ونـَـسـِـي في بـَـاشـِـي

م/ابوحنه
الان حصحص الحق
كلمه ارت اقولها لك منذ اشتراكى فى هذا المنتدى
اى موضوع تكتبوا انا بقراهو من الاول للاخر وبى تدبر وفهم لكن لن يزعفنى الحظ ان ارد الا فى هذه الباشى والونسى الكاربى لانو هذا واقع عشناهو وماجمله وانت تلتمس مواضيع شيقه وممتعه تزكرنا الزكريات الجميله وانت ذكرت فى بوست الاخ على عسى المحطه الكاب نزول انك تعرف الوالد والجد والاعمام جذاك الله الف خيرعلى هذا وهذا شرف عظيم

عبد الرحمن محمود كيف ما أعرف الوالد والجد؟؟ ديل علم في رأسه نار.. أول ما شفتا إسمك عرفتك؟ جدك النعيم راجل فارس متدين.. زول نكات هادفة.. ناس كرم.. ابوك محمود زكي.. زول دين.. وكلام كتير حلو عنو.. يسعدني. أن اقول لك أني حاضر عقد والدكم محمود على والدتكم في كسلا,... أبوك جانا عند ناس عثمان صديق.. في كسلا. كنا جايين أنا والوالد وعلي سليمان ابوحنة من وقر.. وابوك عندو معزة خاصة للوالد عبد الله.. عرف ابوي مع ناس عثمان صديق جاهو.. كلنا مشينا العقد.. الحقيقة محمود النعيم رجل يملا العين لامن تفضل. بس الدنيا ما مهلتو.. شد حيلك في الحياة وشكرا على التعليق الراقي عن البوست

الاخ الرايع ودابوحنه
زمان وقت الزمن السمح والناس الزنين
ابن عمنا احمد علي الحسن لمن دقت الطنبور تعجبي
يقيف في نص الداره ويقول كفرت يا مؤمن
يعني غايه في الابداع والجمال والروعه
وانت كذلك يا باشمهندس والله نترنح طربا زي الشبعانين من ذلك النضمي الجميل
مازال اليل طفل يحبي ونريد المزيد ميسنا بعيد تب

الاخ الرايع صديق
بكل رضا نحن تحت الخدمه وجاهزين
وفي انتظار رسالتك علي احر من الجمر
مع اجمل المني وارق تحياتي

أستاذنا الكبير الباشمهندس صديق تحياتى لك وللاسرة الكريمة ولك فائق الشكر على هذا الابداع الدرامى الدقيق فى السرد و المنظم فى التسلسل وما فى حاجة نقولها سوى نتابع بقية الحلقات .

