهم رخم.. حسب المثل المنصوري

اخوي صديق انت ما داير تجي في الخط مالك والجماعه هويدا والدكتور شرحوا ليك وبرروا ليك ان الامور اختلفت لا هل تصدق ان هناك اغنيه تغنيها البنات ويقول مقطعها ( تعال البي العندك وابوي بيتمك )

يعني حتي كان ما عندو بس يجي وطبعا انت سوف تحور في الاغنيه وتبقي ( يارخمتي تعالي الشوق ليك قداني )

الي اللقاء

كلامك يا صديق ابو حنه صاح

لانه دائما السكن مع الاهل لا يخلو من المشاكل



واغلب صعوبات الزواج نتجت عن تكاليف مناسبه العرس نفسها بذخ ومظاهر وخلافة



اما السكن فعادى اصبح الان ممكن تاجر نص بيت ربع بيت حتى



لانه يوجد مثل اخر بيقول

من تدور حنه ... ابعد منه



وبعدين اذا فرضنا انه هنالك ظروف

فمن الافضل ان الرجل يسكن مع اهلة هو

اما مع اهل البنت ... شينه الصراحه

الله يهون

الأخ المهندس صديق لك التحية والعيد مبارك عليك ثانية وحقيقة تلفونك حرك في ذكريات الماضي ولما كنت أقول لك الصوت ليس بالغريب عندي فهي كانت ذكريات صوت المرحوم عمر نسأل الله له المغفرة .

أما عن الأمثال الشعبية التي يضربها المناصير فهي أمثال في مكانها وفعلا أمثلة حية وعندي مثل يراودني وقد قمت بتحليله ومعانيه وسوف أكتب عنه قريبا. أما مثل الرخمة السخمة فبقاء العريس مع نسابته عادة لا يقبلها المناصير أبدا تحاشيا للمشكلات التي تنجم عن ذلك. كانت تبني للعريس غرفة واحدة معها حمام في بيت العروس وتسمى غرفة النسابة يتوارثها العرسان عريس بعد عريس إذا كان النسيب عنده بنات كثيرات. وصدقا لهذا المثل أعرف أحد إخواننا تزوج من بنت كانت تسكن مع حبوبتها وحبوبتها أم أبوها مرأة كبيرة وخدمة للابن لأمه وهب لها بنته عشان تخدم أمه الكبيرة . وكان أن تقدم عريس لهذه البنت وتم زواجها بشرط أن تمكث البنت مع جدتها والبيت واسع ووافق العريس مجاملة للبنت وجدتها وهو داخليا في نفسه شئ. تصدق أن أولا الجدة الصغار رغم أنهم متزوجين وساكنين خارج المناصير كانت تصيبهم الغيرة وزعلانين رغم أن زوجة العريس تخدم في أمهم كما أن الناس الآخرين يتحدثوا عن أنه باطل وكيف يقعد مع نسابته وصدقني وبسرعة الراجل استقل ببيته فور موت الجدة وكان فرحا على أخذ حريته واستقلاله. وقد عايشت وشاهدت معارك أسرية بين البنت وأمها تخيل لأن الرجل ساكن مع نسابته. وهذه العادة مرفوضة خالص في المناصير وهي متفشية بصورة كبيرة في قرى الجزيرة والنيل الأزرق وصدقني رأيت ذلك بأم عيني كما يحكي لنا الزملاء في العمل أنه في البيت الواحد تسكن عشر أسر ويقولوا أنه شاي الصباح يشدوه في ثلاث حلل أو أكثر. وناس الجزيرة طبعا مشهورين بالبرود بعكس مناصيرنا موقدين نار. أما كلام الأبناء الدكتوره محمد والدكتوره هويدا وأن الزمن تغير يتغير الزمن وتمر الأيام وأهلنا المناصير متمسكين بعاداتهم وأمثالهم خاصة الذين سيكنون المناصير وغدوتهم في ذلك البيت البجيب الريح سده واستريح. والبيت ما بشيل مرتين وقد يكون أثر فيهم البندر . نعم الظروف قاسية والمعيشة صعبة لكن الزواج ما زال ميسر في المناصير .

