ما نقدمه من مواضيع لا يرقى لمستوى القارئ

حسب معطيات علماء النفس.. وحسب قراءة النفوس لعلوم السادة المتصوفة واصحاب الطرق. أن الشخص شديد الذكاء لايكون سعيداً ابداً.. ولحظات شقائه اكثر من لحظات سعادته.. إلا أن لهذا الموضوع معالجة.
والسعداء هم الاقل حظاً في الذكاء..( عشان بيصهينوا من الحاجات) أما الذكي، كل حاجة عايز يفلفلها ويبحتها، وينقرشها، ويمنطقها، ومعظم الحاجات التى ينقاشها في نفسه ويحب أن يمنطقها، تابى أن تتمنطق له.. وهذه المناقشة الفاشلة داخل نفس الشخص الذكى، تولد فيزيائياً بعض الأحماض التى تجلب الشقاء والتعاسة.. الفرقة بين الممكن والمستحيل.. الاسف. الحسرة.. الندم
ولذلك الأذكياء اقل حظاً في السعادة.
برضو ما وجد الذكاء إلا وجدت معه هذه الخصال
1 ذكاء مصحوب بتردد
2 ذكاء مصحوب بوهم
3 ذكاء مصحوب بكدر
4 ذكاء مصحوب بغم
5 ذكاء مصحوب بهم
6 ذكاء مصحوب بحزن
7 ذكاء مصحوب بضجر
8 ذكاء مصحوب بعذاب ضمير
9 ذكاء مصحوب بحقد وكراهية
10 ذكاء مصحوب بملل
11 ذكاء مصحوب بعواطف عارمة ومسهبة
12 ذكاء مصحوب بخوف من المجهول.( التوزع بين الاسف على الماضي.. والاشفاق من اللحظة الحاضره والخوف من المستقبل)
13 ذكاء مصحوب بقلق
14 ذكاء ملوَّن
15 ذكاء ملتوى
16 ذكاء مخلوط بمكر وخداغ وغش
17 ذكاء موظف لمصلحة الأنا.. الأنانية السفلى

أحسن وحدي من ديل شنو؟
إنو يكون عندك ذكاء مخلوط بي شنو؟
أو ضع مقارنة عن حالتك
كل زول بيعرف نفسو
ذكاءك مخلوط بي شنو؟من ديل!
والله أنت تتمنى تكون غبي كان الحكاية بقت كدة؟

آي يا الهادي تعال راجع
بحتاجلك في المواضيع الزي دي!
عشان كلامك بيفتق عندي مواضيع ويذكرني بيها ويساعد في بلوره الهدف

يمكن يدور في خلد أحدنا كلام ويقول في نفسه او كتابة( شوف عليك بالله. هو القارئ شنو كمان! لغاية ما بنرقى لمستواه. هو ذاااتو ليش ما يتحول من قارئ لكاتب!. يكتب الفي مستواه)

كتاباتك ياباشمهندس كلها في الصميم وكلها هادفه وبناءه والمنتدي كدا جميل والقراء متأكده كلهم سعيدين شديد بما قدم تقبل مروري

تسلمي بنتنا عازة..

كشفت ولقيت نفسى ما طالع من روشتة هذا الطبيب





تحياتى

ابو مصطفى

ذكاء اهلنا ديل طبعا ذكاء مصحوب بتردد

لو ما التردد كان تمتعنا بكتاباتم

يديك العافيه استاذنا صديق

م

ابومصطفى
ها ها ها يازول يا ظريف

البحيرة تلد وتبكي والدليل علي ذلك انه قاعدة تزيد و انها تلد السمك ده قاعد يجي من وين
الرد ... والله يا فلان موضوع رائع ودائما تفتح لينا مواضيع شيقة
يرد اخر انا اختلف معاك البحر يبكي احيانا مش دائما ويبيض و البيضة يتكون منها السمك .
+بعض المواضيع فعلا رائعة والردود عليها بعضها ركيك واخر يخشي من الراي المخالف
+بعض الناس ترد علي الراي المخالف بعنف
+بعض الناس ترد من اجل المشاركة فقط وتسجيل حضور من غير ما تفكر فيما تكتب
+بعض الناس تسلم للراي بمجرد ما قاله فلان
+ بعض الناس ترد علي المواضيع بانطباع شخصي وفكرة مسبقة
+بعض الناس يعتقد انه منصوري اكثر من الاخرين
+بعض الناس تقرا فقط ولاتشترك في النقاش او فتح موضوع جديد
+بعض الناس نعذره لانه ليس لديهم وقت
+بعض الناس مخلي شغلها و قاعدة في المنتدي

