يا دييسة شلال دماج...روحت وأدتنا العجاج

يا سلام عليك ياصديق اصلو الجمال والطرب في الجزائر دي ما اظن يتغالطوا فيها اثنين وماداير اقول ليهم باع في الشعر وممكن نثبت هذا الكلام حتي من قبل الميلاد وده مؤشر قوي جدا انها جينات في الدم يعني المسأله وراثه ويالطيب انا دايرك تتفرغ وتجتهد شويه عشان تواكب احداث الجزائر وما يختوك في خانتي انا والرشيد علي وزن انا واخوي الكاشف وتبقي لينا رفيق خاصه وانت يظهر عليك المرأه ما من الجزائر وفي دي انا بلقي زول يساعدني يعني بلقي فزعه من البيت وخارج البيت( القريبين مني عبد الله علي العطا وهو ماشأالله لكنه مختفي ونادر لكنه غتيت لكن هناك ابو الصحب محمد الامين علي الحسن وده فرده يعني انا ما بختي وكنت دايرك تكون زول جزائر في النقاش الذي سوف يدور وماتبقي لينا زول صعيد ساكت وانا ياود الاخت مابرضي ليك الورانيه كلام الخال ماترميه واطه

صحيح يا ابو مصطفى مرتك غريبى ما ها منصوريي وماها مرت جزاير زي ما قال هاشم...
أكيد هي راح تتمنصر وتبقى منصوريي
نحن المابعرس منصورييي.. ده عاد؟
اقولك شنو عاد يا الطيب
................................
شكرا المبدعون هاشم وخالد

والله ياهاشم والخال صديق ابحنة انتو مشيتو بعيد وان اليومين ديل مشغول شديد
اولا خالى صديق يقول بت باسعيد عمتى ودا كلام صاح ويجى بى لورى ويذبح خروفه وكمان يغنى ؟؟؟ يا ديسة راس دماج رحتى وديتينا العجاج شفتو يا جماعة صديق الخواجة ماهو غلطان عليه ابى يعديه يوم العيد بس بقول لى خالى صديق تعال سوى غناك دا الايام دى فى الجزائر بى تلقالك دقة واصلا من زمان ما لقيتها تغن ساكت وبعدين ادونى فرصة اصلا الشعر راقد وحتى اجمعه من مصادره لازم اسافر البلد وماعندى طريقة الايام هذه وهذه حاجة ؟؟؟
والحاجة الثانية انى انا القسمة رمتنى فوق زميلتى فى الجامعة وهى رباطابية من الشريك وهى الان مش بقت منصورية والله خلى الجيران يحكو لانو القرد فى عين امه غزال والزول بعجبو الصارو ؟؟؟
وكفاية مصطفى ولدى امو من بلد وابوه من بلدى درجة ذكاءه عالية جدا جدا
اما يا خال هاشم انا ما من ناس المدن انا ياهاشم مشيت سوق ام درمان ما تقول لى؟؟؟ لى شنو عندى فاس وسكين مشيت طرقتها فى سوق ام درمان عشان عندى سماية وقام واحد من الحاضرين ضحك شديد ؟؟ وقتلو مالك قالى اى خصيلة من الاجداد ابت ما تطلع فى الاحفاد لكن تراكم محافظين على القديم
على العموم ناس الجزائر المشكلة فى شعرهم كان بقولوه فى جماعة حول زير المريسة بعد ما الكورية او القرعة تدور والكاس تجرى مجراها ومن ذلك
الله هوووى ليلنا
الله الليل ليلنا
ويا الخضرة لوباية امزاريق
الله يقسم
اكونلك رفيق
وكل مرة واحد يجيب مقطع لذلك جمع الشعر سوف يكون صعب
لكن برضو ادونى فرصة اذهب الى الجزائر والان شغال اجمع من الناس المعاى

اصلي من قبيل ندودر فيك عشان نصل الي ( الزول بعجبو الصاري )
انا فهمي تقيل شويه لكن يبقي لي ده معناه الحب المستمر قبل وبعد قبل الزواج وبعد الممات وبعدين ندودر دي من خالد عابدين عشان ما نظلم الناس وانا عجبيني الكلمه اما اهلنا الرباطاب مافيهم كلام خاصه وانا تربطني صداقه قويه مع اخونا مبارك عباس

