كـــــــــل عــــــــــام وأنتـــــــــم بخيـــــــــــــر

الاخوه اعضاء المنتدى بدول المهجر
السلام عليكم
هذه الايام وانتم تستعدون لحضور عيد الاضحى المبارك
نسال الله ان يسهل طريقكم وتوصلو للاهل بالسلامه
ونريد ان نذكركم بان السودان ماعاد كما كان قبل مغادرتكم له اخر مره
فقط احملوا معكم ماخف وزنه واتركوا الشنط والعفش الكتير
اقرب شارع للمطار او الميناء تشترى ما تحتاج له من ادوات كهربائيه واجهزه الكترونيه وكل مايلزم خاصه لو اخدت تاكسى او ليموزين واتجهت لسوق ليبيا بام درمان
بس المره دى لو قدرتو جبتو خرفان معاكم يكون احسن لان كل خرفان البلد دى سافرت بره
مااريد ان اقوله فى هذا البوست ياريت كل الاخوه القادمين للسودان
يسجلو اسمائهم ادنى البوست ومكان اقاماتهم وموعد حضورهم وميناء الوصول
ولو امكن برنامج اجازاتهم
وندعو لكم بسلامه الوصول وانشاء الله كلكم من العائدين بالسودان

شكرا اخوى الحاج على هذا البوست الجميل المواكب—
اما العيد فلابد ان يكون فى البلد وخاصة العيد الكبير –وياخى ماتعذب الطيور المهاجرة التى تحول الظروف بينها وبين الحضور للسودان –نحنا ذاتنا نعمل المستحيل عشان نعيد فى البلد—رغم ظروف االعمل الضاغط جدا –وبالمناسبة زمان نجد الاجازات طويلة ومريحة الواحد يعيد مرتاح ويجى يصل الشغل (دور العيد يقوم قطر الطيانة) ويمكن السفر كانت يستغرق وقتا بالقطر—
على كل هنالك فرق كبير بين العيد فى الصعيد والعيد فى البلد وبين الماضى والحاضر زمان نقعد لحدى ماناكل الربيت –وزحمة البوش(العروسات) والطهارى (الطهور) وزمان كنا نشرب النبيت فهو هاضم جدا ومسكر والان الناس تشرب الشربوت فهو ايضا هاضم جدا ولكنه غير مسكر(الواحد يندروخ كدى وياخدلو نومة ويصحى جعان) والنبيت خطير جدا ولايكاد يخلو بيت زمان منه فى عيد الضحيى –وانا اتحدث كشاهد عيان ومجرب –مش كده ياصديق–اما الظواهر الاجتماعية الاخرى فتجد كل او معظم اهل المنطقة او القرية المسافرين يحضروا العيد وهذا سبب اختيار تواريخ تلك المناسبات—والكل يعمل جاهدا لترتيب وتوفيق اوضاعه لحضور العيد—والواحد مرات يقول ليك انا العيد(الزل—او الضحية الزلت) انا ماسافرت البلد فلازم السنة دى اسافر وهكذا –
اما هاجس الخرفان يالحاج وحتى عن قريب كانت ليست هنالك مشكلة اما الان فالهاجس لكل الناس ثمن الخروف والذى يتحدث عنه الناس الان—
الحديث عن العيد وطقوسه كثيروقد عبر عنه شعراء كثيرون من المنطقة والمناطق المجاورة وخاصة الشايقية ولى عودة لهذا الموضوع ولكن عشان تكتمل صورة العيد وطقوسه وبرامجه اريد ان اورد هنا قصيدة للشاعر الاستاذ محمد الحسن قمر الدين التى صورت العيد باسلوب السهل الممتنع—لنعيد الذكريات للناس—وانا متأكد من كان متردد فى السفر بعد قراءة هذه القصيدة سوف يغير رايو--


لو بقيت بالجد زول سعيد
فى البلد يوم تحضر العيد
وتبقى جيت من مدن الصعيد
فى الملابس شايل الجديد
والقروش فوق المليون تزيد
والأهل مبسوطين شديد
كل زول يطلب ما يريد
فى قرايبك حتى البعيد