ونسي في باشي3
أحمد: كدي ياجنا أمسكوا اللباريق غسلوا للناس، غسل ياولد لى عمك سليمان داك، وإنت شوف رفاقتك وأمشوا أمسكوا اللباريق..
سليمان: أها يا ولد جيب صابونتك وتعال جاي..
سليمان كب كب ياولد.. أتك ضهرك لاترشني بالموية,, ابوك ما علمك الكب!
سالم: ايي علمني..
إنت ولد منو!
سالم: ولد موحومااد ود علي
سليمان: ما شاء الله.. ابوك وين!
سالم: ابوي يخدم في الطين في الكلاكلة
سليمان: ما قلت لى يا جنا، ابوك علمك تمسك اللبريق كيف؟
سالم: أول حاجي اللبريق ما أملاه شديد، عشان ما يدفق فوق جلابيتي، وبعدين أتكي ضهري وأنا بكب.. وأكب شويي شويي، لامن الزول يبل إيدو،بعدين أناولو الصابونة، يدعك، يدعك لامن الصابون يرغب في إيدو، بعد كدي أزيد سرعتي في الكب لامن ينضف إيدو من الصابون،أكب أكب لامن يملا إيدو يوديها على خشمو الزول ، يمصمص، بعد كدي أشيل منو الصابونة، وكان قال لى جنا شوف لى قشقيشايي أنضف بيها سنوني! أشوفا ليهو، ونكون خلاص إنتهينا.
سليمان:طيب إنتا قلتا لامن إيدو ترغب، النفرض إيدو ما رغبت ملاني قش ماعط ليهو بيها عروق لوبا، ابت ترغب.قدر ما دك ودعك بالصابونة. تسوي كيفن!
سالم: اسكت أكب لامن ترغب..
سليمان : ماشاء الله.. ما شاء الله.. ابوك علمك تب..كدي خلوا تعليم الغسيل، تعليم المدرسة كيف؟ وصلت وين لوحك وصل وين!
سالم: أنا في سنة تانية ياعمي
سليمان: نتحوكن. أدوكم إمتحان! طلعت كم! بتل رفيقك داك يرعى في الغنم، والله لوحك طلع فوق!كان ما شديت حيلك خدمة الطين راجاك.. والطوريي راجاك.. و البوغة راجاك,,
سالم: إمتحنونا، وطلعت التاني..
سليمان.. ما شاء الله. شد حيلك عشان تروح المدارس الكبار تطلع مدرس زي ود حليمة، تريح ابوك شويي من خدمة الطين!
سليمان: هوي يا ناس هوي، العندو صعوط كدي يجدعنا بي حقتو جاي
بكري: هاك هاك يا عمي سف.. سف
سليمان: بكري يا زول.. الصعوط الناجم ده جبتو من وين! داسي علينا بكانو والله شنو؟
بكري: ها هاها.. المهم إتكيفتا.. مالك بي بكانو
سليمان: وحات مديني أمك.. عللي أعرف بكانو!
بكري: إنت قايلو صعوط من ناس بي هني ديل!
سليمان: أها من وين!
بكري: ده صعوط سورج من الخرطوم يا حاج.. أنا من أجي ولامن اقوم ما بسف من دكاكين بي هني ديل.. ندبغ شلاليفنا ساكت عطرون! ديل يجيبوا الصعوط نمرة تلاتة ويملوهو عطرون.. شن عرفن بالصعوط، هسع ود سليمة ده فاتح دكانو الصعوط ما بيعرف يمطرو. ولاهو قاعد يسف!
بكري: تعرف ياحاج سليمان. يقولك رطل الصعوط الناشف يشيل تمن رطل عطرون، ده الصعوط الناجم، كان زدتو يدبغ شلاليفك.. أنا عادتي أول ما أنوى السفر على المناصير، طوالي أروح ناس سورج في الخرتوم، أسوي لى تلات ارطال في شنطتي.. أول البارح شطبتا حسابي عند قسم السيد هارون في السوق العربي وشلتا قريشاتي وطوالي مشيت على ناس سورج.
سليمان: خليناهو سورج، إنتو الحقق السمحي دي بي تجيبوها من يين! حقق شاي البحاري دي! أنا لليلي حقتي علبة طحينيي!
بكري: ها ها ديل مجدعات زي الشي الكعب فارشين قدام دكان ولاد ملاح..
سليمان: أها يا جنا النقوم نمشي نخبر بكانا. قالوا البيوت قسموهن.. الأخوال براهن.. وناس القبليي براهن.. وناس المغربيي براهن.. وناس الجزاير براهن..
بكري: أها إنت ياعمي سليمان مع الخلالة والله مع المراسة
سليمان: ها ها ها.. خليها مستورة. بعدين وكت النهار يحمى تعال فتشني! والله تلقاني في اللعب، كراع الحاجي دي الهزعة تخليها.. ونسوي الصفقة دنقير لامن نجيب الموية نرقص في بنات الشيخ

مصطفى عمر الحسن.. وين أحمد علي الحسن الآن.. زمن ما شفتو!!! راجل فعلاً مرح جداً...
أها عايزين نستعد نكتب من جديد
ونسي تاني
حكاوي في البوش
بالإضافة للحاجات التي ذكرتها
يا ربي مهيلي.