عاد المناصير يا مصباح!! حروريتن لامن يقسموا منها..
وفعلاً ناس الجزيرة باردين دي ما دايرة أدنى شك؟
ياريت تستمر الحياة على النهج المنصوري الأول..
الغريبة المثل ده منتشر لغاية نوري والبلل.. ومعروف بأنه مثل منصوري جاييهم من القبلية
واحدة شايقية من نوري ساكنة من نسيبها، وراجل ممتاز أخو أخوان يريحا أكثر من بناتها
وهو صاحبي.. جيت لقيتا ساكنة مع راجل بتها..
قلت ليها بت كلتوم؟
كيف إنت مع صاحبي الباشمهندس ابوعبيدة؟
قالت لى راجلا مات وهو اسمو أبو نعوف
قالت يا صديق عمك أب نعوف زمان قال لى: المناصير قالوا( الرخمة أخير من البيقعد مع نسابتو؟)
دحين هسي دي أنا قاعدة مع راجل بتي وسايبة بناتي
وهي ساكنة في ود البخيت,,, يموت راجل بتها من الضحك؟
وكل مرة يقول ليها
يا بت كلتوم. اقيفى المناصير قالوا شنو؟
وكل مرة يحب تكرر ليهو المثل..
وهي تكرروا
( الرخمة قالت: أنا أخير من البيقعد مع نسابتو)

الاخ الرايع صديق واحوتي المتداخلين
كل سنه والجميع في اتم صحه وعافيه
غايتو المثل ده انا عندي فيه راي كبير
صحيح هو يدعو ان يكون العريس مستقلا
وهذا شئ جميل لكن مرات كثيره الظروف تكون
تستدعي ان يسكن النسيب مع اهل زوجته والظروف
كثيره وفي بعض الاحيين تكون ملحه وانسانيه
وتجد من يضرب المثل لمثل هذا الشخص الانساني
الذي ضحي براحته من اجل الاخرين
لذلك هذا المثل احيانا كثيرا فيه تعنت كبير
وعدم احترام للنسب وهم حقيقة اصبحوا جزء منك وانت كذلك
علاقتنا مع نسابتنا بها جفاء وغلظه ناتج من التربيه
ولي عوده ان شاءالله

المقصود أكبر يا شيخنا عمر الحسن..
يعني من الأول ما تخطط.. تختار المرة عشان حقها!!!
يجب أن تخطط تختار المرة عشان هي الشخص البي تبحث عنو من حيث الصفات التى تعشقها فيها وبس ؟
حتى لو اهلها فقراء..
والمصريين عادة يخططوا يعرسو البت الأهلا مروقين.. أو مغتربين عشان يمرقوه بره.. أو عندهم شقة ملك..
يعني العرس عندهم بزنس!
بعدين نحن ذكرنا لو في ظروف استثنائية يسمح بذلك يا شيخنا
لكن أن يتم الإختيار من الأول إنو يسكنوك معاهم؟
يبقا هنا اتخذت شريكة حياتك مطية؟
ويجب أن تختار المرأة لذاتها فحسب.. كينونتها كبشر!

الرايع صديق
كلامك جميل جدا لكن للاسف هذا المثل يضرب
لكل من يسكن مع نسابته دون استثناء
وانا لي تجارب كثيره مع هذا المثل
وياريت كان الفهم زي فهمك لهذا المثل
وطبعا اصلا ما وارد تخطط تسكن مع نسابتك
لكن بعد مرات من المفترض ان يتم تقدير الظروف
ولا تقدر الظروف لان هذا المثل سيف مسلط غايتو يارايع هذا المثل يحتاج الي فهم جديد