يا ابوحنة هووووي الكبر دخل ونضمك بقي ما هو زي زمان كدي اسال العيال وامهم وعاين لهم وكيت تنضم بيستمعوا ليك ولا مرة مرة يعاينو ليبعض ويحتو ييدن فوق خشمن

لسه يستقوا معرفتهم منى يا ابو أحمد..
وين ياخي الكبر. نحن ولاد البارح.. الكبر بيني وبينو... خوى أم سيال والتكارنة.. وبحر المهوة وبحير الحارة..وجزيرة ( دنكو).. وسبعة بحور تاني!
كتار الاكبر منى في المنتدى ده!
اعدهم ليك والله مافي داعي يا ابو احمد

يا ابوحنه

والله بينك وبين الكبر بحر المحيط وكتاباتك مسلية ومفيدة وصدرك واسع وثقتك في نفسك التي اعرفها منذ عشرات السنين زادت قوة

تعليقي السابق قصدت منه المداعبة والتاكد من ان شخصيتك التي اعرفها لم تتغير

والحمد لله

برضو المسالة فيها تدريب للشباب ولاخرين

متعك الله بالصحه والعافيه

العافيه درجات عمنا صديق

لولا أختلاف الناس لبارت السلع

أبو احمد كتب ... يا ابوحنه

والله بينك وبين الكبر بحر المحيط وكتاباتك مسلية ومفيدة وصدرك واسع وثقتك في نفسك التي اعرفها منذ عشرات السنين زادت قوة

ده من ذوقك يا ابو احمد..
عااااارفك تعرفني يا ابو احمد.. لكن ما بسعلك عاد... لامن تجي براها..

.... ساري الليل كتب ....العافيه درجات عمنا صديق

صحيح والله يا ساري الليل.. مالك قللت كتاباتك الحلوي ديك مشغول والله شنو؟
ياخي زمان إنت يا ساري الليل وصفتا ليا الزمارة بتاعة قارسيقة القصب جنس وصف؟ لامن أنا اندهشتا..
خاصة لما قلتا ليا.. ما كل قارسيقاي بي تبقى زمارة قصب؟
صاح
القارسيقاي الـقـَـفـِّي ما بتبقى زمارة..

انت يا ابوحنة المابعرفك منو

اول حاجه كلامك جميل جدا وهادف يا باشمهتدس
اصبت لب الموضوع
فعلا بعض الاحيان نحسن ان المنتدى اصبح روتينى وممل وطبعا الروتين قاتل
وبالرغم من كثره الاعضاء الا اننا نجد المشاركين قليلين جدا وما كلهم بشاركو بأبداء الرأى
اهم حاجه للمواضيع المنقوله نحبذ تصاغ فى شكل يجذب القراء وتكون فى شكل نقاط لانو الواحد ما طوالى بالو رايق يقرا ليهو مواضيع طويله عايز يقرا المختصر المفيد
بالنسبه لبعض الردود الزول بحسها تقليديه او فيها نوع من المجامله ( يعنى اللهم انى رديت وخلاص )
دعونا نمضى مع كل يوم
جديد، نفتتح مغاليق المجهول، في أن نجعل هذا المنتدى دائماً هو الغاية
المنشودة لكل منصوري ، رغم الصعاب، ورغم عدم مقدرتنا على تلبية مطالب
أصحاب الذوق الرفيع.

