الشاعر الكبير : محمد نعوم فضل

الاخ الاستاذ : سلمان عقيد/ الاخ نادر نور الهادى ودشاعر الجزيرة سور ورحم الله والدك وحينها كنا فى عرس الاستاذ عبد السلام ابراهيم سليمان داخل الجزيرة سور وهذا للتاريخ سمعت شعرا من نور الهادى فى هذه الحفلة رحمه الله .
واعود الى موضوع شاعرنا وجدنا رحمه الله محمد نعوم فضل الحاج رقالى لا اتذكر سنة مولده ونحن شفع اتذكره تماما فى الجزيرة دماج حيث المولد والنشاة للكل وله ديوان شعر كبير جدا وسوف نلملم كل اطرافه من ابنه الشاعر ( احمد محمد نعوم فضل ) المشهور بابى سلوك ولعل ابو سلوك اتى هذا اللقب من السلك اى الطمبور وهو حتى الان يجيد العزف على الطمبور بطريقة مبالغة .
رحل الشاعر الى كمساب وهى قرية تقع بالقرب من العشامين وهى نصف ساعة من الجزيرة دماج وله حقوق واطيان هنالك ومن ابنائه :-
احمد محمد نعوم فضل الحاج
جبريل محمد نعوم فضل الحاج
والبنات ناس خالتى نورة وفاطمة وزينب
وهل تعلم ياسلمان عقيد
القصيدة التى يتغنى بها الفنان محمد النصرى
القمر الظهر الليلة وين ماشى
وياغزال وادى ابوسلم الليلة وين ماشى
هى من ديوان شاعرنا الكبير ودنعوم
وله اشعار كثيرة فى الهجاء والمدح والذم ومن ذلك
هجاء المرحوم على تومابى ( راس الجزيرة سور ) ويقال له ابو كراع وهو ايضا شاعر
وكان المرحوم عاوز( على تومابى ) عاوز يناسب جماعة وفى نفس الوقت ودنعوم عاوز النسب
وتقدم ودتومابى وتم رفض ودنعوم وقال قصيدة طويلة فى هجاء ودتومابى منها :--
يا ابو كراعاً عفن شن هداك
لى حمامات جبل ام اراك
يلن ابو سواقة يرجاك
يجدعك فى قافات هناك
ويبقى تنبيه للحول بكاك
الشرح :------
ابو كراعا عفن ( وذلك لان ودتومابى كراعه مقطوعة وبها مشكله ) يلن ابو سواقة ويلن فعل مضارع بمعنى ينتظرك وابو سواقه هو التمساح وفى قافات وهى جمع قاف بمعنى المنطقة التى بها كمية من الشجر والماء والاخشاب والاوساخ داخل المياه الراكدة قليلة الحركة ( وهى الكانديقة )
عموما ودنعوم ومحمد الحسانى من راس الجزيرة بونى هنالك مجادعات شعرية بينهم وانشاء الله سوف اقوم بجمعها وتوثيقها ومنها :----
يا ازرق ياحليل عرب القليتاب
الحى بعود وكعب الرقد مات
وهى قصيدة طويلة جدا والمناسبة هى ان ودنعوم صاحب القصيدة ومحمد الحسانى كانت له علاقة اسرية مع القليتاب وهى فرع من فروع الجعلية وحقيقة الامر كان يعشق امراه من القليتاب وقاموا بضربه و سجنه فى نهاية القصة وقام ودنعوم بالشعر
على العموم كل الاخوة بالمنتدى التحية لكم وحقيقة كنت سوف ارد على تعريف الشاعر ودنعوم ولكن نظرا للظروف لم اتمكن وهذا قليل من كثير .
الطيب محمد عبد الرحيم
الجزيرة دماج

شكرا ابو مصطفى :لايفتى ومالك فى المدينه .والتحيه ليك وانت توعد بجمع تراث هذا الشاعر الكبير .وقد قيل مافى قصيده شايقيه والافيها اقتباس من شعر ودنعوم ولحسن حظى قد قابلت ابو سلوك فى العشامين فى اخر جمع لتراث المناصير وكان مستعجل ووعدنى ان يملكنا اشاعره ..عاد ياالطيب بسراع الحقنا بى الديوان ده

والله يا خالد و يانادرالمسالة دى تحتاج الى سفرة عديل الى البلد للجمع من المصادر الرئيسية حتى لايكون الكلام فى حقهم غير كامل وربنا يعطى الصحة والعافية ونحمد الله كثيرا انو نحن جيل الزمن دا بنقدر نتلاقى والشكر كله للاخ خالد واهل المنتدى والمشاركين فيه وكل من اهتم برفع كلمة منصورى
والله ياخالد دون فخر انا عندى واحد منصورى يساوى عشرة من اى قبيلة اخرى .