الخيلان هاشم وصديق كل سنة وانتما طيبين غايتو انا ماعارف الاقيكم كيف واحد فى اخر الدنياوالاخر غرقان فى الموية وكلامو كلو موية تقول ضاربو عطش الكريتى كل ما تشرق شمس طلمبة طالعة وطلمبة نازلة وخط الكنتور حدو هنا؟؟؟ وبالمناسبة فى جماعة من ناس الجزائر قالوا لى دحين بتعرف المهندس ود الجزولى قلت لهم اعرفوا شديد وقالوا لى الزول دا جانا قبل غراق الخزان وقالنا يا جماعة الكنتور دا حدو هنا ؟؟؟؟ انت الكنتور دا شنو؟؟؟ وقلت ليهم ودالجزولى دا كلام صاح وقالوا لى درس شنو يا الطيب؟؟؟؟ قلت ليهم الزول دا درس الموية دى ودرسها على ما اظن فى الولايات المتحدة الامريكية قالوا لى بسم الله اول الموية قاعدين يقروها ؟؟؟ اسع قول لى ياهاشم ود ابحنة دا من الله خلقوا مغترب وما بنشوفوا الا فى الانترنت دحين اسالك سؤال يا خالى صديق انت مسعول من الخير البلد من غرقت دحين جيتها ؟؟؟؟
لازم ترد لى انت البلد اخر مرة جيتها بتين واصلك انت ما رحت لكن خايف العيال يروحوا مننا ويبقى كلامهم فى فينا ومرة باريس ويتمردوا على الربوهم بى فتل الجريد والليف واذا سالت عن الرباطاب المراة حاج فرح التجانى المهندس عمها اخو ابوها وما عندى قضية بى الرباطاب الولد والبنوت كل اجازة يذهبوا البلد فورا حتى لا يروحوا زى رفاقتهم ؟؟؟ حتى البت الكبيرة بقت تعرف تبتن الجرم مع حبوبتها تعال واسالها قولها تعرفى الجرم اصلوا بعد البحر نزل زرعنا زراعة كتيرة جدا واكتر شى نجح يا صديق الجرم قادر الله والله حى
والله يرد غربتك ولكن صاحبك المهندس ناس الجزائر مبيتين النية له ؟؟ودا كلام بينى وبينك انت عارف ليه يا صديق ؟؟؟ لانو جاء فى الكريتى وبونى وعندو حديد قزقزوا فوق راس الجبل زمن قومة الخزان والبحر فى حفرته وقالهم الموية حدها هنا ؟؟؟ وبعدين البيوت غرقت وخلو ربهم وبقوا يقولوا كل السبب من ود الجزولى قبيل ما قالنا زحوا لافوق ؟؟؟ لامن عفشنا وبيوتنا غرقن واقولك كمان احتمال الناس ديل ينزلوا محامى فى صاحبك المهندس وعاد اعجبك انا يا صديق اصلو داير لى لمة فى ناس سور النار اولعها واديها حبة بنزين كمان وسوف اعواد اليكم اخوالى الكرام ؟؟؟

تحياتى
ابو مصطفى

الشاعر اصلوا على ما اظن حمد سعيد ودجلولى
وقال كتير عن ديسة شلال دماج روحت وادتنا العجاج
والقصيدة طويلة
وسوف نقوم بالجمع من مصادرها
وايضا قال:------------
جينا لى الباشى لى عشانا لاغرض لا ودتنا عانه
المهندس يقلب رطانة ودا السليك الختولو زانه
جيتو لقيتو كلامى مادايرو ولفحنى بى موجات ضفايرو

عليك الله يا نور الهادى شوف شوف ؟؟؟ مقطع جيت ولقيتو كلامى مو دايره ؟؟؟ معناه فى مشكلة وعجز البيت لفحنى بى موجات ضفايرو
اتصور اصلو الضفيرة دى تكون قدريش وطولولها كم ؟؟؟ اسع خالى صديق يقولك جينا باللورى وقسناها زمان ؟؟ ويدخل عليك خالى الاخر هاشم يقولك دى فز زمنا دخلنها موسوعة جنس للارقام القياسية ؟؟؟