وتبقى راجى العيد منتظر
وماتحاول تبعد شبر
تتمم الناقص تنجبر
وما بهمك لو كان كتر
ولى حلاوة العيد تحضّر
وحتى للشربات والعطر

ويوم يكون للعيد باقى يوم
ويسهر الترزى مع الهدوم
والفرح مالى الناس عموم
ومن عيونن طيّر النوم
فى الدغش بدرى الحرّوم تقوم
اللقيمات تلقاها كوم
والفطير فى صحنو مردوم
واللبن فوقو سمن يعوم
والشعيرية محضّرة
والشاى كبابيهو متمرة
والفوط سمحة مشجرة
والأكل داك شيتا برا

والخلق قامت بدرت
أتسمحت واتعطرت
وبى ملابس العيد غيرت
والمراتب افترشت
والملايات فوقا ظهرت
والصوانى خلاص أتملت
والخلق جملة استعدت
يتلموا عاد الناس للأكل
داك قاعد وداك ينزل
وداك ياكل وداك يغسّل
فلان وصل وفلان ما وصل
دا الصحن مليان وداك كمل
كل زول يشبع يندبل
ويركب الشارع يقبّل
بى صينيتو سماحى يقدل

والاكل بعدو الزيارات
نمشى للجيران بانبساط
ونرفع الليد لى سلامات
والقابلى عاد ان شاء الله عرفات
المباركة والتحيات
وأحلى بسمات وأحلى موضات \
والترابيز فوقا حاجات
ولى فتايل الريحى جاهزات
وهاك حلاوة وجاى شربات
والفطير حتى اللقيمات
والخبيز تلقاهو مرات
وفى الزقاقات والممرات
داكا جاى وداك قريب فات

ومن بعد دا الحال يصلّوا
والمديح لابد يقولوا
ويرفعوا الفاتحى ويشيلوا
وبى دريبن عاد ينزلوا
يمشوا للماوصلوا يصلوا
وكل زول يرجع محلوا
الاكل راقد يخلوا
ومن قبل من الناس يملوا
يظهروا الخلان يطلوا
وزى بشاير الخير يهلوا
وبى كلامن زين يسلوا
والحديث بالحيل يعدلوا
يطروا للرحلات يدلوا
والمهرجان معروف دا اصلو

تلاته يوم والعيد فات رحل
وكل زول يرجع للعمل
البعيد لى سفرو عدّل
والقريب لى شغلو عجّل
واى زول فى دربو قبّل

الاخ الحاج دى للزول الهنا تحرك مشاعره فكيف بالطيور المهاجرة--

الاخ سلمان
بعد كلامك ده مافى زول منهم ح يرد
يقرو ويتخارجو دون تعليق
لان معلوماتنا تقول مافيهم زول جاى
واللوارى ح تجى راجعه البلد فاضيه
الاخ فارس هو من صرح بالحضور ولكن تعارضت اجازه الاولاد من المدرسه مع اجازته ولغى الجيه بعد ان رصه الهديمات فى الشنط
اما ناس الرياض مامنهم خبر ولكن انا اعرف من هو قادم من هناك من غير اعضاء المنتدى
اما ناس الامارات وليبيا والهند وهولندا اكيد اخبارهم معاك
فى الختام نتمنى ان يكون حضورا بيننا الاخ محمد البروى لتعويض الاجازه الضائعه فى جده
نواصل حتى ليله العيد

الحاج اخوى---
لقد صدقت فيما قلت الجماعة يقروا ولا يردوا
لكن لابد من العيد فى البلد وان طال السفر--
ياالهى اكون سعيد امشى فى شرى (بسوى ) والحق العيد وعلى هذه الشاكلة--
--جاهو العيد كمان زاد القيب حسرة سادى العبرة حلقو ونفسو منكسرة--
والكثير منها مايزيد الحسرة والبكاء
ولى عودة--

الجماعه ديل يظهر عليهم مافى زول جاى منهم

او يريدون ان يقضو اجازه دون ازعاج

الــعــــيد دور اللــيــــلــة

كل عام وكل أمة محمد (ص) بألف خير

وربنا يتقبل من الحجاج

ونتمني من الاخوان/ت حجاج بيت الله أن لا ينسونا من صالح الدعاء

وللذين لم يحجوا ربنا يسهل لهم حج العام القادم باذن الله.