الرجال أكلوا..
والصواني ودوهن بيوت الحريم.. والحريم أكلن والناس بعد شويي راح تنزل اللعب في التمر..
وراح يتوروا المراسة والخلالة من بيوتهم .عشان يعمروا اللعب.. ويحرروا اللعب. وينقزوا لامن يجيبوا الموية.. يسووا الصفقة دنقير.. زي ما بيقول سلمان عقيد عثمان

روقوا كدي أدوها صنة
مافي عسل زي عسلنا

تسلم يا بشمهندس لكتابتك الرائعه
ربنا يوفقك وفى انتظار المزيد

أختنا بلسم دي ظاهر عليها زولة ذواقة وحساسة ودقيقة وذكية وذات خلق.. ربنا يحفظها..

(إدريس الصادق... جاب الطش)

محاسن.. لأني عشت الحكاية دي كلها في البلد.. مافي باشي بي تفوتني أو طهاري. أو بكا.بعدين نحنا ناس يفقدونا في الملمات..مافي طريقة زوغة.. بكل تواضع اسرة معروفة في المناصير من العال وحتي برتي، لما قدمناه من خدمة للمنطقة في ترقيتها والعمل على تطويرها..
الوالد رفع مستوى المناصير من السفر بالحمير الى السفر للكاب باللنش
الأخ عمر صاحب باص ترحيلات المنصوري.. المناصير أم درمان.. ثم العمل في خدمة اللواري لعشرين سنة رحمه الله
خلوة بلا فخر تطعم المناصير وضيوفهم بالليل والنهار لمدة90 سنة.. جميع وجباتنا نأكلها مع الضيوف حتى لحم السوق.. نصيبنا فيهو زي نصيب الضيف.. مناصير عتمور مناصير بحر يمروا علينا ونسمع أحاديثهم وكلامهم..
عشان كدة ما كنا نغيب عن افراح الناس.. والكشف والعانة.. الدفع يعني..
يلومونا الناس
عشان كدة خفضنا لهم الجناح
حتى ندخل قلوبهم..
قليل من يدخل قلب المناصير
لأنهم أذكياء
الوالد مرات يكون مشغول
يا محاسن...............
اقوم أنا بمجاملة الناس في أفراحهم وأتراحهم
لى برتي مشيت
وللجزاير
اتوكرت جزيري جزيري شرق وغرب مشيت
للعال والشمخية مشيت
لى مناصير نهر عطبرة
ومناصير كسلا ووقر وأروما وتندلاي والسراي ودرديب وهمشكوريب وصابون مشيت
مافي عذر
امام مناسبة كل منصوري
الناس يلومونا
عشان كدة يا محاسن
هذا السرد
الذي تسمعينه ليس خيالا
ولا من نسج القصص
ولكنه الواقع المعاش

يا أخونا صديق لك التحية عمي إدريس الصادق ده مالك ذكرته كده وخليتو مثل الشايب المعلق (لناس الكتشينة ناس شرري) وماك عارف إنه الصادق ود إدريس شقيق حبوبتي أم أبوي زينب إدريس حوري وهي ابنة عم الحوري في الباوقة وزوجة جدي مصباح رحمهم الله جميعا وإذا غابت عليك قصة جاب الطش أسأل عنها ناس محمد بروي ناس فقاعة بيذكورها لك.