قال شاعرنا ودنعوم فى معشوقته :--
ود الاربل الفى الضل سرحتو
التيتنفض يقوم سابل ودعتو
خشمو ان نضم تقطر دمعتو
كتير الزى صابر بى وجعتو
العميان ما بشوف الواقعة تحتو
يا قشيش نص الخلا الروقين براقو
العليك مادردموا الضوانا ساقو
انا حالى حال الكلبشووباكر علاقو
يا جنا الزول المضمر حار فراقو ؟؟؟

هنالك بعض المفردات من العامية تحتاج الى شرح ومنها ( ود الاربل وهو جنى الغزال سرحتو وهى شجرة السرحة - ودعتو وهى الودعة - الروقين اى الخطين دردموا اى دردم اى حزم اى لم والضوانا - رعاة الضان - الكلبشو اى قيدوه ؟
ولعل كل او معظم الاغانى التى يتغنى بها فنانى منطقية الشايقية هى من شعر هذا الشاعر رحمه الله
وحتى الفنان محمد وردى بيقول الجزيرى ام عرقا حمى يا غرق يا جيت حازما مافى بحر حامى وتياره اقوى من بحير الحارة فى العالم و فى المناصير هى ايضا من شعره ويقول فى جبل عرفات وضعتها هل تصدقوا عندنا جبل فى دماج اسمه جبل عرفات وهى جدة الشاعر ودنعوم ؟؟؟

وقال ايضا فيها :-----------
النفيس الصندلية الفى القدور فاح
العيون الاربل وديانو ساح ساح
السنون لبن الجهايم الجماية مرواح
قولو لى ام ريد بى فراقك مانى مرتاح
اصلى فوق طق بقول للواطا صباح
-----------------------------------------------------
ساح ساح من السيح فى الوادى المنبسط
الجهايم النوق الضخمة
كلمة طق كلمة تفيد حركتها اكثر من معناها ويريد انه يتغنى بها حتى الصباح
وقال ايضا :--------------
داير اقولك يا حلو الضوق
يا عجو المحس البموح فوق الكوروق
داير اتهوا فى الطيارة بى فوق
داير اشوف الفى الجناين ماخد الزوق
والله المفلس ما بعرس ولا ببل شوق
وانقعد فى المجالس نضمو ممحوق
-------------------------------------------------------------
تحياتى
ابو مصطفى

غنى ودنعوم فوق البنات وقال شعر كتير ونورد هذه المقاطع له ومنها :-----------------
انا المن جيهتن صهينت صهين
ريدى وريدا ما بنفكوا شابكين
وانت يا ما بتبهدلى الناس المصلين
المقضين الفروض ومن الله خايفين
المجاهدين ما بكرمو الحبة فى الدين
البجرو السبحة زى بقر الخماسين
نهيدا الربعة قاطع الرجحة لكن
الا ميزان الشهب وسط الموازين
منشبك سلك الكهارب رشرش العين
وانضمت حسيسها دقت الصين
وان بسمت جميعا تلقانا باسمين
وفوقا دقة الابرة زى زيق الفناجين
ما بنفك ريدى وريدها شابكين
-----------------------------------------------
بقر الخماسين :-البقر التى تسحب المياه فى الساقية وهى فى حالة مستمرة والخماسين هى فترة الصيف يعنى زى الزول البجرد فى السبحة

تحياتى
ابو مصطفى

ماقصرت ابو مصطفى --
وودنعوم دا من زمان كايسين لى اشعاره وسيرنه --
كلام زى الرصاص--
ارجو ان تواصل--

قال ودنعوم فى حفلة فى راس سور والناس فى ملم كبير يخص ناس ود تومابى بعض من قصيدته المشهوره بالوصف :------------------------

الزول اب جمالا ماليهو مثيل
خده بضلم الكشافة والقنديل
مخروته قامتو لاهو طويل ولاهو قصير
يعرف لى شيوم القدلة والخنتيل
يترز تقول ريلا طلبو مقيل
من دى الصبرة اخير الجرسة راسا عديل
------------------------------------------------
شيوم - الشويوم السفر القاصد وجميع الشعراء يذكرون هذه الكلمة شيوم وابدا مربوطة بالمحبوبة والعاشق الذى ينزح لديار المحبوبة بشخصه يقال عليه شيوم .
الخنتيل :- ضرب مشى الترف والدلال عند النساء
يترز : سير الخائف المتردد وعند الشعراء محمدة للمراه