وأنشاء الله أبي يرجع بالسلامة قولوا أميييييييييييين .

إن شاء الله يا هناء يرج أبوك بالسلامة وربنا يتقبل ونحن من هنا نسمع بهم طيبين ولكن لم نستقبل إي اتصال من أبيك وكل عام وأنتم بخير

سلامات اهلنا وعيدكم مبارك
وصل احد الطيور المهاجرة طائر صغير يدعى mansory@ooty وحط رحاله بالمناصير بالامس....
هناء وانتى طيبة وربنا يرجع والدك ووالدى كمان بالسلامة وحجا مبرورا

الأخوان خال أبرار ومصباح
انشاء الله تامين ولامين .
حجا مبرورا انشء الله .

الاخت --هناء سلام--
لقد تم دمج موضوع الاخ الحاج مع موضوعك ليكون بوست واحد للمعايدة والتهنئة بالعيد--
تم اختيارعنونك (كل عام وانتم بخير) --اتمنى من كل الاخوة المعايدة من حلال هذا البوست ان شاء الله --
وحجا مبرورا باذن الله لوالدك ولوالد خال ابرار--

مشكووووووووور الأخ سلمان

كل سنة وأنت طيب --- والقابلة على أمنياتك .

كل عامممممممممممممممممممممممممممممممممممممممممم وانتممممممممممممممممممممممممممممممممممممممممممم
بخير ؟؟؟


ابو مصطفى

كل عام وأنتم بخير وكل سنة وأنتم طيبون _ نسأل الله أن يعيده علينا وعليكم بالخير واليمن والبركات وعلى أهلنا المرابطيين بديار منصور بمزيد من التنمية والإستقرار مع إستلام حقوقهم كاملة غير منقوصة_آمين يارب العالمين _

كل عام والجميع بالف خير .وربنا يتقبل من جميع الحجاج .

كل عام والجميع بخير—
وان شاء الله من العايدين –
ياجماعة عايزين الناس المسافرين والناس المعيدين هنا –
بعد ان تأكدنا من عدم مقدرة الاخوة بدول المهجر من الحضور للسودان واخرهم كان الاخ فارس والذى عاكسته الظروف فى اخر لحظة—
اما الاخ الريس خالد فهو تقريبا مسافر غدا –وطبعا الاخوان الرشيد والحاج ويس وهاشم وعادل شررى والطيب وكثيرين معيدين هنا –وكما ذكرت ان العيد الكبير ان لم يكن فى البلد فليس بعيد ولكنها الظروف –
للجميع الامنيات المباركات والتهانى الحارة بالعيد

العيد مبارك وكل عام وانتم بخير اخي سلمان انا معيد في البلد وليس هنا حسب رغبه الاولاد وهنا اعني الاولاد ومش امهم فلقد اصبحوا متمسكين بان يعيدوا العيد الكبير في المناصير بعد ان جربوا مرتين لكن ياسلمان انا الدور ده مسافر بعربيه صالون وبين وبينك خائف ( لحدي برتي ومن برتي باالمركب الي سور)
والان بعاين في الخريطه في جوجل وبفكر في الطريقه التي اقطع بيها خور اب سباع وتحديدا بالقرب من الابراج العربيه كويسه لكن ( واطي ) غايتو الحكومه مصره نمشي باالعربيه واخوك خلاص حزم امره باقي قبل ده ياسلمان وتحديدا قبل سنتين سافرت بعربيه دفع رباعي وكانت تمام الا اني تهت والليل دخل علينا في وادي ومعي الاطفال والمويه كملت وكان القرار ان ننوم في محلنا الي ان تصبح وفعلا قد كان وفي الصباح استطعنا ان نعرف الطريق ونواصل المسير ولكن كما ذكرت لك العربيه كانت تمام
الان سوف نغادر تقريبا يوم الاحد صباحا ونتلاقي في البلد ياسلمان ضروري ونمشي لخالد وصالح والحاج اذا سافر يعني نعمل برنامج هناك واقترح ان تكون هناك رحله ثالث ايام العيد في منطقه ثاني او بئر ام احمد في وادي اب سباع التلفونات بينا