حليل هذه الأيام ياصديق وحليل زمن اللعب في التمر وذكريات العوم والرمرمي وشيل الهدوم وبت قيقة والنحاس الشفناه في طهارة أولاد الرشيد لو تتذكرها الباشي كانت 15 يوم وما شاء الله عليك حافظ ناس شري كويس. أما ناس الحوري فقرية الودة في شري هذه يسمونها ودة الحوراب . ناس الصادق ود إدريس حوراب، وناس بنت أهلنا والدة ناس القاضي الحاج وإخوانه من الحوراب. في ودعيسى ناس بنت خليفة زوجة حسن الفكي من الحوراب أضف إليها ناس الطنبوري، وفي المتيرة ناس ود النعمة من الحوراب وفي أم لقاديب المصابيح من الحوراب، وفي بهية خدوم بنت صادقابي من الحوراب، وفي الودة خليفة ود إمام من الحوراب، وما تنسى ناس حليمة بنت أحمد، وناس البحاري، وزهرة بنت صالح يعني باختصار ديل كلهم أهلنا واحسب من فيهم بالمنتدى.

ذكرتني الرمرمي..محمد حسن الكاب.ز هو كان لما يجي من وقر بيكون راس الهيصة ومن الناس البي يكوركوا ( ادريس الصادق جاب الطش) وكان هو حريص أي إجازة صيفية يقضيها في شري .عشان العوم والصفوري وأم راس وأم نص.. والمعصود. والبوش..

ياابوحنه سلام ومحنه:
والله دى ماها ونسى فى باشى دى الباشى ذاته وماها صورة طبق الاصل دا الاصل ذاتو
انا متأكد تماما ان كل من مر من هنا وقرأ ونسة الباشى هذه عاش معها بكل احاسيسه كأنه كان حضورا فى هذه الباشى بشحمه ولحمه.
حرام ان يضيع ماتكتبه من غير توثيق
تقبل مرورى.

مرورك مقبول يا ود البلد يا ذواقة
.....
الإنترنيت يا ود البلد مقروءة أكثر من طبع الكتب.
الزمن سرعة الإيقاع
كاد أن ينتهي الكتاب.. موجود بس موش بنفس قوة زمان

الونسي دي عايزة ليها كلام لسه ما نزلنا التمر .. اللعب في التمر.. الحريم لما يزهجن من عوين الباشي ويكملوا موية السبايل والجراري يطردنهم ويقولن ليهم يلا يلا أجروا التمر اللعب بدا..
دحين أنا عايز أكتب عن اللعب.. والسيرة والقعيييدة وحاجات تاني.. وماني قادر مشغول .. ربنا يسهلا...

الاديب الحنونى
اجمل ما فى هذه الونسة تقسيم الفصول
الفصل الاول :الاستعداد للباشا والذى اظهر تعاون وتكاتف اهلنا المناصير فى مناسباتهم ومن خلاله ادرج اديبنا صور اجتماعيه لحياة المناصير.مشكلة الارمله مع نسيبها وحياة الطيانة (الحياة الزرزورية كما يسميها احد فلاسفة المناصير البسطاء ) اى تجمع كميه من الطعام وترجع لاولادك حتى تكمل ما جمعت ثم ترجع مره اخرى.
والفصل الثانى:اكرام المدعوين :وهنا اظهر اديبنا كرم وحفاوه اهلنا المناصير وتقوية الروابط الاجتماعية ودعم التعارف من خلال المناسبات الاجتماعية وعظمة المرأة المنصوريه كتلك التى تحتضن ابن زوجها. ايضا ثقافات المناصير الخاصة مثل نظام (البيوت) فى الاعراس الذى اعتقد انه خاص باهلنا المناصير .
الفصل الثالث:ما بعد الوجبة وفيه اظهر اديبنا كيفية كرم المناصير واهتمامهم بالضيف لاخر لحظة وهو علم الاتكيت الذى يدرس حديثا .
يظهر انه اديبنا كان من من يديرون المناسبات فى المناصير

الضيف عند المناصير بالذات بالغرب ما بيتحير قبل ما يسال عن حاجته يجد من يوفرها له

هويدا حللتي الموضوع تحليل رائع!! إنت اتخرجتي من الجامعة بتاعة آداب والله شنو؟
أميرة الحومري أضافت.. وسلام لى كل ناس الحومري في البلد وفي الجيلي والكدرو والعاصمة وسلام خاص لعبد الله علي الحومري.. أستاذ الأجيال..