والله يا عمنا انا ما في حاجة غايظاني غير الجماعة الكل ما تدخل المنتدى تلقى اسماهم تحت
وما تلقا ليهم ولا كلمة عوافي او مبروك او حتى التعازي
حاجة غريبة جدا ... يعني قاعدين يسووا شنو ؟؟؟

إن شاء الله يا إقبال الناس البيكتبوا يقدروا يرضوا جميع الاذواق..
أبو هشام.. شد حيلك في الكتابة وابتكر حاجات ترضي القارئ .

لانو الواحد ما طوالى بالو رايق ...إقبال كتبت

ندعو لليوم يا إقبال البي يكون المناصير كلهم بالهم رايق وفايق.عشان ينجزوا

اقبال كتب:اول حاجه كلامك جميل جدا وهادف يا باشمهتدس
اصبت لب الموضوع
فعلا بعض الاحيان نحسن ان المنتدى اصبح روتينى وممل وطبعا الروتين قاتل
وبالرغم من كثره الاعضاء الا اننا نجد المشاركين قليلين جدا وما كلهم بشاركو بأبداء الرأى
اهم حاجه للمواضيع المنقوله نحبذ تصاغ فى شكل يجذب القراء وتكون فى شكل نقاط لانو الواحد ما طوالى بالو رايق يقرا ليهو مواضيع طويله عايز يقرا المختصر المفيد
بالنسبه لبعض الردود الزول بحسها تقليديه او فيها نوع من المجامله ( يعنى اللهم انى رديت وخلاص )
دعونا نمضى مع كل يوم
جديد، نفتتح مغاليق المجهول، في أن نجعل هذا المنتدى دائماً هو الغاية
المنشودة لكل منصوري ، رغم الصعاب، ورغم عدم مقدرتنا على تلبية مطالب
أصحاب الذوق الرفيع.

نحي فيك هذا الحماس زوبا

أختفيت فتره طويله , ومع ظهورك لاحظت انك ذو مشاركات فاعله وهادفه

أطال الله عمرك وزادنا من فيض كتاباتك الجميله

الصدوق أسم الدلع ( تعرف ياصديق عندنا عثمان الحسن عندو بنت كان سماها جيهان وهذا اسم جديد كان علي المناصير او حتي اكون اكثر دقه في سور وطوالي الجماعه سموها الجهون وكان تعليق بعض الظرفاء اه خربتو الاسم هسع انا ماداير اكون خربت الاسم

صراحه نحن مقصرين او اقول انا مقصر في الفتره الماضيه وذلك للاسباب التاليه

كلفت باعداد ورقه في ورشه اقيمت الاربعاء الماضيه في دار حزب الامه تتعلق بمشاكل مهجرين السدود وكنت انا وزميلي عبد العاطي من جانب المناصير انتهت الاربعاء الماضيه ولقد كانت هناك اوراق اخري للحماداب وامري

2 بخصوص العمل انشغلت بموضوع هو الشاغل هذه الايام المتمثل في ارتفاع العمله الصعبه وتاثير ذلك علي الاستيراد وعدم توفر العمله الصعبه في البنوك ولي بضاعه في بورتسودان ودخلت الطوه رغم اني دفعت قبل شهرين دفع مقدم الا انهم تحججوا بعدم توفر العمله ولابد من كتابه تعهد بان تدفع لهم باالعمله الصعبه من مواردك الخاصه وده اسم دلع للسوق الموازي

3- كان هناك موضوع معرض الكتاب ولي شله ظريفه نمشي يوم بعد يوم

وفي الختام حاضرين يا صديق ان نجتهد ونبتكر ونقدم شيء يرضيك ويرضي الاخرين

ابو هشام كتب: والله يا عمنا انا ما في حاجة غايظاني غير الجماعة الكل ما تدخل المنتدى تلقى اسماهم تحت
وما تلقا ليهم ولا كلمة عوافي او مبروك او حتى التعازي
حاجة غريبة جدا ... يعني قاعدين يسووا شنو ؟؟؟

