ركوب الـفَـدَسـَة

سارت بها الركبان كمثل في المناصير يقول ليك ( حوماااد علي ضايق ركوب الفدسة)
الشرح:- ركوب الفدسة يعني الركوب المريح.. أو الترطيب بي لغة اليوم..
أقول ليك فلان مشى لى قريبو داك المسؤول صدق ليهو بي مزرعة دواجن..
تقول لى لاقي ركوب الفدسة.. يعني ينفذون له طلباته بإرتياح..
.....
ركوب الفدسة أن تركب على الحمارة عري من ورا.. فوق ( البنبون) على الحمارة ، أحسن ما تركب على ضهرا المحنكر خاصة إذا الحمارة ضعيفة تتعب شديد والحمارة عري ، خاصة إذا المشوار طويل
عشان كدة ركوب الفدسة ورا مريح ما بتتألم أثناء ما الحمارة تنقز وتجك.. خاصة إذا الدرب حدارة..
........

برضو الحريم.. الواحدة مرات تربط جناها بي ورا عندنا في المناصير وتزرع بالسلوكة أو الطورية وجناها من ورا يكون نايم مرتاح ( لاقي ركوب الفدسة )زي ربطة الفلاتيات لى جناهن مع اختلاف شوية عندنا
والفدسة محل ما ينفدس الزول.. وهو إلتقاء عظمة الحوض أو المخروقة مع السلسلة الفقرية

الله يجازيك يا صديق اخوي

ذكرتني حبوبة لينا اسمها عاشة بت ابجلة في الحلة الجنبنا

اولاد الحلة وبنات الحلة يتلموا عندها كل عشية وهي تضفر في السعف وتخيط في البروش والقفاف والغتايات والكناشبر وتحجيهم بحجوة فاطني السمحي وتسويلهم في نضما متل نضمك ده

غايتو انا نضمك ده عاد بي لذكريات قديمة واستمعت بيهو لكن ما عارف ولاد الزمن ده - زى ناس الطيب ود علويى - فاهمين حاجة ولا شايفنك زول مخرف

ههههههههههه
الطيب ود علوي ده منو يا أبو أحمد!!!
هههههههه
نحن ناس تراث نبحت نضمنا الطاعم من قعرو وقعاقيرو..
الله يرحم عاشة بت أب جلة حبوبتك يا أبو أحمد...
........
ياخي الكلام ده قريييب ماهو شيتاً بعيد شئ، لامن جانا الغراق الجنا يفشـّقوه.. .. ياخي المناصير لغاية قبل الغراق كانوا ضايقين ركوب الفدسة. البلد بي خيرا وخريرا. ما سمعنا بي زولا جاع..
علّ بعد الغراق الناس بقوا في أيتام الناس يتبرعوا ليهم.. وفي ضعفاء وظهرت حاجات كتيرة.. زمان اليتيم ذاتو ما بتعرفوا يتيم. حق أهلو يكفيهو إمبغغ.. وناس حلتو ذاتو ما بيقصروا ولابيحوجوه لى شيتاً يجيهو من خارج الحلي.. كان سياقي يسوقوهو.. كان عيش يدوهو .. كان تعليم يعلموه زي ولادن.. التكاتف.. التعاضدد.. التراحم... التوادد..

صديق اخوي

انت اظنك قاعد تكردس في بوستاتك

كدي شوف بوست الجرف

اليومين ديل معلق فوق ودعلويي

خلاص نمشي بوست الجرف. أصلي شفتو قبل ثلاثة أيام.. نرجع نشوف يا أبو أحمد زولنا. نرجع نشوف بوست الجرف

شكرا صديق ---
ولقد كفيت فى الشرح –والفدسة المنقطة المريحة من ضهر الحماره –واى مكان اخر امالاتنقز او تسلك—وكمان يمكن تخلف الرجلين --ومن اشهر من يجيدون ذلك فى منطقتنا والدك ووالد عباس على خليفة

ههههههههههه
كانوا الأثنين أبوي ووالد عباس يجوا يشتروا السعوط من دكان جدك يا سلمان..
ويتعدلوا للونسي.. ويجوهن المزارعية من لاتحت.ز العايز لو سجارة تنسيهو تعب القراعي والعايز لو رطل سكر. وهكذا.. كان نادي وليس دكان.. وجدك محومااد ود الخليفة رحمو الله يعجبك في الونسي والهظار.ز قاعد فوق عنقريبو داك في نص الدكان الله يرحمن زمنن زمنا سمح

الأخ المهندس صديق لك التحية ونشكرك على اهتمامك بالتراث وشايفك اليومين ديل قبلت على الركوب شئ ركوب فدسة بدون عكفة وشئ ركوبا بالفشيق وشئ ركوب بالخلفة ويمكن بالخلاف . اركبوا فيها بسم الله مجراها ومرساها. حديثا جاء ركوب مراكب ورفاسات وبكاسي وسيارات. تسلم ياهندسة

يسلموا سلمان ومصباح على المرور الكريم والإضافات

السلام للخال..
كيف تقارن بين ركوب (السيستم) والفدسه..
بتاع المرور أوقف ابن ذوات فى شوارع الخرطوم ماشى بى رجليه!!!!قاليهو ليه بس أنا ما سايق حا تعملى مخالفه كيف يعنى.؟
البوليس قاليهو بعمل ليك مخالفه لأنك دّاقى سيستم...قصه من الواقع شاهد عيان أنا!!!!!!!!!!!!!
أبعد من البوليس وغنيلو عشان ما يجرجرك..شفت المخالفه دى كيف يا خال؟؟
وبرضو تقولى (فدسه)إنشاء الله تلقى زول يفهم....
كدى أعمل ده عنوان بوست:
(مقارنه بين ركوب السيستم والفدسه)
تقبل مرورى وأشواقى

هههههههههههه
ود اللخت
قلت لي هو داقي سيستم
والله إنتو ناس البوليس والشرطة حكايتكم حكاية
.........