والله مشتاقين وارجع ليكم تانى

ابو مصطفى

اصلو الشاعر اسمه الحقيقى محمد سعد احمد جلولى
ونحن نقول حمد سعيد(بضم الحاء
وبعدين معاك يا خالى ابحنة فى كلمة فطقة وهى تطلق كثيرا جدا فى الجزائر ويقولك اعمل حسابك فى الكلام مع الزول دا وتقول مالو ؟؟؟ يقولك بس زولا فطقة وهى تعنى والمعنى معلوم لكل الناس
وهى تعنى زول يقول اى مفردة تخطر بباله يقول السمح والشين وماهاميه ؟؟
برجع ليكم
مرة اخرى
)

حقيقة ولله وليك الفضل كبير قالت الوالدة حتى فى المشاكل الاسرية واحتمال يكون داء السبب الخلاهن لحد اللحظة الرحل فيها عمى كان علاقتهن طيبة وبفضل دعوات حبوبه رحمة الله عليها اذكر كانت بتدعى ليهم كتير واتزكر كان المرحوم فى ايامو الاخير بعد كان ووكيل الوالد فى عقد اختنا اتكلم معا الوالد كتير جدا وزكر اسامى ليها الفضل علية وكدا كلام كتير: بس انا الليلة مزعلنى الحكم الظلم المريخ الليلة حتى الكتابة غالبنى والله يفك مننا مرض الكورة /لك الود

خالى صديق انا سالتك اسئلة كثيرة وما رديت عليها ؟؟؟؟
وبعدين معاك انت كل مرة ندخلك بى جانب تخرم بى جانب اخر وكل ما الناس تتلم وتقعد فى طرف الباشى تعرض انت تقوم تقلبها برجى ؟؟؟ الحكاية شنو ؟؟؟؟ رد لى على اسئلتى ؟؟؟
؟؟؟؟

ابو مصطفى

الطيب محمد عبد الرحيم
الجزيرة دماج

عوافى وسلام ليكم كلكم
ياابو مصطفى فى لخبته شوية فى القصائد والشعراء
فقصيده ياديسة شلال تبت فالشاعر سليمان ودنصر الدين وقصيده الخضراء لوباية ام مزاريق فلمحمد ودفرح اما قصيده لاقيتو لدور اسايلو لقيتو كلامى مو دايروفلودنعوم

معذرة عمنا ابوحنه بس خفنا الخلبته فى الشعراء ودى الودرت شعرنا .
وكمان سليمان قال
يابه تاتيب اب قبتين
وتانى قال فى مطلع هجاء العريس ماداير اجيب اسمو والتى اشترك فيها كثير من شعراء المنطقه
مانى صابر فوق ماصبر
عاد بنشرب مويه المطر
لك ودى واحترامى

بمناسبة ديسة شلال دماج وهى قال فيها الكثير من شعراء المنطقة فقال محمد سعيد ود جلولى بعض الابيات :--------------------
الايام يا اخوانى متهيج غرامى
انا شف وجيها زى شهر القسامى
منو فى قلبى داق طار التهامى
ريدها متشعر على وكارب حزامى
قمت سويت الشرك ولى شركى رامى
قمت سويت الحديد وعامل نظامى
اصلى بينا وبينى ما بتمرق سلامى
جيت اخود بى بعيد والعرق حامى
زى ابو الهدهد تقول شايف الطعامى
انا فوق دربك تعبت وطال غرامى
----------------------------------------------
التهامى يقال انه كان مداح فى زمنه يمدح الرسول صلى الله عليه وسلم ويمر فى البلد من الشاميخية الى جبل مناى ماعندو شغلة غير المديح وكل ما يلقى ليه ديوان يقعد يمدح وياكل ويشرب ويذهب الى الحلة الاخرى .حتى يلف المناصير حلة حلة وتانى يبداها من اولها .
جيت اخود : الخوادة هى ان تعبر الاماكن الضحلة فى النيل اى ليست العميقة من مجرى النيل


تحياتى
ابو مصطفى
الطيب محمد عبد الرحيم
الجزيرة دماج

سلام للجميع --
حكاية الديس او المفردة منها (ديسة )او ديسايى ماهو السر فى التشبيه بالدييسى --يعرف الجميع ان الشعراء زمان يوصفوا الشعر بالديس لطوله وانتظامه ونعومته-و-و---
اما الديسايى قد تكون فى مكان منعزل حيث يصعب الوصول اليها او تكون رويانى طوالى او مكان محاط بالمياه كالجزر زى دماج او لجمال الطبيعة ومن امثلة ذلك (دون ذكر الشعراء )حتى لااخطىء--
الدييسى الفى رأس مكوك حارسا الببلع بلالوك (التمساح)
وكناية عن صعوبة الوصول اليها
او--واحد داير يصل لى ديسايى وبدأ فى العوم --بعدين شاف تمساح --وصور موقفه بين المواصلة او الرجوع
فقال:
دييسى وفى قلب شلال
-------------
شفت العينو حمرا شرار
تانى ان عمت عومى خسار
--و(ان رجع) بقيت فى مضحكة وشيل حال
او
ياديسة فالق البحر عند( الصياد )مابيصل
او
يادييسة الفالق الطماح شلالا
البلا اب عاجات مافى حد مشالا
--تقبلوا مرورى ---

