تعابير ميكانيكية مختصرة من الزمن الجميل

بس دي في المدن.. مثال عطبرة والعاصمة ومدني
يمكن ميكانيكية لأنو السيارات والعربات واللواري دخلت كخدمة جديدة في حياة الناس لتسهيل سبل المواصلات
.................................
يقول ليك:
( ده جاريي نور طويل) اي يقصد مذهول مشتت الفكر . سارح... ماسح

نروح الحفلة دي نملا بطاريتنا اي نتغزل
................
الغزل المباح

يقول ليك.... ده كاسر شمبر أي عندو حلقة ناقصة في تفكيرو

يقول ليك: ده عندو سلك عريان أي مجنون... فاكي منو

يقول ليك: ده كاسر كرونا أي متعطل عن العمل.. لافائدة ترجي منه.

يقول ليك ده حارق بلوتين) أي مفلس وجيبو فاضي

يقول ليك: ده عاضي بستم أي زول بخيل

يقول ليك: ده قافل فونيةأي يقطّـِع في الكلام. عندو تمتمه كتيييرة في الكلام

يقول ليك : ده كاسر ركبة صايدو مرض حامد يعني

يقول ليك: ده قايم بي نمرة اربعة ... أي سريع شديد من قولة تييت

كمان تطورنا. بعد دخل القيير الأتوماتيك في السيارات
يقول ليك : البت دي قيير اتوماتيك يعني ما شاء الله عليها ما عندها فواصل في الكتابة ولا الكلام لاتتلعثم. وتكتب سريع وبدون فواصل وراسا مليان.

يا هندسة يقولوا ده مركب شنبر جديد بعد قيام زوجته من الولادة وتمام الأربعين وشكرا هندسة

يا هندسة يقولوا ده مركب شنبر جديد بعد قيام زوجته من الولادة وتمام الأربعين وشكرا هندسة.

والله كلام يا عوض دكام..
ههههههههههههه دكتور مصباح ريحتني
عشان كدة المرأة السودانية..

بما أنك يا دكتور مصباح في يوم ما. كنت مسؤول وسواق بابور المناصير ومرات ميكانيكيها.. تعملوا ليها عمرة.. ومعاك فتاح.. والتجور رحمهما الله..
عشان كدة أهلنا بيجيبوا أمثال في الصميم..
لكن أولاد الزمن ده ما بيعرفوا الشنبر شنو؟
والبستم. أو البستن شنو؟
وماهي فائدة الشنبر للبستم؟
وماهي قيمة الشنبر الجديد
والبابور لمان الشنبر فيها يخف ، بيحصل ليها شنو؟
وأين يقع الشنبر في جسم البابور..
وماهو قميص البابور وماهي الصينية
وكيف تعرف أن هذا الشنبر متآكل؟
وشكل الشنبر كيف؟
وشكل البستن كيف؟
وكدا
.......................
لمان الواحد يعرف مهمة الشنبر بالضبط؟ بالنسبة للوابور.. بعد كدة ممكن يستطعم معنى المثل تماماً.. ويعيشو
.......................
مثلا
زي ولد في الرياض..
سألتو قلت ليهو ماهو الجمل؟
يقول ليك سفينة الصحراء. حيوان من الثديات.. ده كان كتر معاك.. بس تاني ما بينبعث في ذهنو أي شئ
....................
لكن تعال أسأل ولد من بادية المناصير وقول ليهو ماهو الجمل؟
حا يقول ليك الجمال أنواع أي جمل تعني؟
1 جمل اصهب
2 جمل بشاري
3 قعود
4 حاشي
5 جمل حساني
6 جمل أمو بت ريح
7 جمل سباق
8 جمل فحل
......................

مصباح محمد مصباح كتب:يا هندسة يقولوا ده مركب شنبر جديد بعد قيام زوجته من الولادة وتمام الأربعين وشكرا هندسة

ما شطحت شديد يا دكتور
يقوليك ماشى افك جذرة
وماشى اغير زيت
مش احسن من حقت مصباح شوية؟

هههههههههههههههههههههههه
أبو سما.
الدكتور شطح موش؟
لأنو لو مشينا شرحنا مركب شنبر جديد لبستن الوابور بتاعة مصباح دي!
راح ندخل في اللحم الحي
.......
هو إنت يا ابو سما وضحت ليك. لأنو عارف وين مكان الشنبر في الوابور وماهي فائدته

هو ممكن تقول الدكتور زكي..جاب كلام مباري.
زي ما قال الشيخ فرح ود تكتوك( الما بيعرف بالتلاويح. لابيريح لابيستريح)

يقول ليك ده كومر قديم. لكن مركب مكنة تايوتا هايلوكس ) يعني زول يحاول ياكلا محل ماها ملبني. راكب الموجه مع البلع والأكل والسفسفة. وملمع نفسو لزوم البهرجة.

يقول ليك: ده حـُـوَّار.. لكن مركبين ليهو مكنة شيخ )
زول محاول يعمل فهلوة دينية على النساء والأطفال وإنو يعالج. و.. و..و..
ولكن هو في الحقيقة مدي نفسو قامة اكبر من قامتو وحجم اكبر من حجمو. ولابتسعل ولابتنشد.. وخاتي نفسو مع كبارات رجال البقع الدينية الكبيرة بل عامل نفسو تطور حديث عليهم.

ابو سما ... قاطع سير.. يا صديق

هاااااااا هاااا
ود المناصير جا با من الآخر
البابور لمان يكون قاطع سير
دي حالة خطرة خلاص.
ليه؟
سرعتو تصل لدرجة 2000 لفة في الدقيقة. ده كان ما لحقوه يحرق طوالي ويولع نار. ويصلب البستم في القميص وتسيح اللقم. وينكسر العمود و.. و... و.. يعني عمرة كاملة وقد تجدع البابور ترميه في البحر
..........
ليه؟
عشان السير هو الذي يربط البابور بالطلمبة. طلمة جر الموية. ومن طلمبة الموية يجي خرطوش التبريد للبابور نفسها.. لما يتقطع السير معناه البابور فقدت خط التبريد الذي يبردها ويغذيها بالموية من الطلمبة.. تحرق طوالي.. البابور.
البابور لما تكون جاريي طلمبة المزارعي بيكون شادي ليها السرعة شوية..
عشان حمل جر الموية تقيل.
اول ما يتقطع السير تلطقا البابور دي صوتا طلع في السماء.. دق دق دق دق دق
في الغرب يتسمع.لو إنت في الشرق
عشان كدة المزارعي لو يقرع في موية والبابور سيرا اتقطع يجي جاري زي العصار أول عمل يعملوا يوقف البابور بسرعة.. من السقاطة.. ممكن من شدة الهيجان ما تقيف معاك البابور من السقاطة.. تجيب ليك قطعة دلقان كبيرة تضعها على العادم لو منزوع منه راسه، عشان توقف ضخ الهواء للبستم ويدك في السقاطة برضو..
المناصير عندهم تعاون. لأنو قطع السير ومافي زول لحق البابور وقفا. معناه دي ميتي وخراب ديار..
عشان كدة حتى لو بالغرب الناس يكوركو.. لو سيد البابور بعيد منها. حتى الحريم والبنوت عارفات الحركة دي خطرة يجرن يكلمن اي زول يوقف البابور
.....................
عشان كدة ود المناصير قال ابو سما قاطع سير
يعني الطلمبة بتاعتو معزولة عن البابور الايامات دي؟
عشان كدة هو حالتو يعلم بها الله.

سيرنا تمام ما مقطوع