صورة خواجات قالوا أحسن وجبة عندهم الفول بكسرة فيتريتة

مستمتعين ومستمتعات بالفول مع كسرة الفيتريتة.. إكتشفوا أن الفيتريتة بالفول تقي من السرطان..

الشعب السوداني شعب عظيم.. لكنو انسحق في ظروف الغلاء.. فسبحان الله . الله يسوق ليهم علاجات من نفس ما يأكلون.. بس نحنا ما قاعدين ناكل الفول بكسرة الفيتريته.. نقول ليهم بعد كدة أكلوه بكسرة الفيتريتة.. ههههههههه عشان يكتمل العلاج..
قال رسول الله عليه أفضل الصلاة وأتم التسليم ( الخلق عيال الله... أحبهم الى الله أنفعهم لعياله)
........
يعني جميع الخلق هم أسرة الله.. زي ما أنت عندك اسرة مكونة من زوجة وأبناء وتعطف عليهم وتشفق عليهم وتهمهم .. وما يؤذيهم يؤذيك.. كمان كل الخلق أسرة الله.. فإذا قدمت ليهم خير لى أسرة الله دي.. أنت تكون قدمت لى ربك وبالتالي نلت محبة ربك..

معقووووووووووله يالخال خواجات عديل كدا وياكلو بيدهم وكمان فيتريته انا قلت كدي النقرب الصوره الشئ ديل خواجات ولاسودانيين اصلو في السودان البنات وصلو مرحلة الخواجات بالكريمات لكن لما قربت الصوره خواجات بجد والله السودانيين مابقدرو ياكلو الفيتريته ومن شدة كراهيتهم ليها قالو في مدير مدرسه واحده سمحه دخلها المدرسه والشينه حرمها وطبعا هي نكته( لانو الاستاذ ذي الوالد بالضبط طلبتو واحد عندو )المهم البنت الشينه جابت ابوها الابو قال للمدير ياخي مدرستك دي طاحونه تدخل دي وتحرم دي المدير رد ليه قال ليه طاحونه طاحونه بس فيتريت ماندقق هههههههههه

طاحونة طاحونة بس فيتريت ما ندقق
انت عازة سيد الطاحونة ده اقصد المدرسة هدندوي والله شنو؟

اللهجه يالخال قريبه من الهدندوه لانو في النكته قاليهو شيتريته ماندقق يقصد فيتريته ماندقق

قالو هدندوي شغال بتاع اورنيش في محطة السكه حديد يورنش لي شايقي في جزمتو قالو القطر فات الشايقي قاليهو( وا شقاوتي انا )الهدندوي قايلو يقول ليه( ناشقامتنا )يعني شغال شنو رد علي الشايقي قال ليهو اورنيشيب شقامه شفت تقارب اللهجات دا كيف يالخال

انت تعرفي ترطني يا عازة..
تصدقي أولاد أعمي في كسلا ووقر كلهم يرطنوا.. كمان أحمد لامن لسانو أتعوج..
أما علي سليمان في الدكان.. يبايع الهدندوة والكلام كلو رطانة..
غايتو الشرق ده أنا بحبو جنس حب يا عازة.. زمان لازم في الإجازة الصيفية لما كنا طلبة. إجازة الثلاثة شهور لازم شهر منها في وقر.. وقر لما كانت حلوة شديد..

انا ماتعودت اتكلم بالرطانه يمكن الاسره خائفه من عوجة اللسان لكن اكيد بفهم فهم شديد وحافظه بعض الاغاني مثل ايادايدوبا-الكشورنا-سنكات وبي .واجيد رقصة السيف دا كلو ونحن صغار كبرنا عقلنا .