الـقــطر نقرولو .. أي نقروا له

القطر نقروله( قول القطر نقروا ليهو) أي ضرب جرس المحطة لإستقبال القطار..
وبالمناسبة تحضرني هنا قولة أحد الزملاء المهندسين الرائعين في مجال الهندسة العمرانية الزميل مهندس ابوعبيدة محمد سعيد.. من أبناء نوري وأسرته معظمها هاجرت إلي .. الأبيض.. كشأن هجرة الشوايقة في بلاد الله الواسعة..وكهجرة ( آل دقق) الي الأبيض و( سليمان عثمان) من قرية برتي..الي الأبيض. وغيرهم كثر..
قال أبوعبيدة( موسم التمر وإجازة الصيف تلاتة شهور كان أهلنا يرسلونا من الأبيض للشمالية ، عشان نحضر أحلى موسم في الشمال..التمر.. حش التمر..المنقة..سنارية.. ابوسمكة.. قلب التور.. الكتشنير.. وبعدين العوم..والموية العكرة.(.مشتاق للجزيري ومويتا العكرة..) كما قال عبد الله محمد خير..فقال أبوعبيدة أول مانحط الرحال في نوري.. نجي متعلمين كلام الصعيد والشفع يلاقونا في ( سوق بلالة في نوري.. ونحن نقول آي.. موش.. حتى سلامنا يختلف عن سلام ناس البلد.. الأولاد يسيرونا لغاية ما أصل حبوبتي... يقولوا ليها أبوعبيدة تعلم الكلام الموش كويس كلام ناس الصعيد. كلام حريم.. آي .. موش.. قلت ليك.. وكدة.. فقال حبوبتي تدقني وتقول لي الكلام دا يجيب ليك الضحك والآولاد يشوفوهو كلام مايع.. فلما تجينا هنا في نوري ختو في محلو وتعال.. لكن غصباً عننا يطلع..فحبوبتي تدقني عشان أخلي كلام الصعيد البيفتكروهو مايع.. أها كمان المصيبة الكبرى لما تفتح المدارس قال : ونرجع للأبيض.. نجي للأبيض متعلمين كلام ناس البلد.. كمان أمي هناك تدقنا.. في البلد يدقوك وفي الأبيض يدقوك..وأنت بين نارين.
وللحقيقة يا جماعة.. كلام البلد ده هو الأصح لغة.. عربية فصحى
مثلاً
ناس البلد يقولوا( قلنا له كذا كذا).. وهذا الأصح لغة
وناس الخرطوم يقولوا( قلنا ليهو) ودا الغلط
بس تقول شنو؟
عقدونا من كلامنا وهو الأصح لغة..
.............

لهجتنا طاعمي وناقعي وما بنبدلا بي لغة تانية أسألوا دكتور ابو القاسم كروم