كل زول نقدر ظروفه الخاصة بعدم المشاركة

ولكن واصل انت ابوهشام ولاتنقطع

والسلفيه خبرها ايه (انشاء الله اتحلت )1

صديق عبدالله علي أبوحنة كتب:

.... ساري الليل كتب ....العافيه درجات عمنا صديق

صحيح والله يا ساري الليل.. مالك قللت كتاباتك الحلوي ديك مشغول والله شنو؟
ياخي زمان إنت يا ساري الليل وصفتا ليا الزمارة بتاعة قارسيقة القصب جنس وصف؟ لامن أنا اندهشتا..
خاصة لما قلتا ليا.. ما كل قارسيقاي بي تبقى زمارة قصب؟
صاح
القارسيقاي الـقـَـفـِّي ما بتبقى زمارة..

عمنا صديق ماعدمناك ابدا

دائما منور المنتدي وفي شتي اقسامه

ربنا سهل ليك الكتابه والمشاركة في المنتدي في ساعات الفطور

وكما أشرت في موضع انو الناس بتفطر وتشرب الشاي

وانت تتناول الفطور ساندوتش وانت تشارك في المنتدي

والناس بتشرب الشاي وانت تستبدل ذلك بالمنتدي

طبيعة العمل عندنا نحن لاتسمح بالمشاركة في المنتدي الا في بعض الاحيان من الشهر تلقي فرصة او فرصتين

وكل المشاركات تتم في المنزل بعد نهاية دوام العمل وفي بعض الاحيان خصما من زمن الحكومه

مما أضرنا الي اعاده ترتيب الاوراق بالتساوي والعدل

موضوع مهم جداً يا باشمهندس.. وفي تقديري المواضيع جيده والمشاركات والتعاليق لكن المنصوري بي طبعه حار شوي وانطباعي وينطبق عليهن قول الاعرابي الذي اتاه أحد المحسوبين علي التيار السلفي وقاله ما تحلف بي حسن ود حسونه دا..فقال الاعرابي دا صالح وبي جاهو يدخلنا الجنه فهاج فيه السلفي وقالو حسن ود حسونه دا زاتو طاغوت وما بيدخل الجنه..فنهض الاعرابي وهو يقول: جنتن ما يدخلها ود حسونه نحن زاتنا ماني دايرنها !!!

الأخ المهنس صديق لك التحية وإن شاء الله ما نعدمك ومثل هذه الكتابات لا تصدر إلا من شخصية فذة الأخ عبدالواحد فند الموضوع ويااخ صديق كما ذكرت لكم سابقا في موضوعي عن القراءة والمعرفة قلت الذي لا يقرأ لايكتب وأقصد بالقراءة كثرة الاطلاع وفهم ما يقرأ الزمن ده الناس بقت تقرأ الصحف وبعض صفحاتها وتصفحون الانترنت معلومت وهاك يافيس بوك وغيره جتى المتصفحين مجرد دردشة أين قراءة الكتب والمقالات التي كان يحملها أصحابها حتى إلى أماكن عملهم حيث يكون القارئ حريص على استيعاب ما قرأه وتلخيصه كذلك الآن أوعية المعلومات تلونت أشكالها وتعددت مصادرها وقل اسيعابها والقصة واضحة ياصديق وذلك مثل طبيب هذا الزمت الذي أصبح يشخص المرض من نتائج الفخوصات فقط دون الاستفادة من التجارب السابقة وتكوين خبرة أي قالب يضع فيه المعطيات وياحليل الطبيب الذي كان يستفيد من خبرته في التشخيص وتحضرني هنا قصة الدكتور عبدالله محمد سليمان طبيب الباطنية الماهر الذي اتصل به نسيبه من السودان وهو يشكو من كذا وكذا فقال له اذهب إلى طبيب فلان وقال لنا أن نسيبه اتصل به وأنه شخص مرضه بالسرطان حمانا الله وفعلا قد كان ذلك. أذكر هذا لأذكر بأهمية القراءة لتكوين قاعدة وخليفة للاستدراك واستيعاب ما يقرأ حتى نستطيع أن نساهم بما عدنا في هذا المنتدى والحكاية مثل الصدقة التي تنمي المال فالكتابة تنمي الذاكرة ولا تنقص منها شيئا وإلى المزيد. ولكم شكري وتقديريا