كل عام وأنتم بخير وكل سنة وأنتم طيبون _ نسأل الله أن يعيده علينا وعليكم بالخير واليمن والبركات وعلى أهلنا _آمين

ياجماعة الباشمهندس هاشم مسافر—ومعيد فى البلد وسوف ياتينا بالاخبار –وانا معيد هنا بكل اسف –وعيد الصعيد رغم ان الواحد مع الاسرة ولكن للبلد طعم خاص وكما ذكرنا خاصة فى العيد الكبير –
واتذكر هنا الاشعار التى تبادلها الشاعر حميد مع شقيقه ابراهيم فى احد الاعياد حيث قال ابراهيم:
ازيك سلام حميد ----صباح العيد
عاد العيد هناك كيفن ---وكيفن فى الصعيد الحن
فى بعدك لقانا العيد زى زولا لبسلوا جديد
وماسالملو زول بى ايد
ورد عليه حميد:
برضو على مر العيد وزى ما مرّمن سنوات
مضلم مامعاه جديد بلا حسرة وكنز انات
وبرضى برايا عادى العيد اغتى وجعتى بالبسمات
---للجميع حبى وتقديرى –
وكل عام وانتم بخير

انشاالله من العايدنوا وراجنوا وربنا يحقق اماني الجميع

الاخوه الاعزاء بالمنتدي
لكم اجمل التبريكات بحلول عيد الاضحي المبارك اعاده الله علينا وعليكم باليمن والبركات
وبلادنا تنعم بالسلام والرخاء واهلنا رجعت لهم كل حقوقهم باذن الله

الاخ صالح غادر اليوم في طريقه للمناصير وانا الان يستعد للمغادره صباح الغد طبعا هناك ططقوس خاصه انا من المعجبين بها ومنها وفي الطريق وبعد ان تتعدي خور اب سباع توقف في ظل شجره وتشرب ليك شاي ويكون الوقت عصير واذا الامور ظبطت صاح وبتعرف الدرب تمر علي جبل الباقدان ومن الناحيه الشماليه هناك بئر العد الطوال وتحت الجبل وفي الوادي ( هناك ملتقي اوديه كلها تتجمع لتشكل مصب وادي الكربكان الحقيقه هي نتايل ) في هذه المنطقه تقعد عصير متأخر الي ان تغيب الشمس وتشرب شاي المغرب ومن بعد داك والليل يبرد تأخذ قلب الوادي وتنطلق تمر بي بئر في الوادي وبعدها تنحرف يمين وتطلع من الوادي متوجها الي طريق مشرع الحمير وفبله مشروع الابل
ياسلام ياسلمان تكون حاجه تمام اجمل حاجه هواء الليل في ذلك الوادي لكن العربيه لازم تكون تمام
دفع رباعي بنزين ماتشيل هم ( انا الدور الفات ما استمتعت الخوف والشفقه من عدم المويه التي اخطأت التصرف فيها والاطفال وما معي زول طبعا تكون اجمل لو في رفقه ومجموعه مع بعض )
غايتو انا مصر وناوي علي رحله زي دي وقدر ما لوحت في المنتدي مالقيت زول يسمع لي او يتصنت

ياصديق لا تنبش الماضى البعيد
ولاتهيج الذكريات---والله نحنا فى الخرطوم العيد ماعاجبنا--
برضو المعايش والاسر والعيال والسفر---
----للجميع ان شاء الله من العايدين --يعود ونرجا طيبين سالمين وتامين