الرائع صديق

والفهم مصطفى عمر الحسن

سلام

والله يا اخوى مصطفى ما حبيت اكتب الا بعد مداخلتك

لانو فعلا هناك ظروف تجبر الواحد انو يقعد مع نسابتو حتى ولو كان عندو بيت ومقتدر

مثلا اذ كان رب الاسره يعنى النسيب متوفى وما عندهم اخوان

فالنسيب فى هذا الظرف يكون هو سند البيت

وراجلوا

ولارايكون شنو يا اهلنا

البت مرات تكون إختارت العريس أو وافقت عليه، في حين أن الأهل يكون ما عاجبهم شكلو أو تصرفاتو أو نوع تربيتو.. وهي ممكن تكون غريبة أو مختلفة عن تربية رب الاسرة الوالد..
ورب الاسرة عايز يربي بناتو وأولادو التانيين على طريقتو الخاصة..
خاصة إذا راجل بتهم المعاهم ده يتدخل في شئون الاسرة..
لذلك احسن لها تسوق راجلا وتبعد وتجيهم في المناسبات.. تسوق زولا الإختارتو وتبعد..

مرات يكون اهل الزوجه محتاجين للنسيب وهو يضحى ويسكن معاهم عشان هم محتاجين ليه

الزمن اختلف
النسوان بقوا يقدروا الرجال .
اكيد المره بتجيب الراجل ويسكن مع اهلها مكان راحتها هى.
( مرتك كان قالت ليك اطلع الجبل ما تحرر الواطة) والله شنو يا ابحنة

يا اميرة

طبعا لكل قاعدة شواذ ونحن قلنا الا اذا دعت الضرورة الملحة

وهي حوجة اهلها الماسة له



وزي ما بيقولوا الضرورات تبيح المحظورات

وهنا المجتمع قد يجد له العذر





اما ان تكون القاعده الاساسية انه النسيب يسكن مع النسابة فهنا الوضع يوصف بانه رخمه مافي ذلك شك

وعلى فكرة حتى غيرنا من القبائل الاخرى ينظرون للرجل الذي يسكن مع نسابته بنفس المنظار

الضرورة طبعاً يا بنات.. زي ما قلتن
لكن المرة دايماً عايزة راجلا فارس وقدامي وشهم وشجاع..وكريم.. أهم صفات الرجال الكرم والمروءة.. وأهم صفات النساء العفة...
وكلما زادت محبة النسيب لأبو مرتو وأم مرتو، كلما زادت محبة زوجتو ليهو هو، هو المستفيد في النهاية..حتى شعورها نحوه كزوجة يزيد ويتنامى ويتسامى..وتحلق في آفاق بعيدة من بحبوحة الأنس والسعادة.
وكل ما أنفق على أهلا واحترمهم، وشعر بأنو هم هؤلاء النفر الذين أعطوه بضعة منهم، عشان تكون ملك له.. كلما قدرهم أكيد تقديرو بيزيد عند مرتو..لذلك لما يكون قاعد معاهم ملطوع في البيت طوالي ،داخل ومارق وراقد ونايم وحايم، ودارع جلابيتو.. أكيد روتين الحياة العادية البشرية وهو قدام عينهم، أكيد بينقص نظرتهم ليهو في حياة المعيشة اليومية.. هذا شأن البشر .. ونقصهم..وزول قدام عينك طوالي أكيد بتشوف نقايصو؟ حتى لو نهر أطفالو ساكت..الصوت يتسمع بي غادي عند نسيبتو.. تتأثر.. أحسن لزوج البنت يربي أولادو غادي غادي.. في صمت وفي عزلة .. ما يشوفوا نسابتو نقايصو.. حتى مرات بين الأزواج نفسهم، مرات بيكون في نهير وكدة.. ده ينهر ده؟
وغالباً الرجل المنصوري مرات ينهر..
المنصورية ما اصلها ساترة حال.. وصبورة.. وتعمل على السترة بالفي والمافي
لكن مرات زخم الحياة العادي، يضطر إنو يكون في نهيير.. وتاني ترجع الحياة لمجاريها بسهولة في روتين الحياة
........
اها لو بقا ساكن معاهم وأم البيت سمعت النهير ده بي فج الابواب والشبابيك، أكيد خاترا بتكسر.. وتقول مالو نهر بتي؟
أخير بعيد بعيد.. ما يصغر في نظر نسيبتو؟
شكرا للذين أثروا البوست بعد..

زي ما قال ليكم أبو مصطفى
( الرخمة كلاما صاح مائة في المائة)