أميرة قالت ذكاء اهلنا ذكاء مصحوب بتردد

هاشم على الجزولي
فقدناك في الأيام الفاتت
الحمد لله وضحتا عذرك وظهرتا
تسلم على المرور والإضافات

الأخ صحفينا القدير
عبد الواحد. إضافات جيدة في الاتجاه

قصتك دي يا شيخ محمد حبيب ضحكتني لامن دمعتا..
ها ها ها
ياهو حال أهلنا عاد..
ود الدومات
ومصباح
تشكروا على المرور بي جاي

الباشمهندس لا تطش شبكة انا مش صحفي ولكن عندي شوية عباطات احب افرغها في المنتدي ,لكنك امير المنتدي ...

أيوة خلاص... أشعة.. رجعت الشبكة يا عبدالواحد!
بس كتاباتك جيدة.. زول متمرس

فتح الرحمن عبدالرحمن وراق كتب:انا اكتر شى مزعجنى

طريقة تصفح المنتدى متعبه

وما زى بقية المنتديات

ياريت تجدو ليها حل

اختلف معك فتح الرحمن

فأول دخولي افتح متصفح المشاركات الجديده وأتابع ماهو جديد وأشارك بما تيسر لي

ثانيا اقوم بالدخول في متصفح مساهماتي وأشوف الرد عشان الزول يقوم بالواجب

ثالثا المشاركات التي لم يتم الرد عليها

هكذا بسهوله جدا جدا وكمان الواحد عندما يجد مزيدا من الوقت يفتش في الحاجات القديمة ففيها ماهو جميل منسي

لك ودي

بصراحه منتدي المناصير
من اجمل املنتديات التي رايتها
الشي الموسف ان عضوية المنتدي كبيره
ولكنهم لايشاركو ولو بالقليل
ارجو من الاعضاء ان يشدو حيلن شوي
وخاصه في فتره العيد لملئ الفراق الذي يتركه المسافرون الي البلد
الي حين العوده
احتمال الشبكه في البلد تكون رديئه
اوانشغال الناس بالمناسبات