شكرا الرائعان ابو مصطفي وود عقيد والله كلام زي المطعم.... كلام يرد الروح ... لونية الشعر عند المناصير تحيرك ودا الشئ الدايرين الناس في المنتدي دا يملوا حزتن منو.... خالد عابدين يديها وحدي وحدي لكن طاعمي خلاس
لكم ودي وشكري واعجابي

ديسة شلال دماج روحت وادتنا العجاج ؟؟ العجاج الفى خشمكم ؟؟؟؟ حمد سعيد قال يوصف فيهاورسل المرسال ؟؟؟؟؟

قال :---------------
يا مرسال قوم من عندى محرور
جاهلة لون جلدك حرير ماهو دمور
عودها خنجر سواكن هافا مضمور
شايلا فى خشمك بريق العينة مفرور
لهيج النعنعو وكبايتو بنور
ويش هضليمة قرنك ماهو كدمور
----------------------------------------------
محرور - اى مسرع
دمور - تميزا للخشونة ؟؟ دمورية ودى ناس ابحنة والناس القدام بى يكونوا لبسوها جلابية ؟؟؟؟
خنجر سواكن - اشتهرت سواكن بى صنع الخنجر - مضمور - الخصر -العينة - نوء فى وسط الخريف ويريد تشبيه الاسنان بالبرق شفت الاستعارات المكنية والتصريحية دى كيف ؟؟؟؟
لهيج - ترخيم لهج واللهج اشارة هنا للفاء الطيب الرائحة الحلو المزاق -
هضليمة - هى النعامة ويريد ان شعرها اسود وليس قصير ( كدمور ) ويقولك فلانة راسها مكدمر ؟؟؟



تحياتى
ابو مصطفى
من ناس دماج

قال الشاعر محمدودنعوم فى الديسة وفيها يصف زينبو وزينبو فنجرية خالص ويقال انها امراة من الصعيدية وناس الصعيدية ناس متعلمين وجاتهم الحضارة بدرى شوية والمهم ودنعوم وصفها وقال :-----
الدويسة الفى راس ام اراك
حاجرا الببلع بلا لوك
عودها كرباج ود الملوك
ما بجيب اسمك يعرفوك

الله منك يا زينبو
الله منك يازينبو
حجلك ابعشرين نقشو
جابو زايد المال تقلو
منك الجيران ما شكو
خشمك البركاوى الحلو
يا شهر رمضان تراهو
الله منك يازينبو
المشيرقى اللا غرب
سيدها من العين منحجب


تحياتى
ابو مصطفى

ابو مصطفي شهر رمضان مالقي غير شهر رمضان انت ماسمعت الرباطابي قال لولده شنو عندما قال وقد وجد عكفه سرج واقعه ( ياابوي لقيت لي شهر واقع قال ليه ارمه مايبقي شهر رمضان )

تقول شنو يا خالى هاشم رحمه الله ناس زمانه كانوا يحبون شهر رمضان وكان ومازال له صولجان وباقى الشهور ماعندهم فيها شغلة عندهم مرتبا دايرين يصرفوا شهيرهم فرد واحد فى السنة رمضان تانى زولا بعاين على السماء ماهو فى ؟؟؟؟

تحياتى .
ابو مصطفى

شكرا الرائع أبو مصطفي باقي لي زينبو دي تراثيه وهي تغني مع الجابودي وكل واحد بجدع فوقها بيت بيتين عليك الله ما حافظ لك فيها شيتا عديلي
لك شكري وتقبل مروري

