الحكومة الرشيدة ـ بين الدجل والشعوذة ـ وكنز حلفا الجديدة

القرية 22 إسكان في حلفا الجديدة ـ تنوم هادئة هانئة منذ التهجير القسري وإغراق التاريخ السوداني ـ لم يرهبها صوت الرعد ولا ومضات البرق

ولكن ـ في عهد الإنقاذ نتوقع ـ أي ـ حاجة

حركة عربات تحوم وتحوم ـ وآليات تقذف بالإزعاج وجرجرة الجنازير تصم الأذان ـ والحكومة ـ تكبس ـ فجاءة

بوليس اشكال وألوان ـ وأمن بدل وقمصان ـ وساسة كبار وصغار .. وناس جات للفرجة من كل مكان

إن شاء الله خير ؟

خير والله

الفكي قال هنا في كنز ؟

فكي إيه ما عندك راس ؟ كنز إيه ما عندك راس ؟ ديل بيوت الناس يا ناس

عارفين ـ والتعويض جاهز .. والكنز دا حا ينقذ السودان من أزمته الاقتصادية ـ ونناطح امريكا راسا براس ـ والكتوف إتلاحقت

يا ناس إنتو بي صحكم ؟

جد جد ـ والشيخ ياهوداك قاعد ..

يا شيهة بالله دا كلام ؟

إيوة كنز في

ـ كان كدي ـ مسكاقرو ـ فضلجنا

وبدأت المأساة ـ الحفارات تهز الأرض دل دلل دل

واللاندكروزرات ـ عجاجا ـ رابط

والامن والبوليس جابو رتب كبيرة ـ مقدم ـ وعقيد ـ وناس بالملكي ـ شايتا وين ما معروفة ـ جنس بدع ـ جنس تلح

الأكل ـ يغرفو غرف ـ وموية الصحة ـ عوم ـ ما خلاص الكنز قرب يمرق

والفكي ـ اهفر لسع ـ والحفر يتواصل

اسبوعين حفر ـ انتظار

يا شيخ ـ إيه الحكاية ؟

اهدمو الهوش ..

وبردلوب ـ الحوش والبيت اصبحت اثرا بعد عين ـ والحفر شغال

وزادوا القوة ـ ما خلاص قربنا

سبعة متر حفر ـ الله اكبر ـ باقي 25 سنتمتر بس ـ الشيخ يهمهم 25 سنت بس

وجهزوا ـ الميزان ـ الميزان الكبير بتاع الطن

ليه ؟

الكنز عبارة عن دهب خالص ـ وزنه ـ 21 طن

طيب ما دام كدا الحكومة ليها حق ـ لا تخفيض وزرا ولا تشريد مستشارين ـ ولا زيادة اسعار ولا رفع دعم عن محروقات

يا اخي دي الجنة عديل

وانتهت الـ 25 سنت

وفوقا كمان : 3 متر

ويستمر الحفر قرابة الشهر

يا ناس وين الكنز ؟

يا شيخ شنو الحكاية ؟

ـ والشيخ يهمهم ـ والله الشيتان دا زاغ بيهو مهل تاني

ـ الشيطان زاغ بيهو محل تاني ؟

إيوة

يعني الشغلانة كلها شيطان في شيطان ؟

سبحان الله

الحكومة تنسحب .. وتشتت ـ

والناس في حلفا لا زالوا ينتظروا

والشيخ يكب الزوغة

والناس فاتحة خشوما وابدا ما مصدقة إنو حكومتنا الرشيدة تتبع الدجل والشعوذة في حلفا الجديدة

يا اخوانا والله ـ دي ـ ماها ملاريا طارت لينا في راسنا

دي حقيقة وحقيقة مرة علقم

أبعد هذا الهوان هوان ؟

هل تضحك الحكومة على الناس أم على رب الناس ؟

هل هذا هو التأصيل والمجتمع الراشد ـ دجل وشعوذة

اليوم فقط ـ كبرت أربعا على حكومتنا ـ فقد ماتت وهي تمني نفسها بكذبة أخرى

والله يا ود المناصير ضحكتنا .
هو مش الغرقان بيتعلق بقشه؟.