هو المنتدى سهل التصفح..
بس كمنتدى مجاني ما عليه رسوم للشبكة أو للجهة المستضيفة، يبقى بعض الحاجات في عمل برنامج( الوييرد) وبرنامج( الإكسل صعبة عليه أو غير ممكنة.إلا بمحاولات أخرى مستميتة وللمتمرسين. يمكن حكاية( كط وبيست) من موقع آخر الى هنا مباشرة على الصفحة الأولى اللي إنت ناوي تعملا موضوع صعب..
برضو بخصوص لزق الصور
يصعب لزق الصورة مباشرة في الصفحة الأولى مع موضوعك طوالي، كود التحميل المباشر طوالي مع الصفحة الأولى غير فعال أو لايعمل أو غير موجود.. هذه الاشياء توجد في برنامج ( وييرد) يسموها ( ريتش تيكيست) تستعين بيها على كل شئ في صفحة الوييرد الكتابية اللي إنت جهزتها..
بعدين الصور ذاتا
طبعاً حتى الآن غير ممكن أن ترفع صورة من سطح شاشة كمبيوترك مباشرة الى موضوعك في المنتدى.. لابد من رافع مستضيف على ظهر الشبكة العنكبوتية( براوسار) تحمل عليه.. ونحن هنا عندنا ( براوسار في الموقع للصور..
والبراوسار نفسه في اي موقع على الشبكة .. المضاف هنا في المنتدى أو البراوسار في اي مكان عندو شروط معينة وقوانين..
ومن شروطه الفايل الكبير للصورة وغيرها لايقبله.خاصة موقع تحميل المنتدى هنا
يعني لازم صورتك العايز ترفعا .تكون أقل من 200 كيلو بايت ولاتكون بالميقا بايت.. ممكن لغاية 900 كيلو بايت تنزل معاك ولكن يصعب فتحها للمتصفح ولاتنزل إلا بعد زمن طويل والشبكة في السودان دائماً بطيئة.. عشان كدة الناس بزهجوا غالباً من فتح ملفات الصور والأغاني..
لو عايز صورتك المحملة في موضوعك تنزل سريع للمشاهد.. صغرها خليها اقل من مائة كيلو بايت.. هنالك برامج لتخفيف الصورة او الصوت مرفقة مع برامج الكمبيوتر اي كمبيوتر..خاصة برنامج( مايكروسوفت أووفيس بيكجار مانيجار)وتطلب منو تصغير الحجم وتخليها صورة( ووويب.. صغيرة أو كبيرة)أو تقول ليهو ( صورة ضوكي مينت ) تحفظها تاني مرة راجعة تلقى حجمها تصغر شديد من ميقا بايت الى كيلو بايت..
نعم هنالك على الشبكة مواقع تقبل تحميل كتب بي حالا.. بعضها بالإشتراك.. وبعضها مجاني . لكن المجاني عيبو. يحمل ليك كتابك كامل لكن يحاول يستغلك.. ويرسل ليك لنكات مواقع ما راكبة عدلا.عشان تشوفا أو تنشرا.. وكل ما يفتحوا الناس برنامجك أو أغنيتك أو صورتك أو كتابك الذي حملتو عندو يجدوا عند الفتح دلائل ترشدك الى مواقع ما راكبة عدلا..
برضو من عيوب البراوسار..موقع تحميل الصور عندنا في المنتدى! أن مدة إستضافته للصورة المرفوعة او لينك الأغنية مدة حفظو ليها بسيط. شهر. شهرين.. وبعد كدة يمسحا.. وتلقى البوست بتاعك فاضي بدون صورة أو اغنية
برضو حكاية أنت تحمل صورة ولاتظهر مباشرة مع موضوعك أو تظهر مصغرة ولكن كبيرة لازم تظهر في صفحة تانية دي مزعجة شوية للكاتب والقارئ..
في المواقع المشترنها بي قروش اي شي يظهر معاك طوالي بالحجم الإنت عايزو
مثلا انا عضو في سودانيز اون لاين
مافي هذا الكلام هناك.( ريتش تيكيست) يظهر معاك يدلك على اي عمل إنت عايز تعملوا من صورة من صوت من ملفات كتب من غيرو .. ويظهر معاك في الصفحة الاولى طوالي ويظل محفوظاً لمدة 50 عام لأن الموقع هناك عليهو رسوم سنوية للشبكة المستضيفة..
لكن يمكن أن نقول أن موقعنا هنا جيد وسريع في الفتح.. وساهل
لكن في العمل التقني الدقيق لا
لكنه مكفينا الآن طالما هو سريع الفتح
لى قدام ممكن الناس يفكروا يعملوا شنو!.
صديق عبدالله علي أبوحنة
كبار الشخصيات









عدد المساهمات: 2874
نقاط: 10606
تاريخ التسجيل: 14/07/2010





.

معقول كدة يا ابوحنه

انت رطانة الحلفاويين اتعلمتها وين لامن تشيلنا القفة الكبيره دى

ها ها ها
أبو احمد
نحن قلنا شدوا حيلكم شوية في علوم الكمبيوتر، خاصة الجيل الجديد ده
لأنو ما راح يقدر على الأعمال الشاقة الكان بيعملوها أهلهم زمان.
خاصة بعد الإنفراجة الكبيرة كلنا راح نعود لمحلية البحيرة..
وقتها أولادنا
راح يربطوا الحمارة بالكمبيوتر
وبناتنا راح يحلبن العز بالكمبيوتر وكدة
لكن دكتور مصباح قال تاني مافي حمارة
الحكاية بقت بالماكنات يامها.. وسزوكي
طيب.. يا مصباح
يدوروا ماكينة سزوكى بالكمبيوتر
ويجيبوا العشاء في الخلوة للضيف بالكمبيوتر
عشان كدة التقنية الدقيقة في الكمبيوتر يجب تعلمها يا ابو أحمد..