تحياتى
ابو مصطفى

الشاعر ودنعوم وتايته فى ارض الشايقية شغالين ومن زمان ولى يومنا دا الشايقية يحبو السلطة حب شديد والشاعر شغال فى العامراب وهى فى القرير وعندها عمدة ومن ذلك الكبير فى العامراب شرد ودكنيش جدع المفضض والمهم فى الموضوع العمد بصراحة اينما حلو بناتهم سمحات لانهم بختاروا صاح ؟؟؟؟ وفى مرة الشاعر لمح واحدة من بنات العمده فى العامراب بالقرير وعاد سوى القو للصباح :-----------

انت السر دار باشا اللواء العام
البشدو ليهو الخيول ويبروه خدام
الكسر جيش الخليفة من البلد قام
فاطر الجاب دار تواى يمشى اربعة ايام
الصبح كبريها كلو مسقى هدام
وين جناب بيتا البعيد من جده قدام
التزابا التجار فيه لى بندر الشام
اللبيب كاتلاه ايدا ليها اكمام

------------------------
السر دار باشا : القاب تركية
دار تواى : وادى فيه سيل عنيف جدا
التزابا : اى تنافس فيه
اكمام : زينة قد تكون من العاج او الفضة


تحياتى
ابو مصطفى

وقد اوردها الطيب محمد الطيب فى ديوانه تراث المناصير
شكرا ابو مصطفى على الابداع المتواصل

ودنعوم وتايته متوجهين الى دنقلا والمحس حيث العمل فى الشركة الخضراء ( الطين ) وبعدين فى بابور بحر من كريمه حتى دنقلا شغال والان ماعارفو وقف ام لا المهم النقل النهرى وهناك قابل واحدة وعجبتو وعلى ما اظن من الرطانة وكل النوبة من محس ودناقلة وحلفاويين يرطنوا ؟؟ وقال شاعرنا :----------


سافرنا يوم الخميس فى البوستة جينا
لقينا القريش الحر النضمو بالرطينا
المشيهو البقعة هدا اتنعشر مدينا
البابور راكز فى المينا
كلامو الا يفهموا المترجعينا
قالو نبى الله الخدر ماسى فوق جبينا
شاحد المولى يطول فى سنينا
التقول يا حليلو اول كان بجينا

تحياتى
ابو مصطفى

وانا كمان عندى كدى يا ابو مصطفى
انا سألت العلماء والمتفلسفينا
وسألت اهل الدلائل والسكينه
وسألت البفهموا الناحيه ويكونوا منجمينا
قالو لى البت السكروته والاخلاق حسينه
البت مديبيره القدم وماها السمينه
والبت جماله يفوق على تاجوج خمسينه
ياسماحت قدلته وتلت يمينه
داير عميرى يزيد سنينا
عشان نموت قدامه تبكى تشرفينا
تقول حليلو حليلو اول كان يجينا

والله ياسلمان ناس الجزائر مرقوا وبانوا ود الاخت وود الاخو ماقصروا كلامهم يسوي الشعره ويخلي الزول يطول شبرين الله يخليكم ويطول في عمركم وبيكم تفتخر المناصير وكمان خلف الله كباشي اموه من اندنا يعني نحن اخواله عشان كدي طوالي يسلم ويقول لي ياخال اه ياسلمان وخالد فكروا واعيدوا التفكير في نسب ناس الجزائر وحكايه الكجاج الظاهر أنعكست غايتو انا مستعد ان اثبت باالدليل العلمي ان اول ظهور للادوات الموسيقيه في العالم كان في منطقه بوني ولقد سبق وتناولت هذا الموضوع من قبل وان ظاهره الطرب والفن موجوه في الجينات وتتناقل منذ الاف السنين ونحسها اليوم في نادر وأبو مصطفي الظاهر جدهم كان صاحب الالات الموسيقيه المكتشفه والتي جزءمنها الان في المتاحف العالميه دايرين نوثق منذ هذا التاريخ وحتي عام 6000 سنه قبل الميلاد يعني قبل 8الف سنه هذا الابداع متوارث الشاعر ود نعوم سمعت به اول مره من شخص شاعر ومحب جدا للشعر وصوته جميل لكنه لايحب الظهور ولقد سبق وتحدثت عنه وهو الباشمهندس عبدالله علي العطا وهو عم نادر ومشهور في سور بأسم عبيد ولقد سمحت الفرصه بأن أسافر مع عبدالله ونادر في سفريه واحده للبلد وكانت المجادعات الشعريه بينهم وبأصواتهم واستعرضوا كميه كبيره من شعر ود نعوم والرضي والحداد وغيرهم لمده ثلاثه ساعات متواصله و عبدالله عنده ملكه الالقاء وباالمناسبه هذه موجوده في اهل عبدالله طبعا كان المرحوم والد نادر والان نفس الذاكره القويه موجوده عند علي العطا وهو ابن عم نادر وابن اخو عبدالله علي العطا الغرض من هذا الحديث التركيز علي عامل الوراثه وموضوع الجينات ارجع واقول ان ود نعوم وحسب محدثي عبد الله علي العطا الذي شاهده وهو يغني وباالامس كان ان تعرض له باالحديث في رحله المنتدي عمنا علي المشهور بأسم ود العباسي من أوس وفي الختام ارجو من الشباب الاجتهاد والتوثيق لهذا التراث