(ضهلانين)
قبلتها يمين شمال ما عرفتا معناها

بدون تعليق يكفى نتابع حتى لا يكون بيننا وسردك الجميل الرائع فاصل ونواصل ولكن واصل ونحن لك نتابع

الرائع الأديب الأريب ود ابحنة .. أعجز عن التعليق على الموضوع .. فملامسة الواقع دائما تلامس الدواخل ..
ونحن ايام المدرسة المتوسطة في شري كان يستهوينا المديح ونستمتع بتوليع النار لتحميس الطار لاولاد حاج الماحي عند زياراتهم الدورية للمنطقة ونستمتع جدا برقصة عمنا العوض والد الاستاذ المربي ( ود العوض ) وهو رائع جدا في تعاطيه للمديح
ياللا ورينا حاجات عن المديح وحلقاته وذكرياته

بجيك للمديح يا ود المناصير.. لكن تلقى طائفة عن المديح في بوست أحمد الحسن عثمان
نورة
قلبيها جنوب غرب تعرفي معناها..
( ضهلان وضهلانين) وردت في القاموس

الرائع دوما المهندس صديق ابوحنة ماوصفتة فى ونسة الباشى يترسم فىدواخلنا حنين و ذكرة ولهفة للبلد واللمات واالله من باشة البلد نحن كنا فى الزمن داك نلعب صغار مع الجنون وداخلين ومارقين من الخس الفى يدو لحيمة وعضم ذى ما تقول والحروم والحبوبات يقوللن ياولاد ماتحوصو وتبوصو شكرا الرئع صديق لكن يادى الصديق انت بالرغم الغيبة فى دول المهجر الكلمات ديل كيفن مايهفن عليك. لك الود والحترام عشت ذخرا للاهل

نفيق نواصل في الونسي دي

عايزين ننزل التمر، نسوي الرتوتي... اللعب بدا..

راح ننزل التمر. الولاد والبنوت نزلوا التمر.
اللعب بدا
راح نبدا اللعب في التمر
نسوي الصفقة دنقير
نسوي الرتوتي
نجيب الموية
زمان ظهرت موضة في شري في الصفقة. صفقتين ونقرة كراع والزول يطير لافوق وينزل تاني
وكانت موضة عجبت الشباب
وكان حريف فيها
سليمان محمود توم
والشمباني عليه الرحمة
ومن الغرب
حسن محمد علي القاضي
ومن الكاب
الطيب سر الختم. افتكر هو من أم سيال
ومن العرب عرب العتمور عمر سعد
ومن برتي خلف الله محمد علي كباشي
ومن قرية الكحولة احمد الحسن احمد كحيل
ومن سور. عمر ود السلومي امو الكمندة
...............
اها لمان ظهرت نوع الصفقة الجديدة دي
وهي شئ اشبه بعمل الكورس في غناء الطنبور الآن
الحكاية دي
سرقت الاضواء من الصفاقين المعهودين في البوش
اللي هم الطيانة( الغباش)
قوة وضرب كف ورتوتي لامن اضانك تسوي الصووو
اها الكلام ده ما عجبهم الطيانة
........
عمك محمود الملك من فقاعة
كورك مرة في اللعب في عرس الدمكي في شري
يا ولاد هووووي
خلونا من صفقة ناس الكابلي وابراهيم عوض دي
دقوا الكف
جيبوا الموية جيبوا الموية
والله اطلعوا من الدارة لى اسيادا
الغباش طبعا مثقف
رائد الثقافة لأنو كان بيمشي الطين ويعرف الخرطوم وثقافتا وفنانينها قبل الناس
لمان كانت الخرطوم قبلة الانظار
لمان كانت الخرطوم ترمي قشة تسمع صوتا من الهدوء
لمان كانت الخرطوم ورقة واقعة ساكت مافيها من نضافتا