سمح يابوحنه

الله يقدرنا علي خشمنا

والله يجازي الكان السبب

طبعا يا ابوحنة اهلنا زمان بنتظروا زول يجي يقرالم الجواب

اظنها دا تبقي علينا

أبو أحمد
( الله يقدرنا على خشمنا)
دي كانت تقولا طوالي واحدي جارتنا في حلة الحنانين قبالة شري...
تقول الدايري تقولو كلو ن وتقطع في الناس ، تنفشهم نفش.. ما تخلي فتاه والله مرة معرسة، بعد كدة تقول( الله يقدرنا على خشمنا)
كلمي منصوريي طاعمي او جملة ذكرتنا بيها يا ابو احمد

الجواب يا ابو أحمد موش ينتظروا زول!
هم يبادروا ويركبوا حمارة وقد يمشوا لى ولد يقرا في حلة بعيدة عنهم..
المرة لمان ولدا يدخل المدرسة تفرح بين جاراتها في إنو ولدا أغنى الحلة في أن تمشي تفتح الجواب في حلة تانية
شوف يا ابو احمد نحن زمان في أولى إبتدائي نقرا الجواب.. كل الدفعة تقراهو موش الطلبة الشاطرين بس!
مجلات كان نقراها.. ناس مجلة الإذاعة وعمك تنقو والصبيان دي كلها نقراها...
ولمان جينا سنة تانية إبتدائي إنتهينا من حاجة إسمها الكلمات الصعبة
همزة القطع وهمزة الوصل وهمزة على نبرة وهمزة الواو والمثنى والمؤنث والمذكر وغيرو.
حكاية اللؤلؤ يتلألأ في البحر الأحمر
أو السموءل
أو قالت أم لابنها
أو قراءات
وهكذا
بالله عليك الله هسي دي في ناس في الجامعة يغلطوا..

طبعا يا صديق في سؤال بيسالوه الناس الكبار

اول ما تلاقيه يسالك انت ود منو؟ بيتقرا وين؟ اها مابقيت تقرا الجواب؟

الغريبة انو الجواب يتلموا كل الناس ويحضروا قرايتو

يا صديق باقيلك ولاد الزمن ده بيصدقوا كلامنا ده

داك زمن المحنة الصرفة الخلابة... يا أبو أحمد
هسي دي شوف عيني
الواحد يعاينوا فيهو يحتضر ويلعبوا في الكتشينة جنبو.. وبناتهم يشاهدن في التلفزيون!!! بي كهرباء بطارية.. وهو يحتضر!!!
دي بس شوف عيني!
في واحدة من إجازاتي شاهدتها
جابوها من البلد مكملي الدم وعندها يرقان. بناتا يقرن في الجامعات..
هم بس مناصير يعرفوني .موش اهل يعني..
مشيت البقالة جبت فرخة كدة . وقلت للبت الكبيري جيبي منقد وولعت الفحم .كهرباء ما عندهم.وختيت الفرخة ديك قطعتها وفتحت شنطتى . شوية قرفة شوية هيل. حبهان. كدة رميتو فها ومعاهو بصلة. خليتن غلو شديد. وصفيتا الشوربة ومصرتا ليها فيها ليمونة. ونشلت اللحم داك حمرتو. وختيت لها منو..
البنات عليك الله عمو خلينا نسويها! قلت ليهن لا لا
اصلوا جوفي محرقني عليهن!
امهم راقدة وهناني وهن يتفرجن في المسلسل. أيوه حا يعرسا. لا لا مين قالك. فلان داك بيحبها قبلو!
لا هي عايزة الدكتور داك!
ماشفتيهو يوم التخرج قال ليها شنو!
وكده
طبعا رديت عليهن بي لطف..
قلت ليهن انا مشتهي اسوي لى أكله
وهن بيني وبينك يا ابو احمد
ما دايرات يفوتن مسلسلن داك؟
رديت عليهن بي لطف
جيل الزمن ده ما بيستحمل النقد..! ولا النقد الموضوعي
أها سويت ليها من الشوربة دي
ومصرتا ليها فوقا ليمونه
وختيت ليها من اللحيمات المحمرات ديك...
لسانا يلهج بالشكر وتبكي
تصدق يا أبو احمد!
بعد اكلت رقدت
قلت لى واحدي من بناتا ديل عندكم زيت سمسم في البيت
قالت لى ايوه عمو!
قلت ليها جيبيهو
اطرشي ليها كريعاتا ديل بي دهيني!
طرشتن
مع أن امهم صغيرة شديد. شعرا ده قايم وزول سرحو من اسبوع مافي!
سبيب اسود يا حلاتو وحلات طولو..