الاخ محمد حبيب مواصلة لبعض ابيات قصيدة زينبو التى يتغنى بها المناصير مع الجابودى اورد اليكم بعض المقاطع الاخرى منها :---------------
داير انط السام دردرب
وامسك الشخلوب واقنب
الله منك يازينبو
الله منك يازينبو
الجدى البين العسين
قامتو قناصك تمانين
كلو واحد عندو كلبين
قمحن ضرب السقانين
الله منك يازينبو
البنات الخمسى وصفر
واحدى سكر واحد التمر
واحدى صندل واحدى الضفر
واحدى كرباج على ودنصر
الله منك يازينبو
ياقشيش وادى الكربكان
عوج البل وفقع الضان
فرقتنا الماليها امان
سوتنا كل ناس فى بكان
الله منك يازينبو
الله منك يازينبو

محمد حبيب كفاك يا حبيب
تحياتى
ابو مصطفى

لك شكري والله أمتعتنا بهذا الشدو الجميل الله يخدر ضراعك

قال الشاعر محمد الحسانى من راس بونى جرف طويل
فى الوصف لى ود جلولى :-----------------
شوف يااللبيب الاخيدر داكا
لاها خفيفة لاها الفاجر الضحاكا
شفتها مرة تبسم وتومى بى شباكا
شالت صبرى وانت قل حياكا
ما تغشانا عض الجمرة لليوم داك




تحياتى
ابو مصطفى

الكلام الزي دا لمان أقراهو يطلعني شبش يا أبو مصطفي زيدونا

الشاعر ودابسبيب داير طريقة يصل الى محبوبته ومالقى طريقة من والدها والظاهر عليه صعب شديد وبقى يغنى :---------------

مسيكة الفى ام رمال قسن مضاربو
اتحبك فوقو السقد عن دومتو زاربو
كمان الريح ما بتخلى الزول يقاربو
وين مهيرة الدقانين شنبات حاربو
النزين دقنو تالى عليه شاربو
انت قايل الحكاية شنو ؟ تمساح كبير خالص داخل جزيرة ام رمال وعاوز الصياد يصيده لكن الريح عاملة مشكلة ؟؟؟ لانه من بعيد يشم ريحة الصياد والدقانيم فرع من فروع المناصير اشتهروا بالحرابة والفروسية - مسيكة - المسك وهى ريحة توجد تحت ابط التمساح


تحياتى
ابو مصطفى

ابو مصطفي انت تقول سكيني في ضراعي وابوحنه يقول ياديسه شلال دماج افو سكينك دي باقي لي ماتمرق الا للخرفان بس؟

ابحنة يا يسن نحن ما حضرنا زمنو ؟؟؟ وكل سنة وانت طيب ؟؟ كان يصول ويجول فى البلد على كيفو ؟؟؟ ويغنى لامن عرس من الجزائر شوف المسعلة دى اسع البلم ناس الحنانيين فى ناس العيتنوب شنو ؟؟؟ بس زمان الناس كانو طيبين وعندهم الزول المتعلم عندو مكانة ؟؟؟

تحياتى

ابو مصطفى

وانت طيب ياابومصطفي يظهر انو كان فنان لانو لي هسع يغني ولَ دي نيران الغربه؟

والله يا يسن انتو ماعارفين قيمة المنتدى دا عند ناس الحضرة كيف ؟؟؟ حاجة كبيرة جدا وتفرق على الناس وبرنامج بالنسبة ليهم كبير خالص وانا عندى تجربة فى هذا النوع وحالتى لمدة شهر واحد بس ؟؟؟
الغربة حارة شديد والله يجمع شمل المغتربين ويجونا عايدين الله ,,,,,,,,,,,,,,,,, يجونا عايدين يا الله


تحياتى
ابو مصطفى

قال الشاعر ودعبيسة وهو من الجزيرة بونى
قعادا فى السروب يا سمحة الزى
بطر ضحكتا كل برق القاش يشيل لى
من يوديك يشيل منك يجيب لى
انا لينة الصيف نعيم الدنيا للحى
رقاد الاستبالات عوج ايدى
شراب الكينا والحقن اطرش اضنى
بعد دا الحال اشوف الكعزر اخى

--------------------------
السروب : شجر الطندب بلغة البجة فى شرق السودان
الكعزر شقيقه وهو على قيد الحياة الى يومنا هذا والشاعر كان يعمل بالقاش فى كسلا



تحياتى
ابو مصطفى

كلام جميل ونسة مستفيضة
رابطها شعرالاجداد الافذاذ
ولكن لماذا توقف هذا المدالزاخروتوقفت الردود عليه