الاخ ابو مصطفى لك التحية
على حسب علمي ان قصيدة القمر الظهر من كلمات الشاعر علي ود الطرشان وهو من شعراء بوني. وهذه قصيدة اخرى للشاعر ود نعوم اخذتها من احد الذين زاملوه في الطين وقد ذكر انه كان يجمل القعدات بالالحان وطمبوره الذي لا يفارقه.
نهار قمنا مسافرينا
جفل وانضارى في الطينا
وعينيهو بكن علينا
خطاب ردو القالو لينا
سفر عافي تمش تجينا
في ود النورة جينا
لاهو اشو لو مدينا
وبي ده الحال يسلينا
انت يابندة الرحمة وينا
ناديها والتجينا
وتشيل الكاس وتدينا
نحكيلا الغربة شينا
وفارقنا شراب سكينا
البت شلوخا مجاري ودعينا
وقرينا القومتو منساوي
من كتو على الحصايي
محل النيل كجر لاوي
ان قعد حار والقلب غاوي
ان مشيت خايف من حكاوي
خايف اقع في قصة معاوي

شكرا ودكباشى
للشاع ر ودنعوم قصائد كثيره والحمد لله انت ادليت بدلوك لكى نتحصل على المفقود من شعرنا
احاول ان اتذكر معك بعضها
فمثلا
انتى يابنده الرحمه وينا
خزينه بنك القضينه
وايضا
وفارقنا شراب سكينا
شماتل اترم فى يمينا
البت شلوخا مجاري ودعينا
جزيرتا كاكا وزينا
فوقه من عين الحاسدينا

شكرا المبدعين ابو مصطفى --نادر--هاشم --والنجم الصاعد بسرعة الصاروخ عبد الحليم--
هنالك الكثير لاشعار ود نعوم غير موثقة وقيل هنالك الكثير غير محفوظ --وبهذه الطريقة يمكن ارجاع او استرجاع الكثير --ولكن مطلوب ايضا التوثيق من كل الذين عاصروه--
والقصيدة الاخيرة--(اللينا --) هل يكون هذا البيت منها :
نحنا عودنا اتحنينا
والبكا مو جايبو لينا
واصلو--
شكرا هاشم --فعلا ناس الجزاير ابدعوا واخرجوا الدرر --واصلا معروف عنهم حدة الذكاء -ولكن عيبهم بس السخونة الزايدة--والسكين والعكاز--

تحياتى لكم الاخوان ابو مصطفى .نادر .باشمهندس هاشم .سلمان .ودعونى أرحب واشيد بقريبى عبدالحميد الذى اعتبره اضافة حقيقية لهذا المنتدى وارجو ان يقوم بالتوثيق لشعر جده على ود كباشى وعمه خلف الله . وانت عارف يا عبدالحميد القصيدة التى نزلتها لودنعوم ملحنة جاهزة ,اتمنى ان ترسل للقامة عيسى بروى ولك خالص الود والتقدير

تحياتى للاخوة المبدعين الطيب ---نادر-- عبدالحليم كباشى
جميعكم ادهشتمونا بماتدخرون من شعر اجدادنا
ابومصطفى دهشتكم تتمثل فى طرح القصيدة ومناسبتها وشرح بعض الكلمات
كاننا فى سرد روائى يحرك المتلقى بالاستمتاع والمتابعة اللصيقة
ولكم التحيات الحارة مرسولة بى طيبة العبق