بس الهملي
والمناصير قالوا الهملي قدت عين البخت)
قلت لى أثنين من بناتا ..
تعالن سرحن ليها شعرا ده! وضفرنو ليها ضفيرتين.
وغتنها بي توبا ده!
والله يا ابو أحمد المرة دي
العافي دبت في أوصالها..
بس القدر.. ودعتهم وانصرفت الى مروي ثم الى المناصير..
بعد اسبوعين
جاء خبرها قالوا ماتت!
...............
الأجر يا ابو احمد موش مناترة وقوة وكثرة صلاة وكثرة تسبيح وفهلوة وشطارة وتشوف!
الله داير بي عبادتك شنو؟
ملكو تام
لاتنقصو ولاتزيدو أنت ايها العبد الضعيف!
الله عايز أنك من جراء عبادتك تكتسب أخلاق عالية
تقدر تتعامل بيها مع الناس الغبش المساكين زي ديل وتسرق خاطرهم السمح
ناسنا كانوا طيبين كدة زمان يا أبو احمد
عمك بابكوري أبو القامة حبيب بابكوري رحمه الله
كان يبني في ساريقة بعدين حبيب ده كان دابو معرس! يجدع ليهو في التبانة بتاعة الساريقة وتتفترن ما بتصلو هو فوق للساريقة.. انا كنت راكب حمارة خلف أبوي.. ومن فوق ابوي شاف بابكوري عند اهلو فوق ضهر الحمارة وسلم عليهو وبابكوري فوق ساريقتو؟
ضحك بابكوري وقال لى أبوي
حاج عبد الله.. شوف الولد ده اللقمة بتاعة الطين تتفترن منو ما هو قادر يوصلا لى فوق
بقا ليك يا حاج عبد الله لمان بوابير لستر ميريكان تاير دي تنتهي بوابير( دودس) دي بي تلطع ليها موية!
دودس: دي كان نوع بوابير أحمر كدة تشتغل بلا تبريد جابوها جربوها في اواخر السبعينات في المناصير ومانجحت وبقت تحرق وتركوها ورجعوا لى اللستر تلاتة بوصة وأربعة بوصة..
لستر يقصد الجيل القديم
ودودس يقصد بابكوري الجيل الجديد

يا ابوحنه ان شاء الله بناتنا وولادنا يقرو كلامك ده ويسوليهم دم

واحد عمنا من الحيبه غرب شاف رخرخة جيل الدودس وبالمقابل شاف التراكترات والدقاقات والحفارات والصنادل العائمه خاتين فوقها البابور يطلع وينزل مع المويه وبقي لافي كاشان ولا تقا ولا نوريق ولا دير بابور والخدمي بقت هيني

قام قل لهم والله يا ولادي قدر ما اترخرختو الدنيا ماشي مترخرخالكم

لكن يا ابوحنه خدمة الوالدين واجبة ووالله كلامك وعملك مع ام البنات الزرتهم خلى عيوني رقرقو

اهلي الطيبين بعد التحيه والاحترام
ابوحمد وقريبي صديق واصلو في هذا الحديث الطيب
لكن هنالك ملاحظه تحكوا وكانكم تبكون علي الماضي تفاءلواخيرا تجدوه انشاءالله وحواء المنصوريه علي خطي حبوباتها انشاءالله سواء في المدن او القري
لكما التحيه والتقدير