نتابع ـ نقرأ ـ نرشف ـ نهضم ـ ونقول الحمد لله

الله يديك العافية ـ باشمهندس ود ابو حنة

رد: تـنبيه هام
من طرف سلمان عقيد النعوفابى أمس في 8:39 pm

.+
----
-شكرا الصدوق—(لكن اسع
القباضة دى نختها بى هنا واللا نمشى بى غادى-)
فقد ذكرتنا تلك الايام—وفعلا عندما تكتر الناس وتملأ الضللة والولاد يكملوا الموية يلزوهم على
التمر كما ذكرت –حتى يتفرغ الناس (حريم ورجال المجهاد) لاعداد الغداء—وهذه ايضا تحدث عندما
تكتر الناس فى الغداء(وليست من قلة الاكل ولكن لان كل الناس تأتى فى وقت واحد من
اللعب فى التمر) وتدور صحون وصوانى الدنفريس—فيحدث بعض الارتباك لناس المجهاد
فيحسم دائما بان يطلعوا العنقريب والبرش (ويعد العريس نفسه بالحمام ولبس زى القعيدة والسيرة)-فخروج العنقريب يعنى
بداية القعيدة ويسارع الكل لحجز مكانه –وغالبا ونحنا كشباب ما كنا نركز على الغداء
–واحيانا قد يكون هنالك عداء اخر او شربات لدى اهل العروس لو كانت قريبة-
اما اللعب فى التمر
فقد وفيت وكفيت فى الشرح—وجاييك راجع

رد: تـنبيه هام
من طرف ود المناصير اليوم في 12:52 am

.+
----
-الباشمهندس ... صديق ... سلام

والله ذكرتني ... اللاعب البلعب ضربة الكورنر ... ويجري يحصلا في خط ستة ويضربا هد ويجيب قون

صدقني مرات نحس بي كدا ..

تلقى الموضوع جميل وشيق .. والناس تتفرج عليه ..

وكلمة عوافي ما في ..

على كل حال اظنو في مشكلة في كيفية متابعة المواضيع بالمنتدى

وكتير من الناس ـ تجوط ـ عليه الحكاية وما يشوف بعض المواضيع

تشكر يا باشمهندس على التذكير والتنبيه ـ ونمشي بي غادي ـ تغدى دنفريس في الباشي ـ ونسمع الأخبار ـ من الجاي والماشي.
ود المناصير
عضو هام




عدد المساهمات: 2839
نقاط: 11181
تصويتات لمشاركاتي: 22
تاريخ التسجيل: 05/04/2010





.

رد: تـنبيه هام
من طرف عباس محمد اليوم في 12:44 pm

.+
----
-والله يا ودالمناصير نمشى بى غادى ونتغدى تنفريس فى الباشى
ونسمع الاخبار من الجاى والماشى دا كلام جميل
لقد اندثرت تلك الكلمات مع العولمة.

رائع يا باشمهندس صديق
وشكرا على التنبية
دا كلام دايرلوا رقده فى البيت بعد الدوام
وتفتح الموبايل وتتابع وتقرأ وتستمتع لمن عيونك يصرصرن
وترقد تنوم وهاك ياصباح خروج للعمل وتمشى تتابع الباقى فى المكتب
هذا هو الاصل الثابت فى موطن اجدادى

ما وثقتموه عن اهلكم من تراث وثقافة محلية
ارجعتنى تماما لما كتبه القامة الاديب الطيب صالح
والذى نال به الجوائزالعالمية فى الادب.
كتاباتكم تذخر بالكثير من المفردات المحلية وتحكى عن واقع المنطقة
اجمل مافيها الحوار الذى يدار بين الاشخاص يجعلك تعيش الواقع كما هو
ارجوا ان توثق هذه الكتابات لكى تجعل منها كتابا عن المنطقة يحكى عن ثقافتها وتراثها

لك التحية والتجله
هذا التعقيب من الاخ صلاح ابوعاقلة
صديق لابناء المناصير