كل عام والجميع بخير
حجا مبرورا وسعيا مشكورا لحجاج بيت الله الحرام

كل عام وهذة الكوكبة الفريدة من ابناء المناصير تنعم بالسعادة واهلنا يمن اللة عليهم بكل خير

كل عام والجميع بخير
ياصديق فى ناس كدى الظاهر اتمسحوا مسوح العيد وابتعدوا من (الكى بورد)-
منهم الحاج --يس-- الطيب --ودبروى --عادل شررى --ذكرت هؤلاء فقط لعلمى بانهم لم يسافروا--
على العموم كل عام والبلاد تنعم بخير والمناصير بالف خير

كل عام والجميع بخير
وعيدكم مبارك
وان شاء الله من العايديييييييييييييين

كل عام والجميع بخير
وان شاء الله من العايديييييييييييييين
وانشاء الله السنة الجاية نرجاه تامين ولامين (وقابضين)
ونقول مبروووووووووووووك للعرسان من ابناء المناصير بالمحلى والفداء والمكابراب وبيت مال وعيال انشاء الله .
ونقول لاخوانا الطلبة بالجامعات والمعاهد العليا القابله خريجين
ونقول لاخوانا الخريجين القابله موظفين كبار
ونقول لاخوانا الموظفين مزيدا التقدم .
ونقول لاخوانا الفى الغربة ربنا يرد غربتكم وتعودوا الى اهلكم غانمين سالمين
واعفوا مننا وعافين منكم لله والرسول

كل عام والجميع بخير ---
التهانى والمعايدةليست بالمستوى المطلوب--يمكن السفر --او المعايدات على الاهل--ويمكن اكل الشية ثم شرب الشربوت --والدروخة ثم النوم العميق --
على العموم كل عام وانتم بخير والسنة الجاية كل منصورى ماخد حقوقه من هذه الحكومة او غيرها فى انفصال مافى انفصال-

عيد باى حال عدت ياعيد
بما مضى ام لامر فيك تجديد
ولسان حالنا يتمنى امنيات المتنبى المستحيلة
فلا هو حكم مصر ولا صرف اهلى فى المناصير حقوقهم كاملة
والعيد بهجة ومسرة وامانى سعيدة
والعيد يوجع فى القلب عندما تكون بعيدا عن الاهل والاحباب
فلا تكفيك خطوط الهواتف ولو كثرت وكثر رصيدها فى اطفاء الاشواق
ويمضى قطار العيد ويكاد لا يتوقف فى محطتك او هو لم يتوقف فيها اصلا .فأهلى كل عام وانتم بخير ودار ود قمر منارة لاهل الشمال .

من صعيد عرفات الطاهر ومن جوار بيته العتيق ومن البقعة التي حوت معالمها أقدام الرسول الكريم (صلى الله عليه وسلم) نزف إليكم إخوتي في المنتدى ولعموم أهلنا في المناصير أسمى آيات التهاني والتبريكات
وكل عام وأنتم بخير
أخوكم / حسن مكة
حجارها جبالها دي الزّي مكة ما في فرق
عشان كده أصلي أهواها وأزيدها عشق

اوه اخونا حسن مكه وانت بخير والقابله علي الامنيات الطيبات

الاخوة والاحباب بالمنتدي الرائع جدا
انشاء الله العام القادم كلنا نكون بجوار بيته الشريف ونزور قبر الرسول صلي الله عليه وسلم
أّأّأّّّّأأأأأأأأأأأأم____________________ين
ونزر اخونا الفحل المضياف حسن مكة ولقد زرته في عمرة كانت سنة 99 معي الاخ محمد علي شرري وطبعا هو لايتذكرني لطول المسافة ؟
اخي سلمان طبعا العيد في البلد عند طعم خاص جدا وخاصة في هذه الايام لان البحر مرتع والجو رهيب ولكن لظروف العمل لم نتمكن والله يعوضنا .
حجا مبرورا وسعيا مشرورا لوالدي الاخ خال ابرار والاخت الاستاذه هناء
وكل عام والجميع بخير